Read Biblia Mixe de Quetzaltepec Hechos 28 Bible Online

Hechos 28 - Biblia Mixe de Quetzaltepec bible

Hechos 28

¹Koos aak juuky npëtseemtë mejyjoty, ënätës ojts nnijawëtë ko ja it nëë itkujkpyë jä'ä xyëëwajtyp Malta.

²Ja ja'ayëty jampë tsyëënëtën oyës ojts xymyëët'atë, ënät ja jëën tyajmëjëtyë ko tja'awëtyë tëtsyk ets xynyëmaaytyës ets wmëwinkontëtyës ja jëën.

³Ënät ja Pablo näjyëtu'un tkajpmujky ja të'ëts ja'axy. Yë'ë ënäty jyëënku'o'oxyp ko ja tsa'any jap tu'uk pyëtsiimy ja'axyjoty, ja jëën kyukekpy. Jam nyäkyëxpijtë ma ja Pablo ja kyë'ëjën ets ojts kyë'ëmëtsu'utsëty.

⁴Ko ja kukajpn t'ijxtë ko ja tsa'any jam tyiinyë ma ja Pablo ja kyë'ëjën, tääts nyäy'ënanëtë: Ya'atë ja'ay, yaja'ay'o'kpë ënät yë'ë. Oy të jyapëtsëmy juuky mejyjoty, yë Tios yë nyipaye'eyën yë'ë ka'ap y'ëxmatsyë ets jyuuky'atëty.

⁵Tääts ja Pablo ja kyë'ë twinxijty ets ojts tjëënkuwëjy ja tsa'any, niwi'ix ja Pablo kyajajty.

⁶Aakjëtu'un ja ja'ay tjëjp'ixtë tëë yowë ja Pablo yajtsu'utsy, nëkooyë yowë kyiixë'knëty ëkë y'ookëty. Jeky tjëjp'ijxtë, e ja Pablo nitii kyajajtë. Tääts ja wyinma'any tyajtëkajtstë ets y'ënantë ko ja Pablo yë'ë tu'uk tios.

⁷Jam winkon, jam ijty tu'uk yë ja'ay tsyëënë mëti'ipë ja kajpn nyiwintsën'ajtypyën, Publio'ajtp, yë'ëjës ojts xywyowtë ma tyëjkën etsës janty tsuj xyajkaay xyaj'uktë tëkëëk xëëw.

⁸Ja Publio ja tyeety jëënpa'am ets ja ne'pnypya'am ënäty jam pëjkëp. Ënät ja Pablo ojts tkukajpxë. Ko ja Tios ojts tuknija'amyätsë ets ojts tkë'ënixajy, ënätyë tsyoky.

⁹Ënät ja Pablo ja pa'amja'ay ni'ëmukë nyimiinëtë mëti'ipë jamëtyën ets tsyoktë.

¹⁰Mëjwiin ëëts ja ja'ay xywyintsë'ëkëtë, koos ntëjkënëtë jap kepy nëëwinye'epyëjoty winëjatyës xymyooytyë mëti'ipë ënäty ëëts nyajmëyajtëpën.

¹¹Tëës ënäty n'ijnëtë tëkëëk po'o jam Malta, koos tu'uk ntuktëjkëtyë ja kepy nëëwinye'epyë mëti'ipë ënäty jam të tyajnaxyën ja potm. Jamts ja kepy nëëwinye'epyë mäjtsk tmëëtëty ja y'awinax mëti'ipë tyijtëpën tu'uk Cástor ets tu'uk Polux, Alejandría ja kepy nëëwinye'epyë tsyoony.

¹²Täätsës jam ntso'ontë etsës nja'ajtë ma ja Siracusa kajpnën, maas ojts nwë'ëmtën tëkëëk xëëw.

¹³Jamës ntso'ontë etsës nja'ajtë Regio. Jamës jatëkok ntso'ontë, ënät komjëpom ja jëënpoj ojts myiny ets ja kepy nëëwinye'epyë jëtu'unyë wyimpapojy. Kommäjtsk xëëwës nja'ajtë ma ja kajpn txëëwatyën Pozzuoli.

¹⁴Jamës npatë ja mëpëjkpëtëjk. Ënät y'ëna'antë etsës jam mëët nwë'ëmtëty tu'ksëmaan. Jamës ye'epy ntso'ontë etsës nja'ajtë Roma.

¹⁵Tëë ënäty ëëts ja nmëku'uktëjk nijawëtë mëti'ipë jam Roma yajpatëpën. Yë'ë tso'ontë etsës ojts xyjyëjpye'eyë'ëktë ma ja kajpn txëëwatyën Foro Apio ets näjyëtu'un ma ja it txëëwatyën Tëkëëk Ja'ajtakn. Ko ja Pablo y'ijxëtë, tää jyotkujkëy ets ja Tios tkukajpxëy.

¹⁶Kootsës nja'ajtë Roma, ets ja Pablo yajmooy ja kutujkën ets ja jyajtakn ëpëky t'ixta'ajëty ets je'eyë tu'uk ja tsiptuunpë kyëwent'atëtëty.

¹⁷Ko ja Pablo jam jyä'äjty, kom tëkëëk xëëw twoowtsooy ja jutiis ja'ay mëti'ipë wintsën'ajtëpën jam Roma. Ko nyiye'eypyäjtë ets ja Pablo t'ënëmaay: Mëku'uktëjkëty, ëjts, ka'apës yë nja'ay'ajtëm tii të ntukmëtuuntëkoytyë ets nän ka'apës ja n'ap'ajt nteety'ajtëm ja y'ënä'ämën të nkäjpxykyutëjë. Nanëkokyëjxmës xymyajtstë jam Jerusalén ets xykyë'ëyajktës ma ja Romë ja'ayëtyën.

¹⁸Koos ojts xypyaye'eytyë, tääts jëtu'unyë xyjya'ëxmatsantës jä'äkyëjxm ko ka'ap ojts ja npokyës yajpaaty ets xyaj'ooktëtyës.

¹⁹E jä'ä ko ja nja'ay'ajtëm ka'ap tkupëjktë etsës jëtu'unyë nyaj'ëxmatsëty, paatyës n'amëtooy ets ja yajkutujkpë kopk xypyaye'eyëtyës, ëjts ka'apës tii äkë nmëëtëty tiis ntukni'ëënëpën yë nkajpn'ajtëmë.

²⁰Paatykyëjxm miits tyam nwoowtsowtë ko n'ixa'antë ets nmo'oja'antë ja aaw ayuk; jä'ä ko mëët yë'ëkyëjxm tyam pujxn mëët kë'ëtsumy n'ityës ets ja nkajpn'ajtëm, Israel kajpn ja ëwaatsë'ajtën tpaatëty.

²¹Tääts ja jutiis ja'ay y'ëtsoowtë: Nitu'uk ëëts yaa ja noky të xykyanija'të mëti'ipë Judea tso'onpën ets nitu'uk ja nmëku'ukëtyës wi'ix të xykyanëëmëtë mëti'ipë jam tso'ontëpën ets yaa jya'të ma mijts tëkatsy myanikäjpxyën.

²²Yë'ës njamëtowantëp wi'ix mijts mmay mtajy, jä'ä ko nija'awëtëpës ko oymyaajëty aak ëxëëk ja'ay tnikäjpxy tnimëtya'aktë ya'atë jemypyë ijxpëjkën.

²³Ënät tkäjpxy'ajtë jëna'a jatëkok ye'eymyuka'antë. Ko tpaty ja xëëw ets ja ja'ay nimay ye'eymyujktë ma ja Pablo ënäty të jyajtä'äkyën. Ënät ja Pablo tyëjkëy mëtyakpë, jëtu'un kyutsu'ujëy, tuk'ëwaanë ja ja'ay wi'ix ja Tios ja kyutujkën. Jä'ä tyukmëmëtyak ja Moisés ja y'ënä'ämën ets wi'ix ja Tios ja kyäjpxynyajxpë y'ëna'antën, jëtu'un ojts tjatukmëpëka'any ko Jesús yë'ë jëtu'un Kristë.

²⁴Jënaakën tkupëjktë wi'ix ja Pablo y'ënä'änyën, ets ja wiinkëtypë ka'ap tmëpëjktë.

²⁵E jä'ä ko ka'ap ënäty tu'knax myäytyë tyajtë, ënät nitu'uk patu'uk tsyo'ontë ets ja Pablo y'ënëmaayëtë: Mëtëy ojts ja Kënu'kxymyëkajtën y'ënä'äny, ko ojts tyajkäjpxy ja käjpxynyajxpë Jeséas mëti'ipë nteety'ajt n'ap'ajtëmën:

²⁶Nëjkx ya'atë mëëtmëtya'aktë: Oy jënu'un tjamëtowtëty, ka'ap tja'akyukëtëty; Oy tja'ixtëty, ka'ap t'ijxpaatëty.

²⁷Jä'ä ko ya'atë ja'ay yë jyot wyinma'anyëty juun yajpaatë, ëtuky yë tyatskëty, ets pi'its yë wyiinëty, këtiipë y'ixtëty ets këtiipë myëtowtëty, këtiipë jyä'äkyukëtëty ets këtiipë wyimpitëty ma ëjtsën, ets jëtu'un ka'apës nyajtso'oktëty.

²⁸Tääts ja Pablo jyaak'ënany: Yë'ë mnijawëtëp, ko tyam ets jëtu'un tyu'uye'eyä'äny yë xëëw jëmëjt, ja Tios ja nyitsokën yë'ë yajmo'ojantëp ja ja'ayëty ka'apë jyutiis'atën, jä'ä ko yë'ëjëty mëtoowtëp yë'ëjëty.

³⁰Mäjtsk jëmëjt ja Pablo y'ijty ma ja tëjk t'ajuuytyukyën, oy jam pyënëty ijty kyu'ixëty ets t'ëxajë.

³¹Ja Pablo ëwaatsëtum jam yajpaty ets ja Tios ja kyutujkën tkajpxwa'kxë; nimëtyä'äky wi'ix ja Wintsën Jesukristë ja y'ijxpëjkën y'ixëtyën ets ni pën ijty kyayajjotkëxyë.