Read Biblia Mixe de Quetzaltepec Lucas 5 Bible Online

Lucas 5 - Biblia Mixe de Quetzaltepec bible

Lucas 5

¹Jam ënäty ja Jesús tëkok yajpaaty ma tu'uk ja nëë'akëyë nëëpa'ajën Genesaret xyëëwajtyp. Jamts ja mayjyä'äy myiintë mëpaatëp ja Jesús t'atijmujknëtë ko tmëtoow'ita'antë ja Tios ja y'aaw y'ayuk.

²Tääts ja Jesús t'ijxpaty mäjtsk ja kepy nëëwinye'epyë mejypyë'am. Tukwa'ats ënäty, ja ajkxmajtspë tëë ënäty jap pyëtsëmtë, ja tsyääy jam pyujtëp.

³Ënät ja Jesús tuktëjkëy ja kepy nëëwinye'epyë mëti'ipë ja Simón jyä'ä'ajtypyën ets t'ënëmaay ets wäänë tyajnëëkuye'eyëty ma nëëkomën. Tääts nyaaxwe'tsy jap ets tyëjkëy yaj'ijxpëjkpë.

⁴Ko kyajpxtaay, tääts t'ënëmaay ja Simón: Jaakyajnëjkx kepy nëëwinye'epyë jap nëëkomjoty, ets mtsaay jap xykyujëpipëty ets ajkx xymyatstëty.

⁵Tääts ja Simón y'ëtsooy: Wintsën, tëëjës tu'ktsu'um njajëpiptë, ni tu'ukës nëë jëyujk të nkamatstë. Minës n'ëkkujëpipë jatëkok jä'ä ko mijts jëtu'un m'ënaanp.

⁶Ko ojts ja tsyääy tkujëpipë, may ja ajkx tmajtstë, je'eyë ja tsaay kyanakë'tsnë.

⁷Ënät tmëjyäämtë ja ja'ayëty mëti'ipë ënäty jamëtyën wiink kepy nëëwinye'epyëjoty ets pyutëkëtëty. Yë'ë ojts myintë ets ja kepy nëëwinye'epyë mäjtsk tyaj'ujtstë ets jawäänë kyakiiny.

⁸Ko ja Simón Pedro jëtu'un t'ijxy, ënät ojts nyäkyoxtënaaytyä'äkyë ma ja Jesús ets t'ënëmaay: Wintsën, winwa'ktutkës, ëjts pokyjyä'äyës.

⁹Ja Simón Pedro ets ni'ëmukë ja myëku'uktëjk, tsë'këtëp ënäty, jä'ä ko ja ajkx nëkooyë may të tmajtsnëtë.

¹⁰Näy tam ënäty ja Santiagë ets ja Juan, Zebedeo myaank, Simón Pedro myëku'uk ets ja Jesús t'ënëmaay ja Simón Pedro: Këtii mtsë'ëkë, tyam ja'ay mijts matsäämpy wi'ix ja nitsokën tpaatëtyën.

¹¹Ënät ja kepy nëëwinye'epyë ojts tyajnëjkxtë naaxwintë'ëtstum ets tu'kë'ëyë winë t'ëxmajtstaaytyë ets tpatso'ontë ja Jesús.

¹²Ko ja Jesús ënäty jam yajpaaty ma tu'uk ja kajpnën, ënät jyä'äjty tu'uk ja ye'etyëjk pu'uts pa'am pëjkëp. Ko t'ijxpaty ja Jesús ënätyë nyäkyoxtënaaytyakë Jesús wyintum ets tmënu'kxtäky: Wintsën, pën mtsojkpy, yajtsokës.

¹³Ojts ja Jesús tkë'ënixajy ets t'ënëmaay: Ntsojkpyës ets mtso'okëty, tso'ok. Je'eyë ja Jesús jëtu'un y'ënaantaay ënätyë ja ja'ay ja pyu'uts nyiwatsë.

¹⁴Ojts ja Jesús tyuk'ëne'emyë: Ka'ap pën xytyuk'ëwaanëty. Nëjkx yë teety wintsën tuk'ix ko tëë mtso'oky ets xytyukmëyoxëty ja Tios ja wyintsë'kën, jëtu'un ja ja'ay nijawëtëty ko tëë mtso'oky.

¹⁵Oy jyajëtu'unëty, ni'ikyë yajnimëtyä'äky mëj'äämpy ja Jesús, nimayëty ja ja'ay ye'eymyujktë ets tmëtoow'ita'antë ja Jesús ets tyajktso'okëty ja pya'amëty.

¹⁶Kanaak'ok ja Jesús tnikeky ja mayjyä'äy ets ojts nyijkx jam apak itum, jamts ja Tios tja'amyejtsy.

¹⁷Tu'kxëëw tu'ktiempë jyäjty kyëpejty, jam ënäty ja Jesús yaj'ixpëky, tëë ënäty jam nyaaxwäätstë yë fariseë ja'ayëty ets tsajptëkotyëtë yaj'ijxpëjkpëty. Tam yajpaatë ja'ayëty mëti'ipë tso'ontëpën Galilea, Judea ets Jerusalén. Ja Jesús ni'ikyë ja Wintsën ja myëj'ajtën tyaj'ixyë ko ja pa'amja'ay tyajtso'oky.

¹⁸Ënät ja ja'ay tkëëyjya'ajtë tu'uk ja pa'amja'ay kë'ëxujxpë tekyxyujxpë ets jap tëkoty tjayajtëkëjantë ets tpëjkta'aka'antë Jesús wyintuuy.

¹⁹Nimaa kya'ëwa'atsëty ma tyajtëkëtëty, jä'ä ko janty may ja ja'ay ënätyëty. Tääts tëjkëjxy pyäjtë ets tkukëëytyutë ja tëjk, japts tkutëëynyajxtë ja pa'amja'ay mayjyä'äy akujk Jesús wyintuuy.

²⁰Ko ja Jesús t'ijxy ko mëpëjktëp, tääts t'ënëmaay ja pa'amja'ay: Mmëku'uk, npokymye'kxyp mijts.

²¹Ënät ja tsajptëkotyëtë yaj'ijxpëjkpëtëjk ets ja fariseë ja'ayëty wyinmaaytyë: ¿Pën ya'atë ja'ay ko Tios tmëkajpxtëkoy? Yi'iyë Tios maayëp pyokymyä'kxëty.

²²Jesús, wa'ats ënäty tnijawë wi'ix myäytyën tyajtën, paaty tyajtëëy: ¿Tii ko jëtu'un mmaytyë mtajtë?

²³¿Mëti'ipë ka'ap tsyipëty, koos yë pa'amja'ay nëëmëty: Npokymye'kxyp mijts, ëkë koos nëëmëty: Pëtë'ëk, këëyë'ëk yë maapäjn ets nëjkxë?

²⁴Tyam miits ntuk'ixtëty ko yë naaxwiinyëtë ja'ay yë y'U'unk myëët'ajtyp yë kutujkën yaa naaxwiiny ets ja poky tmä'kxëty. Tääts ja kë'ëxujxpë tekyxyujxpë t'ënëmaay: Mijts nëmääpy, pëtë'ëk, këëyë'ëk yë maapäjn ets nëjkx ma mtëjkën.

²⁵Ënätyë ja pa'amja'ay pyëti'ky mayjyä'äy itkujky, ojts tkëëyi'iky ja myaapäjn ma ënäty të kyo'knën ets ojts nyëjkxnë ma tyëjkën, tmëjjaw tjaantyjyawë ja Tios.

²⁶Ets ja ja'ay mëj ixy t'ijxtë, ojts ja Tios näjyëtu'un tmëjjaw tjaantyjawëtë ets y'ënantë: Mëj winma'any ya'atë ja kënu'kxën tyam të n'ijxëmë.

²⁷Ko jëtu'un y'ëkjajty, tääts ja Jesús tëkotm pyëtsiimy ets t'ijxpaty tu'uk ja yajkukëpäjtpë mëti'ipë xyëëwajtypyën Leví. Jam ënäty y'u'unyë ma yajkukëpetyën, ënät ja Jesús t'ënëmaay ja Leví: Pamiinkës.

²⁸Tääts ja Leví wya'kujkëy ets t'ëxmajtstaay mëti'ipë ënäty myëët'ajtypyën ets tpatso'ony ja Jesús.

²⁹Ok ja Leví tnixëëwtuuny ja Jesús, mëj ojts ja xëëw tnipëjktaakë; jam ma kaaypyäjnën, tam ënäty jyatëtë ja yajkukëpäjtpëtëjkëty mëti'ipë ja Roma myëtuuntëpën, ets ja ja'ayëty wiinkëtypë.

³⁰Tääts ja fariseë ja'ayëty ets ja tsajptëkotyëtë yaj'ijxpëjkpë ojts tuknëëmëtë ja y'ijxpëjkpëtëjk ets t'ënëmaaytyë: ¿Tii ko yë Jesús ets miitsëty xymyëëtkaytyë yë yajkukëpäjtpëtëjk ets pokyjä'äytyëjkëty?

³¹Ënät ja Jesús y'ëtsooy: Pën ka'ap tiipa'am tmëët'atën ka'ap yë tsooy tyaj'ëmaaytya'aktë, yë'ë yaj'ëmaaytyaktëp yë tsooy mëti'ipë pëjkëtëpën.

³²Ka'apës yë'ëjëty të niminy wa'ats ja'aytyëjk, yë'ëjës të niminy pokyjä'äytyëjk.

³³Tääts t'ënëmaaytyë ja Jesús: Yë Juan yë y'ijxpëjkpëtëjkëty ets fariseë y'ijxpëjkpëtëjkëty ayuu'ajtëp ni'ik ets nëkooyë Tios tja'amyäjtsnëtë; e mijts yë m'ijxpëjkpëtëjk xëmë kyäytyë y'uuktë ku'uxyë.

³⁴Ënät ja Jesús y'ëtsooy: ¿Mëpaat jëtää miits xyaj'ayuu'atë ja woypyë witsypë ma ja to'oxytyëjk yajnikay yajkni'uukyë ko ënäty jam yajpaatë mëët ja ye'etyëjk mëti'ipë pëkaanpënë?

³⁵E pyatäämpy ja xëëw po'o ma ja ye'etyëjk yajmënëjkxa'anyën, ko ënäty ja xëëw po'o tpaaty jää nëjkxy y'ayuu'atë.

³⁶Näyjyëtu'un tnimëtyäky ya'atë ijxpät: Ka'ap pën ja pakwit t'akëyë mëët jemywyit, jä'ä ko yë jemywyit nëëmujkp yë'ë ets ka'ap nyäpyäätyë oy mëët yë tukwit.

³⁷Näy ka'ap ja tsatsym nyëë pën t'atämë ma tuk po'ojën, jä'ä ko yë jempyë tsatsym nyëë nyajtskë'tsëp ja tuk po'o ets ja tsatsym nyëë y'ixtemy ets wyintëkoy ja tuk po'o.

³⁸Paaty ja tsatsym nyëë jempyë jap yaj'atämë ma ja po'o jempyën.

³⁹Näyjyëtu'un ka'ap pën ja tsatsym nyëë jempyë t'uuka'any pën tëë t'uuky ja tukpë, jä'ä ko y'ëna'antë: Yë tukpë xu'kx ni'ik jyawë.