Read Biblia Mixe de Quetzaltepec Deuteronomio 6 Bible Online

Deuteronomio 6 - Biblia Mixe de Quetzaltepec bible

Deuteronomio 6

¹Ya'atë ënä'ämën'ajtp tëy'ajtën'ajtp ets ja aaw ayuk mëti'ipë Wintsën të xytyuk'ëne'emyënës ets ntukni''ixëtëty ets yë'ë xypyatuntëty ko ënäty jam myajpatnëtë ma ja it naaxwiinyëtën mëti'ipë mjä'ä'atantëpën.

²Jëtu'un'äämpy nëjkx ja mWintsënëty mëj'äämpy xypyëjkta'aktë. Ets xypyatuntëty ya'atë ënä'ämën tëyajtën mapaat mjuuky'atën yaa naaxwiiny naaxkëjxy, näjyëtu'un ja m'u'unk m'ëna'këty, m'u'unk m'okëty ets ja mjuukyajtën yontëty jyäktëty.

³E paaty yam n'ënëëmëtë miits Israel ja'ayëty, ko yë'ë mpatuntëp. Jëtu'un oy mjuuky'atëty ets nëjkx m'awinpitë tu'uk mëj kajpn ma ya'atë it naaxwiinyëtën, ma ka'ap yë jë'kxy pëky y'ëmaaytyä'äkyën, jëtu'un ijxtëm yë Wintsën mëti'ipë m'ap m'ok Tyiosajtën ojts twinwanën.

⁴Mëtoow'it, ënät tyam mijts Israel ja'ayëty: Yë nWintsën'ajtëm Tios tu'ukyë je'eyë Wyintsën'aty.

⁵Tsok jawë yë Wintsën Tios winë aaw winëjot, mëët tu'kë'ëyë mjot mja'awën ets tu'kë'ëyë mjot mmëjaaw.

⁶Jajta'a tëkokyë mëti'ipë yam të ntuk'ëwaanën,

⁷ets xytyukni''ixëty xëmë ja m'u'unk m'ëna'k, mtukmëmëtya'akëp oy jyapëty tëkoty, në'ë'am tu'u'am; ko ma'ajan mpo'kxanëty ets ko ma'aypyëtë'ëkëty.

⁸Ya'atë ënä'ämën tëyajtën jëtu'un xytyimmëët'atëty mjootjoty mwinma'anyjoty tä jeexyë jam mkë'ëkëjxm këxtsumy y'ityën ets tä jeexyë jam mwinpokëjxm këxtsa'ay yajpaatyën.

⁹Jëtu'un jam ma mjëën mtëjkën xymyëët'atëty, tä jeexyë jam këxwopy këxka'atsy xyaj'ityën ma mtëjk'akajën ets ma mtëjk xenyën.

¹⁰Yë Wintsën mëti'ipë miits mTiosajtëpën, yë'ë jam myajtëkëjanëtëp ma ja naax kamën mëti'ipë ja Abraham, Isaac ets Jacob tyukwinwa'anëyën ko mo'oja'anëtë. Tääpë it naaxwiinyëtë myëët'ajtyp oyëtypë naax kajpn, mëti'ipë miits nijënu'un xykyanijawëtën wi'ix ojts kyojyën.

¹¹Ja jëën tëjk ujts yajpaaty mëët winë mëti'ipë oyëtyën; mëti'ipë ka'ap miitsëty të xy'atsëëm'utstën ets mëët ja nëëjut mëti'ipë ka'ap të xytyajtën; näjyëtu'un ja tsatsymkyam, tsajpmokam, mëti'ipë jamën mëj këjää jam yajpaatë, ka'apë myiitsëty xynyijawëtën wi'ix të wyintu'upëkyën. E yë'ëts nëjkx xyjyë'kxtë ets akëtä'äky jotkëtä'äky myajpaatëty.

¹²Ko ënäty jëtu'un tyunyë jyätyë, këtii xyjyä'äytyëkoytyëty ja Tios, mëti'ipë ojts mjuutëtën jap Egiptë ma ënäty mëtun m'ëyowtë.

¹³Yë Wintsën yë'ë m'ëwtatëp ets mëtuntëp xëmë ets ko tii xynyikajpxa'antëty mëët yë kutujkën, yë Tios yë xyëëw myajtuunëtëp.

¹⁴Këtii jëtu'unpë tios xy'ëwtajtëpëty mëti'ipë y'ëwtajtëpën yë ja'ayëty wiink kajpnëpë tsyoontën.

¹⁵Jä'ä Ko yë Wintsën mëti'ipë miits mTiosajtëpën, mëti'ipë yajpatpën mëët miitsëty jä'ä yë Wintsën mëti'ipë ni'akë'ajtpën; tsojk mtukjoot'anpëkëtëty ets myajkutëkoyëtëty ko xykyamëmëtowtëty.

¹⁶Këtii nëkoo Wintsën je'eyë xywyinma'any'ixtëty tä ojts xytyuntën jam Masá.

¹⁷Yë'ë tu'ukyë timpyatuntë ja Tios ja y'ënä'ämën tyiyajtën, ja y'aaw y'ayuk ets ja nyajts'ë'ëw nyaskajpxën mëti'ipë të mtuk'ënä'ämëtën.

¹⁸Yë'ë mtuntëp mëti'ipë tëyajtënën ets mëti'ipë yë Wintsën y'oy'ijxypyën ets jotkujk mjuuky'atëty ets xynyiwa'aktëty ja oypyë ja naax kam mëti'ipë ja Wintsën tyukwinwa'anëyën ja m'ap m'okëty ets yë'ëjëty tmo'oja'any.

¹⁹Ets jëtu'un'äämpy tjëkyäpëty wi'ix ja Wintsën tpawojpkäkta'ajëtyën ja mmëtsiptëjk mëti'ipë ëxëëk mjatunanëtëpën, jëtu'un tä të tnikäjpxyën.

²⁰Ko jëna'a ja m'u'unk m'ëna'k myajtëwëtëty: ¿Tii ya'atë y'antijpy ko y'ënä'äny ja ënä'ämën tëyajtën, aaw ayuk ets ja najts'ë'ëw najtskajpxën, mëti'ipë yë nWintsën nTios'ajtëm të tni'ënä'ämën yajpatunëty?

²¹Ets miitsëty xy'ëtsowtëty: Ëëtsëty, yë yajkutujkpë ijty nmëtuun nmë'ëyoowtëpës jap Egiptë, e yë Tios yë'ëjës ojts jap xyajpëtsëmtë mëët yë myëk'ajtën.

²²Ëëtsëty wa'atsës n'ijxtë wi'ix ojts yë Tios yë myëj'ajtën tyaj'ixyën jap Egiptë mëj këjää, ma yajkutujkpën ets ma jyëën tyëjkën.

²³E ëëtsëty ojtsës jap nyajjuutë ets ojts xywyoownëjkxtës jam ma ja it naaxwiinyëtën mëti'ipë ja n'ap n'okëtyës yajtukwinwa'anëtyën ets ëëts nyajmooytyë.

²⁴Ok ja nWintsënëtyës Tios ojts xytyuk'ënä'ämtës ets npatuntëtyës ja y'ënä'ämën ets nwinkutsë'ëkëtëtyës tääts ja juukyajtën yajmëët'atëty tä tyam yaj'ixyën.

²⁵Paaty ëëtsëty tëëjës nnijawëtë ko oy'atëp koos mpatuntëty ya'atë ënä'ämën tëyajtën ma ja nWintsën'ajtëm Tiosën, jëtu'un tä yë'ë të tni'ënä'ämën.