Read Biblia Mixe de Quetzaltepec Juan 4 Bible Online

Juan 4 - Biblia Mixe de Quetzaltepec bible

Juan 4

¹Tääts ja fariseë ja'ayëty tnija'awëtyë ko ja Jesús wäänëmay ja ja'ay pyajëtityë ets tyajnëëpety këtiinëm ja Juan;

²oy ja Jesús yë'ëjëty kyayajnëëpety, jä'ä ko ja y'ijxpëjkpëtëjk ënäty yajnëëpäjtëp.

³Ko Jesús tnija'awëy ko ja fariseë ja'ayëty ënäty të nijawëtë, ënät tsyo'ony ets ojts nyijkx jatëkok Galilea.

⁴Ko nyijkx jam Galilea, kopkpëky ko ja samaariëtë it tuknaxy.

⁵Tääts jyä'äjty ma ja Sicar kajpnën, samaariëtë y'itjot; winkon ma ja naaxjotmën mëti'ipë ja Jacob tyukumaayën ja myaank José.

⁶Jam ënäty yajpaaty tu'uk ja Jacob ja nyëëtajy. Ënu'kxëp ja Jesús mëk jä'ä ko jeky ënäty të ye'ey, paaty nyaaxwe'tsy jam ma ja nëëtajyën. Kujkyxyëëwën ënäty.

⁷Ets ja y'ijxpëjkpëtëjk tëë ënäty nyëjkxtë juupyë mëti'ipë y'akujky xyëëwatëpën. Tääts tu'uk ja samaariëtë to'oxytyëjk jyä'äjty nëëkoompë ets ja Jesús y'ënëmaayë: Mooykyës wäänë mnëë.

⁸

⁹Ka'ap ja jutiis ja'ayëty mëët ja samaariëtë ja'ay nyämyäyëtë, paaty ja to'oxytyëjk y'ëtsooy: ¿Wi'ixës ko mijts yë nëë xy'amëtoy?, mjutiis ja'ayts mijts ets ëjts samaariëtë ja'ayës.

¹⁰Ënät ja Jesús y'ëtsoowë: Ko jeexyë mijts xy'ëknijawë mëti'ipë ja Tios yäjkpyën ets pën m'amëtoowëp yë nëë, mijts jeexyë m'amëtoopy ja nëë ma yë'ëjën ets mooyëp jeexyë ja nëë mëti'ipë yajjuuky'ajtpën.

¹¹Tääts ja to'oxytyëjk y'ënëmaayë: Wintsën, ka'ap tii xymyëëtëty wi'ix yë nëë xyjyuuta'any jap jutjoty, këk yë nëëtajy, ¿maajën ja nëë xypyëka'any mëti'ipës xymyo'ojaanpën mëti'ipë yajjuuky'ajtpën?

¹²Yë n'ap n'okëtyës Jacob ëëts ojts ya'atë nëëtajy xytyukmëwë'ëmtë, ma ja nëë ijty tyajpëtsëmtën mëti'ipë ijty y'uktëpën mëët ja y'u'unk y'ëna'k ets ja jyëyujk. ¿E mijts wä'än jëtää ni'ik yë mëj'ajtën xymyëëtëtyë këtiinëm yë'ëjë?

¹³Ets ja Jesús y'ëtsoowë: Ni'ëmukë ja ja'ayëty mëti'ipë ya'atë nëë y'uktëpën, tëëtsëjantëp jatëkok;

¹⁴e mëti'ipë y'uktëpën ja nëë mëti'ipës ëjts nyäjkpyën, nijëna'a kyatëëtsëja'antë jatëkok. Jä'ä ko ja nëë mëti'ipës nyakäämpyën, jëtu'un ja myuuta'any ijxtëm ja nëëkopkën mëti'ipë yajjuuky'ajtpën.

¹⁵Ënät ja to'oxytyëjk y'ënëmaayë: Wintsën, mooykyës tääpë jëtu'unpë nëë etsës ka'ap nnäkytyëëtsëty ni nkanäkymyinëtyës yaa nëëkoompë.

¹⁶Ënät ja Jesús y'ënëmaayë: Nëjkx ja mniye'etyëjk woy ets mmintëty yaa jatëkok.

¹⁷Tääts ja to'oxytyëjk y'ëtsooy: Ka'apës pën nniye'etyëjk. Ets ja Jesús y'ënëmaayë: Mëtëy m'ëna'any ko ka'ap pën mniye'etyëjk;

¹⁸jä'ä ko nimëkoxk mijts ja mniye'etyëjk të xyajnaxy ets mëti'ipë tyam mniye'etyëjk'ajtypyën, ka'ap yë'ë xynyiye'etyëjkëty. Tëy jëtu'un të m'ëna'any.

¹⁹Ko ja to'oxytyëjk jëtu'un tmëtooy ets y'ënäny: Wintsën, jëtu'unës nja'akyukë ko mijts mkäjpxynyajxpë'ajtp yowë.

²⁰Ëëts ja nteety n'apëty yaa ijty ja Tios twintsë'ëkëtë ma ya'atë kopkën; e miitsëty jëtu'un m'ëna'antë ko jam Jerusalén mëpaat yë Tios yajwintsë'ëkë.

²¹Ënät ja Jesús y'ëtsoowë: To'xotyëjk, mëtoow'it mëti'ipë yam ntukmëmëtyäkpyën, ko pyätyp ja xëëw jëmëjt ma miitsëty ja Tios Teety xywyintsë'ëkëtëty oymyaajëty, oy mkatimynyëjkxtëty jam Jerusalén ëkë pën kyaminëty yaa ma ya'atë kopkën.

²²Miitsëty ka'ap xynyijawëtë pën m'ëwtajtëp; ëëts nnija'awëtëpës pën n'ëwtajtëpës, jä'ä ko yë nitsokën jam tsyoony ma jutiis ja'ayëtyën.

²³Pyätyp ja xëëw jëmëjt, ets tyam jëtu'un të tpaaty, ma ja ja'ay t'ëwtata'antën ja Tios Teety mëtëypyë ijxtëm ja Tios ja Kyënu'kxymyëk'ajtën tsokyën. Jä'ä ko yë Tios Teety tsyojkpy ets jëtu'un yaj'ëwtatëty.

²⁴Tios, ka'ap yaj'ixy ets pën y'ëwtajtëpën, mëtëy t'ëwtatëty jëtu'un ijxtëm ja Kënu'kxymyëkajtën y'ënä'änyën.

²⁵Ënät ja to'oxytyëjk y'ënëmaayë: Nija'apës ko myina'any ja Mesías ja Kristë; ko ënäty myiny, yë'ë nyikajpxta'ajäämpy tu'kë'ëyë winë.

²⁶Ets ja Jesús y'ënëmaayë: Ëjts jëtu'un, mëti'ipë yam mëmëtyakëpën.

²⁷Ënät ojts jya'të ja y'ijxpëjkpëtëjk, mëj'ixy ojts t'ixtë ko ja Jesús myëtyä'äky mëët ja to'oxytyëjk. E ni pën ojts kyanätyuk'a'ixëty ets tyajtëwëty pën tii ja to'oxytyëjk tsyojkpy ëkë pën tii ënäty mëët myëtyäkpy.

²⁸Tääts ja to'oxytyëjk jam t'ëxmajtsy ja tyu'ts ets ojts nyijkx kajpnjotm ets t'ënëmaay ja ja'ay:

²⁹Min xy'ixtë tu'uk ja ye'etyëjk mëti'ipë të tnikajpxta'ayën tiijatyës të ntunyën. ¿Ka'ap jëtää jyä'äjëty ja Kristë?

³⁰Ënät ja ja'ay ojts tsyoontë jam kajpnjotm ets nyëjkxtë ma ja Jesús jam yajpaatyën.

³¹Tam ënäty ja y'ijxpëjkpëtëjk myënu'kxta'akëtë: Wintsën, kay wäänë.

³²Ënät ja Jesús y'ënëmaayëtë: Ëjts tamës ja kääky uuky nmëëtëty mëti'ipë miits ka'ap xynyijawëtën.

³³Tääts ja y'ijxpëjkpëtëjk nyäyajtëëwëtë nixim niyam: ¿Wä'än jëtää pën kääky uuky të myo'oyë?

³⁴Tääts ja Jesús y'ënëmaayëtë: Ëjts yë'ëjës jëtu'un nja'ap tä kääky tä uukyën koos ntuny ja ënä'ämën mëti'ipë tsyojkpyën ja mëti'ipës të xykexyën ets nyajwintu'upëkëtyës.

³⁵Miitsëty jëtu'un m'ëna'antë: Taxk po'o tyëkoy'ätynyëm ets ja pëjktä'äky pyëtë'ëkëty; e ëjts jëtu'un miits nëëmëtë ets xy'ixtëty ja kam, ko tëë ja pëjktä'äky myëjaawnë.

³⁶Pën ja pëjktä'äky yajpëtë'ktëpën, yajmëjuupy jä'ä; ets ja pëjktä'äky mëti'ipë pëtë'kpën, yë'ë ets tyunëty ma ja juukyajtën xëmëkyëjxmëpë ets y'itëty xyontëty ja ja'ayëty tu'ukyë mëti'ipë niptëpën ets mëti'ipë yajpëtë'ktëpën ja pëjktä'äky.

³⁷Tëy yë'ë ko ayuk y'ënä'äny: Ëpëky ja ja'ayëty mëti'ipë niptëpën ets ëpëky mëti'ipë yajpëtë'ktëpën ja pëjktä'äky.

³⁸Ëjts miits të nkäxtë yajpëjktä'äkpyëtë'kpë ma kä'äp ojts xynyitunëtën, wiinkpë ojts tyuntë ets miits ënät tyam mtuk'oy'atantëp yë tyuunkëty.

³⁹May ja ja'ayëty mëti'ipë kukajpnajtëpën Samaria ojts tmëpëktë ja Jesús, jä'äkyëjxm ko ja to'oxytyëjk ënäty të y'ënë'ëmxëtë: Tëës xytyuk'ëwa'anëtyä'äy tiijatyës të ntunyën.

⁴⁰Paaty ko ja samaariëtë ja'ayëty jyajtë ma ja Jesús ënäty jamën ojts mëktä'äky tnëëmëtë ets jyaak wë'ëmëty ma yë'ëjëtyën. Ojts ja Jesús jyaak wë'ëmy mäjtsk xëëw,

⁴¹may ja ja'ay jyaak mëpëjktë ko tmëtoowtë wi'ix y'ënänyën.

⁴²Ets t'ënëmaaytyë ja to'oxytyëjk: Nmëpëjktëpës tyam, ka'ap yi'iyëty ko mijts të xynyikäjpxy, näjyëtu'un koos kë'ëm të nmëtowtë ko tyiyëty, ko yë'ë naaxwiinyëtë ja'ay Yajknitsokpë.

⁴³Kommëmäjtsk xëëw ja Jesús tsyo'ony jam Samaria ets ojts nyijkxy Galilea.

⁴⁴Jëtu'un ja Jesús kë'ëm y'ënäny, ko ka'ap ja Tios käjpxynyajxpëtëjk yajwintsë'ëkëtë ma kyë'ëmkajpnën.

⁴⁵Ko jyä'äjty jam Galilea, tsuj ojts ja ja'ay kyupëkyë, jä'ä ko tëë ënäty näjyëtu'un y'otstë xëëw'ajtpë jam Jerusalén ets tëë ënäty t'ixtë tii ja Jesús të tunyën ëmaay xyëëwjoty.

⁴⁶Tääts ja Jesús ojts nyijkx jatëkok jam Caná, nän Galilea y'itjotm ma ënäty ja nëë të tyaj'awinpityën tsatsym nyëë. Jamts ënäty tu'uk ja yajkutujkpë tyuunpë, jä'ä myaank pëjkëp jam Capernaúm.

⁴⁷Ko ja yajkutujkpë ja tyuunpë tnija'awëy ko ja Jesús ënäty të tsyoony jam Judea y'itjotm ets të jyä'ty Galilea, ojts tninëjkxy ets tmënu'kxtäky ets tyajtso'okëty ja myaank mëti'ipë ënäty ookanëpën.

⁴⁸Ënät ja Jesús y'ëtsoowë: Miitsëty ka'ap mëpëktë pën ka'ap xy'ixtë ja mëj'ajtën.

⁴⁹Ënät ja ye'etyëjk myënu'kxtakë: Ja'amkojëm Wintsën, naamka'anëmës ja n'u'unk y'ooky.

⁵⁰Ënät ja Jesús y'ënëmaayë: Wimpit, nëjkx ma mtëjkën, juuky'ajtp ja mmaank jam. Ojts ja ye'etyëjk tmëpëky wi'ix ja Jesús y'ënëmaayën ets ojts nyijkxy.

⁵¹Tam ënäty tyu'uye'ey, ko ja tyuunpëtëjk jyëjpye'eyë'kë ets y'ënëmaayë: Juuky ja mmaank jam.

⁵²Ënät ja yajkutujkpë ja tyuunpë tyajtëëy pën tii horë të nyäjyawëty myëpaatë ja myaank ets y'ëtsoowëtë: Ëxë'ëy, kujkyxyëëwën ojts ja jëënpa'am y'ëxmatsyë.

⁵³Ënät ja u'unkteety tja'amyejtsy ko nän jää horë ënäty ja Jesús të nyë'ëmxëty: Juuky'ajtp yë mmaank jam. Ja yajkutujkpë ja tyuunpë ojts tmëpëky ja Jesús mëët ni'ëmukë mëti'ipë tsënaaytyëpën jam ma tyëjkën.

⁵⁴Yë'ë ya'atë mëmäjtskpë mëj'ajtën mëti'ipë ja Jesús tyuunën ko jam Judea tsyo'ony ets ojts nyijkx Galilea.