Read Biblia Mixe de Quetzaltepec Deuteronomio 26 Bible Online

Deuteronomio 26 - Biblia Mixe de Quetzaltepec bible

Deuteronomio 26

¹Ko ënäty jam të mja'ajnë ma ja it naaxwiinyëtën, mëti'ipë yë mWintsën mmo'ojanëpën ets xyjyä'ä'atëty ets ënäty jam të mtsënaaytyaknpëjknë.

²Ja aaytyëëm ujtstëëm, ëkë ja aaypyajk ujtspajk mëti'ipë ënäty ëka'any myajpëtë'kpyën, yë'ë mwin'ixëp yë oyëtypë tsujëtypë ets jap xy'apëkëty ma tu'uk yë katsyën, tääts xymyënëjkxëty jam ma ja it naaxwiinyëtën, mëti'ipë yë mWintsën ënäty kë'ëm të twin'ixyën, ko jam yë xyëëw yaj'ëwtatëty yaja'amyätsëty.

³Ets mnäkyajpxkëxë'ëkëtëty ma ja teetyën, mëti'ipë ënäty jam tuunpën; xy'ënëëmëty: Ëjts yë'ëjës yam nikäjpxyp nWintsën wintum ko tëëjës nja'ty ma ya'atë it naaxwiinyëtën mëti'ipë yë Wintsën ojts tukwinwanën yë n'ap'ajt n'ok'ajtëmë, ko t'ënëmaay koos ya'atë naax kam xymyo'oja'antë.

⁴Tääts ja teety nëjkx t'ëxajë ja katsy ujts mëët ja tsajpmok ets jam tpëjkta'akëty ma ja wintsë'këntyaknën, mëti'ipë yë mWintsën'ajtëm jyä'ä'ajtypyën.

⁵Ets m'ëna'anëty jam mWintsën wintum: Ëëts yë nteety n'apëty, mëti'ipë arameë ja'ayëtyën, tëëyëp jëtu'unyë ojts jyëtitë, ok ojts jap nyëjkxtë Egiptë ets jap tsyënaaytyaknpëjktë. Japts ojts yajxon nyimayëtë ets tu'uk mëj kajpn y'awinpijtë, tääts ojts myëkta'aktë.

⁶E yë Egiptë ja'ayëty ko jëtu'un t'ijxtë, mëktuunk ojts myo'ojëtë, yë'ë mëët yajxon yaj'ëyoowëtë ets tyiytyuunëtë.

⁷Ënät ojts ntuk'ëwaanëtës ja Wintsën mëti'ipës ja n'ap n'ok Tyios'ajtëpën ets xypyutëkëtëtyës, yë'ë ojts tjanty'ixy ëëts ja n'ëyo'on njotmayëty, ja një'ëyënëtyës nyaxënëtyës ets ja nmonyë ntukyëtyës.

⁸Ënät ja myëj'ajtën ojts mëj këjää tyaj'ixyë ets ojts ëëts jap xyjyuutë Egiptë,

⁹ets yaa xyajmiintës ma ya'atë it naaxwiinyëtën, mëti'ipë të xymyo'otënës, ma ka'ap ja jë'kxy pëky y'ëmaaytyä'äkyën.

¹⁰E paatyës yam ëka'any nmëminy ya'atë aaytyëëm ujtstëëm. Mëti'ipë të tyëëm'ajtsoonyën maas yë nkam ntu'ujën, mëti'ipës yë nWintsën të xymyo'oy të xykyexyën. Ënät ja katsy jam xynyajtskëyëty Tios wintum ets mnäkyoxtënaaytya'akëtëty.

¹¹Tääts nëjkx tu'uk yë xëëw xyaj'apaatë. Mëët ko ënäty ja mWintsën mëj këjää të tkënu'kxy ja mkam mtu'u ets tëkokyë ja m'u'unk m'ëna'k, m'u'unk mto'oxytyëjk nëjkxëp mëët tu'ukyë mxëëwtuunta'ay. Ma ja xëëw ënäty jëtu'un xyaj'apaatën, mwowëp ja Leví ja'ayëty ets ja jaaypyaat jaaypyo'kxyëty mëti'ipë yajpatëpën ma mnaax mkajpnën.

¹²Ko ja mëtëkëëk jëmëjtpë tpaatëty, ma yajyäkyën mëti'ipë ënäty majk të yajpupëkyën ma ja mëko'pxpën oy tyimtiijëty, mëti'ipë të xyajpëtë'ëkyën mkamwinm mtu'uwinm ets ënäty ëpëky të xypyëjktakta'ay ets pën tëë näjyëtu'un xymyo'oy ja Leví ja'ayëty, jaaypyaat jaaypyo'kxyëty, ku'ooky'u'unk, ku'ookytyo'oxëty mëti'ipë yajpatëpën ma mnaax mkajpnëtyën ets jotkujk të xyajkay të xyaj'uuky.

¹³Ënät nëjkx m'ëna'any jam mWintsën wintum: Tëës npëjktä'äky ëpëky maas yë njëën ntëjkën ja aaytyëëm ujtstëëm, mëti'ipës të nyajpajk'atyën ets tëë nmo'oyës yë Leví ja'ayëty, jaaypyaat jaaypyo'kxyëty, ku'ooky'u'unk, ku'ookytyo'oxëty, mëti'ipë yajpatëpën ma ëëtsëtyën. Ntunyës jëtu'un mëti'ipës mijts të xytyuk'ëne'emyën ets tëëjës jëtu'un njanty tyuny ets ka'apës ja m'aaw m'ayuk nëkoo je'eyë të nkumëtoownaxy.

¹⁴Ma ënäty pën të y'ookyën ets je'eyë ja monyëtukyë y'ity ets pën näjya'awëyëpës, ko tëëjës ja ëxëëkpë xypyääty ja pëjktä'äky ka'apës nëkoo të ntony. Ets ni o'kpë të nkatukwintsë'ëkës. E paaty yam n'ënëëmë mijts Wintsën, ko tëë nmëmëtoy ets tëëjës ntuny tääjës mijts të xytyuk'ëne'emyën.

¹⁵Mijts Tios mëti'ipë jam ijtpën tsajpkëjxm, ma ja m'ijtaknën wa'atspë, ku'ijxnax yaa naaxwiiny, kënu'kx yë mnaax mkajpn, yë Israel kajpn ets kënu'kx näjyëtu'un yë naaxwiinyëtë mëti'ipës të xymyo'otën ma ja jë'kxy pëky ka'ap y'ëmaaytyä'äkyën ets jëtu'un y'atëwëty ja m'aaw m'ayuk tä ojts xytyukwinwanën ëëts ja n'ap n'okëty.

¹⁶Yë mWintsën yë'ë tyam mtuk'ënä'ämëp ets xypyatunëty yë y'ënä'ämën tyiyajtën ets jä'ä xytyunëty winë'aaw winëjot.

¹⁷Tëë kë'ëm xynyikäjpxy ko yë Wintsën yë'ë mTios'ajtyp ets tëë xytyukwinwanë, ko yë nyë'ë tyu'uyë'ë xypyanëjkxanë ets ko yë y'ënä'ämën tyiyajtën xypyatuna'any ets ko yë'ë xëmë xymyëmëtowa'any.

¹⁸Yë Wintsën tëë näjyëtu'un tnikäjpxy ko mijts Israel kajpn, mijts yë mkajpn'ajtëp, jëtu'un tä ojts mtukwinwanëtyën tëëyëp, e paaty tyam kopkpëky ko yë y'ënä'ämën tyiyajtën xypyatuunëtëty.

¹⁹Yë Tios mëj myaj'awinpita'anyë mëët yë mëj'ajt oyajtën, akäjpxy nimëtyä'äky, mëjpëjktä'äky, ma ja wiinkëtypë ja kajpnën ets jëtu'un mkajpn'ata'anyë tä të tnikäjpxyën, tu'uk ja kajpn mëti'ipë të yajtuknikënu'kxën ja mWintsën Tios.