Read Biblia Mixe de Quetzaltepec Hechos 7 Bible Online

Hechos 7 - Biblia Mixe de Quetzaltepec bible

Hechos 7

¹Ënät ja teety wintsën tyajtëëy ja Esteban: ¿Tëy jëtu'un ijxtëm myajni'ëënënë?

²Tääts ja Esteban y'ëtsooy: Mëku'uktëjkëty, mëjja'aytyëjkëty, amëtoow'ijtëkës. Ko ja nteety'ajt n'ap'ajtëmë Abraham tsyënaay jam Mesopotamia, ka'anëm ënäty nyijkx tsënääpyë ma ja it txëëwatyën Harán, ko ja Tios mëjpë jaantypë ojts nyänyikëxë'ëkyë ma yë'ëjën.

³Tääts ja Abraham yajnëmaay: Ixmats yë mtsënaaytyakn ets näjyëtu'un yë mmëku'uktëjk ets mnëjkxëty ma ja naaxwiinyëtën mëti'ipë ntukni''ixëjäämpyën.

⁴Tääts ja Abraham tsyo'ony jam Mesopotamia ma ja Caldeo ja'ay tsyëënëtën ets ojts nyijkx tsënääpyë jam Harán. Ko ja Abraham ja tyeety y'o'ky, ënät ja Abraham ja Tios yajmiinë yaa ma tyam ëëtsajtëm ntsëna'ayëmën.

⁵E kä'äp ojts ja Tios tii tyukumayë ma tääpë itjotmën, oyxyëp jeexyë yi'iyë'ajty ma ja tyeky tpëjkta'akëtyën. Ojts je'eyë tyukwinwanëty ko myo'oja'anyë, ets ko ënäty y'o'knë yë'ë jyä'ä'attëp ja y'u'unk y'okëty. Oy ja Abraham ka'ap ënäty nitu'uk ja y'u'unknëm.

⁶Ojts ja Abraham näjyëtu'un ja Tios y'ënë'ëmxëty ko ja y'u'unk y'ok nyëjkxtëty tsënääpyë wiink ja'ay y'itjotm, ets ja ja'ay jap yajtunëtëty ëne'emy, mëk tsaatsy; taxk mëko'px jëmëjt.

⁷Tää ja Tios jyaak'ënany: Ëjts ntëytyunäämpyës ja ja'ayëty mëti'ipë ënäty jëtu'un tuunëtëp ets ja m'u'unk m'ok nyajpëtsëma'anyës jam ets yaa myintëty etsës xywyintsë'ëkëtëty.

⁸Ets ja Tios ja kyajpxtyu'unën ojts tyajwë'ëmy mëët ja Abraham wi'ix ijxwë'ëmy y'ita'anyën, wi'ix ja Abraham mëët ja y'u'unk y'ok yajnatsujk'ëwëtitëtyën ja ye'etyëjkajtën. Paaty ko ja Abraham ja y'u'unk myiiny mëti'ipë xyëëwajtën Isaac, kom tuktujk xëëw ojts tyajnatsujk'ëwtityë ja ye'etyëjkajtën. Näyjyëtu'un ja Isaac ja y'u'unk tuuny mëti'ipë xyëëwajtën Jacob ets ja Jacob näjyëtu'un tuuny ja y'u'unk y'ëna'këty nimajkmäjtskpë.

⁹Ya'atë Jacob yë y'u'unk y'ëna'k, mëti'ipë n'ap'ajt nteety'ajtëmën, myë'äkë'ajtëp ijty ja y'uty José. Paaty ojts tooktë ets ja ja'ay yajnëjkxë jap Egiptë. E ja José ka'ap ja Tios y'ijxmajtsë.

¹⁰Ojts ja Tios yajpëtsëmyë amaayjoty jotmayjoty. Mooyë ja wijy'ajt kujk'ajtën ets ojts myëku'ukjawëty ja faraón mëti'ipë jap Egiptë yajkutujkpën, ets nyikajpxpäjtë näjyëtu'un kutuunk ma ja Egiptë kajpnën ets ma ja kutujkëntëjkën.

¹¹Ënät ja mëk yuu myiiny ets ja ëyo'on tyuunë jyajtë ma tëkokyë Egiptë itjotmën ets Canaán itën ets ja n'ap'ajt n'ok'ajtëmë kä'äp ja kyääky jyi'kxy tpatë.

¹²Tääts ko ja Jacob tnija'awëy ko tam ja tsajpmok Egiptë, tää ojts jam tkexy ja y'u'unk y'ëna'k, mëti'ipë n'ap'ajt nteety'ajtëmën. Jëtu'un ojts nyëjkxtë mëtu'k'ok.

¹³Mëmäjtsk ok ënäty nyëjkxtë, ko ja José nyäkyajpxkëxe'kë ma ja jyiiky myëku'ukën. Ënät ja faraón tnija'awëy ko ja José tmëku'ukëty.

¹⁴Ok twoowtsooy ja tyeety ets ja myëkä'äxtëjk, mëët ni'ëmukë ja y'u'unk tyo'oxytyëjkëty; nitëkë'px majkmokx nyiwinë'ajtë.

¹⁵Jëtu'un ja Jacob ojts nyëjkxtë Egiptë mëët ja myëku'uktëjk. Jamts y'o'ky ja nteety'ajt n'ap'ajtëmë.

¹⁶Tääts ja wyääy pyajk ojts tyajnëjkxtë Siquem y'itjotm ma ënäty ja Abraham të tjuyën tu'uk ja aank mëti'ipë ja Hamor y'u'unk tukmëto'kën.

¹⁷Ko ja xëëw jëmëjt tpaty ma ja Tios ja wyaantakën y'atëwëtyën ijxtëm ja Abraham yajnëmaayën, tëë ënäty ja Israel ja'ay ni'ik myäyëtë jap Egiptë.

¹⁸Ënät ja Egiptë ja'ay tu'uk tyëjkëy yajkutujkpë mëti'ipë ka'ap tnijawën pën ja José.

¹⁹Yë'ë ja nteety'ajt n'ap'ajtëm ojts wyin'ëënëtë ets ëxëëk tyuunëtë; ojts y'atsip'atëtë ets t'ëxmatstëty ja y'u'unk y'ëna'k ets y'ooktëty mëti'ipë ënäty je'eyë të myëxu'unk'atën.

²⁰Jää jëmëjt ojts myëxu'unk'aty ja Moisés. Tsojkëp ja Tios ijty ni'ik. Tää ja tyaak tyeety yajyä'kë tëkëëk po'o yu'utsy jam tyëkotmëty.

²¹Ënät ojts atsip yaj'ëxmajtsnë. Ja faraón ojts ja nyëëx tpaaty ja mëxu'unk mëti'ipë Moisés'ajtpën ets tyajyë'ky ijxtëm kyë'ëm u'unkën.

²²Tääts ja Moisés t'ijxpëjktaay tu'kë'ëyë ja wijyajtën kejyajtën mëti'ipë ja Egiptë ja'ayëty nyija'awëtëpën; ets mëj'äämpy y'awinpijty ma ja aaw ayukën ets ma winë ttuny tkäjpxyën.

²³Ko ja jyëmëjt wëxtyikxy tpatnë, ënät ojts myäy tyäjy ko nëjkx tku'ixëja'any ja myëku'uktëjk, ja Israel ja'ayëty.

²⁴Ënät ojts nyijkxy ets jam t'ijxy ko tu'uk ja Egiptë ja'ay twopy tka'atsy ja Israel ja'ay. Tääts ja myëku'uk ënätyë tniwaantuty ets tyimyaj'o'k ja Egiptë ja'ay.

²⁵Jëtu'un ja Moisés myäy tyäjy ets tsyokëtëty ja Israel ja'ayëty ets tja'akyukëtëty ko yë'ë ja Tios të wyin'ixyë ets y'ëwaatsëpëtsëmtëty ja Israel ja'ayëty ma ëxëëk jyatën kyëpätën; e yë'ëjëty kä'äp jëtu'un tja'akyujkëtë.

²⁶Komjëpom ja Moisés tpaty ja jyä'äy, Israel ja'ayëty nimäjtsk jam tsyiptuntë aak yë'ëjëty. Tääts t'ënëmaay: këtii aak miits mtsiptuntë, mtu'kmëku'uk miitsëty. ¿Tii ko mnätsyiikëtë?

²⁷Ja mëti'ipë ja myëku'uk jam tsyi'kpyën je'eyë ojts ja Moisés tnajtstijë ets t'ënëmaay: ¿Pën të mpëjktä'äkyë yajkutujkpë ets yajtsipwa'kxpë ma ëëtsëtyën?

²⁸¿Xyaj'ookaanpës näjyëtu'un ijxtëm ëxë'ëy ja Egiptë ja'ay xyaj'ookyënë?

²⁹Ko ja Moisés jëtu'un tmëtooy ja ayuk, ënät kyeky. Tää ojts nyijkx jam Madián. Jamts ojts tsyëënë ja't ja'ayën, ets nimäjtsk ja myaank y'ijty.

³⁰Tëë ënäty nyäxy wëxtyikxy jëmëjt, ko t'ijxpaty tu'uk ja tsajpjotmëtë kukäjpxy jëënjotm ma tu'uk ja äpnykyepy tyoyën të'ëts'itjotm, Sinaí kopk mëwinkon.

³¹Ja Moisés mëj ixy ojts t'ixy ko ja jëënyä'änk t'ijxpaty. Tääts ojts winkon tninëjkxy ets tmëtooy ko ja Wintsën myëkäjpxyë:

³²Ëjtsës xyTios'ajt ja mteety m'ap: ja Abraham, ja Isaac ets ja Jacob. Tääts ja Moisés tsyëyuuypyijky mëët ja tsë'ëkë, ka'ap tmëmëta'aka'any ets t'ixëty.

³³Ënät ja Wintsën y'ënëmaayë: Jän yë mkë'ëk, wa'ats ya'atë naax ma mtänën.

³⁴Tëës n'ixy ja nkajpnës ko yajtëytyun yajtsaatsytyuntë jam Egiptë; tëëjës nmëtoy ko jyë'ëtë ya'axtë, ko ëxëëk jyatë kyëpätë. Paatyës nkëtä'äky ets nyaj'ëwa'atspëtsëma'antës. Tsojk min, mijts nkäxäämpy ets mnëjkxëty jatëkok jam Egiptë.

³⁵Oy ënäty ja Moisés të yajnëëmë: ¿Pën të mpëjktä'äkyë yajkutujkpë ets paye'epyë?, Tios yë'ë ojts kyexyë yaj'ëwaatsëpëtsëëmpë ets tu'uwinwoopë ko myëkajpxë ja tsajpjotmëtë kukäjpxy ma ja kepy ënäty wyintooypyetyën.

³⁶Moisés ojts tyajpëtsëmy ja nteety'ajt n'ap'ajtëm jam Egiptë; ojts tyaj'ixyë ja mëj'ajtën jap Egiptë, jam Mejyjyotm ets wëxtyikxy jëmëjt jam të'ëts'itjotm.

³⁷Ya'atë Moisés yë'ë näjyëtu'un y'ënëmaay ja Israel ja'ayëty: Tios tyuknipëjktaakëjäämpy ets jam ma miitsëtyën tu'uk pyëtsëmëty ja kukäjpxy ijxtëm ëjtsën.

³⁸Ko ënäty ja Israel ja'ayëty jam të ye'eymyuktë të'ëts'itum, yë'ë ja Moisés ojts kyäjpxynyäxy ma ja Tios kukäjpxy ets maa ja naax kajpnën ko jam myëkajpxë ma ja Sinaí kopkën; yë'ë ojts yajmo'oy ja aaw ayuk mëti'ipë yajjuuky'ajtpën ets ëëtsajtëm ojts xytyuk'ëwa'anëmë.

³⁹E ka'ap ja nteety'ajt n'ap'ajtëmë tmëmëtoowtë ja Moisés, ka'ap tkupëjktë wi'ix y'ënä'änyën; ni'ikyë jyawinpitantë jap Egiptë.

⁴⁰Ets ja Aarón t'ënëmaaytyë: Oytyun ëëts ja ntiosëty wiinkpë mëti'ipës xytyu'uwinye'eytyëpën, jä'ä ko ka'apës ja Moisés nijawëtë tii të jyätyë, mëti'ipës xyajpëtsëëmtën jap Egiptë.

⁴¹Tääts tu'uk ja mëxu'unk tsajpkaa tyaj'akojnajxtë, may ja jëyujk tyaj'o'ktë ets tukwintsë'këtyë ja mëxu'unk tsajpkaa. Ënät twin'äjts twinpujtë mëti'ipë y'oytyuuntën kë'ëm.

⁴²Paaty ja Tios y'ëxmajtsëtë ets twintsë'ëkëtëty ja matsa'a ets tiijaty jam tsajpwinmën. Jëtu'un ijxtëm ja Tios ja kyäjpxynyajxpë ënäty ja nyoky y'ënä'änyën: Miits, Israel ja'ayëty, ko m'ijtë jam të'ëts'itjotm wëxtyikxy jëmëjt, ¿xymyooytyës ja wintsë'kënë?

⁴³Tëkatsy miits winë të xytyuntë, tëë ja Moloc ets ja mëtsa'a Refán ja tsyajptëjk xyaj'ujtstaayëtë mëët ja awinax mëti'ipë kë'ëm të xyajkojtën ets xy'ëwtata'antë. Paaty miits nkäjxpëtsëma'antë ets myajmënëjkxtëty tsumy matsy jam Babilonyë. Ënät ja Esteban jyaak'ënany:

⁴⁴Ma ja të'ëts itjotmën, jam ja nteety'ajt n'ap'ajtëm ijty tmëët'atë ja po'o wit tëjk, mëti'ipë myë'ijtypyën ja käjpxytyu'un mëët ja Tios; yë'ë ja Tios tyuk'ënä'äm ja Moisés ets t'oytyunëty jëtu'un ijxtëm ënäty të t'ixyën ja nyi''ijxpät.

⁴⁵Ja n'ap'ajtëmë yë'ë ojts yajtukumaytyë ya'atë wit tëjk; e ko ja Josué mëët ja jyä'äy myiintë ojts tmëmintë ya'atë wit tëjk ko tjä'äpëjktë ja naaxwiinyëtë mëti'ipë nyitsiptuuntën, mëti'ipë ja Tios y'ëxwojpën ma yë'ëjëtyën. Jam jeky y'ijty mapaat ja David yajkutujkyën.

⁴⁶Ja David ojts ja Tios y'oyjyawëty, paaty t'amëtooy ets tyuk'ëwaanëtëty maa nëjkx jyuuky'atën ja Jacob ja y'u'unk y'ëna'k;

⁴⁷e ja Salomón yë'ë ojts tkojy ja Tios ja tyëjk.

⁴⁸Oy jyajëtu'unëty, Tios ka'ap jap tsyënaay ma ja tëjkën mëti'ipë ja'ay y'oytyuunpyën, ijxtëm ja käjpxynyajxpë y'ënä'änyën:

⁴⁹Tsajpjotyës ja nkutujktakn; ets naaxwiinyës nwa'kpo'kxy. ¿Tiitëjk jëtu'un miits të xytyukni'oytyunëtës? ¿ëkë maajës ëjts ja npo'ktakn?

⁵⁰¿Këtii y'ëjtsëty tu'kë'ëyë winë të n'oytyuunta'ayë?

⁵¹Tääts ja Esteban tjaaknëmaay ja ja'ayëty: Miits ka'ap mmëtowtë. Jëtu'un miits ja mtatsk xypyëjkta'aktë ijxtëm mëti'ipë kyamëpëjktëpën ja Tios. Jëtu'un miitsëty ijxtëm ja m'aptëjkëtyën, xëmë ka'ap xykyupëktë ja Kënu'kxymyëkajtën.

⁵²Ja m'aptëjkëty ojts tpajëtijta'aktë ja Tios ja kyäjpxynyajxpë ets tyaj'o'ktë mëti'ipë nyikajpxtën ko myina'any mëti'ipë ka'ap pyokymyëëtëtyën. Ko të myiny, miits të xyaj'ooktë.

⁵³Oy miits mjayajmooytyë ja ënä'ämën mëët ja anklëstëjk, ka'ap ojts xypyatuntë.

⁵⁴Ko jëtu'un tmëtoowtë ja tsajptëkotyëtë yajuntë'ajtpë, ënät tukjoot'anpëjktë ja Esteban ets nyätyëtskä'pëtë mëët ja äkë.

⁵⁵Ja Esteban mooyë ja Kënu'kxymyëkajtën ja kutujkën ets ja winma'any ets tunëty mëti'ipë ja Tios tsyojkpyën, tää ojts tsajpjotm pya'at'ixy ets t'ijxy ja Tios ja myëj'ajtën jyääntyajtën, näjyëtu'un t'ijxy ja Jesús tyänë Tios y'aka'anytsyow.

⁵⁶Tääts y'ënäny: Ëk'ixtë, ëwa'atsës yë tsajp n'ixy ets näjyëtu'un të n'ijxpaatyës ja Naaxwiinyëtë Ja'ay ja kyutënääpyë Tios pyë'aay, aka'anytsyow tyänë.

⁵⁷Ja ja'ayëty ka'ap tmëtowantë, je'eyë ja tyatsk t'amajtstuktë ets mëk yujk'ënantë ets ja Esteban tmatstëty.

⁵⁸Ënät tyajpëtsëëmtë jam kajpnjotm ets tkuka'tstë; mëti'ipë ja Esteban nyi''ë'ënëtëpën yë'ë ja wyit tyukmëwë'ëmtë ja Saulo ets jam tkëwent'atëty.

⁵⁹Tam ënäty tkuka'atstë ja Esteban ko ja Tios tmëpëjktsooy ets y'ënäny: Wintsën Jesús, mijts ntukë'ëtëjkëp yë nja'awënës.

⁶⁰Ko jëtu'un y'ënaantaay, tää kyoxtënaay ets mëk y'ënäny: Wintsën, këtii xytyukpoky'atëty ya'atë tuuntëko'oyën koos xyaj'ooktë. Ko jëtu'un y'ënaantaay, tääts y'o'ky.