Read Biblia Mixe de Quetzaltepec Lucas 2 Bible Online

Lucas 2 - Biblia Mixe de Quetzaltepec bible

Lucas 2

¹Jää it ja yajkutujkpë César Augusto ojts tni'ënä'ämë ets ja ja'ay ni'ëmukë yajjaaymyuktëty ma yë'ë yajkutukyën.

²Mëtëkokpë ja ja'ay ënäty yajjaaymyuktë jää ma ja Cirenë yajkutukyën jam Sirië y'itjotm.

³Tääts ja ja'ay ni'ëmukë ojts nyëjkxtë yajjääpyë ma kyukajpn'atën.

⁴Paaty ja José tsyo'ony jam Nazaret, Galilea y'itjotm ets ojts nyijkx Belén, Judea y'itjotm, ma ja yajkutujkpë David ënäty të myëxu'unk'atyën, jä'ä ko ja José yë'ë tyeety'ajt y'ap'ajt ja David.

⁵Tääts ojts nyijkx yajjääpyë mëët ja Maria, mëti'ipë ënäty mëët të yaj'ajaaymyukyën ets tmëëtsëënëja'any, u'unk mëët ja Maria ënätynyë.

⁶Tam ënätyëty Belén, ko ja nyixëëw tpaty ma ja María ja y'u'unk myëxu'unk'ata'anyën.

⁷Jam myiiny jyä'äjty ja y'u'unk mëtu'ukpë. Tääts ojts tpity tmotsy mëët ja wit ets tko'ky jëyujk ajë'kxënjoty, jä'ä ko ka'ap ojts ja jya'ajtakn tpaatë ma ja kajpnën.

⁸Jam kajpnpë'am ënäty ja ja'ay tkëwent'atë ja kyupixynyëty.

⁹Ajotkumonë ojts tu'uk yë Wintsën yë y'anklës nyänyikëxë'ëkyë ma ënäty jam yajpaatën ets ja Wintsën ja myëj'ajt y'oyajtën tyë'kxkeky na'ëwtityë ets tsyë'këtyë.

¹⁰Tääts ja tsajpjotmëtë kukäjpxy y'ënëmaayëtë: Këtii mtsë'ëkëtë, aaw ayukës oypyë nmëmiinpy mëti'ipë ja'ay ni'ëmukë tyukxoonta'aktëpën.

¹¹Tëë tyam myëxu'unk'aty jam David kyajpnjotm ja Yajnitsokpë, yë'ë ja Kristë, ja Wintsën.

¹²Yë'ë mtuk'ixkaptëp ko xy'ixtëty tu'uk ja mëxu'unk winmotsy winpity kyo'knë jëyujk ajë'kxënjoty.

¹³Tääts pyëtsëëmtë nimay ja tsajpjotmëtë kukäjpxy tsajpjotmëpë tsyoontën ets jam nyäpyëjktakëtë ma ja myëku'ukëtyën, mëti'ipë Tios myëja'aw jyääntyjya'awëtëpën ets y'ëna'antë:

¹⁴Mëjjaw jaantyjawë ja Tios nyäxy tsajpjotmëpë, ets wä'än jotkujk ja naaxwiinyëtë ja'ay tyajpaatë mëti'ipë tyuk'oy'ajtëpën ko ja mëyajtën të tuny.

¹⁵Ko ja tsajpjotmëtë kukäjpxy wyimpijnëtë tsajpjotm, tääts ja kupixyny këwent'ajtpë nyäy'ënanëtë nixim niyam: Ja'amtë jam Belén ets n'ijxmëty tii të tyuny të jyätyë, mëti'ipë yë Wintsën të xytyuk'ëwa'anëmën.

¹⁶Tääts janty jotëkoy ojts nyëjkxtë ets tpatë ja Maria ets ja José, tam ja mëxu'unk kyo'knë jëyujk ajë'kxënjoty.

¹⁷Ko t'ijxtë, tääts nimëtyaktë wi'ix ënäty ja tsajpjotmëtë kukäjpxy të tnimëtyä'äkyën ja mëxu'unk.

¹⁸Ets ko jëtu'un tmëtoowtë ja ja'ayëty wi'ix ja kupixyny këwent'ajtpë y'ëna'antën, mëjmëtoy ojts tmëtowtë.

¹⁹Ja Maria pëjkë'ëky ja tyaj'ijta'ay y'aawjoty jyotjoy ets je'eyë tmëmay tmëtajy.

²⁰Tääts ja kupixyny këwent'ajtpë ojts wyimpijnëtë akujk jotkujk, tukxoonta'aktë ja Tios ko ënäty të t'ixtë jëtu'un tä ja tsajpjotmëtë kukäjpxy ënäty të y'ënë'ëmxëtën.

²¹Kom tuktujk xëëw ja mëxu'unk yajnatsujk'ëwtijty ja ye'etyëjkajtën ets xyëëwpejty Jesús, nän yë'ë xëëw pyëjktaktë mëti'ipë ënäty ja tsajpjotmëtë kukäjpxy të tuk'ëwaanën ja Maria ma ënäty ka'ap ja y'u'unk nëkëjxm'atynyëmën.

²²Ko ja xëëw po'o tpaty jëna'a ja José ets ja Maria näypyuj näjyä'ätsë tpaata'antën, ijxtëm ja Moisés ja y'ënä'ämën nikäjpxyën, tääts ja mëxu'unk ojts tyajnëjkxtë jam Jerusalén ets ja Wintsën tukkë'ëtëkëja'antë.

²³Jëtu'un tuuntë, jä'ä ko ja Wintsën ja y'ënä'ämën jëtu'un y'ënä'äny: Ni'ëmukë ja mëtu'ukpë ja u'unk maay mëti'ipë kä'äxkopkën, aak Wintsën yajtukë'ëtëjkëp.

²⁴Tääts ojts nyëjkxtë Tios ëwtajtpë ijxtëm ja Tios ja y'ënä'ämën y'ënä'änyën: ets tmënëjkxtë mäjtsk ja kuuk ëkë mäjtsk ja pak mëti'ipë yajtukwintsë'këpën ja Tios.

²⁵Jam ënäty tu'uk ja ja'ay tsyëënë Jerusalén, Simeónk'ajtp. Oy ets wa'ats jyuuky'äty ma Tiosën, wyintsë'këp ja Tios ets y'owëxijtyp jëna'a ja Israel ja'ay nyitso'oka'antën. Ja Simeón myëët'ajtyp ijty ja Kënu'kxymyëkajtën,

²⁶tëë ënäty ja Tios jëwyiin tyuknijawëty ko ka'ap nya'ookëty koonëm t'ixëty ja Kristë, mëti'ipë Wintsën kyäxäämpyën.

²⁷Tääts ja Kënu'kxymyëkajtën yajnëjkxë ma ja mëjtsajptëjkën. Ko ja mëxu'unk Jesús ojts ja tyaak tyeety yajnëjkxyë ets tpatuntë wi'ix ja ënä'ämën y'ënä'änyën,

²⁸ënät ja Simeón ja mëxu'unk t'ëxajëy, tam jëtu'un tsä'än'ity ets ja Tios tukmëjja'aw tukjaantyja'awëy:

²⁹Tyam, Wintsën, tëë ja mwaantakën y'atëy. Oyës n'o'knëty akujk jotkujk.

³⁰Yë'ë ko tëëjës n'ix ja nitsokën

³¹mëti'ipë të xyajtso'ontä'äkyën ets ni'ëmukë ja naaxwiinyëtë ja'ay t'ixtëty,

³²jëtu'unts y'itëty ijxtëm ja kutë'kxnën mëti'ipë kyujaj kyutë'kxëpën ja naax kajpn, mëti'ipë yajnaxëpën ja Israel ja'ay mëj'äämpy.

³³Tääts ja José ets ja Maria mëjmëtoy tmëtoowtë ko ja Simeón jëtu'un tijy ja mëxu'unk Jesús.

³⁴Ënät ja Simeón myooyëtë ja kënu'kxën ets t'ënëmaay ja Maria, ja Jesús ja tyaak: Ya'atë mëxu'unk ye'etyëjk, yë'ë të yajtuknipëjktaakë ets may ja Israel ja'ay kyëtawtëty ëkë pyëtë'ëktëty; ijxpät nëjkx y'ity ets may nëjkx ja'ay ka'ap kyupëkyë,

³⁵jëtu'un yajnijawëty wi'ix ja ja'ay nitu'ukjaty myäytyën tyajtën. E mijts jëtu'un ya'atë tu'kë'ëyë xyjyawëja'any ijxtëm jeexyë ja mja'awën tyuknaxyë tu'uk ja tsujkn.

³⁶Näy tam ënäty tu'uk ja to'oxytyëjk Jerusalén, Aná xyëëwajtyp, Tios käjpxynyajxpë; Penuel yë nyëëx, Aser yë y'u'unk y'ok. Tëë ënäty ni'ik myëjja'ayënë. Je'eyë ojts wëxtujk jëmëjt tmëëtsëënë ja nyiye'etyëjk ko y'ëna'k'ajty;

³⁷mëmajkta'px jëmëjt ënäty ku'ooky të y'ijnë. Xëmë ja Tios twintsë'ëkë ma ja mëjtsajptëjkën xëëny koots; ayuu'ajtp näjyëtu'un ets ja Tios tja'amyetsy.

³⁸Tääts ja Aná nän jää jyä'äjty ets ja Tios tkukajpxëy ets ojts tnikäjpxy tnimëtyä'äky ja mëxu'unk Jesús, ma ja ja'ayëtyën mëti'ipë jyëjp'ijxtëpën ets ja jerusalén kajpn y'ëwaatsëpëtsëmëty.

³⁹Ko jëtu'un tpatuuntaaytyë ijxtëm ja Wintsën ja y'ënä'ämën y'ënä'änyën, tääts wyimpijnëtë ets nyëjkxnëtë ma kyukajpn'atën jam Nazaret, Galilea y'itjotm.

⁴⁰Ets ja mëxu'unk ye'ky pyejty oy mëk, kuwinma'any ets kënu'kxëp ja Tios.

⁴¹Winjëmëjt ja Jesús ja tyaak tyeety ijty nyëjkxtë jam Jerusalén ko ëmaayxyëëw tpaaty.

⁴²Ko ja Jesús ënäty ja jyëmëjnë majkmäjtsk, ënät ojts nyëjkxtë jam Jerusalén xëëw'ajtpë, ijxtëm tukjuuky'atën.

⁴³E ko wyimpijnëtë xëëwnaxy, nyëjkxnëtë ma tyëjkëtyën; tääts ja Jesús ojts wyi'im jam Jerusalén, ka'ap ja tyaak tyeety tnijawëtë.

⁴⁴Jam tjëjp'ixtë ja Jesús myiny mayjyä'äy itkujky. Tu'kxëëw ojts ye'eytyë, tääts ojts t'ixtaaytya'aktë ma ja myëku'uktëjkëtyën mëti'ipë y'ixy'ajtëpën.

⁴⁵Ka'ap tpatë. Tääts ojts jatëkok wyimpitë jam Jerusalén ets jam t'ixtaaytyaktë.

⁴⁶Kom tëkëëk xëëw tpatë ma ja mëjtsajptëjkën, jap ënäty y'u'unyë akujk ma ja yaj'ijxpëjkpëtëjkëtyën; ja yaj'ixpëjkpëtëjk yë'ë myëtoow'ijtëp wi'ix ja Jesús myëtyä'äkyën.

⁴⁷Ni'ëmukë mëti'ipë jam y'amëtoow'ijtëpën, mëj'ixy t'ijxtë ko nëkoo wyijy'ajnë ets mëtëyëty t'ëtsoowinpity.

⁴⁸Ko ja tyaak tyeety y'ijxpatëtë, mëj ixy t'ijxtë. Tääts ja tyaak y'ënëmaayë: U'unk, ¿tii koos jëtu'un xytyuntë? Yë mteety ets ëjts, tëë najënu'un n'ixtaaynyëtë, nëkooyës njotmaypyatnëtë mëët mijts.

⁴⁹Tääts ja Jesús y'ëtsoowëtë: ¿Tii koos xy'ixta'atë? ¿këtii xynyijawëtë ko kopkpëky etsës yaa nyajpaatëty maajës ja nteety ja tyëjkënë?

⁵⁰Ja tyaak tyeety kä'äp twinja'awëtyë tii ko jëtu'un y'ënä'äny ja Jesús.

⁵¹Tääts mëët wyimpijnëtë jam Nazaret. Jam tsyënaay Nazaret ja Jesús, ets myëmëtoow ja tyaak tyeety. Ja Maria pëjkë'ëky tyaj'ity y'aawjoty jyotjoy wi'ix tu'kë'ëyë winë tyunyë jyätyën.

⁵²Ets ja Jesús ye'ky pyejty, wij'ëtëtsp käj'ëtëtsp, tukxoontakëp ja Tios ets ja ja'ay.