Read Biblia Mixe de Quetzaltepec Lucas 9 Bible Online

Lucas 9 - Biblia Mixe de Quetzaltepec bible

Lucas 9

¹Tääts ja Jesús tmëkajpxmujky ja nimajkmäjtskpë ja y'ijxpëjkpëtëjk ets tmooy ja mëk'ajtën, kutujkën ets ja ku'oypyë t'ixkäxtëty ets tyajtso'oktëty ja pa'amja'ay.

²Ojts tkexy ets tkajpxwa'kxtëty ja Tios kyutujkën ets tyajtso'oktëty mëti'ipë pëjkëtëpën.

³Jëtu'un t'ënëmaay: Ka'ap mnitu'uye'eyëk xykyontëty: këtii xymyënëjkxtëty yë tajk, xuumy, tsajpkääky, meeny; tu'ukyë mwit xymyënëjkxtëty mëti'ipë mwit'ajtëpën, ka'ap myäjtskëty.

⁴Ko mtëkëtëty tëkoty, itë jam koonëm mtsoontëty kajpnjotm.

⁵Pën ka'ap mkupëkëtë, pëtsëmtë jam kajpnjotm ets ja pu'uxm xywyinxitëty mtekykyëjxm jëtu'un xytyuk'ixtëty ko pokymyëët wyë'ëmtë.

⁶Ojts ye'eywya'kxtë ets nyëjkxtë oymyakajpnëty, tkajpxwa'kxtë ja oy aaw oy ayuk ets ja pa'amja'ay tyajtso'oktë.

⁷Tääts ja yajkutujkpë Herodes tmëtoy'äjty ko ja Jesús yajnimëtyä'äky ets tu'kkë'ëyë mëti'ipë tyuunpyën. Ka'ap y'ëkwinma'anypyatnë, jä'ä ko tap ja ja'ay mëti'ipë ënantëpën ko Juan Yajnëëpäjtpë të jyuukpyiky,

⁸wiinkpë y'ëna'antë ko ja Tios ja kyäjpxynyajxpë Elías të kyëxë'ëky ets ja wiinkpë y'ëna'antë ko yë'ë nitu'uk ja Tios ja kyäjpxynyajxpë të jyuukpyiky.

⁹Ënät ja Herodes y'ënäny: Ëjts ja Juan ojts nni'ënä'ämë ets yajkyo'kpuxëty. ¿Pën ja'ay tääpë mëti'ipës nmëtoy'ajtypyën yajnimëtyä'äky? Paaty ja Herodes tja'ixany ja Jesús.

¹⁰Tääts ja Jesús ja y'ijxpëjkpëtëjk jatëkok jyajtë ets tukmëmëtyaktë ja Jesús, wi'ixëty ënäty të tuntën winë. Ënät ojts wyoowtsoonëtë ets ëpëky yajnëjkxëtë jam Betsaida kyajpnjotm.

¹¹Ko ja mayjyä'äy tnija'awëtyë, tääts ojts tpanëjkxtë. Jesús kyupëjk ja mayjyä'äy ets tukmëmëtyäky ja Tios ja kyutujkën ets ja pa'amja'ay nimay tyajtsoky.

¹²Tsu'ujënëp ënätynyë, tääts nyimiinëtë ja nimajkmäjtskpë y'ijxpëjkpëtëjk ets y'ënëmaayëtë: Wimpakäjxnë yë mayjyä'äy wä'än nëjkxtë jam kajpnjotm ets jya'ajta'aktëty, wä'än nëjkx t'ixta'atë kyääkyëty jyi'kxëty ets mya'atëty pyo'kxtëty, jä'ä ko ka'ap yaa tii.

¹³Ënät ja Jesús y'ënëmaayëtë: Yajkaytyë miitsëty. Tä t'ënëmaaytyë ja Jesús: Je'eyë tsajpkääky yap mëkoxk ets ja ajkx mäjtsk, ¿ëkë nëjkxës n'ëkjuytyë kääky uuky ets ya'atë mayjyä'äy kyäytyëtyë?

¹⁴Nimëkoxk mil ënäty ja ja'ayëty. Tääts ja Jesús t'ënëmaay ja y'ijxpëjkpëtëjk: Yajnaaxwäätstë yë ja'ay tu'kkëëyi'ikyëty, niwëxtyikxy majkjaty.

¹⁵Ets jëtu'un tuuntë ets ja ja'ay tyajnaaxwä'tstaaytyë.

¹⁶Ënät ja Jesús tkoonë'ky mëkoxk ja tsajpkääky ets ja ajkx mäjtsk, tääts pya'at'ijxy tsajpwinm ets ja Tios tkukajpxëy. Ënät ojts tujkwä'kxy ja tsajpkääky ets tmooy ja y'ijxpëjkpëtëjk ets ja mayjyä'äy tmo'otëty.

¹⁷Ojts ja ja'ay ni'ëmukë kyäytyë ku'uxyë ets tpëjkmujktë majkmäjtsk katsy ja tsajpkääky natëkë ets ja ajkx natëkë.

¹⁸Jam ënäty tëkok ja Jesús ja Tios tja'amyetsy nätyu'uk, ënät ja y'ijxpëjkpëtëjk tyajtëëy: ¿Wi'ix yë ja'ay y'ëna'antë, pën ëjts?

¹⁹Tääts y'ëtsoowtë: Tam mëti'ipë ënantëpën ko mijts Juan Yajnëëpäjtpë; wiinkpë y'ëna'antë ko mijts m'Eliësëty, nän tam mëti'ipë ënantëpën ko mijts Tios kyäjpxynyajxpë të jyuukpyiky mëti'ipë tëëyëp juukyajtpën.

²⁰Ets tjaakyajtëëy: E miitsëty, ¿wi'ix m'ëna'antë, pën ëjts? Ënät ja Pedro y'ëtsooy: Mkristë mijts, Tios U'unk.

²¹Ënät ja Jesús ojts mëk'äämpy tuk'ëne'emy ja y'ijxpëjkpëtëjk ets ka'ap tnimëtya'aktëty.

²²Ets t'ënëmaay: Yë naaxwiinyëtë ja'ay y'U'unk mëk y'ëyowa'any; ka'ap yë mëjja'aytyëjk, teety wintsëntëjk ets ja tsajptëkotyëtë yaj'ijxpëjkpëtëjk kyupëka'anyë. Yaj'ookantëp, je'eyëp ko kom tëkëëk xëëw jatëkok jyuukpyëka'any.

²³Ok ni'ëmukë y'ënëmaayëtë: Pën tsyojkpy etsës n'ijxpëjkpë'atëty, wä'än kyë'ëm winma'any tja'atyëkoy ets winjëpom ja wyinma'any mëk tpëjkta'akëty ijxtëm tu'uk ja ja'ay ja kyëruuts tpatsëmyën ko ja y'o'kën t'anëjkxë, ënätës xypyaminëty.

²⁴Yë'ë ko pën yajtso'okäämpyën ja jyuukyajtën yajtëkoyäämpy jä'ä; e pën yajtëkoopy ja jyuukyajtën mëët ëjtskyëjxm, yë'ë ja nitsokën pyatäämpy.

²⁵¿Tii ja ja'ay tyajwa'anëty ja jyuukyajtën oy tjamëët'ajta'ay tu'kë'ëyë winë ja naaxwiinypë yajtukjuuky'ätyën, pën kë'ëm nyäyajtëkoyë?

²⁶Pën xytyuktsëtyuumpës ets n'aaw n'ayukës tuktsëtyuunë; näjyëtu'un tyuktsëtyuna'anyë ja naaxwiinyëtë ja'ay ja y'U'unk, ko ënäty myiny mëët ja Tios Teety ets ja wa'ats anklëstëjk ja myëj'ajt y'oyajtën.

²⁷Tëy miits n'ënëëmëtë ko ka'ap nya'ooka'antë jënaakën yë ja'ayëty mëti'ipë tyam yaa yajpatëpën, ënätnëm nëjkx y'ooktë ko t'ixtëty ja Tios ja kyutujkën.

²⁸Tuktujk xëëwëp ënäty ja Jesús jëtu'un myëtyä'äky, ko pya'tëjkëy kopkëjxm Tios mëkajpxpë. Wyoow ja Pedro, Santiagë ets ja Juan.

²⁹Ko ja Jesús ënäty ja Tios jam tmëkäjpxy, tääts ja wyiin jyëjp tyëkajtsy ets janty ajajp atë'kxp ja wyit yaj'ixy.

³⁰Ënät jam nimäjtsk ja ja'ay kyëxë'ktë mëti'ipë mëët myëtya'aktën ja Jesús. Jä'ä ja Moisés ets ja Elías,

³¹atë'kxtëp yaj'ixtë ets nikajpx nimëtya'aktë wi'ix ja Jesús ënäty y'ooka'anyën jam Jerusalén.

³²Nëkooyë ënäty ja Pedro mëët ja myëku'uktëjk mya'ajanëtë. Juuky tsyuunajxtë, ënät t'ijxtë ja Jesús myëj'ajtën jyääntyajtën ets ja ja'ay nimäjtskpë mëti'ipë ënäty jam mëët tyänën.

³³Ko ja ja'ay jyëwa'ktë ënät ja Pedro t'ënëmaay ja Jesús: Wintsën, oy koos yaajëty. N'oytyuntës tëkëëk yë ujts aaytyëjk; tu'uk mijts yë mjä'ä, tu'uk yë Moisés yë jyä'ä ets tu'uk yë Elías yë jyä'ä. Ja Pedro ka'ap nijawë tii ko jëtu'un y'ënä'äny.

³⁴Tyam jëtu'un y'ënä'äny ko ja yoots yajnitujkëtë ets tsyë'këtyë.

³⁵Ënät tmëtoowtë yootsjoty tu'uk ja ayuk: Ëjts ya'atë n'u'unk, mëti'ipës të nwin'ixyën. Mëtoow'itë wi'ix y'ënä'änyën.

³⁶Ko tmëtoowtë ja ayuk, tääts t'ijxpatë ko ja Jesús nätyu'uk jam. Yu'utsy tyaj'ijtë, ni pën tkatuk'ëwa'anëtyë ko ënäty jëtu'un të t'ixtë.

³⁷Komjëpom, ko tsyo'ontë jam kopkëjxm ënät ja mayjyä'äy tnimiintë ja Jesús.

³⁸Ets tu'uk ja ja'ay mëktä'äky y'ënëmaayë: Wintsën, ëk'ijxkës yë n'u'unk. Yi'iyës tu'ukyë n'u'unk'ajtyp.

³⁹Xëmë ku'oypyë myätsyë ets yajyä'äxy yajjokyë, mootyë pa'am myëët'ajtyp, yaxon o'pyk jyänty pyëtsimy y'aawjoty, o'ktëy jyäty kyëpety, ka'ap y'ëk'ëxmatsanënë.

⁴⁰Tëës njamënu'kxtä'äky yë m'ijxpëjkpëtëjk ets jeexyë tyajkpëtsëmtë yë ku'oypyë ka'ap të myäyëtë.

⁴¹Tääts ja Jesús y'ënäny: Miits, ja'ayëty, ka'ap mmëpëktë ets ka'ap tyiyëty mëti'ipë mtuuntëp mkajpxtëpën. Jekyës yam njayajpatkojy mëët miitsëty ¿tii ko ka'ap mëpëktë? Yaa m'u'unk yajmin.

⁴²Ko ja yujkyeeky ëna'k tyajmiintë, ënätyë ja ku'oypyë yajkëtaawë ets pyätë ja mootyë pa'am. Ënät ja Jesús twinkukajpxëy ja ku'oypyë ets tyajtsoky ja yujkyeeky ëna'k ets tukë'ëtëjkëy ja u'unkteety.

⁴³Mëj'ixy ja ja'ay t'ijxtë ko ja Tios ja myëj'ajtën tyajwinkëxë'ëky. Tam ënäty ja mayjyä'äy mëj'ixy t'ixtë mëti'ipë tyuunpyën ja Jesús, tääts ja Jesús ja y'ijxpëjkpëtëjk t'ënëmaay:

⁴⁴Mëtoow'itë ya'atë aaw ayuk mëti'ipë yam ntukmëtowantëpën. Yajkë'ëyakaanp yë naaxwiinyëtë ja'ay yë y'U'unk ma ja'ayëtyën.

⁴⁵Ja y'ijxpëjkpëtëjk ka'ap tja'akyujkëtyë ko jëtu'un y'ënä'äny, jä'ä ko ka'ap ënäty ja wijyajtën yajmo'otënëm ets tja'akyukëtëty; tsë'këtëp näjyëtu'un paaty ka'ap ja Jesús tyajtëëwtë tii jyatijäämpyën.

⁴⁶Tääts nyäyajtëwëtë nixim niyam ma yë'ëjëtyën, pën ni'ik mëj'äämpy.

⁴⁷Ko ja Jesús tnija'awëy wi'ix y'ëna'antën, ënät tyaxëy tu'uk ja pi'k ëna'k ets tpëjktäky pyë'aay,

⁴⁸ets y'ënëmaayëtë: Pën ya'atë pi'k ëna'k kyupëjkpy ëjtskyëjxm, nän ëjts ënäty xykyupëjkp ets pën xykyupëjkpës, yë'ë näjyëtu'un kyupëjkpy mëti'ipës xykyäjxpën. Pën mutsk näpyëjktakëp ma miitsëtyën, yë'ë mëj najxp.

⁴⁹Tääts ja Juan t'ënëmaay ja Jesús: Wintsën, tëëjës n'ixy tu'uk ja ja'ay mëti'ipë mijts ja mmëkajtën yajtuumpyën ets ja ku'oypyë t'ixkexy. Yë'ë ko ka'ap ëëtsajtëm xypyajëtijtëmë, tëëjës nja''akajpxtuka'antë.

⁵⁰Ënät ja Jesús y'ënäny: Ka'ap xy'akajpxtuktëty. Pën ka'ap xymyëtsip'ajtëmë, ëëts mëët yë'ë nyajpatëmë.

⁵¹Ko ja xëëw po'o ënäty tpatnë ma ja Jesús pya'tëkëjanën tsajpjotm, tääts ojts amëk jotmëk nyijkx Jerusalén.

⁵²Ojts jëwyiin tkexy ja kyäjpxynyajxpë. Ko jyajtë ma tu'uk ja mutsk kajpnën Samaria y'itjotm, ënät t'ixtaaytyë ja ja'ajtakn.

⁵³Ka'ap ja Samaria ja'ay kyupëjkëtë, jä'ä ko tnijawëtë ko Jerusalén nyijkx ja Jesús.

⁵⁴Ko ja Santiagë ets ja Juan jëtu'un tmëtoowtë, ënät t'ënëmaaytyë: Wintsën, ¿Myajkutujkpy mijts etsës n'amëtowtëty ja jëën tsajpjotm, wä'än yë ja'ay tkutëkoytyë?

⁵⁵Tääts ja Jesús wya'akwinpijty ets twinkukajpxëy.

⁵⁶Tääts tsyo'ontë ets ojts nyëjkxtë ëpëkykyajpn.

⁵⁷Ko ënäty tyu'uye'eytyë ënät ja Jesús tu'uk ja ja'ay y'ënëmaayë: Wintsën, mpatsonäämpy mijts ma mnëjkxyën.

⁵⁸Ënät ja Jesús y'ëtsooy: Nikë tää yë wax yë jyut ets joon tää yë pyä'än; yë naaxwiinyëtë ja'ay yë y'U'unk ka'ap tmëëtëty ma kyëpajk tkëxkonëtyën.

⁵⁹Tääts ja Jesús ja ja'ay wiinkpë t'ënëmaay: Pamiinkës. Ënät ja ja'ay y'ëtsooy: Wintsën, minës nëjkx jëwyiin ja nteety n'ëkyajnaaxtëkë.

⁶⁰Ënät ja Jesús y'ëtsooy: Wä'än yë ja'ay tyajnaaxtëkëtë yë y'o'kpë mëti'ipë näjyëtu'un ookantëpën; mijts minmës ets xykyajpxwa'kxëty ja Tios ja kyutujkën.

⁶¹Jëtu'un ja wiinkpë y'ënëmaayë: Wintsën, mpatsonäämpy mijts, je'eyëp ko nëjkxës jëwyiin n'ëknäjyëjpkäjpxyë maas yë ntëjkën.

⁶²Tääts ja Jesús y'ëtsooy: Mëti'ipë ja'ay yajtsajpkaayuupën ets janaam jatsojk y'ijxwinpity, ka'ap jëtu'unpë tsyokyë ma Tios yë kyutujktaknën.