Read Biblia Mixe de Quetzaltepec Deuteronomio 3 Bible Online

Deuteronomio 3 - Biblia Mixe de Quetzaltepec bible

Deuteronomio 3

¹Ënät ojts wiinkpë tu'u npëktës ets nëjkxtës jam Basán. E yë Og mëti'ipë jam yajkutujkpën, ojts xynyitsoontës mëët nimay yë tsyiptuunpëtëjk ets tsyiptuna'any mëët ëëtsëty jam Edrei.

²Ënätës yë Tios xy'ënëmaay: Këtii tääpë ja'ay xytyimtsë'ëkëty. Jä'ä ko yë'ë tëëjës nkë'ëyäky ma mijtsën, mëët tëkokyë yë tsyiptuunpëtëjk ets nyaax kyajpn. Ets jëtu'un o'ktëy xytyunëty tä xytyuunyën yë Sihón, jampë ënäty y'ëne'emyën Hesbón ma Amor ja'ayëtyën.

³Jëtu'un'äämpy ojts yë nWintsën'ajtëm Tios tkë'ëyäky yë Og ma ëëtsëtyën mëët tëkokyë yë tsyiptuunpëtëjk ets nyaj'o'ktaaytyës nitëkokyë, nitu'uk ojts juuky kyawë'ëmy.

⁴Ja nyaax kyajpn ojts niwa'ktaayëtës ets nitu'uk ojts nkayajwë'ëmtës, jä'ä nyiwinë'ajtë tëkë'px ja kajpn, jampë ënäty yajpaatën, ma ja it naaxwiinyëtë txëëwatyën Argob, mëti'ipë nyiwäämpyën ja Og jampë y'ëne'emyën Basán.

⁵Tëkokyë tääpë naax kajpn aak napotsy ets kuwa'any ijtyëty, oyëty ets ta'tspëkyëty yë nyitëjk'aaw. Ëpëky näjyëtu'un ja kajpnëty mëti'ipë ka'ap nyapotsy'atën.

⁶Tëkokyë tääpë kajpn ojts nyajkutëkooytya'atës, jëtu'un tä ënäty të ntuntënës ja Sihón ja nyaax kyajpn jampë y'ëne'emyën Hesbón. Wa'ats nyaj'o'ktaaytyës ye'etyëjk to'oxytyëjk ets mëjpë mutskpë.

⁷Yi'iyë ojts nyajwë'ëmtës yë jëyujk tsajpkaa ets winëjaty mëti'ipë tsoowpaatyëtyën.

⁸Jä'ä xëëw nimäjtsk ojts ja yajkutujkpë tyimtëkoytyë, mëti'ipë Amor ja'ayëtyën; jampë tsyëënëtën a'oytsyow ma ja Jordán mëjnëëjën, jam tsyo'ontä'äky ma ja Arnón mëjnëëjën ets tyimja'ty jam ma ja Hermón mëj kopkën.

⁹Ya'atë kopk, yë Sidónja'ayëty jä'ä tijtë Sirión, e yë Amor ja'ayëty jä'ä tijtë Senir.

¹⁰Tëkokyë yë naax kajpn mëti'ipë ënäty jam nijoykyëjxm yajpatpën, tëkokyë jënu'un yë Galaad tnitänën ets Basán, jam jyä'ty ma txëëwatyën Salcá ets Edrei, ja naax kajpn mëti'ipë ënäty nyitënääpyën yë Og, jampë Basán, wa'ats ojts nyajkutëkooytya'atës.

¹¹Yë yajkutujkpë Og, yi'iyë ënäty tu'uk jaakwë'ëmp ma Refa ja'ayëtyën. Yë myaapäjn aak juunpujxn ënäty mëët y'oytyunyëty ets jä'ä y'ayenyëty mäjtsk xajpk ja mäjtsk kë'ënux ets myëjwiinëty tu'kxajpk. Tyampaat jaakyaj'ijxp yë jëtu'unpë ma Amón ja'ayëtyën jam Rabá.

¹²Ja naax kam mëti'ipë ojts niwa'aktësën jä'ä xëëw jä'ä jëmëjt, yë'ë ojts nmo'otës yë Rubén yë jyä'äjëty ets Gad yë jyä'äjëty. Jam tsyo'ontä'äky ma Aroer mëjnëëjën ets nyäxy ma ja Arnón mëjnëëpa'ajën, kujkwä'kxy ja Galaad kopkjot tpëjky, mëët ja nyikajpn.

¹³E ja kujkwä'kxy ja Galaad ja y'itjot ets tëkokyë ja Basán ja y'itjot, mëti'ipë ënäty ja Og kutujktakn të tnitänën ets ja Argob ja y'itjotm, ja y'itjotm mëti'ipë ënäty ja Refa ja'ayëty nyitënaaytyëpën, yë'ëjës ojts ntukë'ëtëkëtë yë Manasés yë jyä'äy kujkwä'kxy.

¹⁴Yë Jair, yë jyä'äy yë Manasés, yë'ë ojts tniwä'äky yë Argob yë y'itjot jampaat ma nyäpyäätyë mëët yë Guesur ets Maacá ets ojts txëëwmo'oy ja itjot, jëtu'un tä ënäty yë'ë kë'ëm txëëwatyën, jä'ä ojts tijy Havot-jair, tyampaat jëtu'un yajtijp, mëti'ipë ijty tëëyëp yajtijpën Basán.

¹⁵Yë Maquir yë'ëjës ojts nmo'oy yë Galaad yë y'it nyaaxwiinyëtë.

¹⁶E yë Rubén yë jyä'äy ets Gad yë jyä'äy yë'ëjës ojts nmo'otë yë Galaad yë y'it nyaaxwiinyëtë, ma mëët nyäpyäätyë ja Arnón mëjnëë. Jam ojts nyämyëtsëpa'an'atëtë joyjyotm ets tyimja'ty ma Jaboc mëjnëëjën, ma ja tsyëpa'an nyaxtën ja Amón ja'ayëty.

¹⁷Yë'ëjës ojts näjyëtu'un nmo'otë yë Arabá, ëpa'tkë'ëytsyowpë ja naax kam yajpaatyën, ma ja Piskë kopkën ets jam jyëjpkëjxy ma ja Jordán mëjnëëjën. Jam tsyo'ontä'äky ma ja Cineret mëjmejyën ets jyëjpkëxy jam ma ja Arabá mëjmejyën, yë'ë mëti'ipë näjyëtu'un yajtijpën Ooky myëj mejy.

¹⁸Ënät ojts ya'atë ënä'ämën miits nmo'otë jä'ä xëëw jä'ä jëmëjt: Yë Wintsën mëti'ipë mTiosajtëpën, yë'ë ya'atë naax kam mooyëtëp ets xyjyä'ä'atëty. Ko tëkokyë mëti'ipë tsiptuuntëpën, wä'än tpëjkë'ëktë mëti'ipë myëtsiptuuntëpën ets twinye'eytyëty yë myëku'uktëjkëty Israel ja'ayëty.

¹⁹Yi'iyë nëjkx wyë'ëmtë ma ja naax kajpnën mëti'ipë miits të nmo'otën. Ja to'oxytyëjkëty, ja pi'k'ëna'këty ets ja jëyujk tsajpkaajëty mëti'ipës nija'apën ko xymyëët'atë.

²⁰E ëjts Wintsën, ëjts yam ënaanp, pën ka'ap ja mjëëkyëty mmëku'ukëty oy jotkujk yajpaatënëm, jëtu'un tä miitsëtyën ets ka'ap ja nyaax kyam tpëktënëm mëti'ipës yë'ë nmo'ojantëpën jam awinmtsow ma ja Jordán mëjnëëjën. Miitsëty ka'ap tjëkyepy mwinpitëty ets mnëjkxtëty ma ja itjotmën mëti'ipë të nmo'otën.

²¹Yë Josué jëtu'unës të n'ënëëmë: Tëë kë'ëm xytyim'ixy wi'ix yë mWintsën të tunyën tääpë nimäjtskpë yajkutujkpëty. E jëtu'un tuna'any oy mëti'ipë yajkutujkpëty, maajaty ënäty miits mnaxtën.

²²Ni pën xykyatsë'ëkëty. Jä'ä ko yë mWintsën mkuwa'ananëp ets mnitsiptunanëp.

²³Jä'ä xëëw jä'ä po'o ojts yë Tios nmënu'kxtä'äkyës etsës t'ënëmaay:

²⁴Wintsën mijts ëka'any të xytyuk'ixy ya'atë mtuunpë yë mmëkajtën ets m'oyajtën. Ka'ap ma wiinkpë jëtu'unpë Tios myëjëtyën tä mijtsën, jam tsajpkëjxm ets yaa naaxkëjxy ets jëtu'unpë tyajkëxë'ëkyën ja myëj'ajt y'oyajtën.

²⁵Tun yë mëyajtën, tyam nmënu'kxtä'äky; yajnajxkës jam nëë'awinm ma Jordán nëëjën. Tuk'ijxkës tampë yë naax oypyë tsujpë, ma ja tun kopk janty oypyë yaj'ixyën ets ja Líbano y'it nyaaxwiinyëtën.

²⁶E yë Tios ëjts ojts xytyukjoot'anpëkyës mëët miitskyëjxmëty. Yë'ë ka'ap t'ëwatsy tääjës nja'ënëmaayën, je'eyës ojts xy'ënëëmë, këtii nëkoo wi'ix m'ëk'ënanë. Ëjts ka'apës jëtu'unpë n'ëknimëtya'akanë mëët mijts.

²⁷Pät jam kopkkëjxm ma txëëwatyën Pisgá ets xynyajts'ixëty tääpë itjot, jampaat ëpa'tkë'ëmtsow, anëkëjxytsyow, a'oytsyow ets anajnytsyow. Yë Jordán mëjnëë ka'ap xytyuknaxëty.

²⁸Tuk'ëwaanë yë Josué tii mëpaat tunyën, jotmëkmo'o, winma'anymyo'o; jä'ä ko tyam yë'ë naax kajpn tyu'uwinye'eyäämpy, tyimja'tëty jam ma ja itjotmën, mëti'ipë jyä'ä'atantëpën, tyampë xy'ixa'anyën.

²⁹E jëtu'un ojts jam nwë'ëmtës joyjyotm, winkon ma txëëwatyën Bet-peor.