Read Biblia Mixe de Quetzaltepec Juan 16 Bible Online

Juan 16 - Biblia Mixe de Quetzaltepec bible

Juan 16

¹Paaty miits ya'atë ntuk'ëwaanëtë këtiipë xy'ëxmatstëty ja mmëpëjkën ma ëjtsën.

²Nëjkxëp myaj'ixkäxtë jap tsajptëkoty ets nëjkxëp ja'ay myaj'ookëtë ets jëtu'un nëjkx myäytyë tyajtë ko Tios myëtuuntëp.

³Paaty nëjkx jëtu'un y'ëtë'ëtstë, jä'ä ko ka'ap ja Tios Teety t'ixy'atë, ets ëjts nän ka'apës xy'ixy'atë.

⁴Paaty miits ya'atë ntuk'ëwaanëtë ets xyjyä'ämyätstëty ko ënäty jëtu'un të nëëmëtë ko ja xëëw po'o tpaatëty. Ka'ap ënätyë të ntuk'ëwaanëtë jä'ä ko jaaktää'ajtpës ënäty mëët miitsëty.

⁵E tyam nnëjkxyës ets mëët nyajpaata'anyës mëti'ipës të xykyexyën ets nitu'uk miits xykyayajtëwtë pën maas nnëjkxy.

⁶Wäänëni'ik miits të mmontë mtuktë koos jëtu'un të n'ëna'any.

⁷E tëy miits nëëmëtë: Nëjkxaanpës ets miits xytyuk'oy'atëty. Koos nkanëjkxëty, ka'ap tjëkyepy myinëty ja Nikajpxtutpë ma miitsëtyën; e pën nëjkxpës, ëjts jam nkäxäämpy.

⁸Ko ja Nikajpxtutpë myinëty, yë'ë nyikajpxäämpy pën pokymyëët, kapokymyëët ets pën nëjkx t'ëxajë ja Tios ja tyiytyu'unën.

⁹Mëti'ipë pokymyëëtën yë'ëkyëjxm koos ka'ap xymyëpëky;

¹⁰pën ka'ap pyokymyëëtëty: ëjts, nëjkxpës maajës yë nTeetyën ets miitsëty ka'ap xy'ëk'ixanëtës;

¹¹pën nëjkx t'ëxajëtë ja Tios ja tyiytyu'unën: mëti'ipë ënä'ämpën yaa naaxwiiny naaxkëjxy, tëë nyitukë.

¹²Tapnëm may mëti'ipë miits ntukmëmëtya'akantëpën, je'eyëp ko tyam tsip ets ntukmëmëtyakta'atëty.

¹³Ko ënäty myiny ja Kënu'kxymyëkajtën, mëti'ipë ja tëyajtën yäjkpyën, yë'ë nëjkx tu'kë'ëyë mtuk'ijxpëkëtë ja tëypyë jaantypë, jä'ä ko ka'ap kyë'ëm winma'any tnikajpxa'any, yë'ë nyikajpxäämpy mëti'ipë myëtoopyën ets mtuk'ëwaanëja'anëtë mëti'ipë tunan jatanëpën.

¹⁴Nëjkxëpës ja xymyëjjaw xyjyääntyjyawë, jä'ä ko yë'ë y'ëxajëjäämpy mëti'ipës ëjts njä'äj'typyën ets miits myajmo'oja'antë.

¹⁵Tu'kë'ëyë mëti'ipë ja Tios Teety myëët'ajtypyën, ëjts yë'ë njä'a näjyëtu'un. Paatyës të n'ëna'any ko ja Kënu'kxymyëkajtën t'ëxajëty mëti'ipës ëjts njä'ä'ajtypyën ets miits myajtuknijawëja'antë.

¹⁶Tim jawäänë maajës miits ka'ap xy'ëk'ijxnëtëty, je'eyëp ko nän wäänë y'itëty täätsës jatëkok xy'ixtëty.

¹⁷Ënät jënaakën ja y'ijxpëjkpëtëjk xim yam nyäyajtëëwëtë: ¿Tiijën jyatijäämpy ko jëtu'un y'ëna'änny? Ko y'ënä'äny ko wäänë y'ita'any ma ka'ap n'ijxmëtyën ets ko jatëkok y'ënaankojnëpë ko nän wäänë y'itëty ets n'ijxmëty ets yë'ëkyëjxm ko nyijkx ma Tios Teetyën.

¹⁸¿Wi'ixën ya'atë nyiwijy tim jawäänëpë? ka'ap nja'akyujkëmë mëti'ipë myëtyäkpyën.

¹⁹Ënät ja Jesús nija'awëy ko ja y'ijxpëjkpëtëjkëty tam mëti'ipë tjayajtëwantëpën winë, paaty t'ënëmaay: Tëë miits nëëmëtë ko wäänë jyaak ita'any maajës ka'ap xy'ëk'ijxnëtëty ets nän wäänë y'itëty tääts jatëkok xy'ixtëtyës. ¿Ya'atë miits ka'ap xyjyä'äkyukëtë?

²⁰Tëy nëëmëtë, ko nëjkxëp mjë'ëtë mya'axtë ets mmontë mtuktë ma ënäty ja ja'ay xyoonta'aktën mëti'ipë yajtuuntëpën ja naaxwiinyëtë winma'any; e oy ënäty y'ëkjëtu'unëty ma miits jam mmontë mtuktën ets mjë'ëtë mya'axtën, ja mjë'ëyënëty myaxënëty ets ja mmo'onënëty mtukënëty jä'ä nëjkx y'awinpity xoontakën.

²¹Ko tu'uk ja to'oxytyëjk y'u'unkpaata'any, mëk pyikyë y'ixyë, ko wyinkony ma ja y'u'unk myëxu'unk'ata'anyën; e ko ja mëxu'unk myiinë jya'ajnë, jyä'äytyëkooytyääpy ja pëjkën ato'onën jä'äkyëjxm ko tukxoontä'äky ko tëë tu'uk ja mëxu'unk tyajminy tyajja'ty naaxwiiny.

²²Näyjyëtu'un miits tyam mmontë mtuktë; je'eyëp koos winpitaanpës jatëkok ets min n'ixa'antë ets jotkujk mnäjyawëtëty ets ni pën mkapëjkëtëty ja mxoontakënëty.

²³Ka'ap nëjkx tii xy'ëkyajtëëwnëtës jä'ä xëëw. Tëy miits nëëmëtë, mmo'ojëtëp miits ja nteetyës mëti'ipë m'amëtoowtëpën ëjtskyëjxm.

²⁴Tyampaat ka'ap miits tii xy'amëtowtës ëjtskyëjxm; amëtowtë ets myajmo'otëty, jëtu'un ja mxoontakën kya'pxtëty.

²⁵Tëë miits ya'atë ntuk'ëwaanëtë mëët ja nyi''ijxpäjtën. E pyatäämpy ja xëëw jëmëjt ko miits ka'ap n'ëktuk'ëwaanëjanëtë winë mëët ja ijxpäjtën, wa'ats nëjkx ntukmëmatyaknëtë ja nTeetyës.

²⁶Jä'ä xëëw nëjkx ja nteetyës winë xy'amëtowtë ëjts nxëëwkyëjxm; ets ka'apës n'ëna'any koos n'amëtowa'any ja nTeetyës mëët miitskyëjxmëty,

²⁷jä'ä ko ja nTeetyës kë'ëm miits mtsojkëtëp. Mtsojkëtëp jä'äkyëjxm koos miits tsyoktë ets jä'ä ko tëë xymyëpëktë koos jam ntsoony ma Tiosën.

²⁸Jamës të ntsoony maajës ja nTeetyën ëts yaa naaxwiiny të nminyës, e tyamtsës n'ëxmatsy ya'atë naaxwiinyëtë etsës nnëjkxy jatëkok maajës ja nTeetyën.

²⁹Ënät ja y'ijxpëjkpëtëjk y'ënantë: Tyam tëy wa'ats të'kxy jam mkajpxnë, ka'ap xy'ëkyajtuunë ja ijxpäjtën.

³⁰Tyamës nijawëtë ko mijts tu'kë'ëyë winë xynyija'awëtyä'äy ets ko ka'ap xyajmëyäty pën tii myajtëwëtëty. Yë'ëkyëjxmës tyam nmëpëktë ko mijts mtsoony jam ma Tiosën.

³¹Ets ja Jesús y'ëtsoowëtë: ¿Mjantymyëpëjktëp miits tyamnë?

³²Tëë ja xëëw jëmëjt tpaaty ets tyam jëtu'un nixëëwaty, ko miits mkääkwa'kxta'atëty ets mnëjkxtëty këëkjëën këëktëjk etsës nätyu'uk xy'ëxmatstëty. E ka'apës nätyu'ukëty, jä'ä ko tääjës ja nteety mëët.

³³Ntuk'ëwa'anëtëp miits tyam ya'atë tu'kë'ëyë ets ja kijpxyajtën jyää'atëty ma miitsëtyën. M'ëyowantëp miits yaa naaxwiiny, je'eyëp ko amëk jotmëk myajpaatëty, ëjts tëëjës nmëmëtä'äky ja naaxwiinyëtë winma'any.