Read Biblia Mixe de Quetzaltepec Deuteronomio 15 Bible Online

Deuteronomio 15 - Biblia Mixe de Quetzaltepec bible

Deuteronomio 15

¹Win wëxtujk jëmëjt mëpaat ja mjëëky mëku'uk xymyä'kxëtë ja nyëë pyokyëty ets jyuy nyu'kxyëty.

²Yë'ë yaj'antijp: Pën tëë tu'uk yë ja'ay tii yë jyiiky myëku'uk tuknu'kxtsoy, nyimä'kxëp oy ënäty tka'ëkëpäjnë. Oy ënäty ja jyiiky myëku'uk ëkë ja myëkunaax myëkukajpn mëj këjää myënu'kxy'ätyë, ka'ap tukëpätëty. Jä'ä ko tääpë jëmëjt jää mëpaat yë ja'ay yë myëku'uk yë nyu'kxy tnimä'kxë, mëët ko ja Wintsën jëtu'un yajmëjjawë.

³Yë jaaypyaat jaaypyo'kxy jyëkyejpy xy'amëtowëty yë nyu'kxy ets tkëpätëty, e yë mëkunaax mëkukajpn kwanë ko xymyä'kxëty ja nyu'kxy.

⁴Jëtu'un'äämpy ka'ap ni pën y'ëyowëty ma mnaax mkajpnën, yë mWintsën yë'ë nëjkx mkënu'kxyë mëj këjää ma ja it naaxwiinyëtën mëti'ipë mo'ojanëpën.

⁵Ënät jëtu'un pën mëmëtoopy ets mtuumpy, ijxtëm yë'ë tni'ënä'ämën, jëtu'un tä tyam të mtukmëtowëtën.

⁶Pën mtuumpy jëtu'un yë mWintsën nëjkxëp mjantykyënu'kxyë tä yë'ë të twinwanën ets nëjkx mëj këjää xymyëët'aty ja wit meeny, nëjkxëp xymyëët'aty mëti'ipë mëpaat xytyuk'ënu'kxyën ja wiink naax wiink kajpn, e mijts nitii xykyanu'kxëty. Nëjkxëp xy'ëne'emy wiinkëtypë naax kajpn, e mijts ni pën mkanätyuk'ënä'ämëtëty.

⁷Pën yajpatp yë ëyoopëja'ay ma naax kajpnën, mëti'ipë ënäty yë mWintsën të mo'oyën. Yajnikëxë'ëk ja m'oyjot m'oywyinma'any ma yë'ëjën, mo'o tii yajmëyäjtypyën, këtii ja mëkunaax mëkukajpn jëtu'unyë xynya'ixëty.

⁸Pën tii m'amëtoow mpëjktsoowëp, mo'o.

⁹Këtii jëtu'unpë ëxëëk jot ëxëëk winma'any xypyaatëty ets m'ëna'anëty: Tyam ya'atë wëxtujk jëmëjtpë kya'pxanë ma jëtu'unyë nu'kxy yajnime'kxyën. Paaty ka'apës yam tii pën ntuknu'kxa'any ets ka'ap tii ja mjëëky mëku'uk xytyuknu'kxa'anëty. Jä'ä ko pën jëtu'un mijts mja'ay'äty, yë'ë nëjkxëp yë Wintsën tuk'ëwaanë ets ja jëtu'unpë pokytyu'unën nëjkx nyäxy.

¹⁰Mijts mpatëp ets xypyutëkëty yë mjëëky mëku'uk mëti'ipë ëyoop jotëkoopyën. Jä'ä ko yë mWintsën yë'ë y'ixäämpy wi'ix mijts oy winë xytyuny.

¹¹Yaa naaxwiiny naaxkëjxy xëmë xy'ixa'any yë ëyoopëja'ay, paaty oy kyopkpëkyëty ets mijts xymyo'ojëty xykyäxëty yë mjëëky mëku'uk tii yajmëyäjtypyën.

¹²Pën yë mmëkunaax mmëkukajpn nätyo'këp ma mijtsën, wä'än yë'ëjëty ye'etyëjk ëkë to'oxytyëjk ets mëtuna'anyë. Tëtujkjëmëjt nëjkx je'eyë mëtunyë, ko wëxtujk jëmëjt kya'pxnëty, jä'ä nëjkx xyajwë'ëmy ëwaatsëtuuy.

¹³Ko jam tsyoonëty ma mjëën mtëjkën, këtii jëtu'unyë xynyajts'ixëty.

¹⁴Nëjkxëp xymyooypyë yë jyëyujk ets jyi'kxy pyiky, mëti'ipë kyäyëp y'uukëpën. Jä'ä ntijmëty mpëjkwa'kxëp ja wit meeny ets ja jotkujk'ajtën mëët yë'ë, mëti'ipë ënäty ja mWintsën mmooyëpën.

¹⁵Këtii xyjyä'äytyëkoyëty ko mijts ojts jap Egiptë mmëtuny m'ëyoy ets mWintsën yë'ë ojts jap mjuutyë. E paatykyëjxm tyam mijts ya'atë ënä'ämën nmo'oy.

¹⁶E pën yë mtuunpë kë'ëm y'ënä'äny ko ka'ap m'ëxmatsa'anyë mëët ko m'oyjya'awëyëp ko oy xymyëët'aty ets jotkujk nyäjyawëty ma mjëën mtëjkën.

¹⁷Ënät jam xywyoownëjkxëty ma tëjk'akaj yajpaatyën ets mëët tu'uk yë xu'uny xytyukjë'pnajxëty yë tyatsk. E yë'ëts yajtuk'ixëp ko tääpë tuunpë xëmëkyëjxm xyjyä'ä'aty. E pën yë'ë to'oxytyëjk näjyëtu'un nëjkx yë tyatsk xyajjujtë,

¹⁸këtii xywyiinkja'apëty ko xy'ëxmatsëty ja mtuunpë ëwaatsëtuuy. Yë'ë tëë mëtunyë tëtujk jëmëjt ets ka'ap jëtu'un tmëpaaty ejxtëm jeexyë të xymyëjuyën tu'uk ja mëtuunpë mëti'ipë ja mtuunk jeexyë të tyaj'apaatën. E yë'ëts jëtu'un mja'amyätsëp xëmë, ko yë mWintsën jëtu'un mkënu'kxa'anyë tä ënäty mijts oy winë xytyunyën.

¹⁹Tëkokyë yë jëyujk yä'äypyë mëti'ipë ëka'any miintëpën naaxwiiny, yë'ë mëpaat xytyuknipëjkë'ëkëtë ja mWintsën. Këtii ënätyë xyajtuunë'kojëty yë mtsajpkaa yä'äy, mëti'ipë ëka'any të myëxu'unk'atyën, ka'ap yë nyi'u'kxy ënätyë xypyëjkëty yë mkupixyny, mëti'ipë kä'äxkopkën.

²⁰Tääpë jëyujk të yajnimëtya'aktën winë jëmëjt nëjkx xytsyu'utstë mëët ja m'u'unk mto'oxytyëjk jam ma mWintsënën, ma ja it naaxwiinyëtën mëti'ipë ënäty yë'ë kë'ëm të twin'ixyën.

²¹E pën tääpë jëyujk ma'at yë kyë'ë tyeky, ëkë wyiin, ëkë pëjkëp ijxëp, këtii yë wintsën xymyo'ojëty.

²²Tääpë jëyujk jyëkyäpëp jam xytsyu'utsëty ma mnaax mkajpnën, wä'än yë'ëjëty mëti'ipë ënäty ja kënu'kxynyëë të nyätyukpaatyën ets mëti'ipë ka'apën, jëtu'un xytsyu'utstëty tä yë jëtyu'u ëkë pax yajtsu'utsyën.

²³Yë'ë tëy yë nye'pny këtii yë xyjyë'kxëty, je'eyë xynyaaxnitajëty ëkë xy'ixtämëty tä nëëjën.