Read Biblia Mixe de Quetzaltepec Juan 2 Bible Online

Juan 2 - Biblia Mixe de Quetzaltepec bible

Juan 2

¹Kom tëkëëk xëëw y'ijty ja pëjkën ukën jam Caná, Galilea y'itjotm. Tam ënäty ja Jesús ja tyaak yajpaaty,

²ets ojts ja Jesús yajwoy mëët ja y'ijxpëjkpëtëjk.

³Ojts ja tsatsym nyëë kyixy, ënät ja Jesús ja tyaak y'ënëmaayë: Ka'ap tii tsatsym nyëë t'ëkmëët'ajnëtë.

⁴Ënät ja Jesús y'ëtsooy: Nanë, ¿tiis ko jëtu'un xy'ënëëmë? Ka'anëm tpaaty ja nyixëëw maas winë ntunëtyën.

⁵Ënät ja tyaak ja Jesús t'ënëmaay ja mëti'ipë wiinkëëy kujkkëëytyëpën: Tuntë tu'kë'ëyë mëti'ipë yë'ë nyi'ënä'ämëpën.

⁶Tam ënäty tëtujk ja mëjtsaa tu'ts, nëë atä'ämën mëti'ipë ijty yajtuuntëpë ja jutiis ja'ayëty ko näypyuj nyäjyä'ätsëtë, majkta'px ëkë mëko'px litrën ja jyot ja tu'ukpë.

⁷Tääts ja Jesús t'ënëmaay ja wiinkëëpyë: Atääm'ujtsta'atë ya'atë tu'ts. Tääts t'atääm'ujtstë ape'etsy'jäty.

⁸Ënät ja Jesús y'ënëmaayëtë: Ajä'ptu'utë wäänë ets xytyukninëjkxtëty mëti'ipë xëëw wintënääpyën. Jëtu'un ojts tuntë.

⁹Tääts ja xëëw wintënääpyë ojts tja'awëkyäpy ja nëë mëti'ipë të y'awinpityën tsatsym nyëë, ka'ap ënäty nijawë maa tsyoony ja nëë; yi'iyë mëti'ipë wiinkëëy kujkkëëytyëpën nyija'awëtyëp, jä'ä ko yë'ë ënäty të tyajpëtsëmtë ja nëë. Tääts ja xëëwintënääpyë tyaxëy ja ye'etyëjk mëti'ipë pëjkpën,

¹⁰ets t'ënëmaay: Ko pën pyiky yë'ë jëyëjp yaj'apëjkëp yë oypyë tsatym nyëë e ko kom të y'uknëtë tääts yë'ë jyaak yajmo'otë mëti'ipë ka'ap nëkoo y'oyëtyën. E mijts taptëm xypyëjkë'ëky ja oypyë tsatym nyëë mëti'ipë yam ok myajpëtsëëmpyën.

¹¹Ya'atë mëj'ajtën mëti'ipë Jesús tyuunën jam Caná ma Galilea y'itjotmën yë'ë ma mëtu'uk tyajnikëxë'kyën ja myëj'ajt y'oyajtën.

¹²Ko jëtu'un y'ëktuun y'ëkjajtë tääts ja Jesús ojts nyijkxy jam Capernaúm, mëët ja tyaak, y'uty ets ja y'ijxpëjkpëtëjk; jam ojts y'itë kanaak xëëw.

¹³Ëmaayxyëëw ënäty wiinkoonëp mëti'ipë jutiis ja'ayëty myëjja'awëtëpën, ko ja Jesús ojts pya'tëkë jam Jerusalén.

¹⁴Ets tpaty ma tsajptëjkën ja tsajpkaa to'kpë, kupixyny to'kpë, pak to'kpë ets mëti'ipë jam u'unyääytyëpën ma tyuuntaknëtyën ma ja meeny twinkukontën.

¹⁵Ko ja Jesús jëtu'un t'ijxy, ënät txa'ty tu'uk ja tejpxy ets t'ëxwojppëtseemtaay ja ajuuy ato'kpë ma ja tsajptëjkën, mëët ja tsyajpkaajëty kyupixynyëty ets mëti'ipë ja meeny wyinkukoontëpën; ja tyo'kpäjnëty ojts yajtijkëtaawta'atë ets ja myeeny y'ixko'owtaaytyë.

¹⁶Ënät ja pak to'kpë yaj'ënëmaaytyë: Yajpëtsëmtë ya'atë yaa, ka'ap tjëkyepy miits maaytyëjkën xywa'antëty ja nTeetyës ja tyëjk.

¹⁷Ënät ja y'ijxpëjkpëtëjk tja'amyäjtstë ja Tios ja y'aaw y'ayuk mëti'ipë ënaanpën: Mëkës yë mtëjk ni'äkë'aty.

¹⁸Tääts ja jutiis ja'ayëty yajtëëwëtë: ¿Tii ijxpäjtën myäjkpy mëti'ipë yajknikëxë'kpyën ja kutujkën ets ya'atë jëtu'un xytyunëty?

¹⁹Tääts ja Jesús y'ëtsooy: Jijtë'ëktë ya'atë mëjtsajptëjk ets kom tëkëëk xëëw nkojtëkatsëtyës.

²⁰E ja jutiis ja'ayëty jëtu'un y'ënëmaayëtë: Wëxtyikxy tëtujk jëmëjt ya'atë mëjtsajptëjk të yajkojy, ¿e mijts tëkëëk xëëw xykyoja'anyë?

²¹E ja Jesús, yë'ë ja nyi'kx kyopk y'antijpy.

²²Paaty ko ja Jesús ojts jyuukpyiky, ënät ja y'ijxpëjkpëtëjk tja'amyäjtstë ko ënäty jëtu'un të y'ënä'äny ets tmëpëjktë ja Tios ja y'aaw y'ayuk ets ja Jesús ja y'aaw y'ayuk mëti'ipë këxja'ay miinpën.

²³Ko ja Jesús ënäty jam yajpaaty ma ja Jerusalén kajpnën ëmaay xyëëwjoty, may ja ja'ay t'ijxtë ja mëj'ajtën mëti'ipë tyuun kyajpxën ets tmëpëjktë.

²⁴E ja Jesús ka'ap tuk'ijxpety ja mayjyä'äy, jä'ä ko nyija'ap wi'ix jyä'äy'atën ni'ëmukë.

²⁵Ka'ap tuk'ëwaanë tsoky, wi'ixjaty ja ja'ay jyä'äy'atën, wa'ats nijawë wi'ix ja y'aaw jyotëtyën.