Read Biblia Mixe de Quetzaltepec Hechos 5 Bible Online

Hechos 5 - Biblia Mixe de Quetzaltepec bible

Hechos 5

¹Jam ënäty yajpaaty tu'uk ja ja'ay mëti'ipë xyëëwajtëpën Ananías, Safira ja tyo'oxytyëjk xyëëwajtyp. Jä'ä tyo'k ja nyaax.

²Tääts ja Ananías ja nyaax tsow ojts tyajwë'ëmy tu'pëky ets ojts jatu'kpëky tmo'oy ja ijxpëjkpëtëjk. Wa'ats ja tyo'oxytyëjk tnijawë ko jëtu'un ja Ananías të tuknipëjktaakë.

³Tääts ja Pedro t'ënëmaay ja Ananías: Ananías, ¿tii ko ja mëjku'u të mnätyuk'ëne'emyë ets xywyin'ëënëty ja kënu'kxymyëk'ajtën ko të xymyëwë'ëmy tu'kpëky ja naaxtsow?

⁴¿Tii këtii mijts xyjyä'äjëty ja naaxë? ets ko të xytyooky, ¿këtii myijtsëty xyjyä'äjëty ja nyimeenyë? ¿Tii ko jëtu'un të mwinma'anypyääty? ka'ap nyaaxwiinyëtë ja'ayëty xywyin'ëëny, Tios jëtu'un të xywyin'ëëny.

⁵Je'eyë ja Ananías jëtu'un tmëtooy, ooky tyimnakëtäky. Ets mëti'ipë y'ijxtën nyija'awëtën, ni'ëmukë tsyë'këtyë.

⁶Tääts ja ëna'ktëjk myiintë, ets twinpijtë ja o'kpë ets ojts tmënëjkxtë tääts tyajnaaxtëkëja'antë.

⁷Wäänë y'ijty tääts ja Ananías ja tyo'oxytyëjk pyajajtë ets tyëjkëy jap tëkoty, ka'ap tnijawë tii ënäty të tyuny të jyätyë.

⁸Ënät ja Pedro tyajtëëy ja Safira: Nikajpx, ¿jëtu'un ja mnaax të xytyooktë ijxtëm të xynyikajpxtënë? Tääts y'ëtsooy ja Safira: Jëtu'un.

⁹Tääts ja Pedro t'ënëmaay: ¿Tii ko të xykyäjpxy'atë nimäjtsk ets ja Wintsën ja kyënu'kxymyëk'ajtën xywyinma'any'ixa'antë? Tää ja ja'ay myintë tëjk ëkë'ëy mëti'ipë ja mniye'etyëjk ojts të tyajnaaxtëkëtën, mijts näjyëtu'un ënät nëjkx mnaaxtëkë.

¹⁰Tääts ja to'oxytyëjk ooky tyimnakëtäky jam ma ja Pedro tyeky'ëjxën. Ko ja ëna'ktëjk tyëjkëtyë, ooky ja to'oxytyëjk jap tpatë. Tää tyajpëtsëëmtë, ets ojts nän jam tnitajëtë ma ënäty ja nyiye'etyëjk të nyaaxtëkën.

¹¹Ënät ja mëpëjkpëtëjk tsyë'këtyääytyë, mëët ja ja'ayëty mëti'ipë y'ixtë nyija'awëtyën tii të tyuny të jyätyën.

¹²Ja ijxpëjkpëtëjk kanaak ja mëj'ajtën tuuntë ma ja ja'ayëtyën. Jam ijty ni'ëmukë ye'eymyuktë ma ja mëjtsajptëjkën, ma txëëwatyën Salomón Tyëjkwiin.

¹³Ja ja'ay mëti'ipë kyamëpëjktëpën ja Jesús, ka'ap ijty myintë ets ye'eymyuktëty mëët ja ijxpëjkpëtëjkëty, e ja ijxpëjkpëtëjkëty mëk ja ja'ay tsyokëtë.

¹⁴Ni'ikyë ja ja'ay nyimayëtë mëti'ipë ja Wintsën myëpëjktëpën, ye'etyëjk to'oxytyëjk.

¹⁵Ets ja pa'amja'ay jam may tpëjktaktë tu'u'am, tam mëti'ipë myaapäjnkëjxm ko'knaaytyëpën ets tam mëti'ipë to'okykyëjxmën; yë'ë y'ëwxijtëp ko ja Pedro nyaxëty ets ja ja'ay tsyo'oktëty, oy je'eyë ja y'äpk pyaatëtëty.

¹⁶Näyjyëtu'un ja ja'ayëty mëti'ipë wiink kajpn tso'ontëpën mëti'ipë ja Jerusalén myëwinkon'atëpën, ojts näjyëtu'un tyajmintë ja pa'amja'ay ets mëti'ipë ja ëxëëk pa'am myëët'ajtëpën. Ni'ëmukë tsyoktaaytyë.

¹⁷Ënät ja teety wintsën mëët ja saduceos mëktä'äky tukjoot'anpëjktë ja ijxpëjkpëtëjk,

¹⁸ets tmajtstë ets ttsuumtë.

¹⁹Tu'uk ojts ja Wintsën ja y'anklës myiny ets ja pujxntëjk tyaj'ëwatsy ets pyëtsëëmtë. Tääts y'ënëmaayëtë:

²⁰Nëjkxtë jam ma mëjtsajptëjkën ets xytyuk'ëwaanëtëty ja ja'ay ya'atë aaw ayuk mëti'ipë yajjuuky'ajtpën.

²¹Ko jëtu'un tmëtoowtë, tää komjëpom ojts tsojkyë nyëjkxtë ma ja mëjtsajptëjkën ets ja ja'ay tyaj'ijxpëjktso'ontë. Ko ja teety wintsën mëët ja jyä'äy jyajtë, ënät twoowmujktë ja tsajptëkotyëtë yajuntë'ajtpë ets ja ijxpëjkpëtëjk näjyëtu'un ets yajwoowtsoowtë mëti'ipë ënäty të yajtsumtën.

²²Ko ja mëjtsajptëjk këwent'ajtpë jyajtë ma ja pujxntëjkën, ka'ap ja ijxpëjkpëtëjk jam tpatë. Tääts wyimpijtë, ets t'ënëmaaytyë ja mëti'ipë käjxëtën:

²³Koos jam të nja'të, ëtuky ja pujxntëjk të npaatës, tam ja këwent'ajtpë tyänëtë pujxntëjk ëkë'ëm. Koos ja pujxntëjk të nyaj'awa'atstë, ni pën jap të nkapaatës.

²⁴Ko jëtu'un ja ayuk tmëtoowtë ja teety wintsënëty ets ja mëjtsajptëjk këwent'ajtpë wintsënëty, ka'ap tmëwinma'anypyatë, je'eyë tmëmay tmëtajtë wi'ix kyukëxëja'any ya'atë winë.

²⁵Tääts ja ja'ay tu'uk jyä'äjty ets y'ënäny: Ja ja'ay mëti'ipë miits të xytsyumtën, tam ja yaj'ijxpëktë ma mëjtsajptëjkën.

²⁶Tääts ja mëjtsajptëjk këwent'ajtpë wintsën ets ja tyuunpëtëjk ojts tninëjkxtë ja ijxpëjkpëtëjk; je'eyëp ko ka'ap wi'ix tuuntë, jä'ä ko tsyë'këtëp ja ja'ay ko kyuka'atsëtëty.

²⁷Ko tyajja'ajtë, tääts ots twoownëjkxtë ma ja tsajptëkotyëtë yajtu'ukmujkpën. Jamts ja teety wintsën y'ënëmaayëtë:

²⁸Tëë mëk'äämpy nëëmëtë ko ka'ap tääpë Jesús jyä'ä xy'ëknimëtyakënëtëty ma ja'ayëtyën. ¿E miitsëty tii të xytyuntë? tëë ja Jerusalén kajpn xytyuk'ëwa'anëtya'atë tääpë ijxpëjkën, etsës näjyëtu'un ëëts xypyokynyitijtë ko ja Jesús të y'ooky.

²⁹Tääts ja Pedro y'ëtsooy mëët ja myëku'uktëjk: Yë'ë ëëts xypyatëp ets ja Tios nmëmëtowtëtyës, këtiinëm ja ja'ay.

³⁰Ja Tios, mëti'ipë ëëts ja n'ap n'ok y'ëwtajtën, yë'ë të tyajjuukpyiky ja Jesús, mëti'ipë miits myaj'o'ktën jam kruutskëjxm.

³¹Tëë ja Tios tpëjktä'äky y'aka'any'äämpy Yajkutujkpë ets Yajknitsokpë, jëtu'unts ja Israel ja'ay t'ëxmatstëty ja y'ëxëëk winma'anyëty ets ja pyoky yajnimä'kxtëty.

³²Ijxpë nija'awëpë ëëts të n'itë, näjyëtu'un ja Kënu'kxymyëkajtën, mëti'ipë ja Tios Teety të tmo'oyën ja ja'ayëty mëti'ipë mëmëtoowëpën.

³³Ko jëtu'un tmëtoowtë, tääts tukjoot'anpëjktë ets ojts tjayaj'ooka'antë.

³⁴Jamts ënäty tu'uk ja fariseë ja'ay, Gamaliel xyëëwajtyp ets tyuk'ijxpëjkpy ja jutiis ja'ay ja ënä'ämën ets wintsë'ëkë ja ja'ay yaj'ityë. Yë'ë ojts wya'kukë ets t'ënëmaay ja mayjyä'äy ets tuktsojk yajkäjxpëtsëmtëty ja ijxpëjkpëtëjk.

³⁵Tääts t'ënëmaay ja wiinkëtypë ja kutuunktëjkëty: Israel ja'ayëty, ëkwinmay ëkwintajtë yajxon wi'ix tääpë ja'ay xytyuna'antën.

³⁶Ja'amyätstë ko ojts tu'uk ja ja'ay jyapëtë'ëky, mëti'ipë xyëëwajtën Teudas; ko y'ënäny ko yë'ë mëj'äämpy y'ity ets ojts may yë jyä'äy tpaaty, nimajktaxk mëko'pxën. E ojts ja ja'ay yaj'ookyë ets jëtu'unyë ja jyä'äy ye'eywya'kxtaaytyë ets jääyë kyijxy nyäjxy.

³⁷Kom ok, näjyëtu'un jyäjty ja Judas, mëti'ipë Galiletë ja'ayën, jää ma ja yajkutujkpë jyääymyujkyën; ojts jyä'äy nimay tpaaty, je'eyëp ko ojts ja ja'ay yaj'ookyë ets jëtu'unyë ye'eywya'kxtaaytyë ja jyä'äy.

³⁸Paaty tyam nkajpxwijtë ets xy'ëxmatstëty tääpë ja'ay, ka'ap nëkoo xytyuktëkëtëty tääpë jëtu'unpë winma'any. Pën kyë'ëm winma'any yajtuuntëp, tsojk kyutëkoya'antë,

³⁹e pën Tios yë jyä'ä yajtuunëtëp, nijëna'a miits xykyayajkutëkoytyëty. Näkyëwent'atëtë, ka'ap mëpaat mtsiptuntë mëët ja Tios.

⁴⁰Ojts tja'akyukëtyë mëti'ipë ja Gamaliel kyajpxën. Tää twoowtsoowtë ja ijxpëjkpëtëjk ets tyajkwojpëtë je'eyë, ets t'ënëmaaytyë ko ka'ap t'ëknimëtyaknëtëty ja Jesús. Tääts t'ëxmajtstë.

⁴¹Ënät ja ijxpëjkpëtëjk pyëtsëëmtë juntëjoty, akujk jotkujk tsyo'onëtë, jä'äkyëjxm ko ja Tios ënäty të tyajkutuky ets y'ëyo'onpaatëty ko ja Jesús tnikäjpxy tnimëtya'aktë.

⁴²Jëpom jëpom ijty tnimëtya'aktë ja Jesús ja jyä'ä ma mëjtsajptëjkën ets winjëën wintëjk.