Read Biblia Mixe de Quetzaltepec Lucas 20 Bible Online

Lucas 20 - Biblia Mixe de Quetzaltepec bible

Lucas 20

¹Tëkok ja Jesús ënäty yaj'ixpëky ma ja mëjtsajptëjkën, ja oy aaw oy ayuk nyikäjpxyp. Tääts ja teety wintsëntëjk jam jyajtë mëët ja tsajptëkotyëtë yaj'ijxpëjkpëtëjk ets ja mëjja'aytyëjkëty,

²ets t'ënëmaaytyë ja Jesús: ¿Pën ja kutujkën mooyëp ko jëtu'un winë xytyunëty? ¿Pën të m'ëne'emyë?

³Tääts ja Jesús t'ëtsooy: Näjyëtu'un miits nyajtëwa'antë ets xynyi'ëtsowtëty:

⁴¿Pën ja Juan Yajnëëpäjtpë ojts kyexyë ets yajnëëpätëty, Tios ëkë ja'ayë?

⁵Tääts aak ayi'iyë nyäyajtëëwëtë ets nyäy'ënanëtë: ¿Wi'ix n'ëtso'owmëty? Ko ënät n'ëtso'owmëty ko Tios ojts kyexyë, tsojk y'ëtsowëty: ¿e tiits ko ojts xykyamëpëktë?

⁶e ko nëmä'ämyëty ko ja'ay ojts kyexyë, tsojk mayjyä'äy xykyuka'tsmëty, jä'ä ko nyija'awëtyë ko ja Juan Tios ja kyäjpxynyajxpë.

⁷Tääts y'ëtsoowtë ko ka'ap nijawëtë pën ja Juan käjxë.

⁸Ënät ja Jesús näjyëtu'un y'ëtsooy: Nen ka'ap yam miits ntuk'ëwaanëtëty pën yë kutujkën xymyoopyës.

⁹Ënät ja Jesús tyaj'ijxpëjktso'ony ja ja'ay mëët tu'uk ja ijxpäjtën ets y'ënäny: Ojts tu'uk yë ja'ay nipëjktaakë yë tsatsymkyam ets tmooy ënu'kxy ja tuunpëtëjk ets ojts tsyo'onë.

¹⁰Ko tpaty ja tsatym tujk, ënät ja kukam tkejxy tu'uk ja tyuunpë ets t'amëtowëty ja tsatym mëti'ipë patëpën; e ja naax ënu'kxypë je'eyë ojts twoptë ets tyajwinpijtë jëtu'unyë.

¹¹Tääts ja kukam tkejxy wiinkpë ja tyuunpë. Näyjyëtu'un ojts tuunkojnëtëpë, je'eyë twojptë tka'tstë ets tyajwinpijtë.

¹²Ënät ja kukam ja mëtëkëëkpë tyuunpë tkejxy, ko jam jyä'äjty je'eyë tyajtsëtyujtë ets tyajkäktë.

¹³Tääts ja kukam y'ënäny: ¿Tiis ënät ntuunta'akëp? Tyaa t'ixëty, nmaankës ënät nkäxëp mëti'ipës ni'ik ntsojkpy nja'apën; ko yë'ë t'ijxpaatëty, wä'änxyëp twintsë'ëkëtëty.

¹⁴Ko ja naax ënu'kxypë t'ijxpatë ja kukam ja y'u'unk, tääts xim yam nyäy'ënanëtë: Ya'atë, yë'ë kam myëwë'ëmta'ajäämpy, oy ntimyaj'o'kmëty ets tsatsymkyam ëëts njä'ä'ajtmëty.

¹⁵Tääts tyajpëtsëëmtë kamjotm ets ojts tyaj'ooktë. ¿Tii jëtää ja kukam tyunäämpy ma ya'atë ja'ayëtyën?

¹⁶Nëjkxaanp jam kyamjotm ets tyaj'o'kta'aja'any ja naax ënu'kxpëtëjk ets ja kyam wiinkpë ja'ay tmo'oja'any. Ko ja ja'ay tmëtoowtë ets y'ënantë: Tkatsoky ja Tios.

¹⁷E ja Jesús ojts wyintë'kxëtë ets y'ënëmaayëtë: ¿Tii ja Tios ja y'aaw y'ayuk tyijpy ko y'ënä'äny?: Ja tsaa mëti'ipë ja pojtspë ojts tpäxtën, yë'ë të nyäxy tsaakopk.

¹⁸Pën këxkëtaap ma ya'atë tsaajën, tukwop tuka'atsë jyata'any. Pën ya'atë tsaa tukka'apäjtëp, pu'uxmën jyajta'aja'any.

¹⁹Ënätyë ja teety wintsëntëjk ets ja tsajptëkotyëtë yaj'ijxpëjkpëtëjk tjamatsantë ja Jesús, jä'äkyëjxm ko jëtu'un tja'awëtyë yë'ë yowë yajwinkajpxpäjtëp ko ënäty ja Jesús ja ijxpäjtën jëtu'un të tnimëtyä'äky.

²⁰Ënät ojts tkäxtë ja ja'ay mëti'ipë pya'ix pyawoontëp ja Jesús, tääpë ja'ayëty oyjyä'äy nyäpyëjkta'akëtë, yë'ë tsyojktëp ets ja Jesús muum kyajpxtëkoyëty ets jëtu'un tkë'ëyaktëty ma ja Roma yajkutujkpën.

²¹Paaty ojts tyajtëwtë: Wintsën, nija'awëtyëp ëëts ko mijts mkäjpxy ets myaj'ijxpëky ijxtëm pyaat'atyën ets ka'ap yë'ë xytyuny mëti'ipë ja naaxwiinyëtë ja'ay tsyojktëpën. Mëtëy yë'ë ko mijts yë'ë ja'ay mtukni''ijxëp ja Tios ja nyë'ë tyu'u.

²²¿Oy jëtää ko ja yajkutujkpë César nmëkëpäjtmëtyë ëkë ka'apë?

²³Nyija'awëp ja Jesús ko ënäty ëxëëk ja wyinma'anyëty. Tääts y'ënëmaayëtë:

²⁴Tuk'ijxtëkës tu'uk ja meeny. ¿Pën ya'atë wyiin jyëjp yam nikojtu'uty ets pën yë xyëëw yam këxja'ay miimp? Ets y'ëtsoowtë: Yë'ë yajkutujkpë César.

²⁵Tääts ja Jesús y'ënëmaayëtë: Mo'otë ja yajkutujkpë mëti'ipë yë'ë jyä'ä'ajtypyën ets mo'otë ja Tios mëti'ipë yë'ë jyä'ä'ajtypyën.

²⁶Ka'ap ojts tyu'upaatë ma ja aaw ayukën, mëti'ipë ja Jesús nyimëtyäkpyën ma ja ja'ayëtyën ets tmatstëty; amonyë ojts wyë'ëmtë ko tmëtoowtë ja Jesús aak oyëty y'ëtsoy.

²⁷Tääts ja Jesús nyimiinëtë ja satuceë ja'ayëty, mëti'ipë ënantëpën ko ka'ap ja o'kpë jyuukpyëktë. Paaty ja Jesús tyajtëëwtë:

²⁸Wintsën, jëtu'un ja Moisés tjaay ja ënä'ämën: Ko tu'uk yë ye'etyëjk y'ookëty ets ja tyo'oxytyëjk ka'ap tii ja y'u'unk; jyëkyejpy ja myëkä'äx tpëkëty ja kyäpy ets ja y'u'unk y'ëna'k tpaatëty, mëti'ipë jyä'ä'atëpën ja myëkä'äx mëti'ipë ënäty të y'ookyën.

²⁹E jääts ijty tëëyëp ja ye'etyëjk niwëxtujk tyu'kä'äx'atë. Ja kä'äxkopk ojts pyiky ets y'o'ky, kä'äp ja y'u'unk y'ijtë.

³⁰Ja mëmäjtskpë,

³¹ja mëtëkëëkpë ets jëtu'un tyimja'ajty ma ja mëwëxtujkpën, aak ojts tpëjkta'atë ja kyäpy ets aak ojts y'o'kta'atë, ets ni pën ja y'u'unk kya'ijty.

³²Ok ojts y'o'knë näjyëtu'un ja to'oxytyëjk.

³³Ko ja o'kpë nëjkx jyuukpyëktë, ¿pën jëtää nëjkx to'oxytyëjk'aty ja to'oxytyëjk?, tyam ënäty tëë tpëjk'apëtsëëmta'atë.

³⁴Tääts ja Jesús y'ënëmaayëtë: Yääyë naaxwiiny ja ye'etyëjk ets ja to'oxytyëjk pyëktë y'uuktë.

³⁵Pën ja Tios të wyin'ixëtën ets tpaatëty ja juukyajtën mëti'ipë miimp këtakpën, oy ënäty të y'ooky'itë, wä'än ye'etyëjk to'oxytyëjkëty; ka'ap nëjkx jëtu'un y'ëkpëjk y'ëk'uknëtë,

³⁶jä'ä ko ka'ap nëjkx t'ëkjëkyäjpnë y'ooktëty. Aakjëtu'un yajpaatanëtë tä Tios kukäjpxy, aak Tios u'unk'atanëtëp jä'ä ko ënäty të jyuukpyëktë.

³⁷Yë'apaat ja Moisés nija'awëy ko yë o'kpë jyuukpyëka'antë, ko ojts t'ixy ja zarsa kepy tyoy. Ma y'ënä'änyën ko yë Wintsën yë'ë Abraham, Isaac ets Jacob yë Tyios.

³⁸Yë Tios ka'ap yë'ëjëty niTios'aty yë o'kpë, yë'ë nyiTios'ajtyp yë juukpyë.

³⁹Tam naakën ja tsajptëkotyëtë yaj'ijxpëjkpë mëti'ipë ënantën: Oy, Wintsën.

⁴⁰Ets ka'ap ojts tii y'ëknätyuk'a'ijxënëtë tyajtëwtëty.

⁴¹Tääts ja Jesús yajtëëwëtë: ¿Tii ko yë ja'ay y'ëna'antë ko David y'u'unk'ajtyp y'ok'ajtyp yë Kristë?

⁴²David ojts kë'ëm y'ënä'äny ma ja Salmos: Jëtu'un ja Wintsën t'ënëmaay ja nWintsënës: U'nyë n'aka'any'äämpyës,

⁴³koonëmës yë mmëtsip nmëmëtakta'ajëty.

⁴⁴E wi'ixën ja Kristë yë'ë y'u'unk'aty y'ok'atyë ja David, e David jëtu'un ja Kristë tijy Wintsën.

⁴⁵May ja ja'ay ojts tmëtowtë ko ja Jesús ja y'ijxpëjkpëtëjk t'ënëmaay:

⁴⁶Näkyëwent'atëtë, ijxkëm yë tsajptëkotyëtë yaj'ijxpëjkpëtëjk mwin'ëënëtë; yë'ëjëty amëj akëjxm nyaxtë tyëkëtë ets wyit yenyëty tpëjkta'aktë; yë'ë tsyojktëp ets ja ja'ay kyajpxpo'kxëtëty maayjoty mëët ja wintsë'kën; ko muum yajwowtë kääpyë yë'ë tyimtsojktëp ja u'unyääytyakn oyëtypë ets wintsë'ëkë tyim'ita'antë, näjyëtu'un jap tsajptëkoty y'ëtë'ëtstë.

⁴⁷Pyëjkëtëp ja ku'ookytyo'oxy ja jyëën tyëjk, këtiipë pën nijawëty janty jekyëty nyätyijyë Tios mëkajpxtë. Je'eyëp ko yë'ëjëty mëk ni'ik yajtëytyuna'antë.