Read Biblia Mixe de Quetzaltepec Hechos 1 Bible Online

Hechos 1 - Biblia Mixe de Quetzaltepec bible

Hechos 1

¹Teófilo, ja noky mëti'ipës mëjëyëjp njaayën, yë'ë nyimëtyäkpy mëti'ipë ja Jesús tyuuntso'onën ets mëti'ipë tyuk'ijxpëjktso'onën ja ja'ay

²ets mapaat tsyajpejtyën. Ka'anëm ënäty tsyajpety ko ja y'ijxpëjkpëtëjk ojts tukwinjawë mëët ja Kënu'kxymyëkajtën mëti'ipë tyuntëpën kyajpxtëpën.

³Tëë ënäty y'ooky, ko jatëkok nyänyikëxë'kë juuky kanaak ok, ets jëtu'un ja y'ijxpëjkpëtëjk ojts tuknijawë ko juuky'ajtp ënäty. Wëxtyikxy xyëëw ja y'ijxpëjkpëtëjk nyätyuk'ijxë, tukmëmëtyä'äky ja Tios ja kyutujkën.

⁴Tëkok ënäty ja ijxpëjkpëtëjk jam tmëëtkaytyë ja Jesús ets y'ënëmaayëtë: Ka'ap mnatsoontëty yaa Jerusalén. Owxitë mëti'ipë Tios Teety të twaantä'äkyën ma miitsëtyën, mëti'ipë të ntukmëmëtya'aktën.

⁵Tëy ko ja Juan yajnëëpejty mëët ja nëë, miitsëty tsojk mnëëpäta'antë mëët ja Kënu'kxymyëkajtën.

⁶Tëë ja ijxpëjkpëtëjk ënäty ye'eymyuktë mëët ja Jesús jam ma Olivo kopkën, ko tyajtëëwtë ja Jesús: Wintsën, ¿mkutujkënmo'ojäämpy ja Israel kajpn ets jatëkok kë'ëm nyäy'ënä'ämëtëtyë?

⁷Tääts ja Jesús y'ëtsooy: Ka'ap myiitsëty mpaatëtë xynyijawëtëty ja xëëw mëti'ipë ja Tios Teety të tuknipëjktaakën mëët ja kyutujkën.

⁸E mpëktëp miits ja mëk'ajtën ko ja Kënu'kxymyëkajtën mtukëta'akëtëty ets xykyajpxwa'kxtëty mëti'ipë të xy'ixtën ëjtskyëjxm; jëtu'unts xynyikajpxtëty jam Jerusalén, Judea y'itjotm, Samaria ets ma tu'kë'ëyë it naaxwiinyëtën.

⁹Ko ja Jesús kyajpxtaay, tääts nän jämyë ijxwintë'kxyë tsyajpejty ets yu'tsëy ja yoots.

¹⁰Tam ënäty pya'at'ixtë tsajpjotm ko ja Jesús tsyajpety, mäjtsk ja ye'etyëjk ajotkumonë kyëxë'ktë jam pyë'amëty, aak poopxoxy yaj'ixtë,

¹¹ets y'ënëmaayëtë: Miits, Galilea ja'ayëty, ¿tii mpa'at'ijxtëp jam tsajpjotm? Ya'atë Jesús mëti'ipë të xy'ixtën pya'tëkë tsajpjotm, jëtu'un jatëkok myina'any yaa naaxwiiny.

¹²Tääts ja ijxpëjkpëtëjk tsyo'ontë jam ma ja Olivo Kopkën ets nyëjkxtë Jerusalén. Je'eyë ojts tu'uk mil metrën ye'eytyë, jä'ä ko jëtu'un ja Jutiis ja'ayëty ja y'ënä'ämën y'ëna'antë, ko wäänë ye'eytyëty po'kxënxëëw.

¹³Ko jyajtë jam kajpnjotm, tääts pyäjtë tëjkëjxm ma jyajta'aktën. Tap ja Pedro, Juan, Santiagë, Andrés, Felipe, Tomás, Bartolomé, Mateo; Santiagë, mëti'ipë Alfeo y'u'unk'ajtypyën; Simón, mëti'ipë ja zelotë winma'any tyuk'ijtëpën ets ja Santiagë, mëti'ipë Judas y'u'unk'ajtypyën.

¹⁴Ni'ëmukë ijty xëmë ye'eymyuktë ets ja Tios tja'amyätstë mëët ja Jesús ja myëkä'äx ets ja Maria mëti'ipë Jesús tyaak'ajtypën ets ja to'oxytyëjkëty wiinkëtypë mëët.

¹⁵Näy jää tiempo ja Pedro ojts wya'këxë'ëky ma jam ja mayjyä'äyën; nimëko'px ja i'px ënätyëty jam ets y'ënäny:

¹⁶Mëku'uktëjkëty, kopkpëky ko ënäty jëtu'un tyuna'any jyata'anyë ijxtëm ja Kënu'kxymyëkajtën ojts tyaj'ëna'anyën ja David, ma tnimëtyä'äkyën ja Judas, mëti'ipë tyu'uwinwoowën ja ja'ayëty mëti'ipë myajtstën ja Jesús.

¹⁷Ja Judas tu'ukyë ijty mëët nyajpatëmë, ets myëët'ajtyp ja tuunk ënäty ma ëëtsajtëmën.

¹⁸Ojts tu'uk tjuy ja naax kam, mëët ja meeny mëti'ipë pyatën ko pyokytyuuny; ok ojts tsixkëtän kyuka'anaxy ets ojts pyëjwä'kxy ets ja tyiinty pyëtsëëmtaay.

¹⁹Tu'kë'ëyë ja ja'ay tnija'awëtyë mëti'ipë ënäty jam tsënaaytyëpën Jerusalén. Tääts ja naax ojts tyajxëëwpätë mëët ja kyë'ëm ayukëty Hacéldama, jä'ä nyiwijy Ne'pnyë'am.

²⁰Ets ja Pedro jyaak'ënany: Tyaapë jap jëtu'un kuja'ay myiny ma ja salmos nokyën, mëti'ipë ënaanpën: Apak ja tyëjk wyë'ëmanë, ka'ap jam pën y'ëktsëënaaynyëty. Näjyëtu'un y'ënä'äny: Wä'än ja wiinkpë kyutëkëty ma ja tyuunkën.

²¹Tää yaa ja'ay yajpaatë mëët ëëts'ajtëmë mëti'ipë xëmë të xyjyämyëët'ajtëmën ko ja Wintsën Jesús yajpaty mëët ëëts'ajtëmë,

²²tyimtso'ontäky ko ja Juan yajnëëpäjtpë ets koonëm tsyajpejty. Kopkpëky ko tu'uk yajpaatëty ma ëëtsajtëmën, ets näjyëtu'un tnikajpxëty ko tëë ja Jesús jyuukpyiky.

²³Ënät twin'ijxtë ja ja'ay nimäjtsk ets tu'uk wyinkëta'akëty. Tu'uk txëëwaty José Justo, mëti'ipë näjyëtu'un yajtijpën Barsabás ets tu'uk Matías xyëëwajtyp.

²⁴Tääts ja Tios tja'amyäjtstë: Wintsën, mijts mnija'ap wi'ixjaty ja ja'ay tu'uktu'uk ja jyot wyinma'anyën. Tyam ya'atë ja'ayëty nimäjtsk, tuk'ijxtëkës pën mijts mwin'ixyp.

²⁵Wä'än tuny ja tuunk mëti'ipë ja Judas y'ëxmajtsën ko ojts nyijkx ma ënäty tuknipëjktaakë y'ityën.

²⁶Tääts t'ijxpëtsëëmtë suertëjoty pën tuka'ajëp. Ja Matías ojts tyuka'ayë ja tuunk ets jam yajkuja'ayëy ma ja nimajk tu'ukpë ja ijxpëjkpëtëjkën.