Read Biblia Mixe de Quetzaltepec Juan 17 Bible Online

Juan 17 - Biblia Mixe de Quetzaltepec bible

Juan 17

¹Ko ja Jesús jëtu'un y'ënaantaay ënät jam tsajpkëjxm pya'at'ijxy ets ja Tios nja'amyejtsy: Tios Teety, tëë ja xëëw jëmëjt tpatnë, mëjjaw jaantyjawë ja m'U'unk ets näjyëtu'un nmëjjaw njaantyjawëtëty.

²Jä'ä ko mijts të xymyo'oy ja kutujkën ma tëkokyë naaxwiinyëtë ja'ayëtyën, ets tmo'oja'any ja juukyajtën tëkokyë mëti'ipë të xymye'eyën.

³Yë juukyajtën xëmëkyëjxmëpë ënät yajpaaty ko mijts myaj'ixy'äty, ja tu'ukyëpë Tios'atyën mëtëypyë, ets ja Jesukristë mëti'ipë mijts të xykyexyën.

⁴Tëë mijts nmëjjaw njaantyjyawë naaxwiinyëtë, tëëjës ja tuunk nyaj'apaatë mëti'ipës të xymye'eyën.

⁵Mooykyës tyam mwiintuuy ja mëj'ajt oyajtën mëti'ipës ijty nmëët'ajtypyën ma ka'anëm ja naaxwiinyëtë tsyo'ontä'äkynyëm.

⁶Ja ja'ayëty mëti'ipë mijts të xywin'ixyën naaxwiiny, mëti'ipës të xymye'eyën, tëëjës ntuk'ëwaanëtë mpën mijts. Mijts ijty mjä'ä'ajtyp ets tëë mijts xymyo'oyës ets tëë ja m'aaw m'ayuk tpatuntë.

⁷E tyam nyija'awëtëp ko ja mëti'ipës mijts të xymye'eyën aakmijts yë mjä'ä.

⁸Tëës ntuk'ëwaanëtë ja ayuk mëti'ipës mijts të xymye'eyën ets tëë tkupëktë. Tëë tnijawëtë ko tëy jëtu'un ko jamës ntsoony ma mijtsën ets tëë tmëpëktë ko mijts të xykyexyës.

⁹Yë'ës nninu'kxtaktëp; ka'apës yë'ëjëty nninu'kxtä'äky mëti'ipë yi'iyë myëmaay myëtajtëpën yë naaxwiinypë; yë'ëjës ninu'kxtäkpy mëti'ipës mijts të xymye'eyën.

¹⁰Tu'kë'ëyë mëti'ipës njä'ä'ajtypyën aakmijts yë'ë mjä'ä; ets mëti'ipë mijts mjä'ä'ajtypyën ëjts yë njä'a; ets ja nmëj'ajt n'oyajtënës nikëxë'kp jam ma yë'ëjëtyën.

¹¹Ka'apës n'ëkyajpaatanë naaxwiiny, je'eyëp ko yë'ëjëty naaxwiiny yë wyë'ëmtë; ëjts jamës nnëjkxy ma mijtsën ets tu'ukyë nyajpatmëty. Tios Teety Wa'atspë, ijx'it këwent'at mëët ja mxëëw ja myëk'ajtën, ja mxëëw mëti'ipës të xymye'eyën ets tu'ukmukyë yajpaatëty, ijxtëm ëëtsajtëmën.

¹²Koos ijty nyajpaaty mëët yë'ëjëty naaxwiiny, n'ijx'ijtëp nkëwent'ajtëpës ijty mëët ja mmëkajtën mëti'ipës xymyooyën. E nitu'uk të kyatëkoy, yi'iyë tu'uk mëti'ipë ënäty jëtu'unyëm tëkoy'ajtpën, ets y'atëwëty ja m'aaw m'ayuk mëti'ipë kuja'ay miinpën.

¹³Tyamtsës nnëjkxy ma mijtsën; e paatyës jëtu'un n'ëna'any jä'ä ko jaaktyaanëmës njaakyajpaaty naaxwiiny, ets ëmuumtu'ukjot xyoonta'aktëty ijxtëmës ëjts nxoontä'äkyën.

¹⁴Tëës ja m'aaw m'ayuk ntukmëmatya'aktë, e ja ëxëëkja'aytyëjk ëxëëk y'ixëtë jä'ä ko ka'ap yë'ë tyajtuntë ja naaxwiinyëtë winma'any, ijxtëm ëjtsën nän ka'apës yë'ëjëty nyajtuny ja naaxwiinyëtë winma'any.

¹⁵Ka'apës n'amëtoy ets xyajpëtsëmëty yaa naaxwiiny, yë'ëjës n'amëtoopy ets xy'akëëytyuk xy'axajtukëty ma ja ka'oypyën.

¹⁶Jëtu'un ijxtëm ëjtsën ka'apës yë naaxwiinyëtë winma'any nyajtuny, yë'ëjëty nän ka'ap yë naaxwiinyëtë winma'any tyatuntë.

¹⁷Kënu'kx mëët ja tëyajtën ets mijts xytyuk'oy'atëty; jä'ä ko yë m'aaw m'ayuk tëy'ajtën'ajtën yë'ë.

¹⁸Jëtu'un ijxtëmës mijts të xykyexyën ma ja ja'ayëtyën mëti'ipë ja naaxwiinyëtë winma'any yajtuuntëpën, näjyëtu'unës yë'ë yam nkäxtë ma ja ja'ayëtyën mëti'ipë yajtuuntëpën ja naaxwiinyëtë winma'any.

¹⁹Yë'ë koos yë'ëjëty nmëmay nmëtajtë paatyës kë'ëm nnäkyënu'kxyë, ets näjyëtu'un yë'ëjëty yajkënu'kxtëty mëët ja tëyajtën.

²⁰Tios Teety, ka'apës yi'iyëty nni'amëtow nnipëjktsowë mëti'ipë tyam mëpëjktëpën, näjyëtu'un mëti'ipë mëpëkantëpnëm ko tmëtowtëty ja aaw ayuk mëti'ipë yë'ë nyikajpxantëpën.

²¹N'amëtoy npëjktsoy ets tu'ukyë y'itëty; ijxtëmës tu'ukyë n'ityën mëët mijts ets mijts tu'ukyë mëët ëjts. Näjyëtu'unës n'amëtoy ets tu'ukyë y'itëty mëët ëëtsëty ets tmëpëktëty ja naaxwiinyëtë ja'ayëty ko mijtsës të xykyexy.

²²Tëës nmo'otë ja mëj'ajt oyajtën mëti'ipës mijts të xymye'eyën, jëtu'un tu'ukyë y'itëty, jëtu'un ijxtëm ëëtsajtëmën tu'ukyë nyajpatëmën.

²³Jamës nyajpaatëty tu'ukyë ma yë'ëjëtyën ets mijts myajpaatëty tu'ukyë ma ëëtsëtyën, jëtu'un ja naaxwiinyëtë ja'ay nijawëtëty ko mijts të xykyexyës ets ko xytsyoky xyjyawë ijxtëmës mijts xytsyokyën.

²⁴Tios Teety, mijtsës të xymyo'oy, ntsojkpyës ets jam yajpaatëty maas n'ita'anyën ets t'ixtëty ja mëj'ajt oyajtën mëti'ipës mijts të xymye'eyën, jä'ä ko mijtsës të xytsyoky naamka'anëm ënäty ja naaxwiinyëtë kyojynyëm.

²⁵Tios Teety mëtëypyë, yë naaxwiinyëtë ja'ay ka'ap m'ixy'atëtë; ëjts n'ixy'äjtypyës mijts, ya'atë näjyëtu'un nyija'awëtyëp ko mijtsës të xykyexy.

²⁶Tëës ntuk'ëwaanëtë mpën mijts ets njaaktuk'ëwanëjantëpës, ets ja tsojkën ja'awën tmëët'atëty mëti'ipës mijts të xymye'eyën ets nyajpaatëtyës ma yë'ëjëtyën.