Read Biblia Mixe de Quetzaltepec Lucas 21 Bible Online

Lucas 21 - Biblia Mixe de Quetzaltepec bible

Lucas 21

¹Tam ënäty tëkok ja Jesús t'ixy ko ja kumeenyjyä'äytyëjk t'apëkëtë ja meeny jap apëjkënjoty,

²ënät näjyëtu'un t'ijxy ko tu'uk ja ku'ooktyo'oxy t'akonë ja jyä'ä, mäjtsk ja mutsk pujxnmeeny.

³Tääts ja Jesús y'ënäny: Tëy miits nëëmëtë ko yë ku'ooktyo'oxy, yë ëyoopëja'ay ni'ik may yë myeeny të t'akonë jap apëjkënjoty këtiinëm yë ja'ayëty mëti'ipë jap yë jyä'ä të t'apëkëtën.

⁴Yë ja'ayët aakyë'ë meeny y'ako'nëtëp mëti'ipë natëjkëpën e yë ku'ooktyo'oxy, yë'ë të t'akonë mëti'ipë nimëjaaw pyätypyën ets mëti'ipë ënäty nätyukjëjp'ijxëpën ma jyuuky'ajtënën.

⁵Jam ënäty tëkok ja ja'ayëty tnimëtya'aktë ja mëjtsajptëjk ko janty tsuj kyëxë'ëky mëët ja tsaa mëti'ipë myëët'ajtypyën ets näjyëtu'un mëti'ipë ja ja'ay yojxtëpën ets oy ja tsajptëjk yaj'ixëty. Tääts ja Jesús y'ënäny:

⁶Mëti'ipë yaa m'ijxtëpën, pyatäämpy ja xëëw jëmëjt ko nitu'uk ja tsaa kyawë'ëma'any, tu'kë'ëyë jyijta'aja'any.

⁷Ënät ja Jesús tyajtëëwtë: Wintsën, ¿jëna'a jëtu'un jyata'any kyëpäta'any, ets tii ijxwë'ëmën mëët yajtuknijawëp ko ënäty jëtu'un jyatanë?

⁸Ets ja Jesús y'ënäny: Näkyëwent'atëtë ets këtii pën mnätyukwin'ëënëtëty. Yë'ë ko nimay ja ja'ay myina'antë ets y'ëna'ana'antë: Ëjts jëtu'un Kristë ets Tëë ja tiempo tpatnë. Miitsëty këtii xymyëpëktëty.

⁹Ko xymyëtoy'atëty ja tsip tyunyë ets ko ja ja'ay nyänyipëtë'ëkyë, ka'ap mtsë'ëkëtëty; jëyëjp ya'atë tyuna'any jyata'anyë naamka'anëm ënäty ja nyixëëw tpaaty ets ja naaxwiinyëtë kyëxëty.

¹⁰Tääts ja Jesús jyaak nëmaayëtë: Tsiptunaanp ja naax kajpn mëët ja wiinkpë ja mëj kajpn.

¹¹Yu'kxaanp yë naaxwiinyëtë, itaanp yë yuu xëëw, pa'am ëyo'on oymyaajëty, ets jam tsajpjotm atsë'ëk ajawë jam yaj'ixa'any.

¹²Naamka'anëm ënäty jëtu'un jyäty kyëpetynyëm, ko nëjkx miits myajmatstë, myajpajëtijta'aktë, myajkë'ëyaktë ma ja tsajptëjkën ets myajtsumtë ets myajmënëjkxtë ma ja yajkutujkpëtëjkën jä'äkyëjxm ko ënäty miits të mëpëktë ma ëjtsën.

¹³Ko jëtu'un tyunëtëty jyatëtëty, jyëkyejpy xynyimëtya'aktëty ja tëyajtën ëjtskyëjxm.

¹⁴Këtii xymyëmay xymyëtajtëty wi'ix m'ëtsowtëtyën.

¹⁵Ëjts miits ja winma'any ets ja ayuk nmo'ojantëp wijypyë kejypyë mëti'ipë mkajpxtëpën këtiipë ja mmëtsip mëmëta'akëtëty ets këtiipë wyinma'anypyaatëty wi'ix myaj'ëmonëtëty.

¹⁶Yë'ëpaat nëjkx yë mtaak mteety mkë'ëyakëtë, näjyëtu'un yë mjëëky mmëku'ukëty ets mëti'ipë mëët mnämyäyëtën ets tam mëti'ipë nëjkx myaj'ookëtën.

¹⁷Ni'ëmukë ja ja'ay m'ëxëëk'ixa'anëtë, jä'ä ko ënäty ëjts xymyëpëktës.

¹⁸E miitsëty nitii mkajata'anëtë, nitu'uk ja mwaay kyaka'aja'antë.

¹⁹Aamëk jotmëk näpyëjkta'akëtë ets ja nitsokën xypyaatëty.

²⁰Ko xy'ixtëty ja Jerusalenkajpn ko tëë ja myëtsip yajnatukyë, yë'ë mtuknijawëtëp ko tsojk ënäty kyutëkoyä'äny.

²¹Ko jëtu'un tyunëtëty jyatëtëty, wä'än kopkjotm nëjkxtë mëti'ipë jam Judea yajpatëpën ets wä'än ënätyë tpëtsëmtë mëti'ipë jamëtyën Jerusalén. Mëti'ipë jam kamjotm yajpatpën, këtii nëkoo tyimwinpitëty ma kyajpnën.

²²Jä'ä ko ma tääpë xëëwën ëyo'on jää itaanp, jää y'atëwa'any ijxtëm ja Tios ja y'aaw y'ayuk y'ënä'änyën.

²³Mon tuk ja to'oxytyëjk yajpaatë mëti'ipë ënäty ja u'unk jää nyëkëjxm'ajtëpën ëkë mëti'ipë ënäty jää yaj'u'unktsi'tstëpën. Jä'ä ko mëj këjää ja pëjkën ato'onën jää y'ita'any ets ja mëj tsaatsytyu'unën ma ja naax kajpnën.

²⁴Tam mëti'ipë nëjkx yajkupuxyën, mëti'ipë nëjkx yajtsumy yajmatsyën wiink naax wiink kajpn; ets ja mëtsip jëtu'unyë nëjkx t'ateeny tukteeny ja Jerusalén kajpn koonëm tpaatëty ja nyixëëw ma ënäty të yaj'akäjpxyën.

²⁵Yaj'ixaanp jam winë ma xëëwën, ma po'ojën ets ma ja matsa'ajën; ets naaxwiiny jëtu'unyë nëjkx ja naax kajpn myoonkëta'ak tyujkëta'aktë, ko y'ënaanta'akëty ja mejy ets nëë o'pky nëkooyë pyëtë'knëty, nëjkxëp tsyë'ëkëtë.

²⁶Jëtu'unyë nëjkx ja ja'ay kyëtawtë kyëpiptë mëët ja jotmay ko tnijawëtëty ja naaxwiinyëtë kyëxa'any; jä'ä ko yë'ëpaat yë tsajpjotmëpë nëjkx yajxijtyu'kxtë.

²⁷Ënät yaj'ixa'any jam tsajpjotm tsyoony yootsjotm ja naaxwiinyëtë ja'ay ja y'U'unk mëët ja mëj'ajt oyajtën.

²⁸Ko jëtu'un tsyo'onta'akëty ja ëyo'on, akujk jotkujk mnäjyawëtëty, jä'ä ko yë'ë ënäty wiinkoonp ja nyixëëw ja nitsokën.

²⁹Ojts ja Jesús tnimëtyä'äky näjyëtu'un tu'uk ja ijxpäjtën: Ixtë ja higo kepy, ëkë oymyëti'ipë kepyëty.

³⁰Ko y'ääy pyëtsimy, jëtu'un yajnijawë ko tsojk ja anpë myina'any.

³¹Näyjyëtu'un ko xy'ixtëty ko tyunëtëty jyatëtëty mëti'ipës të nkäjpxyën, jëtu'un xynyijawëtëty ko wiinkoonp ja Tios ja kyutujkën.

³²Tëy miits nëëmëtë, jatëp jëtu'un ka'anëm ënäty ja ja'ay y'o'kta'atë mëti'ipë jää tyam juuky'ajtëpën.

³³Këxaanp naxaanp yë naax tsajp, e yë n'aaw n'ayukës nijëna'a kyakëxa'any.

³⁴Näkyëwent'atëtë, këtii xy'atsoktëty ja nëë ju'uky, këtii m'uuktëty mu'ukëtëty, këtii yë'ë xymyëmay xymyëtajtëty ja naaxwiinyëtë naaxkëjxypyë yajtukjuuky'ätyën, këtiipë ja ëyo'on ajotkumonë mtukja'tëtëty,

³⁵jëtu'un tä ja jëyujk yajxokyën. Jä'ä ko minaanp ma tëkokyë ja naaxwiinyëtë ja'ayën.

³⁶Jëjp'ixy xëmë myajpaatëty, ja'amyätstë ja Tios janaam jatsojk, jëtu'un ka'ap montëty mtuktëty oy ja ëyo'on jyatunyë, ets akujk jotkujk xywyinkuwa'akëtëty ja Jesukristë.

³⁷Winjëpom ja Jesús ijty yaj'ixpëky ma ja mëjtsajptëjkën ets koots nyijkx ma ja Olivo Kopkën.

³⁸Jopyëp, tsojk ja ja'ay ojts nyëjkxkojtë ma ja mëjtsajptëjkën ets tmëtoow'ita'antë mëti'ipë ja Jesús nyikäjpxypën.