Read Biblia Mixe de Quetzaltepec Deuteronomio 14 Bible Online

Deuteronomio 14 - Biblia Mixe de Quetzaltepec bible

Deuteronomio 14

¹Tëë xynyijawëtë, ko miitsëty mWintsën m'u'unk'ajtëtëp. Paaty këtii nëkoo mjot mnini'kx oy wi'ix xytyuntëty, këtii nëkoo xyajtsëtyut xyajwintëkoytyëty. Ni yë'ë mwaay mkopk ëxaty xykyatuntëty ko pën y'ookëty tyëkoyëty.

²Jä'ä ko yë mWintsën Tiosëty yë'ë të y'ënä'äny, ko miits mjä'ä'ata'anëtë. Paaty kë'ëm të mtimwin'ixëtë ma wiinkëtypë ja naax kajpnën ets yë'ë mjä'ä'ata'anëtë.

³Këtii tii xyjyë'kxtëty mëti'ipë ëxëëkën.

⁴Tyaa këxja'ay myiny ets xynyijawëtëty mëti'ipë jëyujk mëpaat xytsyu'utstën. Jyëkyäpëp xytsyu'utstëty yë tsajpkaa, tsajppax, kupixyny,

⁵ets ja jëtyu'u u'unk, pax, tsajppax mëti'ipë aayjoty ujtsjoty yajpatëpën ets oymyëti'ipë jëyujkëty mëti'ipë wajmëëtën.

⁶Jyëkyejpy xytsyu'utstëty tëkokyë yë jëyujk mëti'ipë apu'uyëpën, mëti'ipë yë tyekyxyooky amäjtsk ëkë axeenyën.

⁷E ja jëyujk mëti'ipë mëpaat ka'ap xytsyu'utstën, oy jya''apu'uyëtë, ëkë oy ja tyekyxyookyëty jyaxeenyëty. Yë'ë jëyujk jëku'ux, mëj tsuk ets tsik ka'ap mëpaat xytsyu'utstë oy jya''apu'uyëtë ets oy yë tyekyxyooky jya''axeeny'atë.

⁸E ëtsëm näjyëtu'un jyamëët'ajtyp axeeny yë tyekyxyooky, je'eyëp ko ka'ap y'apu'uyë, këtii xytsyu'utstëty. Tääpë jëyujk ëxëëkjëyujk mëpaat xyajnaxtë ets këtii yë nyi'kx kyopk xytsyoonëtëty ko ënäty muum të y'ooky.

⁹Yë nëë jëyujk jyëkyejpy xytsyu'utstëty. Yë'ë mëti'ipë jam yë kyäknën ets nyimeenyën.

¹⁰E pën kajts tii yë kyäkn ets ka'ap näjyëtu'un tmëëtëty yë nyimeeny këtii xytsyu'utstëty, ëxëëk tääpë nëë jëyujk xytyijtëty.

¹¹Yë joon jëyujk, oymyëti'ipëty, pën oytsyu'tsnë jyëkyejpy xytsyu'utstëty.

¹²E tii tëy ka'ap mëpaat xytsyu'utstë yë witsn, me'ky, pajkjëpip, wojny,

¹⁴lut, wëëky,

¹⁵yutyk, ju'k, wääk'oo, nëë'apatë,

¹⁶pix, jëpityë, kexyky,

¹⁷tsu'kxy, këwayerë, pooplaan,

¹⁸wojny, ënääwkëtsey ets tëëxy.

¹⁹Tëkokyë yë tsukts aak ëxëëk yë nyäxy, ka'ap mëpaat xytsyu'utstë.

²⁰Yë joonëty mëti'ipë të yajnikajpxtën ko tsyu'utsëty, jyëkyejpy xytsyu'utstëty.

²¹Yë jëyujk najts'ookë këtii xytsyu'utstë. Wa'ats mnäyaj'itëtëty, jä'ä ko miitsëty yë'ë yë Wintsën mkajpn'ajtëtëp. Pën yajpatp yë jaaypyaat jaaypyo'kxy ma miitsëtyën, yë'ë jyëkyäjptëp tsu'utstëty, nän jyëkyejpy xytyukmëtooktëty ja jaaypyaat jaaypyo'kxy mëti'ipë tu'u'am'ajtëpën. Yë tsajppax u'unk tsu'utsy këtii xyajkëëwjëtitëty mëët yë tyaak yë tyi'tsk nëë.

²²Ko winjëmëjt yë mpëjktä'äky xyajpëtë'ëktëty, nëjkxëp wäänë xypyupëktë mëti'ipë ja Wintsën mo'otëpën.

²³Mëti'ipë ënäty mpupëjktëpën oy yë'ëjëty yë tsajpmok, tsatym nyëë, ëkë on; ëkë wä'än yë'ëjëty ja më''ëka'anypë myinyën naaxwiiny, ejxtëm ja mjëyujk mtsajpkaajëtyën, mtsajppaxëty, ëkë mkupixynyëty, jam nëjkx xytsyu'utstë xyjyë'kxtë jam wyintum ma ja mWintsënëtyën, ma ja it naaxwiinyëtën mëti'ipë ënäty yë'ë kë'ëm të twin'ixyën ets jam yaj'ëwtat yajmëjjawëty. Jëtu'un'äämpy xytyukjatëty wi'ix mëpaat ja Wintsën xëmë xywyinkutsë'ëkëtën.

²⁴Pën yë Tios mkënu'kxëtëp ënäty mëët yë mpëjktä'äkyëty ets xyjyayaka'antëty ma tu'kpëky yajëpëkyën ja majk pëkpyë, e jëkäm ja it naaxwiinyëtë yajpaaty mëti'ipë të twin'ixyën ma yajmëjjawëtyën.

²⁵Jyëkyejpy xytyooktëty mëti'ipë ënäty myakantëpën ets ja nyimeeny mëti'ipë ënäty ja ja'ay tyukujuupyën yë'ë mmënëjkxtëp jam ma ja it naaxwiinyëtën mëti'ipë ënäty ja Wintsën të twin'ixyën.

²⁶Yë'ë mtukjuyëp tii ënäty m'a'ijxëpën. Jyëkyejpy xyjyuyëty yë tsajpkaa, tsajppax, kupixyny, tsatym nyëë, ëkë oytyiinëëjëty mëti'ipë tëë xyunyën; mijts kë'ëm m'ixëp tii ënäty mjuyäämpy, yë'ëts mtsu'utstëp mjë'kxtëp jam Wintsën wyintum mëët ja m'u'unk m'ëna'k, m'u'unk mto'oxytyëjk ets jëtu'un'äämpyts xyaj'apaatëtëty tu'uk ja xëëw.

²⁷Yë Leví ja'ayëty mëti'ipë yajpatëpën ma mnaax mkajpnëtyën, këtii ijxtëkoy ja'atyëkoy xyaj'itëty. Miitsëty wa'ats xynyijawëtë, ko yë'ëjëty ka'ap yë nyaax kyamëty tmëët'atë tä miitsëtyën.

²⁸Wintëkëëk jëmëjt ëpëky xypyëjkta'akëty ma ja tu'kpëkpyë yajëpëkyën ma ja majk pëkpyën; mëti'ipë ënäty mjëpëjkpyën winjëmëjt ma ja mpëjktä'äky y'ity wyintëyën ets xynyipëjkpätëty ma tu'uk ja it naaxwiinyëtën kajpntum.

²⁹Yë'ë mo'otëp yë Leví ja'ayëty, ko ënäty mnimin mnija'tëtë. Miits tëë xynyijawëtë, ko yë'ëjëty ka'ap tii nyaax kyamëty jëtu'un tä miitsëtyën; yë'ë nëjkx xymyo'otë yë jaaypyaat jaaypyo'kxyëty, ku'ooky'u'unkëty ets ku'ooky tyo'oxyëty ets jëtu'un näjyëtu'un yajpaatëty ku'uxyë jotkëtä'äky. Yë Wintsën nëjkxëp mkënu'kxëtë ets mjuuky'atëty mëjwiin këjää ko ënäty jëtu'un xytyuntë.