Read Biblia Mixe de Quetzaltepec Hechos 9 Bible Online

Hechos 9 - Biblia Mixe de Quetzaltepec bible

Hechos 9

¹Ja Saulo tyim yaj'ookäämpy ënäty ja mëpëjkpëtëjk, paaty ojts tninëjkxy ja teety wintsën,

²ets ja noky tu'uk t'amëtooy ta'tspëky ets tmënëjkxa'any ets tuk'ixa'any ja ja'ay mëti'ipë ye'eymyujktëpën ma ja tsajptëjkën jam Damaskë ets t'ixta'aja'any mëti'ipë pyanëjkxtëpën ja Jempyë Në'ë Tu'u ets tyajnëjkxa'any kë'ëtsumy tekytsyumy jam Jerusalén, wä'än ye'etyëjk to'oxytyëjkëty.

³Ko ënäty jam jya'tanë Damaskë, ënät ojts ajotkumonë t'ijxpaaty tu'uk ja jëën mëk y'ajajy y'atë'kxy wyintuuy pyë'aay mëti'ipë tso'onpën tsajpjotm.

⁴Tääts kyëtääy ets tmëtooy tu'uk ja ja'ay kyäjpxy ets y'ënä'äny: Saulo, Saulo, ¿tii koos xy'ixjëtity xypyajëtiy?

⁵Tääts ja Saulo tyajtëëy: ¿Mpën mijts, Wintsën? Ets y'ëtsooy: Jesusës ëjts, mëti'ipë m'ixjëtijtyp mpajëtijtypyën.

⁶Ets ja Saulo tsyëyuuypyijky ets y'ënäny: ¿Tii mtsojkpy etsës ntunëty? Ënät ja Wintsën y'ënëmaayë: Pëtë'ëk ets nëjkx kajpnjotm. Jamts myajtuk'ëwaanëty mëti'ipë mtunëpën.

⁷Tääts ja Saulo ja jyämyëët näjyëtu'un tsyë'këtyäky ko ja ayuk tmëtoowtë, je'eyëp ko ka'ap t'ijxtë pën kajpxp.

⁸Ënät ja Saulo pyëti'ky ets ojts jya'ijxwa'kxa'any, ka'ap tii t'ixy. Tääts ja Saulo ja jyämyëët wyijtstso'onë ets yajmënëjkxnë jam Damaskë.

⁹Jamts y'ijty tëkëëk xëëw wiints, ni kyakay ni kya'uuky.

¹⁰Näy jam Damaskë tu'uk ja ye'etyëjk mëti'ipë ja Jesús myëpëjkpyën, Ananías xyëëwajtyp. Ënät ja Wintsën ojts tyuk'a'ijxnaxyë ja Ananías ets y'ënëmaayë: Ananías. Tää ja Ananías y'ëtsooy: Tyamës, Wintsën.

¹¹Tääts y'ënëmaayë: Nëjkx ma ja tu'u txëëwatyën Tëytyu'u. Ko mja'tëty ma ja Judas ja tyëjkën, jam xyajnitëwëty ja Tarsëtë ja'ay mëti'ipë xyëëwajtypyën Saulo. Yë'ë tam ja Tios tja'amyetsy.

¹²Näy tëë yajktuk'a'ijxnaxy ko mijts mnëjkxa'any, ets xykyë'ënixajëty ets y'ijxpëkëty.

¹³Ko ja Ananías jëtu'un tmëtooy, tää y'ënäny: Wintsën, may yë ja'ay të xytyuk'ëwaanës ko tääpë ja'ay ëxëëk të y'ëti'itsy ets ëxëëk të tuny ja mnaax mkajn jam Jerusalén.

¹⁴Ets të tmëja'ty ja noky kutujkënmëëtpë mëti'ipë ja teety wintsënëty të mye'eyën ets tmajtsta'ajëty mëti'ipë mxëëw y'ëwtajtëpën.

¹⁵Tää ja Wintsën y'ënäny: Nëjkx, tëëjës ntuknipëky. Nyajtunäämpyës yë'ë ets nyëjkxëty ma ja ja'ay mëti'ipë ka'ap jyutiisëty. Jamts tnikäjpxy tnimëtya'akëty ja n'aaw n'ayukës ma ja mëti'ipë tsënaaytyëpën wiink it wiink naax ets ja yajkutujkpë mëti'ipë ënä'ämtëpën, näjyëtu'un ja Israel ja'ayëty.

¹⁶Ntuk'ix ntuknijawëpës wi'ixës xykyu'ëyowëtyën.

¹⁷Tääts ja Ananías ojts tninëjkxy ja Saulo. Ko tëkoty tyëjkëy, tää ojts tkë'ënixajy ets t'ënëmaay: Mëku'uk Saulo, Wintsën Jesúsës të xykyexy, mëti'ipë ojts xy'ixyën tu'ujotm. Të xykyexyës ets mijts jatëkok m'ijxpëkëty ets ja Kënu'kxymyëkajtën xy'ëxajëty.

¹⁸Ënät ajotkumonë wyiinjoty t'ijxy tsay tsi'kxpiikën ets y'ijxpëjky jatëkok tääts pyëti'ky ets nyëëpejty.

¹⁹Ko kyääyi'ky y'uukë'ky, ënät ja myëjaaw tpëjky ets ojts wäänë jyaak wë'ëmy mëët ja mëpëjkpëtëjk jam Damaskë.

²⁰Tääts ënätyë ja Saulo tkajpxtso'ontäky ja Tios ja y'aaw y'ayuk jam tsajptëkotm ets y'ënäny ko ja Jesús yë'ë ja Tios ja Y'u'unk.

²¹Ets ja ja'ayëty mëjmëtoy ojts tjawëtë mëti'ipë jam myëtoow'ijtëpën ets xim yam nyäy'ënanëtë: ¿Këtii yë'ëjëty ya'atë ja'ay mëti'ipë ijty y'ëxëëk'ijxypyën ja Jesús ja myëpëjkpëtëjk jampë Jerusalén kyukajpnëtyënë? ¿Këtii yë'ëjëty yaa të tniminy ets tmajtsmujkta'aja'any mëti'ipë ja Jesús ja xyëëw yajmëjnajxëtëpën ets tkë'ëtsuma'any tekytsyuma'any tääts tkë'ëyaka'any ma ja teety wintsëntëjkëtyënë?

²²Ënät ja Saulo ni'ikyë amëk jotmëk kyajpx'ëtëtsy, wa'ats ja ja'ay tuknija'awëy ko Jesús, yë'ë janty Kristë. Ja jutiis ja'ayëty jëtu'unyë myoonkëtak tyujkëtaktë mëti'ipë ënäty tsënaaytyëpën jam Damaskë.

²³Komjekynyëm ja jutiis ja'ayëty ojts tkäjpxy'atë ko ja Saulo tyaj'ooka'antë,

²⁴je'eyëp ko ja Saulo ojts tnijawë. Xëënaxy tsunaxy ja myëtsip ojts tkëwent'atë ja naax kajpn ma yajnitëkën ets ma yajnipëtsëmyën ets yaj'ooka'anyë,

²⁵ja mëpëjkpëtëjkëty jap pyëjktakë katsyjoty, ets jam potsyjëxkë'p koots kyutëëynyajxë.

²⁶Ko ja Saulo jyä'äjty jam Jerusalén ojts ja mëpëjkpëtëjk mëët jyaye'eymyuka'any, je'eyëp ko tsyë'këtëp ja Saulo, jëtu'un tjëjp'ixtë ko nëkoo yowë ja Saulo y'ënä'äny ko ja Jesús tmëpëky.

²⁷Ënät ja Bernabé ojts twoownëjkxy ja Saulo jam, ets tukwinkuwo'owëy ja ijxpëjkpëtëjk. Tääts ja Bernabé tnimëtyäky wi'ix ënäty ja Saulo të t'ixyën ja Wintsën tu'ujotm ets wi'ix myëkajpxën ja Wintsën ets näjyëtu'un wi'ix ënäty amëk jotmëk të tnikäjpxy të tnimëtyä'äkyën ja Jesús jam Damaskë.

²⁸Tääts ja Saulo ojts jam wyi'im Jerusalén mëët ja ijxpëjkpëtëjk ets yë'ë mëët jyëtijnëtë. Amëk jotmëk ja Tios ja y'aaw y'ayuk tnikäjpxy tnimëtyakëtë,

²⁹ets kyäjpxy myëtyäky mëët ja jutiis ja'ayëty mëti'ipë griego ayuk kyajpxtëpën; e yë'ëjëty yaj'ookantëp ënäty ja Saulo.

³⁰Ko ja mëpëjkpëtëjk tnija'awëtyë ko ja Saulo ja ja'ay yaj'ooka'anyë, tää ojts twoownëjkxtë jam Cesarea, jam ojts tsyoony ets tkäjxtë Tarso.

³¹Jotkujk ja mëpëjkpëtëjk yajpaatë mëti'ipë tsënaaytyëpën jam Judea y'itjotm, Galilea ets Samaria. Wimpäjt'ëtëtstëp ja myëpëjkën, xëmë ja Wintsën twintsë'ëkëtë ets nyimayë'ëtë'ëtstë, näjyëtu'un ja Kënu'kxymyëkajtën ojts yajjotkujk'ätëtë.

³²Ja Pedro, jëtu'un ijty t'aye'ey t'anaxy ja mëpëjkpëtëjk maajëty tsyëënëtën. Ojts näjyëtu'un tku'ixë ja mëpëjkpëtëjk mëti'ipë jam tsënaaytyëpën ma ja Lida kajpnën.

³³Jam tu'uk tpaty ja ye'etyëjk mëti'ipë xyëëwajtypyën Eneas, xuxyë pa'am myëët'ajtyp, tëë ënäty tyuktujkjëmëjtpäjnë ma ja pa'am pyaatëtën.

³⁴Tääts ja Pedro t'ënëmaay ja Eneas: Eneas, Jesukristë yam myajtsokëp. Pëtë'ëk, yajpëtë'ëk mmaapäjn. Tääts ja Eneas ënätyë pyëti'ky.

³⁵Ko tnija'awëtyë ni'ëmukë ja ja'ayëty mëti'ipë kukajpnajtëpën jam Lida ets Sarón, ënät ja y'ëxëëk winma'any t'ëxmajtstë, ets tmëpëjktë ja Wintsën.

³⁶Jam ma ja Jope kajpnën, jam ijty tu'uk ja to'oxytyëjk mëpëjkpë tsyëënë, Tabita''ajtp. Dorcas yajtijy griego ayuk. Ya'atë to'oxytyëjk xëmë ijty tuny mëti'ipë oy ets pyutëjkëp ja ëyoopëja'ay.

³⁷Ënät ja pa'am pyätë ets y'o'ky; ko y'o'ky ojts ja nyi'kx kyopk yajpujy, tää ojts tpëjkta'aktë jap tëjkëjxy.

³⁸Winkon ja Lida kajpn ënäty wyi'im. Ko ja mëpëjkpëtëjk tnija'awëtyë ko ja Pedro jam Lida, ënät nimäjtsk ja kukäjpxy tkäjxtë ets ja Pedro tuk'ëwa'anëtyë ets myinëty jotëkoy ma ja Dorcas të y'ookyën.

³⁹Tääts ja Pedro tpatso'ony. Ko jam jyä'äjty ets ojts yajwoownëjkxy ma ja o'kpën. Ënät ja Pedro ja ku'ooktyo'oxy tyukye'eymyujkëtë ets tyuk'ijxëtë ja wit mëti'ipë ënäty ja Dorcas të txuyën ko ënäty mëët të jyaak juuky'atë.

⁴⁰Tääts ja Pedro tkäjxpëtsëëmtaay ja ja'ayëty ets nyäkyoxtënaaytyakë ets ja Tios ojts tmëkäjpxy ets ja o'kpë tniwa'akwinpijty ets y'ënäny: Tabitá, pëtë'ëk. Ënät ja o'kpë ojts y'ijxwä'kxy ets ja Pedro yajwintë'kxy ets wyä'tskujkëy.

⁴¹Tä ja Pedro tmajtsy ma kyë'ëjën ets tyajtënaaykyujkëy; tä tkumëkajpxëy ja mëpëjkpëtëjk ets tuk'ijxy ko ënäty tëë ja Dorcas jyuukpyiky.

⁴²Ni'ëmukë tnija'awëtyë ja ja'ay mëti'ipë tsënaaytyëpën jam Jope. Jëtu'un ja Wintsën nimay tmëpëjktë.

⁴³Kanaak xëëw ja Pedro jam pyoxy ma ja Simón yajpo'otëtspë tyëjkën.