Read Biblia Mixe de Quetzaltepec Hechos 16 Bible Online

Hechos 16 - Biblia Mixe de Quetzaltepec bible

Hechos 16

¹Tääts ja Pablo ets ja Silas jyajtë jam Derbe ets Listra. Jamts tpatë tu'uk ja mëpëjkpë, Timoteo xyëëwajtyp. Jutiis ja'ay tyaak'ajtyp, mëpëjkp näjyëtu'un; je'eyëp ko tyeety, griego ja'ay.

²Ja Timoteo, oy nyikäjpxyë ja mëpëjkpëtëjk mëti'ipë tsënaaytyëpën jam Listra ets Iconio.

³Tääts ja Pablo wyinmaay ets ja Timoteo pyajämyëët'atëtëty, je'eyëp ko jëyëjp ojts tnatsujk'ëwtijtë ja ye'etyëjkajtën ets ka'ap ja jutiis ja'ay y'ijxma'atëtëty, jä'ä ko wa'ats ja jutiis ja'ayëty ënäty tnijawëtë ko ja Timoteo ja tyeety griegë ja'ay.

⁴Ënät tsyo'ontë ets ojts nyëjkxtë maajaty ja kajpnën. Jamts tnikäjpxy tnimëtyaktë wi'ix ja ijxpëjkpëtëjk mëët ja mëjja'aytyëjk ënäty të tyaktën ja kajpxwijën jam Jerusalén.

⁵Jëtu'un ja mëpëjkpëtëjk tu'ukyë ja wyinma'any tpëjktaktë ets nyimayëtë winjëpom.

⁶Tääts ja Pablo mëët ja myëku'uktëjk tsyo'ontë ets ojts nyëjkxtë Frigia ets Galacia, jä'ä ko ka'ap ja Kënu'kxymyëkajtën ojts tyajkutuky ets ja Tios ja y'aaw y'ayuk tkajpxwa'kxtëty jam Asia.

⁷Ko jam jyajtë Misia tsëpa'an'ëkë'ëm, Bitinia ënäty jyanëjkxa'antë; je'eyëp ko ja Jesús ja Kyënu'kxymyëk'ajtën ka'ap ojts tyajkutuky ets jam nyëjkxtëty.

⁸Ënät ja Misia tnanajxtë jëkäm, ets ojts nyëjkxtë jamm Troas.

⁹Jamts ja Pablo koots yajtuk'a'ijxnajxy, tu'uk ja Macedonia ja'ay jam tyänë ets myënu'kxtä'äkyë ets nyëjkxëty Macedonia y'itjotm ets ja ja'ay jam tputëkëty.

¹⁰Ko ja Pablo jëtu'un t'a'ijxnajxy, ënät ojts nwinmaytyës ko ja Tios jam xywyowtëpës Macedonia ets jam nkajpxwa'kxtëtyës ja oy aaw oy ayuk.

¹¹Ënätës ojts ntëkëtë kepy nëëwinye'epyëjoty, jamës ntsoontë Tróade ets ojts nnëjkxtë tëyë jam Samotracia, komjëpomës nja'ajtës jam Neápolis.

¹²Jamës ntso'ontë etsës ojts nnëjkxtë Filipos, Roma jam ënä'ämp ma tääpë kajpnën, mëj'äämpy nyäxy ma Mecedonië nyaaxjotmën. Jamës n'ijtë jeky jyawë.

¹³Po'kxënxëëw ënäty koos ojts nnëjkxtë jam mëjnëë ëkë'ëm, maas ënäty të nijawëtën ko jam ja jutiis ja'ay nyëjkxtë Tios mëkajpxpë. Etsës jam naaxwä'tstë, ntuk'ëwaanëtës ja oy aaw oy ayuk ja to'oxytyëjkëty mëti'ipë ënäty jam të nyiye'eypyätën.

¹⁴Tam ënäty tu'uk ja to'oxytyëjk mëti'ipë xyëëwajtypyën Lidia, Tiatira kyukajpnëty, wit to'kp, aakjä'ä ijty tyo'kpy ja tsu'unk wit. Ya'atë to'oxytyëjk wyintsë'këp ijty ja Tios. Wintsën ojts winma'any myo'oyë ets tja'akyukëty wi'ix ja Pablo y'ënä'änyën.

¹⁵Tää ojts nyëëpety mëët ni'ëmukë mëti'ipë jam tsënaaytyëpën ma tyëjkën. Täätsës xymyënu'kxtaktës ets y'ënäny: Tuntë mëyajtën, mintë maas yë ntëjkën, pën m'oyjya'awëtëp miits koos nmëpeky ja Wintsën. Ënätës kwanë ojts xyajnëjkxtë.

¹⁶Tëkok ojts jyäty kyëpety, jamës ënäty nnëjkxtë ma ja ja'ay ja Tios tja'amyätstën, täätsës mpatë tu'uk ja to'oxy'ëna'k mëti'ipë ja ku'oypyë myëët'ajtypyën, ets tyuknajtsjawëty mëti'ipë tunan jatanëpën. Ëne'emy ijty y'ity; yajxon ja wyintsën myeenypyääty mëti'ipë ënä'ämëpën.

¹⁷Ja to'oxy'ëna'k ojts ëëts xypyatsoontë, ets y'ënäny mayjyä'äyjoty: Ya'atë ye'etyëjkëty, Tios ni'ik këjxmëpë myëtuuntëp. Yë'ë mtukmëmëtyakëtëp wi'ix xypyaatëty ja nitsokën.

¹⁸Ko jëtu'un kanaak xëëw y'ëtitsy, yä'äxy jyoky; tää ja Pablo tsyijpënë ets tniwa'akwinpijty ets t'ënëmaay ja ku'oypyë mëti'ipë ja to'oxy'ëna'k ënäty myëët'ajtypyën: Jesukristë xyëëwkyëjxm yam mijts n'ëne'emy, ëxmats yë to'oxy'ëna'k. Tääts ja to'oxy'ëna'k ënätyë y'ëxmajtsë ja ku'oypyë.

¹⁹Ko ja to'oxy'ëna'k ja wyintsën t'ijxtë ko ka'ap y'ëkmeenypyatnëtë, ënät tmajtstë ja Pablo ets ja Silas, ets ojts tyajnëjkxtë ma ja kutuunkën, jap kajpn'ikujky.

²⁰Ko yajmëjajtë ma ja kutuunkën ënät t'ënëmaaytyë ja kutuunktëjk: Ya'atë ja'ayëty, jutiis yë'ëjëty, nëkoo kajpn t'ëk'atsijpnëtë.

²¹Jä'ä ko yë'ë tyuk'ijxpëjktëp mëti'ipë ka'ap kyutukyëtyën ets ka'ap tjëkyepy ëëts ntuntëty, jä'ä ko Roma ëëts näkyumatsëtë.

²²Tääts ja mayjyä'äy jyoot'anpëjktë ets ni'ënä'ämëtyë ma ja kutuunkëtyën ets ja Pablo mëët ja Silas yajnijäntëty ets yajkepywyoptëty.

²³Ko yajwojptaaytyë, tääts yajtsuumtë ets ja pujxntëjk këwent'ajtpë ojts yajtuk'ëne'emy ets mëk tkëwent'atëty.

²⁴Ko jëtu'un tmëtooy, tää ojts tpëjktä'äky wäänë o'okwinmpy. Ënät ja tyeky yajtuknaaxkukë'ëyëtë tu'uk ja pu'uy tuknitsatsëpë, naaxkutsumë mëët ja pujxntejpxy.

²⁵Tsu'umkujk ënäty, tap tmëtowtë ja wiinkëtypë ja pujxntëjkja'ayëty ko ja Pablo mëët ja Silas tyëjkëtyë Tios mëkajpxpë ets tkuuy'ëwtë.

²⁶Ajotkumonë ojts ja mëk ujx myiny ets ja pujxntëjk yu'kxpëjky, ënät ja pujxntëjk'aaw y'ëwatsy, näjyëtu'un kya'ataay ja tsumyjä'äy ja pyujxntejpxy pujxnëty.

²⁷Ko ja pujxntëjk këwent'ajtpë ojts nyiwijy nyikejy, tääts t'ijxpaty ko ënäty ja tëjk'aaw të y'ëwatsta'ay. Jëtu'un tjëjp'ixy tëë yowë ja pujxntëjkja'ay kyäkta'atë, ënät ja tyiypyujxn tju'ty ets jyanäyaj'ookanë.

²⁸Ko ja Pablo t'ijxpaty ko nyäyaj'ooka'anyë, tääts mëk t'ënëmaay: Ka'ap wi'ix mnätyunëtëty. Aak tyap ëëtsëty ni'ëmukë.

²⁹Ojts ja pujxntëjk këwent'ajtpë t'amëtoy ja kutë'kxn, ets tyëjkëy tsëyuuypyë pujxn tëkoty ets nyäkyoxtënaaytyakë Pablo ets Silas wyintuuy.

³⁰Tääts ja pujxntëjk këwent'ajtpë tyajpëtseemy ja Pablo mëët ja Silas ets tyajtëëy: Mëku'ukëty, ¿tiis ntunëp etsës nnitso'okëty?

³¹Ënät ja Pablo ets ja Silas t'ëtsoowinpijtë: Mëpëk ja Wintsën Jesukristë ets mnitso'okëty mëët ja m'u'unk mto'oxytyëjk.

³²Ënät ja Pablo ets ja Silas tuk'ëwa'anëtyë ja Tios ja y'aaw y'ayuk ja pujxntëjk këwent'ajtpë mëët ni'ëmukë ja myëku'uktëjk jënu'un tyu'kjëën'at tyu'ktëjk'atën.

³³Näy ënätyë ja pujxntëjk këwent'ajtpë ojts tpujy ja Pablo ets ja Silas ja tsyëtyutëty ets nyëëpäjtë ni'ëmukë mëti'ipë tsënaaytyëpën jam ma jyëën tyëjkën.

³⁴Tää ja Pablo ets ja Silas wyoowëtë ja pujxntëjk këwent'ajtpë ma tyëjkën kääpyë ukpë. Janty jotkujk nyäjya'awëyë mëët ja jyä'äy ko ënäty tëë ja Tios tmëpëktë.

³⁵Ko xyiinytyäky, ënät ja kutuunk tkäjxtë ja kyäjpxynyajxpë ma ja pujxntëjk këwent'ajtpën ets n'ënëëmëtëty wä'än ja Pablo ets ja Silas tnajtsmatsë.

³⁶Ënät ja pujxntëjk këwent'ajtpë t'ënëmaay ja Pablo: Tëës ja kutuunktëjk xytyuk'ënä'ämtë ets n'ëxmatstëty. Oy mnëjkxtëty akujk jotkujk.

³⁷E jëtu'un ja Pablo t'ënëmaay ja kukäjpxy: Nen Romë ja'ay ëëtsëty, ets tëëjës nyajwop nyajka'atstë mayjyä'äyjoty nanëkookyëjxm, ka'anëm ënäty ja npokyës yajpaye'eynyëm, ets tëëjës näjyëtu'un nyajtsumtë. ¿Wi'ix ko ënät tyam yu'utsy me'tsy xy'ëxmatsa'antës? Ka'ap jëtu'un myëtëyëty. Wä'än kë'ëm tmintë ja kutuunktëjkëty etsës yë'ë xyajpëtsëmtëty.

³⁸Ets ja kukäjpxy wyimpijtë ets tuk'ëwa'anëtyë ja kutuunk wi'ix ja Pablo ja ayuk ënäty të t'ëtsoowinpityën. Ënät ja kutuunk tsyë'këtyë ko tnija'awëtyë ko ja Pablo ets ja Silas Romë ja'ayëty.

³⁹Tä ja kutuunk ojts nyëjkxtë ma ja Pablo ets ja Silas jamëtyën ets yajpëtsëëmëtë je'eyëp ko jëyëjp ja mä'kxën tpëjktsoowtë ma ja Pablo ets ja Silas: Tuntë mëyajtën, pëtsëmtë yaa kajpnjoty.

⁴⁰Ko pyëtsëëmtë pujxn tëkoty ets ojts nyëjkxtë ma ja Lidia ja tyëjkën. Jamts mëët nyäpyaatëtë ja mëpëjkpëtëjkëty. Ojts tjotmëkmo'ojtë, tää jam tsyo'onëtë.