Read Biblia Mixe de Quetzaltepec Lucas 18 Bible Online

Lucas 18 - Biblia Mixe de Quetzaltepec bible

Lucas 18

¹Tääts ja Jesús tnimëtyäky mëët tu'uk ja ijxpäjtën wi'ix kyopkpëkyëtyën ko ja'ay wyanë tsyowë ets ka'ap kyumay kyutajëty.

²Ets y'ënäny: Jää ijty kajpnjoty tu'uk ja paye'epyë mëti'ipë ka'ap tsë'ëkën ja Tios ets naaxwiinyëtë ja'ay.

³Jam ma tääpë kajpnën tam ënäty näjyëtu'un tu'uk ja to'oxytyëjk ku'ookpyë, jä'äts ja paye'eyën y'amëtoopy ma ja nipaye'epyën, jä'ä ko ja myëtsip yajjotkëxyë.

⁴Kanaak'ok ojts ninëjkxy ja paye'epyë, je'eyëp ko ka'ap nyipaye'eyë. Ok ojts ja paye'epyë myäy tyäjy: Oyës yë Tios nkatsë'ëkë ets naaxwiinyëtë ja'ay nkatsë'ëkë,

⁵minës ya'atë to'oxytyëjk ku'ookpyë n'ëknipaye'ey ma myëtsipën, këtiipë nëkoo xyajjtokëxëtyës.

⁶Tääts ja Wintsën jyaak'ënany: Jëtu'un ojts y'ënä'äny ja ëxëëk ja'ay ka'apë oy pyaye'eyën.

⁷E yë'ë ënät ja Tios, ¿këtii jëtää tnipaye'eyëty ja jyä'äy mëti'ipë të twin'ixyën, mëti'ipë xëëny koots ja'amyäjtsëpën? ¿Wä'än jëtää jeky tyaj'ëwxitëtyë?

⁸Jëtu'un miits nëëmëtë ko ënätyë tpaye'eyä'äny. E yë'ë ënät ko yë naaxwiinyëtë ja'ay yë y'u'unk jatëkok wyimpitëty, ¿jyaak paatëp jëtää ja ja'ay mëti'ipë mëpëjktëpën?

⁹Ënät ja Jesús ojts nimëtyä'äky tu'uk ja ijxpäjtën ets tuk'ëwaanëja'any ja ja'ay mëti'ipë pyäjxtëpën ja wiinkëtypë ja myëku'uk ets nyäyjyawëtë ko oy tmëtuntë ja Tios:

¹⁰Nimäjtsk ja ja'ay ojts nyëjkxtë Tios mëkajpxpë ma ja mëjtsajptëjkën: Tu'uk ja fariseë ja'ay ets tu'uk ja yajkukëpäjtpë mëti'ipë Roma kajpn myëtuumpyën.

¹¹Ja fariseë ja'ay, tënääpy ja Tios tmëkäjpxy ets në'ix pa'at'ix, jëtu'un y'ënä'äny: Tios Teety, mijts yam nkukajpxëp ko ka'apës njëtu'unëty ijxtëm yë ja'ayëtyën, mëti'ipë mä'tstëpën, mëti'ipë ëxëëk ja'ay'ajtëpën, mëti'ipë ka'ap ja nyiye'etyëjk ëkë ja nyito'oxytyëjk twintsë'ëkën; ets ka'ap njëtu'unëtyës ijxtëm xiipë yajkukëpäjtpën.

¹²Ëjts mäjtsk okës n'ayuu'aty tu'ukpë sëmaan, nmoopy xëmë ja nkëpäjtënës, tu'kpëkyës xëmë njëpëky ma ja majk pëkpyën mëti'ipës npatyp n'ijxypyën.

¹³E ja yajkukëpäjtpë, jëkäm jam tyänë, ets ni kya'ijxë'ëky, je'eyë nyäkyätsykyupyë ets y'ënä'äny: Tios Teety, pa'ëyoowkës, pokyjya'ayës ëjts.

¹⁴Tääts ja Jesús y'ënäny: Jëtu'un miits nëëmëtë ko ja yajkukëpäjtpë ojts ja Tios kyupëkyë ijxtëm tu'uk ja wa'ats ja'ayën, e ja fariseë ja'ay ka'ap yajkupëjky. Jä'ä ko mëti'ipë ja ja'ay kë'ëm näkyumaayëpën naxym yajpëjkta'aka'any; e mëti'ipë naxym näpyëjktakëpën, yë'ë mëj'äämpy naxaanp.

¹⁵Tääts ja Jesús yajtuknimiiny ja pi'k ëna'k ets tkë'ënixajëty. Ko ja y'ijxpëjkpëtëjk t'ijxtë ets ojts twinkukajpxëtë ja ja'ay mëti'ipë ja pi'k ëna'k wyoowmiintëpën.

¹⁶Ënät ja Jesús ja pi'k ëna'k tyaxëy ets y'ënäny: Wä'än yë pi'k ëna'k xynyimintës, këtii xy'ëtuktë, jä'ä ko yë'ë jëtu'unpë ja Tios kyutujkën jyä'ä'ajtëtëp.

¹⁷Tëy miits nëëmëtë, pën ja Tios ja kyutujkën ka'ap tkupëjkë ijxtëm ja pi'k ëna'kën, nijëna'a kyatëkëty ma Tios yë kyutujktaknën.

¹⁸Tääts ja Jesús tu'uk ja kutuunk y'ënëmaayë: Oy yaj'ijxpëjkpë, ¿tiis ntunëp etsës npaatëty ja juukyajtën xëmëkyëjxmëpë?

¹⁹Ënät ja Jesús y'ëtsooy: ¿Tii ko m'ëna'any ko oy yaj'ijxpëjkpë ëjts? Tios yi'iyë tu'uk oy, ka'ap pën wiinkpë.

²⁰Mnija'ap ja Tios ja y'ënä'ämën mëti'ipë ënaanpën: ka'ap xyajtëkoyëty ja nyiwintsë'kën ja pëjkën ukën, ka'ap myajja'ay'ookëty, ka'ap mmäätsëty, ka'ap m'anta'akëty ets wintsë'ëkë ja mtaak mteety.

²¹Tääts ja kutuunk y'ëtsooy: Mutsknëm tääpë npatuunta'ayës.

²²Ko Jesús jëtu'un tmëtooy, tääts t'ënëmaay: Tap ja tu'uk mëti'ipë mtëkoy'ajtxëpën. To'kta'a winë mëti'ipë mmëët'ajtypyën ets xymyo'ojëty ja ëyoopëja'aytyëjk; jëtu'un xypyaatëty ja kuma'ayën tsajpjotmëpë ets pamiinkës ënät ok.

²³Ko jëtu'un tmëtooy, tääts jyotmaytyëjkëy, jä'ä ko kumeenyjyä'äy ënäty.

²⁴Ko ja Jesús y'ijxë mon tuk, tääts y'ënäny: Tsip ni'ik ets ja kumeenyjyä'äy tyëkëty ma ja Tios ja kyutujktaknën.

²⁵Nikë tsojk tu'uk ja jëyujk jëku'ux nyaxëty xu'uny jutjoty ets këtiinëm tu'uk ja kumeenyjyä'äy ets tyëkëty ma ja Tios ja kyutujkënën.

²⁶Mëti'ipë myëtoowtën, ojts tyajtëwtë: ¿Pën nitso'okantëp?

²⁷Ënät ja Jesús y'ënëmaayëtë: Mëti'ipë ka'ap ja ja'ay myäyën, yë Tios maayëp yë'ë.

²⁸Tääts ja Pedro y'ënäny: Tëës ja mpëjktä'äky n'ëxmajtsta'atë ets mijts të myajpatsoony.

²⁹Tääts ja Jesús y'ëtsooy: Tëy miits nëëmëtë, pën y'ëxmatsyp ja jyëën tyëjk, tyaak tyeety, myëkä'äx, y'u'unk tyo'oxytyëjk, Tios kyutujkënkyëjxm,

³⁰yë'ë wäänëni'ik ja Tios mo'ojanëp ja oyajtën naaxwiinyëtë ets ok ja Tios myo'oja'anyë ja juukyajtën xëmëkyëjxmëpë.

³¹Tääts ja Jesús ja y'ijxpëjkpëtëjk nimajkmäjtskpë tyaxëy ëpëky ets t'ënëmaay: Ja'amtë jam Jerusalén, ma tu'kë'ëyë tyuna'any jyata'anyën ijxtëm ja Tios ja kyäjpxynyajxpëtëjk ojts t'akajpxtën jyata'any ja naaxwiinyëtë ja'ay ja y'U'unk.

³²Yajkë'ëyakaanp ma wiink ja'ayëtyën, yajnëxi'ikaanp yajtukxi'ikaanp, yaj'ojaanp yajya'axaanp ets yajwinkutsujëjaanp.

³³Yajkoxaanp yajtsiikaanp ets yaj'ooka'anyë ja'ay; je'eyëp ko kom tëkëëk xëëw jyuukpyëka'any.

³⁴Tios të tyajkutuky ets ka'ap ja y'ijxpëjkpëtëjk tja'akyukëtëty tii ja Jesús tukmëmëtyakëtëp ets ka'ap tnijawëtëty tii ja Jesús jyatijpy.

³⁵Ko ja Jesús ënäty jam jya'tanë Jericó, jam tu'uk ja ja'ay wiintspë y'u'unyë tu'ujotm meeny y'ametoopë.

³⁶Ko ja ja'ay ja wiintspë tmëtooy ko ja ja'ay nimay nyaxtë, tääts tyajtëëy tii tuunëp jajtëp.

³⁷Ënät yajtuk'ëwa'anëy ko ja Jesús mëti'ipë Nazaret tso'onpën yë'ë najxp.

³⁸Tääts ja wiints mëk yujk'ënany: Jesús, David y'u'unk y'ok, pa'ëyoowkës.

³⁹Ja ja'ay mëti'ipë jëyëjp nëjkxtëpën, ojts t'ojtë ets y'amonëty. E yë'ë ni'ikyë tyëjkëy yaxpë jojkpë mëk: David y'u'unk y'ok, pa'ëyoowkës.

⁴⁰Tääts ja Jesús wya'ak'o'oyëy ets y'ënäny ets ja wiints tyajmintëty. Ko ja wiintspë myiiny winkon, tääts ja Jesús yajtëëwë: ¿Tii mtsojkpy etsës ntunëty?

⁴¹Tääts ja wiints y'ëtsooy: Wintsën, ijxpëkaanpës.

⁴²Ets ja Jesús y'ëtsooy: Ijxpëk, jä'ä ko mijts mëët'ajtyp ja mëpëjkën.

⁴³Ënätyë ja wiints y'ijxpëjky ets tpatso'ony ja Jesús ets tmëja'aw tkënu'kxyja'awëy ja Tios; ko ja mayjyä'äy jëtu'un t'ijxtë ojts ja Tios tmëjjaw tkënu'kxyjyawëtë.