Read Biblia Mixe de Quetzaltepec Hechos 6 Bible Online

Hechos 6 - Biblia Mixe de Quetzaltepec bible

Hechos 6

¹Näy jä'ä xëës jä'ä jëmëjt, ma ënäty ni'ikyë nyimayëtën mëti'ipë myëpëjktëpën ja Jesús; ja ja'ayëty mëti'ipë ja griego ayuk kyajpxtëpën, ojts tukjoot'anpëktë ja myëku'ukëty mëti'ipë kyajpxtëpën ja hebreo ayuk ets y'ëna'antë ko ja ku'ooky tyo'oxytyëjkëty mëti'ipë griegë ja'ayëtyën ka'ap oy yajputëkëtë ma winë wyä'kxyën.

²Ënät ja ijxpëjkpëtëjk tyajmujktë ja mëpëjkpëtëjkëty ets t'ënëmaaytyë: Ka'ap y'oyëty ko ja Tios ja y'aaw y'ayuk ka'ap n'ëkkajpxwa'kxënëty, ets yi'iyë ntuunk'ajtënëty ma winë je'eyë wyä'kxyën.

³Mëku'uktëjkëty, tyam ëëts yajxon nikajpxtë ko xynyikajpxpätëty niwëxtujk ja ja'ay, mëti'ipë mtukmë'a'ijxëtëpën wijy kejy yajpaatëty ets mëti'ipë ja Kënu'kxymyëkajtën mooyëpën ja mëk'ajtën ets ja winma'any ets tuntëty tkajpxtëty mëti'ipë ja Tios tsyojkpyën. Yë'ë mtuknipëktëp ets ja näypyutëkë yë'ë tyajwa'kxtëty.

⁴Ëëtsëty minës yë Tios n'ëkja'amyätstë ets minës n'ëknikajpx n'ëknimëtya'aktë ja Tios ja y'aaw y'ayuk.

⁵Ni'ëmukë ojts oy tmëtowtë ja aaw ayuk ets ja Esteban nikajpxpäjtë; yë Esteban mëk ijty myëpëky ets myëët'ajtyp ja Kënu'kxymyëkajtën, ojts näjyëtu'un tnikajpxpätë ja Felipe, Prócoro, Nicanor, Dimoná, Parmenas ets ja Nicolás, mëti'ipë tso'onpën jam Antioquía, mëti'ipë ënäty të tmëpëkyën ja jutiis ja'ay ja myëpëjkënëty.

⁶Tääts jam tyajmiintë ma ja ijxpëjkpëtëjkëtyën ets ja Tios tuknija'amyäjtsëtë ets ojts tkë'ënixajtë.

⁷Ja Tios ja y'aaw y'ayuk ni'ikyë ënäty myëjwiinë kyëjääjë ets ja mëpëjkpëtëjkëty ni'ikyë myäyëtë jam Jerusalén, yë'ëpaat ja teetytyëjkëty ojts may myëpëjknëtë.

⁸Ja Esteban, yë'ëkyëjxm ko ja Tios pyutëkëty ets kyënu'kxyë paaty ijty tyaj'ixyë ja mëj'ajtën ma ja naax kajpnën.

⁹E tam ënäty ja ja'ayëty yajpaatë ma ja tsajptëjkën mëti'ipë yajtijpën Najtspëkë Ja'ay Tsyajptëjk, mëti'ipë tso'ontëpën Cirenë, Alejandría, Cilicia ets Asia. Jä'ä ojts ja Esteban mëët nyäy'ojëtë,

¹⁰je'eyëp ko ka'ap tmëmëtaktë ja Esteban, jä'ä ko ja Esteban wijyajtën mëët kyäjpxy ets yë'ë winma'anymyooyëp ja Kënu'kxymyëkajtën.

¹¹Ënät tmeenymyooytyë ja ja'ay mëti'ipë ëna'antëpën ko tëë tmëtowtë ko ja Esteban wiinkjaty tnikäjpxy tnimëtyä'äky ja Moisés ets ja Tios.

¹²Tääts ja naax kajpn tyajjoot'anpëjktë ets ja mëjja'aytyëjkëty ets ja tsajptëkotyëtë yaj'ijxpëjkpëtëjkëty ets tmajtstë ja Esteban. Tääts ojts tyajnëjkxtë ma ja tsajptëkotyëtë yajjuntë'ajtpën.

¹³Näy ojts t'ixta'atë ja ja'ayëty mëti'ipë nyi'antaakëtëpën ja Esteban, ets y'ëna'antëty: Ya'atë ja'ay, xëmë tni'ojë yë mëjtsajptëjk ets Moisés yë y'ënä'ämën.

¹⁴Tëës ntimmyëtowtë ko y'ënä'äny ko ja Jesús nazaretëtë ja'ay tyajkutëkoyä'äny yë mëjtsajptëjk ets ko tyajtëkatsa'any ja ënä'ämën mëti'ipë ja Moisés ojts xytyukmëwë'ëmëmën.

¹⁵Tam ënäty jëtu'un y'ëna'antë, ko ja yajjuntë'ajtpë t'ijxtë ko ja Esteban ja wyiin jyëjp tyë'kxpëky ijxtëm ja Tios kukäjpxy.