Read Biblia Mixe de Quetzaltepec Deuteronomio 27 Bible Online

Deuteronomio 27 - Biblia Mixe de Quetzaltepec bible

Deuteronomio 27

¹Ënät ja Moisés mëët ja mëjja'aytyëjkëty ojts ja ënä'ämën tyaktë ma ja naax kajpnën: Mtuntëp ya'atë mëti'ipë yam myajtuk'ënä'ämtëpën.

²Ko ënäty jam të mja'ajnëtë ma ja Jordán mëjnëëjën ets ënäty të xypyatnëtë ja naax kam mëti'ipë ja mWintsën Tiosëty mo'ojanëtëpën, nëjkxëp yë tsaa jam kanaak xytyajëtë ets xytyukwinkoytyëty yë jaam, jëtu'unts poop kyëxë'ëkëty.

³Jam yajkëxja'ajëty tëkokyë mëti'ipës yam të nikäjpxyën. Mtuntëp jëtu'un ijxtëm yam yajni'ënä'ämën, ko ënäty jam mjajnëtë, ma ja it naaxwiinyëtën ma ka'ap ja jë'kxy pëky y'ëmaaytyä'äkyën, mëti'ipë yë Wintsën mo'ojanëtëpën, mëti'ipë tyukwinwa'anëyën ja m'ap m'okëty.

⁴Paaty ko ënäty tëë xytyuknajxnëtë ja mëj Jordán nëë, nëjkxëp jam kopkëjxm xytyajëtë tu'uk yë tsaa ayenypë, ma txëëwatyën Ebal ets jaam poop xywyinkoytyëty.

⁵Nëjkxëp näjyëtu'un tu'uk yë wintsë'këntyakn xyaj'oyëtë, tsaa mtukpotstëp, mëti'ipë yë Wintsën miits yë mTiosëty jyä'ä'atëpën. Ja tsaa mëti'ipë ënäty mtukpojtstëpën ëmuum xyajtuntëty këtii xypyu'uta'aktëty ëkë xytyätstëty. Ma ya'atë wintsë'këntyaknën, jam nëjkx yë Wintsën miits yë mTiosëty xymyo'otë yë wyintsë'kën nino'okpyë.

⁷Ma ya'atë potsyën jam nëjkx näjyëtu'un yajyäky ja wintsë'kën, ko ënäty ja nay'ëëw'oy näykyajpx'oyë y'ity mëët yë Tios ets nëjkx tu'uk yë mëj xëëw xytyuntë jam Tios wintum, ma nëjkx mkaytyë m'uuktën.

⁸Jam tsaakëjxm jam nëjkx tëkokyë xykyëxjaaytya'atë ja aaw ayuk, mëti'ipë yam ntukni''ijxëtyëpën ets mëti'ipë të nmo'otën.

⁹Ënät ja Moisés ojts tkäjpxy ja aaw ayuk ma ënäty jyam'atën ja teetytyëjkëty ets ja Leví ja'ayëty, y'ënäny: Miitsëty Israel ja'ayëty, mëtoow'itë ya'atë ja aaw ayuk, mëti'ipë yam ntukmëtowantëpën. Tyam jä'ä miits të mnajxnëtë Tios yë nyaax kyajpn.

¹⁰Paaty yë'ë jëtu'un mëmëtowtëp ets patuunëtë yë y'ënä'ämën tyiyajtën ets y'aaw y'ayuk, mëti'ipë të mtuknipëkëtën.

¹¹Jä'ä xëëw ja Moisés ojts näjyëtu'un tu'uk ja ënä'ämën tyajwë'ëmy ma ja naax kajpnën ets t'ënëmaay:

¹²Ko ënäty tëë xytyuknajxnëtë ja mëjnëë, mëti'ipë yajtijpën Jordán, yë jyä'äjëty yë Simeón, Leví, Judá, Isacar, José ets Benjamín, yë'ë nëjkx jam wya'ak'oyëtë nitëtujk ma ja Guerizim kopkën ets ja naax kajpn yajkënu'kxëty.

¹³E ja jyä'äyëty ja Rubén, Gad, Aser, Zabulón, Dan ets Neftalí, jam nëjkx wya'ak'oyëtë ma ja Ebal kopkën ets pojkën yajnikajpxëty ma ja naax kajpnën.

¹⁴E ja Leví ja'ayëty mëti'ipë teety'ajtëpën, nëjkxëp tmëkajpxtë ja naax kajpn mëët ya'atë ja aaw ayuk:

¹⁵Poky yë ja'ay wyë'ëmëty mëti'ipë yajkojpyën yë awinax, ja awinax mëti'ipë pujxn mëët y'oytyunyëtyën ets ja ja'ay mëti'ipë tyuunk'ajtypyën janty'oy ja ijxën tmo'ojëty ets ënät tpëjkta'akëty muum yu'utsytyuuy. Yë jëtu'unpë y'ëxëëk'ijxyp yë Wintsën. Ënät ja ja'ay y'ëtsowtëty: Oy, jëtu'un'atëp.

¹⁶Poky yë ja'ay wyë'ëmëty, mëti'ipë ka'ap ja tyeety tyaak tmëj'ixy t'mëjpëjktä'äkyën. Ënät ja ja'ay y'ëtsowtëty: Oy, jëtu'un'atëp.

¹⁷Poky yë ja'ay wyë'ëmëty, mëti'ipë tsëpa'an ayu'utsy ame'tsyë wyijtstëkajtsypyën, ma jyiiky myëku'uk mëët nyäpyäätyë. Ënät ja ja'ay y'ëtsowtëty: Oy, jëtu'un'atëp.

¹⁸Poky yë ja'ay wyë'ëmëty mëti'ipë wyoowma'typyën tu'uk yë wiints. Ënät ja ja'ay y'ëtsowtëty: Oy, jëtu'un'atëp.

¹⁹Poky yë ja'ay wyë'ëmëty, mëti'ipë o'ktëy yë jaaypyaat jaaypyo'kxy tyuunpyën näjyëtu'un yë ku'ookytyo'oxy ets ku'ooky'u'unk. Ënät ja ja'ay y'ëtsowtëty: Oy, jëtu'un'atëp.

²⁰Poky yë ja'ay wyë'ëmëty mëti'ipë myëët'ajtypyën yë tyeety yë tyo'oxytyëjk. Jä'ä ko tyeety jëtu'un ënäty yë myëyajtën wyintsë'kën yajtëkooyëp. Ënät ja ja'ay y'ëtsowtëty: Oy, jëtu'un'atëp.

²¹Poky yë ja'ay wyë'ëmëty mëti'ipë yë jëyujk myëëtko'knääpyën, jëtu'un tä jeexyë tu'uk yë to'oxytyëjk tmëëtko'knë. Ënät ja ja'ay y'ëtsowtëty: Oy, jëtu'un'atëp.

²²Poky yë ja'ay wyë'ëmëty mëti'ipë myëëtko'knääpyën yë myëkä'äx to'oxytyëjkpë, oyxyëp wiink to'oxytyëjkëty tjataak'aty, tu'ukyë tyeetyëty tukmuktë, ëkë mëti'ipë wiinkteetyën, tu'ukyë ja tyaakëty tukmuktë. Ënät ja ja'ayëty y'ëtsowtëty: Oy, jëtu'un'atëp.

²³Poky yë ja'ay wyë'ëmëty mëti'ipë myëëtko'knääpyën yë tyo'oxytyëjk më't. Ënät ja ja'ay y'ëtsowtëty: Oy, jëtu'un'atëp.

²⁴Poky yë ja'ay wyë'ëmëty mëti'ipë yë jyiiky myëku'uk yaj'o'kpy yajtëkoopyën ets oy mëët të nyäjyawëty. Ënät ja ja'ay y'ëtsowtëty: Oy, jëtu'un'atëp.

²⁵Poky yë ja'ay wyë'ëmëty mëti'ipë yë myëku'uk nyimeenypyijkpyën ets tyaj'ook tyajtëkoyëty, oy ënäty nitii poky të tkatuny. Ënät ja ja'ay y'ëtsowtëty: Oy, jëtu'un'atëp.

²⁶Poky yë ja'ay wyë'ëmëty mëti'ipë ka'ap tkupëkyën ya'atë aaw ayuk, mëti'ipë yajnikajpxpën ets ka'ap tpatuny. Ënät ja ja'ay y'ëtsowtëty: Oy, jëtu'un'atëp.