Read Biblia Mixe de Quetzaltepec Romanos 1 Bible Online

Romanos 1 - Biblia Mixe de Quetzaltepec bible

Romanos 1

¹Ëjts Pablo, Kristë Jesús myëtuunpë. Tiosës të xywoowtsoy etsës nmëtunëty, të xytyuknipëkyës ets nkajpxwa'kxëtyës ja y'aaw y'ayuk oypyë.

²Tëëyëp ja Tios tnikäjpxy mëët ja kyäjpxynyajxpë, ko ojts tkëxja'atë ma ja nokyën kënu'kxypyë.

³Ma tnimëtyä'äkyën ja Tios ja y'u'unk, Wintsën Jesukristë, mëti'ipë mëxu'unk'ajtën jëtu'un tä oy pën ja'ayën; yë'ë ja David ja y'u'unk y'ok;

⁴je'eyëp ko jyuukpyijky o'kpë akujky jää ojts y'awinpity Tios u'unk, mëët ja kutujkën, ets mëët ja mëk'ajtën mëti'ipë yajwatspën.

⁵Jesukristë mëyajtën të tuny etsës të xyajnaxy oy ayukkajpxwa'kxpë, jëtu'unts oymyaatsowëty ja ja'ay tmëpëktëty ja Jesukristë ets tmëmëtowtëty.

⁶Ma yë'ëjëtyën miits näjyëtu'un myajpaatë mëti'ipë jam Roma tsënaaytyëpën. Mtsojkëtëp yë Tios ets të mwootsowëtë ets mjuuky'atëty wa'ats. Wä'än ja Tios Teety ets ja Wintsën Jesukristë mmo'ojëtë ja kënu'kxën ets ja jotkujk'ajtën.

⁸Tim jëwyiin tim jëyëjp, nyajnaxyës ja kukajpxën ja'awëkyëtakën ma Tiosën mëët ja Wintsën Jesukristë ja xyëëw, ko miitsëty oy myanimëtya'aktë oymyaajëty ko të mëpëktë.

⁹Tios, mëti'ipës ëmuumtu'ukjot nmëtuumpyën ets nnikäjpxy nnimëtyä'äkyës ja y'u'unk, yë'ë y'ijxyp nyija'ap ko miits xëmë nja'amyätstë koos ja Tios nmëkäjpxy.

¹⁰Xëmës ja Tios n'amëtoy npëjktsoy ets yë'ë tyajkutukëty ets miits nëjkx nku'ixëtë.

¹¹Jä'ä ko ntsojkpyës ets npaata'an n'ixa'antë ets nputëkëtëty mëët ja Kënu'kxymyëkajtën ets amëk jotmëk myajpaatëty.

¹²Yë'ëjës ntijpy ets näjyotmëkwinkajpxëmëty nixim niyam mëët ya'atë mëpëjkën mëti'ipë nmëët'ajtëmën.

¹³Tyam ntuknijawëtë mëku'uktëjkëty, ko tëëjës kanaak ok njatuknipëjktaakë ets të njaninëjkxa'antë ets nni''ixa'antë, je'eyëp ko xëmës ja ëtujkpë të npaaty. Yë'ës njatsojkpy ets ja Tios tyajkutukëty etsës n'ixa'any wi'ix ja Tios tyunyën ma miitsëtyën jëtu'un tääjës të n'ixyën wiinktsow muum ma ka'ap jyutiis kajpnëtyën.

¹⁴Nu'kxyjoty n'ityës ma miitsëtyën, ma wijyjyä'äyën ma tsuuja'ayën, ma këpetyjyä'äyën ets ma tëtä'äkyjyä'äyën;

¹⁵paatyës ni'ik ntsoky ets ja oy aaw oy ayuk ntuk'ëwaanëja'antë, miitsëty mëti'ipë tsënaaytyëpën jam Roma.

¹⁶Ka'apës ntuktsëtyuny ja oy aaw oy ayuk, jä'ä ko ja Tios ja myëk'ajtën ets tpaatëty ja nyitsokën ni'ëmukë ja ja'ayëty mëti'ipë mëpëjktëpën, jëyëjp yë jutiis ja'ayëty ets näjyëtu'un ja ka'apë jyutiisëty.

¹⁷Ya'atë aaw ayuk oypyë yë'ë xytyukni''ijxëmë wi'ix ja Tios ja npoky'ajtëm xytyukniwatsmëtyën: mëët ja mëpëjkën tsyo'ontä'äky ets jëtu'un jyëjpkëxy. Jëtu'un ijxtëm ja Tios ja y'aaw y'ayuk këxja'ay myinyën: Ja wa'ats ja'ay mëpëjkën mëët jyuuky'ata'any.

¹⁸Tios yajnikëxë'kpy ja tsyip y'äkë ko tyajtsoony jam tsajpjotm ja ëyo'on ets tëytyuny ja ëxëëkja'aytyëjk ko ka'ap oy tii tnipaye'eytyë, mëti'ipë tsumy matsy yaj'ijtëpën ja oyajtën ets ja tëyajtën ets këtiipë ja ja'ay tnijawëtëty.

¹⁹Wa'ats yë'ëjëty tjanijawëtë ja Tios ja tyiyajtën, jä'ä ko tëë kë'ëm jyatuk'ixëtë,

²⁰jä'ä ko ja Tios ja jyä'ä mëti'ipë ka'ap yaj'ixyën, pën yajmëmääpy yajmëtajp mëti'ipë yë'ë të tunyën. E mëtëy jëtu'un, jä'ä ko maju'unëm ja naaxwiinyëtë kyojyën, yë'ë të yajtuk'ijxy ko yë'ë Tyiosëty ets ko ja myëk'ajtën ka'ap kyukëxë. Paaty ka'ap ja ëxëëkja'aytyëjkëty yajpokymyä'kxantë.

²¹Oy ja Tios të tja'ixtë, ka'ap të tmëjjaw të tjaantyjyawëtë ijxtëm ja Tios mëpaat yajmëjpëjktä'äkyën, ni të tkamo'otë ja kukajpxën. Ni'ikyë jëëmpit winë të tuntë, aakjä'ä të tmëmay të tmëtajtë ka'apë tyuunëtyën, jëtu'un ja tsyuuwinma'any të yajwë'ëmëtë ijxtëm ja ja'ay kupi'its kukoots y'ityën.

²²Jëtu'un ijty y'ëna'antë ko wyijy'at kyejy'atë, je'eyëp ko tsuu yë'ë të y'awinpitë,

²³jä'ä ko tëë tyajtëkajtsëtë ja myëj'ajt y'oyajtën ja Tios mëët ja awinax mëti'ipë ja ja'ay yajkojtëpën, mëti'ipë o'ktëpën; yë'ëpaat të tyajnikojtu'utë ja joon jëyujk mëti'ipë kääkjëtijtëpën, jëyujk mëti'ipë taxk yë kyë'ë tyekyën ets tsa'any.

²⁴Paaty ja Tios të y'ëxmatsëtë ets jam tyimyajpaatëty ma ja ëxëëkpën mëti'ipë yë'ë tsyojkën'ajtëpën, aakyë'ë të ttun të tkajpxtë mëti'ipë yajtsëtyuunpën.

²⁵Ka'ap ja Tios ja tyiyajtën të tmëjpëjktakëtë, ni'ikyë ja ënëëmëtyä'äky të tyajmëjtëkëtë ets të twintsë'ëkëtë, të t'ëwtatë mëti'ipë ja Tios të tyajkojyën; ka'ap ja Tios të twintsë'ëkëtë, mëti'ipë ja paat'ajtëpën ets jeexyë tmëjjaw tjaantyjyawëtë.

²⁶Paaty ja Tios të y'ëxmajtsënëtë ma ja ëxëëk tuunkën mëti'ipë je'eyë yajtsëtyuunpën. To'oxytyëjk paat tuunëtë mëti'ipë ka'ap y'oyëtyën, ka'ap ye'etyëjk tmëët'itë ets të tyajtëkatstë wi'ix tyo'oxytyëjk'atëtyën.

²⁷Näyjyëtu'un ja ye'etyëjkëty ka'ap t'ëkmëët'ijnëtë ja to'oxytyëjk, aak ye'etyëjk ja tsojkën ja'awën tmëët'ajnëtë. Aak ye'etyëjk ëxëëkjaty y'ëtë'ëtsnëtë y'ënanëtë, ets ënät kë'ëm nyätyuktëytyunëtë ko tii wiinkjaty tuntë tkajpxtë.

²⁸E jä'ä ko ka'ap nijawëjantë ja Tios, paaty ja Tios të tyukmë'ixëtë ets tmëët'atëty ja ëxëëk winma'any ets tuntëty mëti'ipë ka'ap pyaat'atyën.

²⁹Ujts ja jyot wyinma'anyëty mëët ja ëxëëkpë, ijxtëm ja ëxëëk'ijxën, atsojkën, mëtsip'ajtën, tuku''oy'ijxën, yaja'ay'o'ktëp, tsiptuuntëp, win'ë'ëntëp, aak jëëmpit tii t'ixtë ets pi'tskajpxtëp.

³⁰Nyikajpx nyimëtyaktëp ëxëëkjaty ja myëku'ukëty, myëtsip'ajtëp ja Tios, ëxëëk kajpxtëp, mëjjëtëp patëtëp, amëj akëjxm, myëwinma'anypyaat'ëtëtstëp ja ëxëëkpë, ka'ap ja tyaak tyeety tmëmëtowtë,

³¹ka'ap jyä'äkyukëja'antë, ka'ap ja y'ayuk tpatuntë, ka'ap pën t'oyjyawëtë, ka'ap nyimyä'kxtë, ka'ap ja pa'ëyo'owën tmëët'atë.

³²Nyija'awëtëp ko Tios të tuknipëjktaakë ko paat'ajtëtëp ja o'kën mëti'ipë jëtu'un ëtëtstëpën ets ka'ap yi'iyëty ko jëtu'un tuun'ëtë'ëtstë, tyukxoontaktëp yë'ëpaat ko ja wiinkëtypë jëtu'un y'ëtë'ëtstë y'ëna'antë.