Read Biblia Mixe de Quetzaltepec Deuteronomio 20 Bible Online

Deuteronomio 20 - Biblia Mixe de Quetzaltepec bible

Deuteronomio 20

¹Ko mnëjkxtëty tsiptuunpë ets xy'ixtëty yë mmëtsip ko nimay ni'ik tmëët'atë yë kyepy wintëkäämpë ets kyëwaayëty, këtii xytsyë'ëkëtëty. Jä'ä ko yë Wintsën yë'ë yajpatp mëët miitsëty, mëti'ipë ojts mjuutëtën jap Egiptë.

²E ko ënäty ja xëëw jëmëjt tpaaty jëna'a ja mëtsiptëjk xywyinkuwa'akëja'antën, ënät nëjkx jëyëjp ja teety tmëkäjpxy ja tsiptuunpëtëjk,

³ets t'ënëëmëty: Mëtoow'itë ya'atë aaw ayuk miitsëty Israel ja'ayëty. Tyam miits yë mëtsiptëjkëty xywyinkuwa'akëja'antë, këtii nijënu'un mtimtsyë'ëkëtëty ets këtii mwinmaaytyëkatstëty.

⁴Jä'ä ko yë mWintsën yë'ë yajpatp ma miitsëtyën ets yë'ë tsiptunaanp mëët yë mëtsiptëjkëty, oy tyimjëna'ajëty ets miits mëta'aktëty.

⁵Ënät ja tsiptuunpë wintsënëty, nëjkx tmëkajpxtë ja tyuunpëtëjkëty ets t'ënëëmëtëty: Pën tëë pën yë tyëjk tnaamkojy ets ka'ap tuktsëënënëm, nikë oy ko wyimpitëty, kajekyën jam tsipjotm y'ëk'o'knëty ets ja jyemtyëjk wiink ja'ay nëjkx tuktsëënë.

⁶Pën tu'uk yë tsatsymkyam të t'ixkukë ets ka'ap ja pyëjktä'äky tjë'kxynyëm, nikë oy ko wyimpitëty, këtiipë wiink ja'ay tjë'kxëty ja tsatymtyëëm, ko ënäty ja nyiwintsën jam të y'ooky tsipjotm.

⁷E pën pëkaanp ënäty tu'uk ja ja'ay ets jam muum ja to'oxytyëjk nijämyëët'aty, nikë oy ko wyimpitëty këtiipë wiink ja'ay tpëkëty ja to'oxytyëjk mëti'ipë ënäty të tnijämyëët'atyën.

⁸Ënät ja tsiptuunpë wintsën, nëjkx jatëkok tmëkajpxtë ja tsyiptuunpëtëjkëty ets t'ënëëmëtëty: Pën tsë'këp ets ka'ap jotkujk nyäjyawëty twinkuwa'akëty amëk jotmëk ja myëtsip, nikë oy ko wyimpitëty këtiipë nëkoo ja myëku'uk tsë'ëkëwinkajpxëty.

⁹E ko ënäty jëtu'un ja tsiptuunpë wintsëntëjkëty të kyajpxta'atë, ënät nëjkx jëyëjp nyaxtë ets tsyoontëty mëët ja tsiptuunpëtëjk.

¹⁰Ko tu'uk yë kajpn xynyitëkëja'antëty, jëyëjp mëpaat xymyëmëtya'aktë yë ja'ayëty mëti'ipë jam tsënaaytyëpën ets xy'ënëëmëtëty, ko ka'ap mtsiptuna'antë.

¹¹E pën ja ja'ayëty mëti'ipë jam tsënaaytyëpën kyupëjktëp, ijxtëm ënäty m'ëna'antën ets mooyëtëp ja najxtakn ets jam mtëkëtëty kyajpnjotm, yë'ëjëty nëjkxëp mëtunëtë ets ja mëkëtypë ja tuunk nëjkx xytyuktuntë.

¹²E pën yë'ëjëty kajts më'oykyajpxëtë, ja tsip jä'ä tyimtsojktëp, ënät nëjkx ja kajpn xyajnatuktë ets xynyitëkëtëty.

¹³Yë Wintsën yë'ë kyë'ëyakäämpy tääpë ja'ayëty ma miitsëtyën ets nëjkx xykyupujxta'atë.

¹⁴To'oxytyëjkëty, pi'k'ëna'këty, jëyujk tsajpkaajëty miits nëjkx xyjyä'ä'atë; tëkokyë mëti'ipë ënäty yë Wintsën të tnikäjpxyën xyjyä'ä'atëty, tuk'it tukxontëmës yë'ë.

¹⁵Ja naax kajpn mëti'ipë ënäty jëkäm yajpatpën mëët ya'atë kajpnëty mëti'ipë ja Wintsën mooyëtëpën, jëtu'un nëjkx xytyuntë tä yam të myajtuk'ënä'ämtën. Jä'ä jëtu'un ja kajpnëty mëti'ipë ka'ap yajpaatyën ma ja it naaxwiinyëtën mëti'ipë ja Wintsën mo'ojanëtëpën.

¹⁶E ma ja naax kajpnën mëti'ipë jam yajpatpën ma ja it naaxwiinyëtën, mëti'ipë ja Wintsën ënäty mooyëtëpën, tëkokyë winëjaty mëti'ipë jam yajpatëpën, nëjkxëp xyajkutëkooytya'atë.

¹⁷Nëjkxëp ëpëky xypyëjkta'aktë ets ja Wintsën jä'ä xytyukwintsë'ëkëtëty, tä yë Hit ja'ayëty, Amor ja'ayëty, Canaán ja'ayëty, Ferez ja'ayëty, Heve ja'ayëty ets Jebús ja'ayëty, jëtu'un ijxtëm ja Wintsën të ni'ënä'ämën, nëjkxëp xyajkutëkooytya'atë.

¹⁸Këtiipë mtukjatëtëty ja ëxëëktu'un ëxëëkajpxën ma ja wyintsën tmëjjaw tjaantyjyawëtën ets ja mWintsën xymyëtëkooynyëtëty.

¹⁹Ko tu'uk yë kajpn jeky natuky xyaj'itëty ets mëët ja nyija'ay mtsiptuntëty ko ja kyajpn xynyitëkëja'antë, këtii yë kyepy xypyuxtëty, jä'ä ko jyëkyejpy yë tyëëm xyjyë'kxëtëty. Yë kepy ka'ap jyëtu'unëty tä ja'ayën mëti'ipë näkyuwanëpën ko ënäty wi'ix xytyuntë.

²⁰Yë'ë tëy yë kepy mëti'ipë ka'ap tyëëmpetyën, jyëkyejpy xypyuxtëty, yë'ëts myajtuntëp ets xyajnatuktëty ja kajpn.