Read Biblia Mixe de Quetzaltepec Deuteronomio 9 Bible Online

Deuteronomio 9 - Biblia Mixe de Quetzaltepec bible

Deuteronomio 9

¹Mëtoow'itë tyam miitsëty Israel ja'ayëty, tëë jëtu'un ja xëëw jëmëjt tpaaty ets xytyuknaxtëty ja mëjnëë mëti'ipë yajtijpën Jordán; niwa'kta'atë ja naax kajpn mëti'ipë mëjjëtyën këjääjëtyën këtiinëm miitsëty, mëti'ipë ja kyajpnëty këjxmëty ets mäjpxyëty nyapotsyëtyën.

²Yë ja'ayëty jampë tsyëënëtën këjxmëty tyänëtë, jëtu'un tä ja ja'aypyajkyeny Anac ja y'u'unk y'okën. Miitsëty wa'ats xynyijawëtë ja ayuk mëti'ipë ënaanpën: ¿Pën y'ëkwinkuwa'akëp ja ja'aypyajkyeny Anac ja y'u'unk y'ok?

³E miitsëty yë'ë mëpaat xymyëmay xymyëtajtë, ko ja Wintsën, miits yë mTiosëty yë'ë mtu'uwinye'eyëtëp. Yë'ë jëyëjp nëjkxp ma miitsëtyën, jëtu'un tä tu'uk yë mëj jëënën mëti'ipë ka'ap nitii tyajwë'ëmyën. Tyajkutëkooytyä'äy ja naax kajpn maajaty tyimnaxyën. Ko tääpë naax kajpn xynyitëkëtëty, ka'ap tsip xyajtukwa'atstëty ets xyajkutëkoytyëty ja nyija'ay. Tu'k'ijxmi'kyxyë nëjkx kyutëkooytya'atë tä ja Wintsën të tnikäjpxyën.

⁴Ko ënäty ja Wintsën të tyajjëwa'kta'ay ja ja'ay, mëti'ipë jam tsënaaytyëpën, këtii nëjkx m'ëna'antë: Tioskujuuyëp mëët ya'atë mëjnäkyumayë, ma ya'atë Wintsën të xymyo'oyëmën yë naax kam. Jä'ä ko pën yë Wintsën y'ëxwojptääpy tääpë yë naax kajpn, yë'ëkyëjxm jëtu'un tuny, ko ja nyëë pyokyëty mëj këjää oy të wyinku'ujtnë jam Tios wintum.

⁵E paaty ka'ap yë'ëkyëjxmëty ko miitsëty oy mja'ay'atë ets ko mëtowtë myajmo'otë ja kuma'ayën; yë Wintsën paaty t'ëxwojpta'ay tääpë ja'ay jä'äkyëjxm ko ja tyu'unën kyajpxënëty ka'ap myëtëyëty ets näjyëtu'un mëët ko tniwa'aka'any ja y'ayuk, mëti'ipë tyukwinwa'anëyën ja Abraham, Isaac ets Jacob, miits ja m'ap m'okëty.

⁶Yë'ë mnijawëtëp ko tääpë naaxwiinyëtë mëti'ipë tyam yë Wintsën mooyëtëpën ka'ap nyäkyumayëty mëti'ipë miits mpatëtëpën. Jä'ä ko miitsëty jä'ä të mnäpyëjkta'akëtë kujuun, ka'ap tsojk mkäjpxyjyä'äkyukëtë.

⁷Këtii xyjyä'äytyëkoytyëty nijëna'a, ko miitsëty ojts yë Tios xyajjoot'anpëktë jam të'ëts'itjotm. Tyimtso'ontäky ko jap mtso'ontë Egiptë ets Yaapaat je'eyëm mkäjpxykyumëtoownaxtë.

⁸Ko ënäty jam myajpaatë ma ja Horeb kopkën, ojts yë Wintsën yajxon xyajjoot'anpëktë, ojts jya'ëna'any ets jeexyë mtimyajkutëkooytyääyëtë.

⁹Ënätës jam npejty kopkkëjxm maas ojts n'ëxajën ja tsaatsetsy, ma ja Wintsën tkëxjaayën ja y'aaw y'ayuk, mëët ko ja käjpxytyu'unën tuuny mëët miitsëty. Jä'äjës jam njaak'ijty wëxtyikxy xyëëw wëxtyikxy tsyu'um.

¹⁰Ënätës ja Tios ojts xymyo'oy mäjtsk ja tsaatsetsy, kë'ëm jam tkëxjaay ja y'aaw y'ayuk. Jä'ä jam jaaypyety miimp ja mëti'ipë ojts tkäjpxyën jam kopkëjxm jëën'akujky, jä'ä xëëw ma ojts jam nye'eymyujkëmën.

¹¹Ma ënäty të nyäxyën wëxtyikxy xyëëw wëxtyikxy tsyu'um, ënätës ojts ja Tios xymyo'oy mäjtsk ja tsaatsetsy. Jä'ä mëti'ipë ja käjpxytyu'unën myëët'ajtypyën.

¹²Ënätës xy'ënëmaay: Jënak poj'am jä'ä ko ja naax kajpn mëti'ipë të xyajpëtsëmyën jap Egiptë, tëë ja nyäyajtu'utëkoyëtë. Ka'ap ninu'un të jyeky ets të t'ëxmatstë, mëti'ipës të njatuk'ënä'ämtën tuntëty, tëë tu'uk tyajkojtë ja awinax, pujxn të tuk'oytyuntë.

¹³Täätsës ojts näjyëtu'un xy'ënëëmë: Tëës nijawë ko ya'atë naax kajpn ninu'un kyakäjpxyjyä'äkyukëtë.

¹⁴Tyaa t'ixtëty nyajkutëkooytya'atëpës ënät yamëty ets tyim'atëkoytyëty yë xyëëwëty yaa naaxwiiny naaxkëjxy. E ma mijtsën nyajkojjäämpyës tu'uk yë mëj kajpn.

¹⁵Koos ojts jam ntso'onë ma ja kopkën, mëti'ipë toopyën, ëjts nmëët'ajtypyës ënäty mäjtsk ja tsaatsetsy mëti'ipë ja käjpxytyu'unën myëët'ajtypyën.

¹⁶E koos n'ijxy, ko miitsëty tëë ënäty ja Wintsën xymyëtëkoytyë ets tëë tu'uk xyajkojtë ja awinax, ma tu'uk ja tsajpkaa u'unk xyajnikojtutën. Ets jëtu'un'äämpy xy'ëxmajtsnëtë ja në'ë tu'u, mëti'ipë ënäty ja Wintsën të mtuk'ënä'ämëtën xypyanëjkxtëty.

¹⁷Ënät ojts mäjtskëty ja tsaatsetsy ntukpu'ujëtyä'äyës mëti'ipës ënäty nmëët'ajtypyën, piw nuukës ntuuntaay mijts mwintuuyëty.

¹⁸Täätsës ntëjkëy nu'kxtakpë ma ja Wintsënën, mëk'äämpyës njantymyëkäjpxy jëtu'un tä ënäty kanaak'ok të ntunyësën; wëxtyikxy xyëëw wëxtyikxy tsu'umës n'ijty ayuu. Nitii ojts nkajë'kxyës ets ni tu'ktsunyën ja nëë nka'ukyës, mëëtkyëjxm ja mpokyëty mëti'ipë ënäty të xytyuuntëkoytyën, ko ja Wintsën xyajjoot'anpëjktë.

¹⁹Ëjts mëkës ojts ntsë'ëkë, ko ja Wintsën mtukjoot'anpëjkëtë mëj këjää, ojts wa'ats mjayajkutëkooytya'aja'anëtë, ëjts ënetyës ojts nmënu'kxtä'äky ets yë'ë ojts tmëtoow'ity ja nnu'kxtakënës.

²⁰Yë Wintsën ojts yë Aarón näjyëtu'un tukjoot'anpëky, ojts tjatimyaj'ooka'any, koos jëtu'un n'ijxy, ënetyës ojts ntuktëkë ets këtiipë wi'ix tunëty.

²¹Ënät ja tsajpkaa jam nkutijnaxyës mëti'ipë ënäty të xyajkojtën ets të myajpokytyunëtën; xit ko'ow ntuuntaayës etsës ojts nëëkuko'owta'ay ma ja nëëwokën mëti'ipë jam kopkëjxm tso'onpën.

²²Näyjyëtu'un jam Taberá, Masá ets Quibrot-hataavá ojts yë Wintsën jam xyajjoot'anpëktë.

²³E ko yë Wintsën ojts tni'ënä'ämë ets jam mtsoontëty Cades-barnea ets mnëjkxëty ma ja it naaxwiinyëtë mo'oja'anëtën, miitsëty ka'ap ojts xymyëmëtowtë, ka'ap xymyëpëjktë mëti'ipës ojts tjanikäjpxyën.

²⁴Ix tää yajnijawë ko jëtu'un xytyimyajtu'uye'eytyë, tyimtso'ontäky ma ojts ëka'any n'ixy'ajtë'ëktën je'eyë nëkoo Wintsën xykyäjpxykyumëtoownajxtë.

²⁵E yë Wintsën tëë ënäty yajxon timnyikäjpxy, ko myajkutëkoya'anëtë, paatyës ojts yë Wintsën nwinkoxtänë ets jä'äs n'ijty ayuu axëëw wëxtyikxy xyëëw wëxtyikxy tsyu'um.

²⁶Etsës nmënu'kxtäky, n'ënëmaayës: Wintsën tun yë mëyajtën, këtii ya'atë naax kajpn xyajkutëkoy, mëti'ipë mijts mkajpn'ajtypyën, mëti'ipë të xyjyuutyën jap Egiptë mëët yë mmëjajtën mkutujkën.

²⁷Ja'amyäts ja mtuunpëtëjk mëti'ipë oy mëtuunën, tä yë Abraham, Isaac ets Jacob. Tun yë mëyajtën këtii ya'atë naax kajpn yë kyujuun'ajtën xymyëjpëjktakë ets nyëë pyoky.

²⁸Këtiipë käjpxy jam y'ëna'anëty ma ojts xyajpëtsëmyën: Yë Wintsën ka'ap të myäyë ets tääpë naax kajpn jam tyajja'tëty ma ja it naaxwiinyëtën, mëti'ipë tyukwinwa'anëyën, e jä'ä ko wyiink'ijxypytyëm jëtu'un, je'eyë ojts yaa twoowtsoony ets jam të'ëts'itjotm t'ëxmajtsy ets y'o'kta'atëty.

²⁹E mijts Wintsën wa'ats xynyijawë, ko ya'atë naax kajpn, mijts mkajpn'ajtyp, mijts kë'ëm të xyjyuuty jap Egiptë mëët yë mmëjajtën ets mkutujkën.