Read Biblia Mixe de Quetzaltepec Deuteronomio 25 Bible Online

Deuteronomio 25 - Biblia Mixe de Quetzaltepec bible

Deuteronomio 25

¹Ko nimäjtsk yë ja'ay tsyiptuntëty, nimäjtsk mëpaat jam nyëjkxtë ma ja yajkutujktaknën ets yajnipaye'eytyëty ja pyokyëty ets ja kutuunktëjkëty yë'ë nëjkx nikajpxtë pën ënäty pokymyëët ets pën ka'ap.

²Ja ja'ay mëti'ipë pokykya'apën, nitëjkëyëp ets yajxon yajwinwopëty, ko'knë yajwopëty ma ja kutuunktëjk jamëtyën ets jëtu'un tkumëtowëty ja pyoky.

³Ja mëti'ipë yajwojpën ka'ap tjëkyepy yajwopëty naxy wëxtyikxy'ok, këtiipë nyäjyawëtëty o'ktëy jam ma ja kutuunktëjkëtyën ets ma ja myëkunaax myëkukajpnën.

⁴Këtii yë tsajpkaa xytyuk'ajäänë'ëktëty yë xuumy, ko ënäty jam xyajpajk'aty ja tsajpmok.

⁵Pën nimäjtsk yë ye'etyëjk tu'kkä'äxpë tukmuktë tëjk ets tu'uk y'ookëty, e ka'ap nitu'uk ja y'u'unk; ja tyo'oxytyëjk ku'ookpyë ënäty të wyë'ëmnën, ka'ap tjëkyepy oy pën ye'etyëjk mëët pyëkëty jatëkok, ja kyäpy jä'ä mëët pyëkëty, jä'ä ko yë'ë ja nyiye'etyëjk ja myëkä'äx.

⁶Ko ja to'oxytyëjk mëtu'uk ëka'any ja y'u'unk tyajmëxu'unk'atëty, jëtu'un nëjkx tukxëëwatë tä ja mëjëyëjpë ja nyiye'etyëjk txëëwatyën, këtiipë ja xyëëw yaja'atyëkoyëty ma ja Israel ja nyaax kyajpnën.

⁷E pën ja ye'etyëjk kajts tpëka'any ja kyäpy, ja to'oxytyëjk jam nëjkx tnikäjpxy ma ja kutuunktëjkëtyën ets ma ja mëjja'aytyëjkëty jam yajpaatën ets y'ëna'anëty: Yë nkäpyës ka'ap tsoky ets y'äjty yë xyëëw ja'amyetsy y'itëty ma Israel kajpnën. Ka'apës xypyëka'any, e ëjts nija'apës ko yë'ë patëp jä'ä ko yë'ëjës nkäpy'äjtyp.

⁸Ënät nëjkx ja kutuunktëjkëty ets ja mëjja'aytyëjkëty tmëjwowtë ja ye'etyëjk ets tmëmëtya'aktëty. Pën janty ënaanpën ko ka'ap tpëka'any ja to'oxytyëjk, mëti'ipë ja y'äjty të tku'ookyën.

⁹Ënät ja to'oxytyëjk twinmëtsujëty ja kyäpy ets tpëjkëty ja kyë'ëk tu'kpa'a ets t'ënëëmëty: Jëtu'un yë ye'etyëjk yajtuny mëti'ipë ka'ap tsokyën ets myëkä'äx yë xyëëw ja'amyetsy y'itëty mëti'ipë të y'ookyën.

¹⁰E ja ye'etyëjk ja y'u'unk tyo'oxytyëjk, jä'ä nëjkx yajtijy jam ma ja Israel ja'ayëtyën kë'ëktuk.

¹¹Pën nimäjtsk yë ye'etyëjk nätsyi'këtëp ets tu'uk tyo'oxytyëjk nyiwaantu'utëtëty ets ja tu'uk jap yajmatsëty ma ja y'ëxtsyaa pajkën.

¹²Jëtu'umpë ja to'oxytyëjk këtii xypya'ëyowtëty, ni'ënä'ämëtë ënätyë ets ja kyë'ë yajnëtsukëty.

¹³Ko tii xytyooktëty këtii mkijpxni'ikëtëty, näjyëtu'un ko mjuytyëty këtii mkijpxni'ikëtëty.

¹⁵Ko tii xykyijpxtëty ets xytyiytyëty, mëtëy mëpaat winë xytyiytyë xykyijpxtë. Jëtu'un'äämpy yë Wintsën jeky myajjuuky'atëtëty ma ja it naaxwiinyëtën, mëti'ipë myajmo'ojantëpën.

¹⁶Jä'ä ko yë Wintsën y'ëxëëk'ijxyp, ko tii oy kyayajtuny.

¹⁷Mja'amyätstëp jëtu'un wi'ix yë Amalec ja'ayëty ojts mtunëtën jam tu'ujotm, ko mtso'ontë jap Egiptë.

¹⁸Yë'ëjëty ninu'un ojts yë Tios tkatimtsyë'ëkëtë, ko mnipëtë'këtë ets ëxëëk mtuunëtë, yë'ëjëty ojts tja'ixtë, ko tëë ënäty m'ënu'kxëtyääynyëtë, ni'ikyë ojts ëxëëk o'ktëy tuntë, mëti'ipë ënäty ix'am të wyë'ëmtën.

¹⁹E paaty n'ënëëmëtë, ko ënäty ja Wintsën tëë mputëkëtë ets ja mmëtsip tëë xyajkutëkooytya'atë, mëti'ipë winkon tsënaaytyëpën ma ja naax kamën mëti'ipë ja Wintsën mo'ojanëtëpën. Yë Amalec këtii xyjyä'äytyëkoytyëty, nëjkxëp xyajkutëkooytya'atë yë y'u'unk y'ëna'këty ets nyaax kyajpnëty.