Read Biblia Mixe de Quetzaltepec Hechos 4 Bible Online

Hechos 4 - Biblia Mixe de Quetzaltepec bible

Hechos 4

¹Tam ënäty ja Pedro ets ja Juan ja ja'ay tmëëtmëtya'aktënëm, ko jyajtë ja teetytyëjkëty ets ja mëjtsajptëjk këwent'ajtpë wintsënëty ets ja saduceostëjkëty.

²Tëë ënäty jyoot'anpëktë, jä'ä ko ja Pedro ets ja Juan ja ja'ay tyaj'ijxpëktë ko tëë nyikëxë'ëky ma ja Jesusën ko ja o'kpë jyuukpyëktë.

³Ënät ojts tmatstë ets tsuumtë. Paaty ojts tsumtë jä'ä ko tëë ënäty tsyu'ujënë, komjëpomnëm tyajpëtsëëmtë.

⁴May ja ja'ay myëpëjktë mëti'ipë ënäty të tmëtowtën ja aaw ayuk; ja mëpëjkpëtëjkëty, yi'iyë ye'etyëjktëjkëty, jä'ä nyimay'ajtë mëkoxk mil.

⁵Komjëpom ja kutuunktëjk, mëjja'aytyëjkëty ets ja tsajptëkotyëtë yaj'ijxpëjkpëtëjk ye'eymyujktë jam Jerusalén.

⁶Tam ënäty ja Anás, mëti'ipë teety wintsënën, ja Caifás, ja Juan ets ja Alejandro, aaktam ënäty ja teety wintsën ja myëku'uktëjkëty.

⁷Ënät ja Pedro ets ja Juan yajwoowmiintë ets jam itkujky yajkuwo'owëtyë ets tyajtëëwtë: ¿Pën yë mëk'ajtën mmooyëtëp ëkë pën jëtu'un mnëmaayëtëp ets jëtu'un winë xytyuntëty?

⁸Tääts ja Kënu'kxypyë Mëk'ajtën ja Pedro tyukëtakë ets t'ëtsooy: Wintsëntëjkëty, mëjja'aytyëjkëty,

⁹Miitsëty yë'ë myajtëëwtëp ko ja oypyë ëëts të ntuntë, wi'ix tu'uk ja tekymya'at të tsyo'okyën.

¹⁰E oy ko xyajtëwtë, tyamës nikajpxtë ma miitsëtyën ets ma tëkokyë ja Israel ja'ayëtyën; ko ya'atë ja'ay, mëti'ipë yam m'ijxtëpën: ja Jesús ja xyëëw, mëti'ipë Nazaret kukajpn'ajtën yë'ë të yajtso'okyë, mëti'ipë miits myajkruutspäjtën ets mëti'ipë ja Tios jatëkok të yajjuukpyikyën.

¹¹Yë Jesús yë'ë tyam jëtu'un të nyäxy ijxtëm ja tsaakopkën, mëti'ipë miitsëty, ja pojtspëtëjk ojts xy'ixka'atstën. E tëëts ja y'awinpity jëtu'un ijxtëm tu'uk ja mëjtsaakopkën mëti'ipë myëtënääpyën ja jëën tëjk.

¹²Ka'ap maa wiinkpë yajnitsokpë, ka'ap maa naaxwiinyëtë apëtsëmy ja ja'ay mëti'ipë ja Tios të xymyo'oyëmën ets xyajnitsokmëty.

¹³Ko ja kutuunktëjkëty t'ijxtë ko amëk jotmëk kyajpxtë ja Pedro ets ja Juan ets ko tnijawëtë ko ka'ap ënäty maa të tni''ijxpëkëtë, mëjmëtoy ojts tmëtowtë; ënät nija'awëtyë ko yë'ë ja Jesús ja y'ijxpëjkpë.

¹⁴Ets tam ënäty ja ja'ay yajpaaty mëët yë'ëjëty mëti'ipë të tsyo'okyën, paatykyëjxm ka'ap tjëkyepy wi'ix y'ëna'antëty.

¹⁵Tääts ja Pedro ets ja Juan tkäjxpëtsëëmtë jap juntëjoty ets aakyë'ë tyëjkëtyë mëtyakpë.

¹⁶Ets nyäy'ënanëtë: ¿Tii winma'any ënät npatmëp mëët ya'atë ja'ayëty? Y'aaknija'awëtyëp yë Jerusalén ja'ayëty ko yë mëj'ajtën të tyaj'ixëtë. Ka'ap tjëkyepy nkuyu'tsmëty.

¹⁷Ets këtiipë ya'atë aaw ayuk myëjwiin kyëjääjëty, tsojk nkajpx'ëtsë'këmë këtiipë muum t'ëknimëtyaknëtëty yë Jesús.

¹⁸Tääts jatëkok twoowtsoowtë ja Pedro ets ja Juan ets mëk'äämpy t'ënëmaaytyë ko ka'ap ja ja'ay t'ëktukmëmëtyaknëtëty ja Jesús.

¹⁹Tääts ja Pedro ets ja Juan y'ëtsoowtë: Miits kë'ëm yajxon ëkwinmay ëkwintajtë pën paat'ajtëp Tios wyintuuy ko miits myajmëmëtowtëty ets Tios ka'ap.

²⁰Ëëtsëty ka'ap tjëkyepy amonyë n'itëtyës ets nkanikajpxtëtyës mëti'ipës të n'ixy të nmëtowtën.

²¹Ënät ja kutuunktëjkëty ojts kyajpx'ëtsë'ëkëtë je'eyë ets jëtu'unyë y'ëxmajtsëtë, ka'ap tpatë ja winma'any wi'ix tyiytyunëtëty, jä'ä ko ja ja'ayëty tyukmëjja'awëtyëp ja Tios mëët mëti'ipë ënäty të tyuny të jyätyën.

²²Wëxytyikxy jëmëjt naxy ënäty ja ja'ay ja jyëmëjt mëti'ipë tsokën mëët ja Tios ja myëj'ajtën.

²³Ko ja Pedro ets ja Juan y'ëwa'atspëtsëëmtë, tääts ja myëku'ukëty ojts tninëjkxtë ma ënäty jamëtyën, ets tukmëmëtyaktë wi'ix ënäty ja teety wintsëntëjk ets ja mëjja'aytyëjk të y'ënë'ëmxëtën.

²⁴Ko ja myëku'uk jëtu'un tmëtoowtë, ënät ja Tios ni'ëmukë tja'amyäjtstë: Wintsën, mijts të xyajkojta'ay tu'kë'ëyë winë, wä'än tsajpëty, tnaaxëty, tnëëjëty, tmejyëty ets oy tyimtiijëty,

²⁵jëtu'un xyaj'ënany ja mKënu'kxymyëk'ajtën ets ja nteety n'apëtyës David, ja mtuunpë: ¿Tii ko yë naaxwiinyëtë ja'ay xim yam myuktë xyu'umtë? ¿Tii ko nitsuu nipoj tii tuknipëjktaakëtë?

²⁶Ets mëti'ipë yajkutujktëpën ets ënä'ämtëpën naaxwiinyëtë tëë kyäjpxykyumëtoownaxtë ets të tnipëtë'ëktë ja Wintsën, ets ja tyuunpë mëti'ipë të twin'ixyën.

²⁷Tëyajtën yë'ë, ko yë Herodes ets ja Poncio Pilato yaa të ye'eymyuktë mëët ja mayjyä'äy, ma ya'atë kajpnën, jutiis ets mëti'ipë ka'ap jyutiisëty, ets ja mWa'ats Tuumpë Jesús të yajmëtsippëky, mëti'ipë të xywyinwitsyën.

²⁸Jëtu'un winë të tuntë ijxtëm ënäty mijts të xytyuknipëjktaakën tyunëtëty jyatëtëty.

²⁹E tyam, Wintsën, ix wi'ix kyajpx'ëtsë'ëkëtën ets yajkutuk ets ja mtuunp amëk jotmëk tnimëtya'aktëty ja m'aaw m'ayuk.

³⁰Mooytyëkës ja mëk'ajtën ets nyajtso'oktëtyës ja pa'amja'ay ets nyaj'ixëtëtyës ja mëk'ajtën mëët ja xyëëw ja wa'atspë ja mtuunpë Jesús.

³¹Ko ja Tios tja'amyäjtstaaytyë, tääts ja tëjk tsyëyuuypyijky ma ënäty jam të nyiye'eypyätën ets ja ja'ayëty t'ëxajëtyääytyë ja Kënu'kxymyëk'ajtën ets amëk jotmëk nimëtyaktë ja Tios ja y'aaw y'ayuk.

³²Ja mayjyä'äy mëti'ipë myëpëjktën ja Jesús, tu'ukyë ijty ja jyot wyinma'any tyaj'itë; ni pën ja pyëjktä'äky tkajä'äpëjktä'äky nätyu'uk, aak tu'knax tyajtuntë.

³³Ets ja ijxpëjkpëty ni'ikyë mëk'ajtën mëët tnikäjpxy tnimëtya'aktë ko tëë ja Wintsën Jesús jyuukpyiky jatëkok. Ni'ikyë ja Tios kyënu'kxëtë ni'ëmukë.

³⁴Ka'ap ijty nitii pën tyajmëyäty, pën myëët'ajtyp ja naax ëkë ja tëjk, tyo'kpy ijty ets ja meeny tyajminy,

³⁵ets tukë'ëtëkëtë ja ijxpëjkpëtëjk, jä'äts ja meeny yajwa'kxtëp ets tmo'otë mëti'ipë yajmëyajtëpën.

³⁶Jam ijty tu'uk ja Israel ja'ay mëti'ipë ja Leví y'u'unk'ajtyp y'ok'ajtypyën; Josee'ajtp, Chipre kyukajpnëty, mëti'ipë ojts ja ijxpëjkpëtëjk yajxëëwpetyën Bernabé jä'ä nyiwijy Yajotkujk'ajtpë.

³⁷Jä'ä ja nyaax tyo'k ets ja naaxtsow tukë'ëtëjkëy ja ijxpëjkpëtëjk.