Read Biblia Mixe de Quetzaltepec Deuteronomio 19 Bible Online

Deuteronomio 19 - Biblia Mixe de Quetzaltepec bible

Deuteronomio 19

¹Ko ënäty ja Wintsën të tyajkutëkooytyä'äy ja naax kajpn, mëti'ipë jam yajpatëpën ma ja it naaxwiinyëtë mëti'ipë miits mjä'ä'atantëpën ets jam ja mnaax mkajpnëty ets ja mjëën mtëjkëty ënäty të xypyëjktaknëtë.

²Nëjkxëp tëkëëk ja naax kajpn xyajwë'ëmtë ëpëky, ma ja it naaxwiinyëtën mëti'ipë ënäty ja Wintsën mooyëtëpën.

³Ets ja në'ë tu'u mëti'ipë jam ja'tëpën, yajxon nëjkx xyaj'oyëtë. Tëkëëkpëky xyajwa'kxtë ja it naaxwiinyëtë mëti'ipë ja Wintsën mooyëtëpën, jam kyäktso'oktëty oypyënëty, ko pën ja myëku'uk tyaj'ook tyajtëkoyëty ets ka'ap tsyokyëty tuny.

⁴Pën ënäty ja myëku'uk të tyaj'ooky, jyëkyäpëp jam kyäktso'okëty, pën ka'ap ënäty tsyokyëty tuny ets ka'ap ma ja myëku'uk të tmëjëën'aty të tmëtsip'aty.

⁵Tä npëjktakmëtyën tu'uk yë ijxpät ko nimäjtsk yë ja'ay nyëjkxtëty ja'axypyujxpë ets nitu'uk pën yë jyätyë kyuka'atu'utëty ets jam jya'tëty ma ja myëku'uk ja kyëpajkën ets y'ookëty. Ja mëti'ipë ja myëku'uk të tyaj'ookyën, jyëkyäpëp jam kyäktso'okëty ma ja kajpnën mëti'ipë ënäty yë'ëkyëjxmën të nyikojë.

⁶Jä'ä ko pën ka'ap ma ja naax kajpn yajpaaty, ma mëpaat ja ja'ay kyäktso'okyën ets yeny oy ja tu'u. Mëti'ipë ja myëku'uk ënäty të y'ookyën tsojk poj'am tpatsoonëty mëti'ipë ënäty të yaja'ay'ookyën ets näjyëtu'un tyaj'o'okwinpitëty. Tyam ja tu'ukpë ka'ap ënäty ja myëku'uk tsokyëty tuny ets ka'ap maa nyämyëtsip'atëtë.

⁷E paatykyëjxm yam ntuk'ënä'ämtë ets ëpëky xypyëjkta'aktëty tëkëëk yë kajpn.

⁸Ko ja Wintsën tyajmëj tyajkëjääjëty ja mnaax mkamëty, jëtu'un tä tukwinwa'anëyën ja m'ap m'okëty,

⁹näjyëtu'un nëjkx tëkëëk ja tsoktakn kajpn xyajni'ikëtë, ëpëky ja tëkëëkpë mëti'ipë jamën. Ënät jyëtu'un'atëty pën mpatuuntëp ja ënä'ämën tëyajtën mëti'ipë yam nmooytyëpën, ko xytsyoktëty xyjyawëtëty yë Wintsën mëti'ipë mTiosajtëpën ets ja nyë'ë tyu'u xëmë xypyanëjkxëtëty.

¹⁰Jëtu'un ka'ap pën ja ne'pyny tam tjä'ätsëty nanëkokyëjxm ma ja naax kajpnën mëti'ipë ja Wintsën mo'ojanëtëpën ets ka'ap pën pyokytsyëëmë'ëkëty ets ja käjpxy y'ëna'anëty yaja'ay'o'kpë.

¹¹E pën ja ja'ay jëtu'unyëm ja myëku'uk tmëtsip'ajtpë, ko muum të twinkuye'eyë, tääts ënätyë të tyaj'ooky ets ënätyë jam kyäktso'okëty ma ja tsoktakn kajpnën.

¹²Ja mëjja'aytyëjkëty yë'ë nëjkx tni'ënä'ämëtë ets tääpë ja'ay yajtsum yajmatsëty. Tääts tkë'ëyaktëty ma ja ja'ay ja myëku'uktëjkën mëti'ipë ënäty të y'ookyën ets nëjkx näjyëtu'un y'ooky.

¹³Jëtu'umpë ja'ay këtii xypya'ëyowtëty, ko jëtu'un xytyuntëty yë'ë ënäty m'ëtujktëp ets ka'ap ja jot ne'pyny nëkoo pën tam tjä'ätsëty ma ja Israel kajpnën; ko jëtu'un xytyuntëty, oy nëjkx winë mwinpëtsë'ëm njëjppëtsë'ëmxëtë.

¹⁴Ja tsëpa'an mëti'ipë ja m'ap m'ok pyëjktaktën ma ja mmëëjëën mëtëjkën, ëkë ma ja mmëkam mmëtu'ujën, nëjkxëp xywyinkutsë'ëkë ets këtii nëkoo xymyëmayëty. Jä'ä ko oy tsuj yë Wintsën tsoky mjuuky'atëty jam ma ja it naaxwiinyëtën mëti'ipë mo'ojanëtëpën.

¹⁵Ko je'eyë ja ja'ay tu'uk y'itëty mëti'ipë ja nëë poky nyikajpxëpën, ijxtëm ko ënäty muum ja ja'ay ja myëku'uk të tyaj'ooky, ma të tyuuntëkoy të kyajpxtëkoyën, ëkë ma tii poky të tunyën. Ënät mëpaat yajmëpëky ja nëë poky, pën nimäjtsk nitëkëëk y'ity ja mëti'ipë poky nyikajpxtëpën.

¹⁶Ko tu'uk yë ja'ay mëti'ipë ëxëëk yë jyot wyinma'any jya'apën tniwaanpätëty ajotkumonë yë myëku'uk ets oy tii poky tuknitijëty.

¹⁷Nimäjtsk yajwoownëjkxtëty ma ja Wintsën yajmëkäjpxyën, näjyëtu'un ma ja teetytyëjkëtyën ets ma ja kutuunktëjkëtyën, mëti'ipë jam tuuntëpën jä'ä xëëw jä'ä jëmëjt.

¹⁸Ja kutuunktëjkëty yajxon nëjkx tnipaye'eytyë ya'atë jotmay, pën janty tëy; e ko ënäty kyatëyëty, jëtu'un ijxtëm ja ja'ay ja myëku'uk tnikäjpxyën,

¹⁹ja ja'ay mëti'ipë ënäty ja myëku'uk nëkoo nyiwaanpejtypyën, jëtu'un nëjkx yajtëytyuny, tä ënäty yë'ë të jya'ëna'anyën ets jeexyë ja myëku'uk yajtëytyuny. Ko nëjkx jëtu'un xytyuntë yë'ë ënäty mka'ijxtaktëp ja ëxëëktu'un ëxëëkajpxën ma miitsëtyën.

²⁰Ko nëjkx ja ja'ay tnijawëtë ja jëtu'unpë nëjkxëp y'ëna'antë: Kajtëm y'oyëty ko jëtu'un nja'ay'ajtmëty ets nëjkxëp ja tsë'ëkë tmëët'atë, këtiipë jëtu'un y'ëtë'ëtstëty.

²¹Këtii pa'ëyo'owën xymyëët'atëty: nitsiptun ja juukyajtën, wiin, tëts, kë'ë, teky.