Read Biblia Mixe de Quetzaltepec Deuteronomio 29 Bible Online

Deuteronomio 29 - Biblia Mixe de Quetzaltepec bible

Deuteronomio 29

¹Jëtu'un ojts jyëjpkëxy ja mëtyä'äky mëti'ipë ja Wintsën tyuk'ënä'ämën ja Moisés ets tunëty tu'uk ja käjpxytyu'unën mëët ja Israel kajpn jam Moab. Ëpëky ja käjpxytyu'unën mëti'ipë tyuunën jam ma ja Horeb kopkën.

²Ko ja Moisés tyajtu'ukmujktaay ja naax kajpn, ënät t'ënëmaay: Miitsëty Israel ja'ayëty, tëë xy'ixtë wi'ix yë Wintsën o'ktëy të tunyën yë yajkutujkpë mëët yë wyintsëntëjk jënu'un mëët tyuunmukyën jap Egiptë.

³Ets miitsëty tëë wa'ats xy'ix xynyijawëtë wi'ix yë Wintsën yë myëj'ajtën jap të tyaj'ixyën ets wi'ix mëj këjää winë të tunyën.

⁴E tyampaat yë Wintsën ka'ap tyajkutukynyëm ets xyjyä'äkyukëtëty ets xywyinjawëtëty wi'ix'äämpy ko tëkokyë ya'atë të tuny.

⁵Ix jënu'un miitsëty të ntu'uwinwowtë, yaa të'ëts'ituuy wëxtyikxy jëmëjt ets ma tääpë wëxtyikxy jëmëjtpë të nyäxyën, ka'ap yë mkë'ëkëty ets mwitëty wi'ix të jyatë.

⁶Ka'ap nitu'k'aawën të xyjyawëtë yë tsajpkääky ets tsatym nyëë ets oymyëti'ipë nëëjëty mëti'ipë mukpën, e tiikyëjxmën ko të jyëtu'un'aty, jä'äkyëjxm ets xynyijawëtëty ko yë Wintsën yë'ë tu'uk Tios'ajtp.

⁷Ko ojts nja'ajtëmë ma tääpë it naaxwiinyëtën, ënät ojts xynyitso'onëmë yë Sihón yajkutujkpë ets xyaj'o'kta'aja'anëmë. Yë'ë mëti'ipë ënäty jam yajkutujkpën Hesbón, ojts mëët nyäpyikyë yë Og, jampë yajkutujkpë'atyën Basán. E oyën ojts amëjaaw xyjyanitso'onëmë, yë'ëjëty ka'ap ojts myëta'aktë.

⁸Ko ka'ap myëtaktë, tä ja nyaax kyajpnëty ojts niwa'kta'ayëmë ets jä'ä tjä'ä'ajtë ja jyä'äyëty ja Rubén, Gad ets kujkwä'kxy ja Manasés ja jyä'äyëty.

⁹E paaty yam n'ënëëmëtë ets xypyatuntëty ya'atë aaw ayuk, tä yam yaj'ëëwkëxy yajkajpxkëxyën ya'atë käjpxytyu'unën, mtuntëp jëtu'un ets jotkujk mjuuky'atëty ets aak'oy wyimpëtsëm jyëjpëtsëmëty ja mëti'ipë ënäty mtuknipëjktakëtëpën.

¹⁰Tyam jëtu'un yaa myajpaatë ni'ëmukë Wintsën wintuuy, mëti'ipë mTiosajtëpën. Yajpatëp yë mëjja'aytyëjkëty, mëti'ipë nyikopk'ajtëpën ja jyä'äjëty, ja tsiptuunpë wintsënëty, tëkokyë yë Israel ye'etyëjktëjk,

¹¹ja mëjja'ay mutskja'ayëty, yä'äy to'oxyëty, jaaypyaat jaaypyo'kxyëty, mëti'ipë yajpatëpën ma miits yë mnaax mkajpnëtyën ets mëti'ipë tyuunk'ajtëpën ja nija'axk ets nëë nikoonk nëë niwijtsk.

¹²E paaty ya'atë käjpxytyu'unën tpa'atwa'akëtë, mëti'ipë ja Wintsën tyam tyuunpyën mëët miitsëty.

¹³Tyam yajxon yajnijawë, ko miitsëty Tios mtimykyajpn'ajtëtëp ets miitsëty yë'ë Wintsën mTios'ajtëp, tä ja Abraham, Isaac ets Jacob tukwinwa'anëyën, mëti'ipë miits m'ap'ajt m'ok'ajtëpën.

¹⁴E kajts ënät n'ëna'anmëty mijts'ajtyë yë Tios mëët yë käjpxytyu'unën të tyaj'apaatë,

¹⁵ja käjpxytyu'unën mëti'ipë tyam tyuunpyën, näjyëtu'un tuny mëët ja ja'ayëty mëti'ipë tyam yaa ka'ap yajpaatën.

¹⁶Miitsëty wa'ats xynyijawëtë wi'ix jap Egiptë ijty njuuky'ajtëmën ets wi'ix kanaak të ntuknajxëmën ja naax kajpn,

¹⁷ma tääpë kajpnëtyën tëë kë'ëm ntimy'ijxëmë mëti'ipë ka'ap tyiosëtyën, mëti'ipë tyijtëpën yë'ëjëty wintsën ets ka'ap wyintsënëty, tä yë tsaatsetsyën kepy tsyetsyën, ëkë mëti'ipë oytyunyën mëët yë pu'ts pujxn poop pujxn ets ënät t'ëwtatë.

¹⁸Ma miitsëtyën, ni pën tka'ëxmatsëty yë nyë'ë'aaw tyu'u'aaw yë nWintsën'ajtëm Tios ets tpanëjkxtëkëty ja wiink tios, mëti'ipë tääpë yë naax kajpn y'ëwtajtëpën. Ka'ap mëpaat yajpaaty ma miitsëtyën yë ja'ay mëti'ipë yë Wintsën jëtu'un jyawëpën tä yë ujts mëti'ipë ta'amën.

¹⁹Pën jam pën y'ënä'äny ëkë myäy tyäjy; ëjts tiijës pën xykyëwentëty jyëkyejpyës ntunëty oy tii ntimtyuna'anëtyës, jëtu'unpë ja'ay yë'ë ja poky myëët'atëp, ko ënäty miitsëty wi'ix mjatë mkëpätë.

²⁰Yë Wintsën ninu'un nëjkx jëtu'unpë poky tkame'kxy, nëjkxëp ja ja'ay tëytyuny mëti'ipë ënäty të yajjoot'anpëkyën ets ja pojkën mëti'ipë yajnikajpxpën jap ma ja nokyën wa'ats nëjkx tyuka'ata'ayë. Ja Wintsën nëjkxëp tjo'tsta'ay ja y'u'unk y'ok yaa naaxwiiny.

²¹Yë Wintsën ëpëky nëjkx tpëjktä'äky jëtu'unpë ja'ay ma Israel ja'ayëtyën ets nëjkx jam muum atu'uk tyuk'ëyoowtu'uty ets ja pojkën atu'uk tmë''ëyowëty, tä mëti'ipë jap yajnikajpxtëpën ma ja nokyën ma ja tëyajtën myinyën.

²²Ja m'u'unk m'ëna'këty m'u'unk m'okëty mëti'ipë ok minan ja'tantëpën ma miitsëtyën ets ja jaaypyaat jaaypyo'kxyëty nëjkxëp t'ixtë, wi'ix ënäty ja pa'am ëyo'on jam ja Tios tkexyën ma ja it naaxwiinyëtën.

²³Ets t'ixtëty ko ja naaxwiinyëtë je'eyë ënäty të y'awinpijnë naaxwayën, naaxtooyën ets kaanën. Ka'ap nëjkx tjëkyepy wi'ix pën nyi'ipëtyën ets nitii'aay nitii'ujts nëjkx kyayony, jëtu'un jyata'any tä jam Sodomë ets Gomorra jyäjty kyëpejtyën ets jam Admá ets Seboím mëti'ipë ja Wintsën yajkutëkooyën ko tukjoot'anpëjky.

²⁴Ënät nëjkx yë ja'ay nyäyajtëwëtë: ¿E tyam wi'ix ko ënät yë Wintsën jëtu'un ya'atë naax kajpn të tuny? ¿Wi'ix ko nëkooyë të tukjoot'anpëky?

²⁵Tä nëjkx yaj'ëtsowtë: Yë'ëkyëjxm ko të tkamëjpëjkta'aktë ja käjpxytyu'unën, mëti'ipë yë Wintsën yë y'aptëjk Tyios'ajtëpën, mëti'ipë jap ju'tëtë Egiptë.

²⁶Ko të t'ëwtajnëtë ets të wyintak të nyaaxkoownëtë ma ja wiink tiosën, mëti'ipë ka'ap t'ixy'atën ets ni y'ap ni y'ok tka'ixy'ajtë.

²⁷Paatykyëjxm jëtu'un yë Wintsën të tukjoot'anpëky tääpë naax kajpn ets të tyajkëtä'äky jam yë ëyo'on jotmay, jä'ä jëtu'un atëëp ja pojkën, tä jap myinyën ma nokyën.

²⁸Ets të t'ëxmatsy tääpë naax kajpn ajoot'anë ets wä'än t'ijxnëtë wi'ix jyatë kyëpätë jëtu'un tä tyam yaj'ixy yajkoyën.

²⁹Jaaktäänëm mëti'ipë ka'ap yajnijawën winë, yë'ë tëy yë nWintsën'ajtëm Tios nyija'ap, e may näjyëtu'un mëti'ipë tëë nija'awëmën ets tëë tnijawëtë ja u'unk ëna'k ets yajpaatunëty, tä ja ënä'ämën tëyajtënën.