Read Biblia Mixe de Quetzaltepec Lucas 24 Bible Online

Lucas 24 - Biblia Mixe de Quetzaltepec bible

Lucas 24

¹Tominkë, sëmaan ëjxy ënäty ko ja to'oxytyëjkëty jatëkok ojts nyëjkxtë tsojktsojk ma ja o'kpëjutën, mëët ja pya'ak xu'kpë mëti'ipë ënäty të tnipëjktaakëtën.

²Ko jam jyajtë, tëë ënäty ja tsaa yajjëtijy mëti'ipë ja jut y'akë'ë'ajtypyën;

³ënät tyëjkëtyë jap o'kpëjutjoty, ka'ap tpatë ja Wintsën Jesús ja nyi'kx kyopk.

⁴Tam ënäty myäytyë tyajtë tii tyuntëpën, ko ajotkumonë t'ijxpatë nimäjtsk ja ye'etyëjk pyë'aayëty, ajajp atë'kxp ja wyitëty.

⁵Tsë'këtë ja to'oxytyëjk, ënät je'eyë nyaaxkoowtë; ets ja ye'etyëjk nimäjtsk y'ënëmaayëtë: ¿Tii ko xy'ixta'atë ma ja o'kpëjutën mëti'ipë juukyajtpën?

⁶Ka'ap jää yaa pën, tëë ja jyuukpyiky. Ja'amyätstë wi'ix m'ënëmaayëtën ko ënaty jyam'atynyëm Galilea. Jëtu'un y'ënäny

⁷ko ja naaxwiinyëtë ja'ay ja y'U'unk yajkë'ëyaka'any pokyjyä'äy kyë'ëjoty, ko kyëruutspäta'any ets ko jyuukpyëka'any kom tëkëëk xëëw.

⁸Ënät tja'amyäjtstë ja Jesús ja y'ayuk wi'ix ënäty të y'ënä'änyën.

⁹Ko jam tsyo'onëtë ma ja o'kpëjutën ets tukmëmëtyaktë tu'kë'ëyë ja nimajk tu'ukpë ja Jesús ja y'ijxpëjkpëtëjk ets mëti'ipë ënäty jaakjamëtyën.

¹⁰Ja Maria Magdalena, Juana ets Maria, mëti'ipë Santiagë tyaak'ajtypën ets ja wiinkëtypë to'oxytyëjkëty, yë'ë ojts tmënëjkxtë ja mëtyä'äky ets tukmëmëtyaktë ja ijxpëjkpëtëjk.

¹¹E ka'ap ja ijxpëjkpëtëjk tmëpëjktë; nëkoo ja tmëtoowtë tsyuumëtya'aktë.

¹²Tääts ja Pedro ojts nyijkx pëyi'ikyë ma ja o'kpëjutën ets ko kyu'ijxëy jap jutjoty, o'kpë wit jap je'eyë wijtsnääpy mëti'ipë yajtukwinpijtën ja Jesús. Ënät ja Pedro wyimpijty ets ojts nyijkxy ma ja tyëjkën, janty mëk ojts tmëmay tmëtajy ko ënäty jëtu'un të tyuny të jyätyë.

¹³Näy jä'ä xëëw ja Jesús ja y'ijxpëjkpë nimäjtsk ojts nyëjkxtë jam Emaús, tu'k'ajop ye'ey ko yajnitsoony jam Jerusalén.

¹⁴Yë'ë ënäty nyimëtyaktëp wi'ix winë të tyuny të jyätyën.

¹⁵Tam jëtu'un myëtya'aktë ko ja Jesús nyimiinëtë ets mëët ye'eytsyo'ontë.

¹⁶Tios ënäty të tyajkutuky ets ka'ap ja Jesús t'ijxkaptëty.

¹⁷Tääts ja Jesús yajtëëwëtë: ¿Tii mnimëtyaktëp tu'ujoty? ¿Tii ko mjotmay'ooktë? Yë'ëjëty ka'ap y'ëtsoowtë je'eyë ojts wya'akwë'ëmtë.

¹⁸Ënät tu'uk mëti'ipë xyëëwajtypyën Cleofas y'ëtsooy: ¿Mijts nätyu'uk yaa Jerusalén të mja'ajtä'äkyë, paaty xykyanijawë tii të tyuny të jyätyë?

¹⁹Tääts ja Jesús tyajtëëy: ¿Tiixë të tyuny të jyätyë? Ets y'ëtsoowtë: Ja Jesús Nazaretëtë ja'ay, ja Tios ja kyäjpxynyajxpë mëti'ipë mëk'ajtën mëët winë tuunyën ma Tiosën ets ma ja ja'ayëtyën.

²⁰Ja teety wintsënëty ets ja nkutuunktëjkëtyës tëë tkë'ëyaktë ets të tyaj'ooktë ets të tyajkruutspätë.

²¹Njëjp'ijxtëpës ënäty ets ja Israel ja'ay tyajnitso'okëty. Tëë tyëkëëkxëëwpäjnë ma jëtu'un të tyuny të jyätyë.

²²Tëës ja to'oxytyëjk jënaakën xy'ëtsë'ëkëtë mëti'ipë jam ma ëëtsëtyën, mëti'ipë të y'otstën tsojkyë ma ja o'kpëjutën.

²³Ka'apëk ja Jesús nyi'kx kyopk të tpatëtë etsës të xynyimintë, xytyuk'ëwaanëtës ko tsajpjotmëtë kukäjpxy të t'ixtë nimäjtsk ets të y'ënë'ëmxëtë ko Jesús jyuukyëty.

²⁴Tëëtsës ja nmëku'uk jënaakën y'otstë ma ja o'kpëjutën näjyëtu'un të tpaatë ijxtëm ja to'oxytyëjk y'ëna'antën, je'eyëp ko ja Jesús kä'äp të t'ixtë.

²⁵Ënät ja Jesús y'ënëmaayëtë: Ka'ap miits mja'akyukëtë, ka'ap xytsyojkmëpëktë mëti'ipë ja Tios ja kyäjpxynyajxpë nyikajpxtën.

²⁶Ko jëwyiin ja Jesús y'ëyowëty ets ok tpëkëty ja myëj'ajt y'oyajtën.

²⁷Tääts ja Jesús ojts tyuk'ixëtë ja Tios ja y'aaw y'ayuk ma kë'ëm yajnimëtyä'äkyën, tyimtso'ontä'äky mëti'ipë Moisés jyääyën ets tu'kë'ëyë jënu'un ja Tios ja kyäjpxynyajxpëtëjk tjaaytyën.

²⁸Ko tmëwinkoontë ja kajpn ma ënäty jya'ta'antën, ënät ja Jesús ye'eytsyo'ony pe'tym ijxtëm jeexyë jyotëkoyën.

²⁹Ënät mëktä'äky t'ënëmaaytyë: Wë'ëm mëët ëëtsëty, jä'ä ko po'oxy tyamnë, tëë kyootsënyë. Tääts ja Jesús tyëjkëy tëkoty ets ojts mëët wyi'imy.

³⁰Ko ënäty jam y'u'unyëtë ma ja kaaypyäjnën, tääts ja tsajpkääky ojts nixajë ets ja Tios tkukajpxëy ets ojts myo'ojëtë.

³¹Ënät t'ijxwatstë ets t'ixkajptë ko jyä'äjëty ja Jesús; e ja Jesús ënätyë jëtu'unyë tyëkooy.

³²Ets nyäy'ënanëtë: Paatyëm jëtu'un janty jotkujk të näjya'awëmë ko tu'ujoty ja Tios ja y'aaw y'ayuk të xytyukmëmëtyakëmë.

³³Tääts ënätyë ojts nyëjkxtë jam Jerusalén ets jam tpatë nimajktu'uk ja ijxpëjkpëtëjk ets mëti'ipë ënäty jam mëët të ye'eymyuktën,

³⁴ets y'ënëmaayëtë: Janty tëyajtën ko tëë jyuukpyiky ja Wintsën, tëë ja Simón tim'ixy.

³⁵Ënät nimäjtsk tukmëmëtyaktë wi'ix ënäty të t'ixtën tu'ujoty ets wi'ix ënäty të t'ixkaptën ja Jesús ko ja tsajpkääky të tujkwä'kxy.

³⁶Tam ënäty myëtya'aktënëm ko ja Jesús ojts nyänyikëxë'ëkyë itkujky tyänë ma yë'ëjëtyën ets ojts kyajpxpo'kxëtë: Jotkujk yajpaatë.

³⁷Nëkooyë ojts tsyë'kënëtë, jëtu'un t'ijxtë ijxma'tëp yowë.

³⁸Tääts ja Jesús y'ënëmaayëtë: ¿Tii ko mtsë'ëkëtë? ¿Tii ko maaymyin maayxyëptë?

³⁹Ijxtëkës yë nkë'ë nteky. Ëjts yë kë'ëm. Toontëkës ets ijxtëkës; yë poj ka'ap yë wyääy pyajk ijxtëm ëjtsën.

⁴⁰Ko jëtu'un t'ënëmaay, tääts ja kyë'ë tyeky ojts tuk'ixy.

⁴¹E yë'ëjëty ka'ap ënäty oy tmëpëktë, jä'ä ko xoontaktëp ets jotkujk nyäyjyawëtë. Tääts ja Jesús y'ënëmaayëtë: ¿Ja kayaanpës, yuu'o'këpës?

⁴²Tääts tu'k e'kxy tmooytyë ja ajkx tsa'ay,

⁴³ets t'ëxajëy ets ojts jämyë tsu'utsy ma yë'ëjëtyën.

⁴⁴Tääts y'ënëmaayëtë: Mëti'ipës të xyäty të xykyëpetyën, yë'ë mëti'ipë ojts ntuk'ëwaanëtën ko ënäty jää mëët miitsëty njaak'ityës, ko kopkpëky ko jëtu'un njata'anyës ijxtëm xynyimëtya'aktësën ja Moisés ja y'ënä'ämën, ja Tios ja kyäjpxynyajxpë ets ja Salmos.

⁴⁵Tääts ja Tios ja y'aaw y'ayuk ojts tyukja'akyukëtë,

⁴⁶ets y'ënëmaayëtë: Jëtu'un kyëxja'ayëty ko ja Kristë y'ookëty ets kom tëkëëk xëëw jyuukpyëka'any,

⁴⁷ets yajkajpxwa'kxëty ma tu'kë'ëyë ja kajpnën, Jerusalén tsyo'onta'akëty, yajtuk'ëwaanëtëp ets tyajtëkatstëty ja wyinma'any, wä'än ja Tios tmëpëktë ets ja pyoky yajnimä'kxtëty.

⁴⁸Miitsëty ijxpë nija'apë mwë'ëmtë ma tyam winë të tyuny të jyätyën.

⁴⁹Ntuknikäxtëp miits mëti'ipë ja Tios Teety të twaantä'äkyën, je'eyëp ko wë'ëmtë miits yaa Jerusalén koonëm xypyaatëty ja mëk'ajtën mëti'ipë tsajpjotm tso'onpën.

⁵⁰Tääts ja Jesús ojts wyoowpëtsëmëtë jam kajpnjotm, Betania ojts wyoownëjkxëtë. Ënät ojts kyë'ënixajëtë ets kyënu'kxëtë.

⁵¹Tam ënäty kyënu'kxëtë, tääts y'ëxmajtsëtë ets ja Tios yajpa'tëjkëyë tsajpjotm.

⁵²Ënät twintsë'këtyë ets ojts xoontä'äky nyëjkxnëtë jam Jerusalén.

⁵³Jëpom jëpom ënäty jyam'atë ma ja mëjtsajptëjkën, tmëjjaw tjaantyjawëtë ja Tios.