Read Biblia Mixe de Quetzaltepec Hechos 8 Bible Online

Hechos 8 - Biblia Mixe de Quetzaltepec bible

Hechos 8

¹Oy ja Saulo tja'awëy ko ja Esteban tyaj'o'ktë. Jä'ä xëëw yajpajëtijtaktë ja mëpëjkpëtëjkëty, mëti'ipë ja Jesús myëpëjktëpën jampë tsyëënëtën Jerusalén. Ni'ëmukë, yi'iyë ja Jesús ja y'ijxpëjkpëtëjkëty ojts ka'ap yajpaatë, jä'ä ko ojts ënätyë ye'eywya'kxta'atë, ets nyëjkxtaaytyë maajaty ja Judea ets Samaria y'itjotmën.

²Tam jënaakën mëti'ipë ja Tios myëpëjktëpën, yë'ë yajnaaxtëjkëtyë ja Esteban ets tnijëëy tniyaxtë.

³Tääts ja Saulo tpajëtijtäky ja mëpëjkpëtëjk winjëën wintëjk ets atsip tyajpëtsëëmy tyëkoty, wä'än ye'etyëjk to'oxytyëjkëty ets pujxn tëkoty tpëjktaktaaytyë.

⁴Ja mëpëjkpëtëjk mëti'ipë pëtsëëmtën jam Jerusalén, jä'ä ojts tnikäjpxy tnimëtya'aktë ja Tios ja y'aaw y'ayuk maajëty nyëjkxtën.

⁵Ja Felipe, ojts kyëtä'äky jam Samaria kajpnjotm. Ënät ja Kristë ja y'aaw y'ayuk ojts tkajpxwa'kxë.

⁶Nimay ja ja'ay myiintë ets t'amëtoow'ijtë ja aaw ayuk mëti'ipë ja Felipe kyäjpxypën ets t'ijxtë ja mëj'ajtën mëti'ipë tyuunën.

⁷May ja ku'oypyë t'ixkejxy ja Felipe. Ayaxp ajojkp pyëtsëëmtaaytyë ma ja ja'ayëtyën. Näy tsoktaaytyë ja kë'ëxujxpë tekyxyujxpë ets ja ja'ay tekymya'atëtypë.

⁸Paaty ja ja'ay jam xyoontaktë ma tääpë kajpnën.

⁹Näy jam Samaria ijty tu'uk ja ye'etyëjk mëti'ipë xyëëwajtypyën Simón, mëti'ipë xëëwmääpyën. Mëj ijty kë'ëm nyäpyëjktä'äkyë ets ja ja'ay tukmëpëky mëti'ipë tyuunpyën.

¹⁰Ni'ëmukë mëj mutsk t'amëtoow'ijtë ja ja'ay wi'ix ja Simón y'ënä'änyën. Jëtu'un y'ënantë ko ja Simón tmëëtëty ja Tios ja myëk'ajtën.

¹¹Yë'ëts ja xëëwmääpyë ja jyä'ä pyatuunëtëp, jä'ä ko tëë ënäty kanaak jëmëjt wyin'ëënëtë.

¹²Ko ja Felipe ojts nimëtyä'äky ja aaw ayuk oypyë mëti'ipë ja Tios kyutujkën'ajtypyën ets näjyëtu'un nimëtyäky ja Jesús ja jyä'ä, tääts tmëpëjktë mëti'ipë ja Felipe kyäjpxypën ets nyëëpäjtë ye'etyëjk to'oxytyëjk.

¹³Näyjyëtu'un ja Simón ojts myëpëjknë ets nyëëpejty ets ja Felipe ojts tmëjwa'kpety ko t'ijxy ja ijxpät ets ja mëj'ajtën mëti'ipë ja Felipe tyuunpyën.

¹⁴Ko ja ijxpëjkpëtëjk tnija'awëtyë, mëti'ipë jam jaakwë'ëmtën Jerusalén, ko tam ja Samaria mëti'ipë myëpëjktëpën ja Tios ja y'aaw y'ayuk, tää ja Pedro yajkäjxtë mëët ja Juan.

¹⁵Ko jam jyajtë, ënät tuknija'amyäjtsëtë ja samaariëtë ja'ayëty ja Tios ets t'ëxajëtëty ja Kënu'kxymyëkajtën.

¹⁶Jä'ä ko ka'anëm ënäty ja Kënu'kxymyëkajtën tyukmin tyukja'tëtë ja samaariëtë ja'ayëty, je'eyë ënäty të nyëëpätë Wintsën Jesús xyëëwkyëjxm.

¹⁷Tääts ja Pedro ets ja Juan ja ja'ay ojts tkë'ënixajtë, ets ja Kënu'kxymyëkajtën ojts t'ëxajëtë.

¹⁸Ko ja Simón t'ijxy ko ja ja'ay t'ëxajëtë ja Kënu'kxymyëkajtën ko ja ijxpëjkpëtëjk kyë'ënixajëtë, ënät ja meeny ojts t'ëwaanë,

¹⁹ets y'ënëmaayëtë: Mooykyës näjyëtu'un yë mëk'ajtën mëti'ipë mmëët'ajtypyën ets näjyëtu'un tpaatëty ja Tios ja myëjaaw myëk'ajtën koos pën nkë'ënixäjëty.

²⁰Tääts ja Pedro y'ëtsoowë: Poky mijts m'itëty mëët yë mmeeny ëyoowtaknjoty, jä'ä ko xywyinmay xyjyuyä'äny mëti'ipë ja Tios nyayäjkpyën.

²¹Ka'ap ya'atë tuunk mpaatyë, jä'ä ko ka'ap yë m'aaw mjot y'oyëty ma Tiosën.

²²Jootwinpit ets ya'atë ëxëëk winma'any xy'ëxmatsëty. Ja'amyäts ja Wintsën ets mpoky yajnimä'kxëty mëti'ipë m'aaw'ajtyp mjot'ajtypyën.

²³Jëtu'unës n'ixy ko yowë näjyënaxë xyjyawë ko ja poky myaj'ityë tsumy matsy.

²⁴Tääts ja Simón y'ëtsooy: Tuknija'amyäjtsëtëkës ja Wintsën etsës ka'ap jëtu'un njatëty ijxtëm mijts të m'ëna'antën.

²⁵Ko ja Pedro ets ja Juan tnimëtyaktaaytyë ja Wintsën ja y'aaw y'ayuk, ënät wyimpijnëtë ets nyëjkxnëtë jam Jerusalén, tkajpxwa'kxtë ja Tios ja y'aaw y'ayuk maajëty ja kajpn ënäty tuknaxtën jam Samaria y'itjotm.

²⁶Tääts ja Felipe ojts tu'uk ja Wintsën ja y'anklës nyë'ëmxëty: Nëjkx ëpa'tkë'ëmtsow, ma të'ëts'itjotmën, mëti'ipë tu'u najxpën jam Jerusalén ets nyijkx Gaza.

²⁷Tääts tsyo'ony ets jam tu'u'am tpaty tu'uk ja Etiopíë ja'ay mëti'ipë ënäty ja Tios ojts të t'ëwtatyën jam Jerusalén. Ya'atë ja'ay mëj tuunk ënäty nyëkëjxm'ajtyp, yë'ë tyuunk'ajtyp ja meenykyoonë'k ma ja yajkutujkpën, ja to'oxytyëjk jampë y'ën'emyën Etiopíë.

²⁸Kyajpnjotm ënäty ja ja'ay nyëjkxnë kepywyintëkäämjoty ets jap tkäjpxy ja noky mëti'ipë ja Tios ja kyäjpxynyajxpë Jeséas jyääyën.

²⁹Ënät ja Kënu'kxymyëkajtën ja Felipe y'ënëmaayë: Ninëjkx ya'atë kepy wintëkäämpë winkon.

³⁰Ko ojts tninëjkxy ets tmëtooy ko ja noky tkäjpxy mëti'ipë ja käjpxynyajxpë Jeséas jyääyën. Ënät tyajtëëy: ¿Mwinja'ap tääpë xykyäjpxyënë?

³¹Tää y'ëtsooy ja noky kyajpxpë: ¿Wi'ixës nwinjawëty? ka'apës pën xytyukwinkumëtyaakë wi'ix nyiwijyën. Ënät ja Felipe t'ënëmaay ets yajpätëtëty pujxnwintëkäämpë këjxm ma ënäty jam y'u'unyën.

³²Yë'ë ënäty kyäjpxyp ma ja Tios ja y'aaw y'ayuk y'ënä'änyën: Jëtu'un jä'ä ijxtëm ja kupixyny yajmënejkxyën ma y'o'ktaknën; ets ijxtëm ja kupixyny u'unk amonyë tkupëkyën ko yajknikeepy, ni tuk'aaw ojts kyakäjpxy.

³³Jëtu'un ja ja'ay yaj'amutsk'ajtë ets kä'äp ojts oy yajpaye'ey; ¿Pën jëtää nikajpxëtëp ko jam ja y'u'unk y'ok?, jä'ä ko ojts ja ja'ay yaj'ookyë yaa naaxwiiny.

³⁴Tääts ja Felipe ja etiopiiyëtë ja'ay yajtëëwë: Tun yë mëyajtën, nikajpx, ¿tii nyimëtyäkpy, kë'ëm nyätyijyë, ëkë wiinkpë nyimëtyäkpyë?

³⁵Tääts ja Felipe tuk'ijxpëjktso'ony mëti'ipë ënäty ja ja'ay kyäjpxypën ets tukmëmëtyäky ja oy aaw oy ayuk, ja Jesús ja jyä'ä.

³⁶Jëtu'un tyu'uye'eytyë, ënät ja nëë tpatë ets ja Etiopíë ja'ay y'ënäny: Tyaa nëë, ¿ka'ap jëtää y'oyëty koos nnëëpätëtyë?

³⁷Tää ja Felipe y'ëtsooy: Pën mmëpëjkpy yë Jesús ëmuumtu'ukjot, oy mnëëpätëty. Tää y'ëtsoowinpijty: Nmëpëjkpës ko Jesús Tios y'u'unk'atyë.

³⁸Ko jëtu'un y'ënäny, tää ja kepy wintëkäämpë tyajwa'ak'o'oyëtë ets nimäjtsk ojts nyëjkxtë nëëjotm. Jamts nyëëpejty ja Etiopíë ja'ay.

³⁹Ko pyëtsëëmtë nëëjoty, ënät ja Felipe ja Wintsën ja Jya'awën wiinktsow yajnëjkxë; ni kä'äp ja Etiopíë ja'ay t'ijxy maa ojts ja Felipe nyijkxy e yë'ë akujk jotkujk ojts jatëkok tyu'utëkë.

⁴⁰Jam ja Felipe ojts yaj'ixy ma ja kajpn txëëwatyën Azoto. Kajpnkajpn ijty tkajpxwä'kxy ja aaw ayuk oypyë koonëm jyä'äjty jam Cesarea.