Read Biblia Mixe de Quetzaltepec Deuteronomio 4 Bible Online

Deuteronomio 4 - Biblia Mixe de Quetzaltepec bible

Deuteronomio 4

¹Miitsëty Israel ja'ayëty mëtoow'itë ya'atë tëyajtën ets ënä'ämën mëti'ipë yam ntukni''ixëjantëpën ets xykyuuytyuntëty. Yë'ë mtukjuuky'atëp ko ënäty jam myajpaatë ma ja naax kamën mëti'ipë yë Wintsën mo'ojanëtëpën, yë Tios mëti'ipë ja m'ap m'ok Tyiosajtën.

²Mëti'ipë yam ntuk'ënëëmëjantëpën, këtii kë'ëm xyajni'ikëtëty ëkë kë'ëm xyajwäänëtëty. Jëtu'un xypyatuntëty ya'atë Wintsën yë tyiyajtën tä yam ntuk'ëwaanëja'antën.

³Miitsëty ojts kë'ëm xytyim'ixtë wi'ix yë Wintsën tuunyën yë Baal-peor ets wi'ix tyajkutëkooytyääyën tëkokyë ja ja'ay jampë ënäty yajpaatën ma tääpë it naaxwiinyëtën, mëti'ipë wiink wintsën y'ëwtajtëpën.

⁴E tëkokyë miitsëty, jënu'un ojts yi'iyë xytyuk'ijxpätën yë Wintsën mëti'ipë mTiosajtëpën, ix tyaa myajpaatë je'eyëm juuky tsuxk.

⁵Ëjts tëëjës yam nikäjpxy ja ënä'ämën tëyajtën, mëti'ipë yë Wintsën nTiosës të xytyuk'ëne'emyën ets yë'ë xykyuuytyuntëty ma ja naax kajpnën mëti'ipë mniwa'akantëpën.

⁶Yë'ë jëtu'un jot'at winma'any'atë ets patuntë, jëtu'un'äämpy nëjkx ja wiinkëtypë ja naax kajpn mëj'äämpy myajnaxëtë. Ets nëjkx y'ëna'antë, ko ma ya'atë kajpnën jam'ajtp ja wijyajtën ets ijxkujk ja'aykyujkën. Ko ënäty yë'ëjëty tnijawëtë ya'atë ënä'ämën tëyajtën jyëkyäpëp y'ëna'antëty: Ma ya'atë naax kajpnën janty jam'ajtp yë wijy'ajt kujk'ajtën ets ja'aykyujkën.

⁷Jä'ä ko ¿Ma jëtu'unpë n'ëkpatmëty wiinkpë kajpn mëti'ipë myëwinkon'ajtypyën Tios. Ets nWintsën'ajtëm Tios xëmë yajpaaty ma ëëtsajtëmën oy jëna'a ntimmyëkajpxa'anmëty tää'ajtp?

⁸¿Maa wiinkpë naax kajpn n'ëkpatmëty mëti'ipë myëët'ajtypyën ja ënä'ämën tëyajtën oypyë ets mëtëypyë, jëtu'un tä yë mëti'ipë yam miits të ntukmëtowtën?

⁹E paaty yam miits n'ënëëmëtë, ko yë'ë xëmë mja'amyätstëp, mëti'ipë yam të xy'ixtën. Nijëna'a xykyaja'atyëkoytyëty. Ni'ikyë nëjkx ja m'u'unk m'ëna'k xytyuk'ëwaanëtë ets m'ok'u'unk m'ok'ëna'këty.

¹⁰Jä'ä xëëw ma ojts myajpaatën ma ja Wintsën mëti'ipë mTiosajtëpën, jam ma ja Horeb kopkën, tyaajës ojts yë Wintsën xy'ënëëmë: Yajtu'ukmuk yë naax kajpn ets tmëtoow'itëty yë n'aaw n'ayukës ets tjat tnijawëtëty wi'ix mëj xyjyëkyäptëtyës mapaat jyuuky'atën ets jëtu'un ja y'u'unk y'ëna'k tukni''ixëtëty.

¹¹Ënät ojts miitsëty mwinkontë ets jam mwa'ak'o'oyëtyääytyë kopk'ëjxm. Xy'ixtë ko jam ma ja tunkupi'tsykyën jëtu'un jam ja jëën jyäty pyëtsimy ets ja jëënjok janty yëk je'eyë y'akëxë'ëkë.

¹²Tääts ja Wintsën ojts myëkajpxëtë jam jëën'akujkm. Miitsëty wa'ats xymyëtoowtë ja y'aaw y'ayuk, oy ka'ap ja Wintsën xytyim'ijxtë.

¹³Yë Wintsën ojts mtuk'ix mtuknijawëtë yë kyäjpxytyu'unën, majk ojts ja ënä'ämën tëyajtën tja'ay ma mäjtsk ja tsaajën mëti'ipë kepy tsyetsyën ets ojts tni'ënä'ämë ets xykyuuytyuntëty.

¹⁴Ëjts ojts xytyuk'ëne'emy ets ntukni''ixëtëty ya'atë ja ënä'ämën kutujkën ets yë'ë xypyatuntëty, ko ënäty jam mjajnëtë ma ja itjotmën mëti'ipë mniwa'akantëpën.

¹⁵Jä'ä xëëw ma ojts ja Wintsën mëkajpxëtën jëën'akujky jam kopkkëjxm ma txëëwatyën Horeb, ka'ap nitii xy'ijxtë, paaty mëk mnäkyëwent'atëtëty.

¹⁶Ets këtii oynatii xyajnikojtu'utëty, ëkë xyaj'akojnaxtëty tu'uk yë to'oxytyëjk ëkë ye'etyëjk,

¹⁷ëkë joon jëyujk,

¹⁸ëkë nëë jëyujk ëkë tsa'any.

¹⁹Ets ko näjyëtu'un mpa'at'ixtëty tsajpkëjxm ets xy'ixtëty yë xëëw po'o, ëkë matsa'a, këtii m'ëna'antëty ets ënät yë'ë xy'ëwtatantëpëty. Jä'ä ko yë Wintsën mëti'ipë miits mTiosajtëpën, yë'ë ojts yajkojëtë ets tëkokyë ja ye'etyëjk tuk'oy'atëty.

²⁰E miitsëty, Tios ojts kë'ëm mtimjyuutëtë jap Egiptë, ma ënäty myajpaatën mëj jëënjotypyën ets mkajpn niwanëtë.

²¹E mëët ko miitsëty ka'ap ninu'un mkäjpxyjyä'äkyukëtë, ojtsës yë Tios xytyukjoot'anpëky ets y'ënäny ko ka'apës ntëkëty jam ma oy it oynyaaxën, mëti'ipë miits mjä'ä'atantëpën, ma yajtuknaxa'anyën ja Jordán mëjnëë.

²²E paaty yam n'ënëëmëtë oyës nëjkx yaa n'ooky ets ka'apës ja Jordán mëjnëë ntuknaxëty. Miitsëty nëjkxëp xytyuknaxtë ets nëjkxëp tääpë it naaxwiinyëtë xynyiwa'aktë.

²³E yë'ë tëy ijxkëm xyjyä'äytyëkoytyë ja Wintsën ja kyäjpxytyu'unën, mëti'ipë yë'ë të tunyën mëët miitsëty. Nitii xykyayajnikojtu'utëty mëti'ipë yë Tios ka'ap t'ëwa'atsyën.

²⁴Jä'ä ko miits yë mWintsën Tiosëty, yë'ë Tios mëti'ipë ni'akë'ajtpën. Ko tii tka'oy'ixy, jëtu'un yë jyoot'anpëky tä tu'uk yë mëj jëën tyajtooytyä'äyën winë.

²⁵Ko ënäty xymyëët'ajnëtë ja m'u'unk m'ëna'këty, ja m'ok'u'unk m'ok'ëna'këty ets të mmëjja'ayënëtë ets jää xyajkoj'awinajxtëpëty oynatii, mpokytyuntë jëtu'un ma ja Wintsënën mëti'ipë mTiosajtëpën ets yë'ë xyajjoot'anpëktëty.

²⁶Ëjts tyamës yajxon ntimnyikäjpxy, yë tsajp ets naax yë'ëjës mpëjktäkpy ijxpë tuunpë, ko miitsëty ënätyë nëjkx mkutëkooytya'atë jam ja ma it naaxwiinyëtën mëti'ipë mjä'äpëkantëpën jamtsow nëë'awinm ma Jordán mëjnëëjën. Ka'ap nëjkx jeky xytyukjuuky'atë tääpë naax kam, wa'ats mkëjxta'atëty.

²⁷Yë Wintsën jëtu'unyë nëjkx m'awojpwa'kxëtë naaxwiinyëtë apëtsëmy, niwäänë mjaakwë'ëmtëty.

²⁸Jam nëjkx ja wiink wintsën xymyëtuntë, mëti'ipë yë naaxwiinyëtë ja'ay kë'ëm yajkojtëpën; tä yë kepy tsyetsyën, tsaatsetsyën, mëti'ipë ka'ap y'ixy myëtoyën; ka'apë kyäy y'uukyën ets ka'apë xyejyën.

²⁹E pën miitsëty mja'amyäjtstëp jatëkok ja mWintsënëty mëti'ipë mTiosajtëpën ets winë aaw winëjot xymyëkajpxtë, nëjkxëp xypyaatë.

³⁰Ma ënäty miits xymyënax xyajnaxtën ja ëyo'on jotmay ets ja monyëtukyë ets mjootwinpitëty jatëkok xymyëmëtowtëty ja mWintsën Tiosëty.

³¹Yë'ë mëët yë y'oyjyot y'oywyinma'any nëjkxëp mpa'ëyowëtë; ka'ap tu'ukyë m'ëxmatsa'anëtë ets ka'ap nëjkx myajkutëkooyënëtëpë. Ka'ap tja'atyëkoyä'äny ja käjpxytyu'unën, mëti'ipë tyuunën mëët yë m'ap m'okëty ko y'ënäny ko kopkpëky ko tuna'any.

³²Yë'ë ëkmëmay ëkmëtajtë ja tëëyëpë. Yë'ë ëk'ixtë ma Tios ojts ëka'any yë naaxwiinyëtë ja'ay tyajkojyën. Nëjkx yajnitëwëtë oymyaajëty pën tëë jëtu'un winë y'ëktuun y'ëkjajtëpë ëkë pën tëë winë y'ëkyajnija'apë tä tyamën.

³³¿Jää jëtää muum ja naax kajpn mëti'ipë të tmëtoyën ja Tios ja y'aaw yo'kn jëënjoty tä miitsëty të xymyëtowtën ets ka'ap të y'ooktë?

³⁴¿Jää jëtää muum wiinkpë wintsën mëti'ipë yë naax kajpn të twin'ixyën ma kanaak yajpaatën, mëët kanaak ja ëyo'on jotmay, mëj'ajtën, ko tii tyunyë jyätyë; tsip käjpxy, tyaj'ixyë ja myëj'ajtën ets jëtu'un winë tyajtuny tyajjatyë atsë'ëk ajawë; ijxtën winë të tunyën ma miitsëtyën ets mëët miitskyëjxmëty ja mWintsën Tios jap Egiptë?

³⁵Tëkokyë ya'atë, paaty kyëjxm të myajtuk'ixtë ets xynyijawëtëty, ko yë Wintsën yë'ë tu'uk Tios mëtëypyë ets jëtu'un tä yë'ëjën ka'ap maa wiinkpë.

³⁶Jam ojts tsajpjotm kyukajpxnaxy ets ojts mkajpxwijëtë, yaa naaxwiiny ojts mtuk'ixëtë ja myëj'ajt y'oyajtën ets mëj jëënjoty ojts mëkajpxëtë.

³⁷Ojts tsoky tjawë miits ja m'ap m'okëty ets yë'ë wyin'ijx ja m'ap m'ok ja y'u'unk y'okëty, paatykyëjxm ojts jap tjuuty Egiptë mëët ja mëk'ajtën.

³⁸Ojts tyajkutëkoy mëjëtypë naax kajpn, ma miits kë'ëm xytyim'ijxtën ets miits myajmo'oja'antë, tä tyam yaj'ixy yajtunyën.

³⁹Paaty n'ënëëmëtë ko yajxon xyajkëpajkpätëty, ko yë Wintsën yë'ë Tios'ajtp oy jyamëty tsajpjotm ets yaa naaxwiiny ets jëtu'un tä yë'ëjën ka'ap maa wiinkpë.

⁴⁰Kuuytyuntë ja y'ënä'ämën tyiyajtën mëti'ipë tyam ya'atë xëëw nmooytyëpën, jëtu'un'äämpy oy mjuuky'atëty ets ja m'u'unk m'ëna'këty, jam ma ja itjotmën mëti'ipë ja Tios mo'ojanëtëpën, nëjkxëp jam jeky mjuuky'atë.

⁴¹Ënät yë Moisés ojts tëkëëk twin'ixy yë kajpn jamtsow ëpa'tkë'ëmtsow ma yajpaatyën yë mëjnëë mëti'ipë xyëëwajtypyën Jordán ets yë'ë wya'antëty tsoktakn.

⁴²Jëtu'un'äämpy jam ja ja'ay kyäktso'okëty, mëti'ipë ënäty ja myëku'uk ka'ap tsyokyëty të tyaj'ookyën ets ka'ap mëët nyämyëtsip'atyë.

⁴³E ya'atë ojts kyajpn'atë, mëti'ipë ojts wyä'änyën tsoktakn: Béser ja jampë joyjotmën të'ëts'itum, mëti'ipë jyä'ä'ajtëpën ja Rubén ja'ayëty ets ja wiinkpë ja kajpn jä'ä txëëwaty Ramot, jam yajpaaty Galaad nyaaxjotm mëti'ipë ja Gad ja jyä'äy jyä'ä'ajtëpën ets ja wiinkpë Golán txëëwaty, jam yajpaaty ma Basán nyaaxjotmën mëti'ipë jyä'ä'ajtëpën ja Manasés ja jyä'äy nikujkwä'kxy.

⁴⁴Ya'atë yë Moisés ojts tukni''ixë yë Israel ja'ayëty.

⁴⁵Ja ënä'ämën tëyajtën, ja aaw ayuk ets ja jot winma'any mëti'ipë tyukmëmëtyakën, ko jap tsyo'ontë Egiptë.

⁴⁶Ma ënäty jam jyaak yajpaatënëm ëpa'tkë'ëmtsow ma ja Jordán nëëjën, jam joyjyotm winkon ma txëëwatyën Bet-peor ma nyaaxjotmën ja Sihón mëti'ipë yajkutujkpën ma Amor ja'ayëtyën. Yë Sihón jam ënäty tsyëënë ma Hesbón kajpnën, e yë Moisés ets Israel ja'ayëty yë'ë ojts yajkutëkoyëtë ko jap tsyo'ontë Egiptë.

⁴⁷Yë Israel ja'ayëty yë'ë ojts tniwa'aktë ja Og nyaaxjot, mëti'ipë jam ënä'ämpën Basán ets ja nimäjtskpë ja yajkutujkpë mëti'ipë ënäty jam yajpatëpën a'oytsyow ma Jordán nëë jyënäkyën.

⁴⁸Ja nyaaxjotëty jampaat ënäty tsyo'ontä'äky ma Aroer itjotmën, nyäxy jam ma Arnón mëjnëëjën ets tyimja'ty ma Sirión kopkën, yajtijp näjyëtu'un Hermón.

⁴⁹Yë'ë nyitënääpy tëkokyë yë Arabá, mëti'ipë wë'ëmpën jam ëpa'tkë'ëmtsow ma ja Jordán nëëjën ets jyä'ty jam ma ja Ookymyëjmejyën, jam Pisgá kopk'ëjxm.