Read Biblia Mixe de Quetzaltepec Hechos 25 Bible Online

Hechos 25 - Biblia Mixe de Quetzaltepec bible

Hechos 25

¹Tääts ja Festo tyëjkëy yajkutujkpë jam Cesarea. Kom tëkëëk xëëw tsyo'ony ets ojts pya'tëkë jam Jerusalén.

²Jamts ja teety wintsënëty mëët ja jutiis kutuunk ojts myintë ets ja Pablo jyaak yajni'ë'ënpäta'any.

³Ënät ja Festo t'amëtoowtë ja mëyajtën ets ja Pablo tyajminëty jam Jerusalén. Jëtu'un ënäty ja jutiis ja'ayëty të tuknipëjktaakëtë ets ja Pablo tyaj'ooka'antë tu'ujoty.

⁴Ja yajkutujkpë Festo jëtu'un y'ëtsooy ko ja Pablo jam tsumy jyaak ita'any Cesarea ets ko ja Festo tsojk jam jatëkok nyëjkxa'any.

⁵Ënät t'ënëmaay: Nikë oyës xypyamintëty jënaakën ja mkutuunk. Jam tni'ëënëtëty pën tëë tääpë ja'ay tii tuuntëkoy.

⁶Ja Festo tuktujk xëëwën ëkë majk xëëwën jam y'ijty Jerusalén ets wyimpijty jatëkok jam Cesarea. Komjëpom tpaty ja kyutujktakn ma pyaye'eyën. Ënät ja Pablo tnikäjxëy ets myinëty.

⁷Ko ja Pablo twinkuwa'këy ja Festo, ënät ja jutiis ja'ayëty, mëti'ipë ënäty të tsyoontë jam Jerusalén, tnawa'ak'ëwtijtë ja Pablo ets kanaakpëky mëk'äämpy tni''ë'ënpäjtë, oy nitii tkamëët'atë wi'ix tyajtëytyëkëtëty ko ja Pablo pyokymyëëtëty.

⁸Tääts ja Pablo ojts nyäkyukäjpxyë ets t'ënëmaay ja yajkutujkpë Festo: Ni tiis pën nkatukmëtëkoy, ni yë jutiis ja'ay y'ënä'ämënëty, ni yë mëjtsajptëjk ets ni yë yajkutujkpë kopk.

⁹Ja Festo, yë'ë tsyojkpy ets y'oyjyawëtëty ja jutiis ja'ayëty, paaty tyajtëëy ja Pablo: ¿Mkupëjkpy ets mnëjkxëty jam Jerusalénkë ets jam yajpaye'eyëty ja mpoky ijxtëm të myajni'ëënënë?

¹⁰Tääts ja Pablo y'ëtsoowinpijty: Yääyë pyaat'atyë etsës nyajpaye'eyëty, ma yajkutujkpë kopk ojts yajpëjktä'äkyën ets ja'ay yajpaye'eyëty. Wa'ats mijts xynyijawë koos ka'ap tii yë jutiis ja'ay ntukmëtuuntëkoy.

¹¹Ëjts, ka'apës yam n'ëna'any koos yë n'o'kën nkakupëka'any pën tëëjës ntuuntëkoy mëti'ipë ja o'kën paat'ajtëpën. E pën ka'ap tyiyëty mëti'ipës xytyukni'ë'ënëtëpën, ni pën tkamëët'aty ja mëk'ajtën etsës xykyë'ëyakëty ma ja jutiis ja'ayëtyën. Ënaanpës ets kë'ëm xypyaye'eyëty ja yajkutujkpë kopk.

¹²Ko ja Pablo kyajpxtaay, ënät ja yajkutujkpë tkäjpxy'äjty mëët mëti'ipë kajpxwijtëpën ets t'ënëmaay ja Pablo: Tëë m'ëna'any ko ja yajkutujkpë kopk mpaye'eyëtëty, jam mnëjkxëty.

¹³Kom ok ja yajkutujkpë Agripa ets ja Berenice ojts nyëjkxtë jam Cesarea ets tkajpxpo'kxa'antë ja yajkutujkpë Festo.

¹⁴Jä'ä ko jam kanaak xëëw pyoxtë, tääts ja Festo ojts tukmëmëtyä'äky ko ja Pablo jap y'ity tsumy, ets t'ënëmaay: Tää yaa tu'uk ja'ay tsumy y'ity, yë'ë yajkutujkpë Félix ojts jap tsumy t'ëxmatsy.

¹⁵Koos n'ojtsy jam Jerusalén, ja teetytyëjkëty ets ja mëjja'aytyëjkëty Jutiis ja'ayëty, ojts ni'ëënëtë ja Pablo, ets t'amëtoowtë koos nyajnitukëty ets y'ookëty.

¹⁶Tääts ënëmaaytyës ko ka'ap yë Romë jëtu'un yë kyutujkën tmëët'atë ets pën y'ookëty pën ka'anëm ja paye'eyën tyunyë ets pën ka'anëm nyäwyintänëtë mëti'ipë nänyi'ë'ënëtëpën.

¹⁷Ko yaa jyajtë ja jutiis ja'ayëty, ka'apës ja tiempo nyajtëkooy. Komjëpomës ja nkutujkën nyaj'ëwatsy maas npaye'eyëtyën ets ja Pablo nmëjwooyës.

¹⁸Ko myiintë mëti'ipë ë'ëntëpën, ka'ap jëtu'un y'ë'ëntë ijxtëmës ënäty të nwinmayën.

¹⁹Jä'ä ko yë'ë tyukni'ë'ënëtëp ja myëpëjkën, ets ja Jesús mëti'ipë o'kën ko ja Pablo y'ënä'äny ko tëë jyuukpyiky.

²⁰Ëjts ka'apës nmëwinma'anypyäty wi'ixës ntunëty, paatyës ja Pablo ojts nyajtëy pën kyupëjkpy ets nyëjkxëty Jerusalén ets jam yajpaye'eyëty.

²¹Jä'ä ko jëtu'un kë'ëm y'ënäny ko jam nyëjkxa'any ma ja yajkutujkpë kopkën ets ko jam yajpaye'eyëty, paatyës tsumy nyaj'ëwxity koonëmës jam nkäxa'any ma ja yajkutujkpë kopkën.

²²Tääts ja Agripa t'ënëmaay ja Festo: Ëjts nän njamëtoow'itäämpyës wi'ix tääpë ja'ay y'ënä'äny. Ets ja Festo y'ënäny: Jëpom xymyëtowëty.

²³Ko jëpom, ënät ja yajkutujkpë Agripa jyä'äjty mëët ja tyo'oxytyëjk Berenice wintsë'kën mëët ma ja mayjyä'äy ënäty myuka'antën, ma Festo yajkutukyën. Mëët ojts jyä'ty ja mëj tsiptuunpë wintsënëty ets näjyëtu'un mëët ja kutuunkëty. Tääts ja Festo tnikäjxëy ets myinëty ja Pablo,

²⁴ko ja Pablo yajwoowmiiny, ënät ja Festo y'ënäny: Mijts, yajkutujkpë Agripa ets ni'ëmukë jënu'un të mintën, tyaa ya'atë ye'etyëjk mëti'ipë ni'ëmukë ja jutiis ja'ayëty të nyi''ëënëtyën yaa Jerusalén ets oy tyimmaajëty, aakyë'ë pyëjktsoowtëp ets y'ookëty,

²⁵e ëjts ka'apës npaaty tii tëko'oyën ma ya'atë ja'ayën mëti'ipë jeexyë kyu'o'këpën. Tëë kë'ëm t'amëtoy ets jam nëjkx yajpaye'ey ma ja yajkutujkpë kopkën, paatyës jam ntimyajnëjkxa'any.

²⁶E ka'apës nmëwinma'anypyääty tii pokyës ya'atë ja'ay ntuknipëkëp, wi'ix'äämpës ja ë'ënën npëjkta'akëty ma ja yajkutujkpë kopkën. E tyaatyës nyajminy ma mijtsën yajkutujkpë Agripa ets xypyaye'eyëty, jëtu'unës nmëët'atëty ja winma'any tiijës nja'ajëpën.

²⁷Tsuu lokës nmëëjaty koos tu'uk ja tsumyjä'äy nëkoo nkäxëty, ni nkatuk'ëwaanëtyës ja yajkutujkpë kopk tii poky yajktukni'ë'ënëp.