Read Biblia Mixe de Quetzaltepec Romanos 11 Bible Online

Romanos 11 - Biblia Mixe de Quetzaltepec bible

Romanos 11

¹Yë'ës tyam nyajtëëpy: ¿Tëë jëtää ja Tios t'ëxmajtsnë ja nyaax kyajpnë? Niwi'ix'äämpy. Ëjts nän Israel ja'ayës ëjts, Abrahamës nteety'äjtyp n'ap'ajtyp, Benjamínkës ja y'u'unk y'ok ëjts.

²Tëëyëp ja Tios tkajpniwa'any ja Israel ja'ay, e tyampaat je'eyëm tkajpniwa'any ¿tii ko t'ëk'ëxwaanpëty? ¿Këtii xynyijawëtë wi'ix ja Tios ja y'aaw y'ayuk y'ënä'änyën ma ja Tios ja kyäjpxynyajxpë Elías yajnimëtyä'äkyën, ko ja Tios ojts tja'amyetsy ets ojts tuk'ëwaanë ja Tios wi'ix ja jutiis ja'ay y'ëtë'ëtstënë? ets y'ënäny:

³Wintsën, tëë ja mkäjpxynyajxpë myaj'o'kxëtë ets tëë ja mwintsë'këntyakn mjijtxëtë, ëjts nätyu'uk të njaakwë'ëmyës ets xyaj'ookantëpës näjyëtu'un.

⁴Ënät ja Tios y'ëtsoowinpijtë: Tëës ja ja'ay ëpëky npëjktä'äky niwëxtujk mil mëti'ipë ka'ap të twinkoxtänëtën ja Baal ja y'awinax.

⁵Näyjyëtu'un tyam jyäty, niwäänë të wyë'ëmtë mëti'ipë ja Tios të wyinwitsëtën myëyajtënkyëjxm.

⁶Ets pën yë'ëkyëjxm ko ja Tios tmëët'aty ja oyjyot oywyinma'any, ka'ap y'ëktsoowpatnë ja mëti'ipë yajtuunp yajkajpxpën; jä'ä ko jeexyë kyajëtu'unëty kajxyëp ja Tios ja y'oyjyot y'oywyinma'any tsyowpaaty.

⁷¿Wi'ix ënät njaak'ëna'anmëty? Ja Israel ja'ayëty ka'ap të tpaatë mëti'ipë të tja'ixta'atën, yi'iyë mëti'ipë ja Tios të wyin'ixëtën të tpaatë. Ja wiinkëtypë je'eyë ojts kyujuunta'aktë,

⁸ijxtëm y'ënä'änyën ja jaaypyetypë myinyën: Tios ojts jëtu'un pyëjkta'akëtë ets ka'ap tii tjawëtëty, ets jëtu'un tyampaat je'eyëm jyatë; jya'ijxtëp ets ka'ap t'ijxpaatë, jyamëtoowtëp ets ka'ap tja'akyyukëtë.

⁹Näyjyëtu'un ja David y'ënäny: Wä'än ja kyä'äyën y'ukënëty yë'ë tmëpokytyëkëtë, ets nyäyajtëkoyëtëty ets tkumëtowtëty,

¹⁰Wä'än ja wyiin tpi'itstë ets ka'ap y'ixtëty, wä'än xëmëkyëjxm t'itë jëku'ux.

¹¹Nyajtëëpyës jatëkok: Ko ja jutiis ja'ay kya'atë pokyjotm, ¿tim'ëxmajtsëtëp jëtää ja Tiosë? Niwi'ix'äämpy. Ko ja jutiis kyamëtaktë, nikë jää të tpaatë ja nitsokën mëti'ipë ka'ap jyutiis ja'ay'atën, jëtu'unts ja jutiis ja'ay y'äkëtëty.

¹²Paaty, ko ja jutiis ja'ay pyokytyuuntë ënät ja Tios ojts tkënu'kxy mëti'ipë ka'ap jyutiis ja'ay'atën, jëtu'un ja Tios wäänëni'ik ja naaxwiinyëtë ja'ay tkënu'kxëty ko ja jutiis ja'ay ja Tios tmëpëktëty jatëkok.

¹³E tap miits njaakmëmëtya'aka'antë, miitsëty mëti'ipë ka'ap jyutiis'atën. Mëët ko ja Tios të xytyuknikexyës ja mëti'ipë ka'ap jyutiis ja'ay'atën, jotkujkës näjyawëty mëët ya'atë tuunk.

¹⁴Njatsojkpyës ets jeexyë ja jutiis ja'ayëty wiink tjawëtë ko miits ja Tios të xymyëpëktë, jëtu'un tjëkyäpëty wi'ix tpaatëty ja nitsokën.

¹⁵Mëët ko ja jutiis ja'ayëty ka'ap të tsojkën'atë ja Tios ja y'oyajtën, ënät ja wiink ja'ay të tpaatë ja nimä'kxën ma ja Tiosën; ¿tii ënät jyaak tunäämpy? yë'ë myo'ojäämpy ja juukyajtën mëti'ipë të y'ooktën.

¹⁶Jëtu'un ijxtëm ja jëtsyën mëti'ipë ja Tios yajtuknipëjktakëpën kënu'kxy ja nyäxy, näjyëtu'un ja tsajpkääky nän kënu'kxy jä'änë. Näyjyëtu'un ënät tu'uk ja kepy tyikts ko tëë Tios tkënu'kxy, ja kepyxye'enty aak wa'ats ja nyajxtaaynyë.

¹⁷Jëtu'un ja jutiis ja'ayëty ijxtëm ja olivë kepyxye'entyën mëti'ipë të yajkatspuxyën; ets mijts mëti'ipë ka'ap jyutiis ja'ayëty, jëtu'un ijxtëm ja pa'olivos xe'entyën ets të myatukpu'ootsë ja olivë kepy mëti'ipë mëtëyën. Ets të m'awinpity ijxtëm jeexyë mijts mjanty olivë'atën.

¹⁸Je'eyëp ko këtii mnätyukmëjawëtëty ko jam të myajpëjktä'äky. Pën mnätyukmëjja'awëyëp, ja'amyäts ko ka'ap myijtsëty xyaj'ity ja kepy aats, ja kepy aats mijts myaj'ijtëp.

¹⁹Wä'än jëtää mijts m'ëna'any: Jä'äkyëjxm të yajkatspuxy ja kepyxye'enty etsës ëjts jam nyajkëx'ootsëty.

²⁰Tëy jëtu'un. Ojts jyänty yajkatspuxy je'eyëp ko yë'ë ko ka'ap myëpëjktë, e mijts paaty jam myajpaaty jä'ä ko mmëët'ajtyp ja mëpëjkën. E paaty mijts këtii mnämyëjjawëtëty, këtiipë näjyëtu'un myajkatspuxëty.

²¹Pën ka'ap ja Tios ojts tnime'kxy ja jutiis ja'ayëty, mëti'ipë jëtu'unëtyën ijxtëm ja oy olivë kepyxye'entyën, nän ka'ap mijts mnimä'kxëtëty ko näjyëtu'un m'ëtë'ëtsëty.

²²Ix, wi'ix ja Tios y'oyëtyën ets näjyëtu'un wi'ix tpëjktä'äkyën ja tsaatsytyu'unën; mëk tsaatsytyuny mëti'ipë pokyjotm ka'atëpën, e mijts oy të mmëët'atyë. Je'eyëp ko kopkpëky ko mjuuky'atëty xëmë oy ijxtëm yë'ë t'oy'ixyën; jä'ä ko tsojk näjyëtu'un myajkatspuxëty.

²³E ko ja jutiis ja'ay tmëpëktëty ja Tios, jam jä'ä yajpëjkta'aktëty ma të ënäty mijts të myajpëjktä'äkyën; jä'ä ko myëët'ajtyp ja Tios ja mëk'ajtën ets pyëjkta'akëtëty jatëkok ma të y'itën.

²⁴Jä'ä ko pën mijts mëti'ipë ka'ap jyutiis ja'ayëty, jëtu'un mnaxy ijxtëm ja pa'olivo kepyën, ojts myajpuxy ets myajkëx'o'tsy ma ja olivë kepyën mëtëypyë; ja jutiis ja'ayëty mëti'ipë jëtu'unëtyën ijxtëm ja olivë kepyën mëtëypyën, ni'ik pyaat'atëtë ets jam jatëkok yajkëx'ootstëty ma ja nyikepyën.

²⁵Mëku'uktëjkëty, yë'ëjës ntsojkpy ets miits xynyijawëtëty mëti'ipë ijty ka'ap yajnijawën, jëtu'unts ka'ap mnämyëjpëjkta'akëtëty. Yë jutiis ja'ay juun yë y'aaw jyot të tpëjkta'aktë, ka'ap yë Tios të tmëmëtowtë, jëtu'un y'ita'antë koonëm tpata'atëty ja oyajtën mëti'ipë ka'ap jyutiis'atën.

²⁶Ko ya'atë tyunëtëty jyatëtëty, ni'ëmukë ja jutiis ja'ay tpaata'antë ja nitsokën. Ijxtëm ja Tios ja y'aaw y'ayuk këxja'ay myinyën: Jerusalén myina'any tu'uk ja jutiis ja'ay yajnitsokpë ets tyajnitso'oka'any ja pokyjä'äytyëjk mëti'ipë ja Jacob tyëëmp'ajtyp y'aats'ajtypyën.

²⁷Ya'atë käjpxytyu'unën nëjkx tyuny ko ënäty ja pyoky nimä'kxëtës.

²⁸Ja jutiis ja'ayëty mëtsip'ajtëtëp ja Tios, paaty miits ja Tios mkënu'kxëtë; je'eyëp ko Tios tsyojk'ëtëtsyp ja jutiis ja'ay jä'ä ko ojts oy jyuuky'atë ja y'aptëjkëty.

²⁹Ka'ap ja Tios wyinma'any tyëkatsy ko pën tii tmo'oy mëti'ipë të twin'ixyën.

³⁰Tëëyëp ka'ap ja Tios ijty xymyëmëtowtë, e tyam ma ja jutiis ja'ayëty ja Tios ka'ap të tmëmëtowtën, tëë ja Tios miits mpa'ëyowëtë.

³¹Näy jä'äkyëjxm ko ja Tios mpa'ëyowëtë, paaty ja Tios tpa'ëyoy ja jutiis ja'ayëty.

³²Jä'ä ko ja Tios ni'ëmukë ja ja'ay ojts tukwinmëtoy ja pyoky ko të kyäjpxykyumëtoownaxtë ets ënät näjyëtu'un tpa'ëyowa'any ja wiinkëtypë tu'knax.

³³Ni'ik ja Tios ja myëj'ajt jyääntyajtën kyëjääjëty ets näjyëtu'un ja wyijy'ajt kyejyajtën. Ni pën kyamayë tkajpxtë'kxëty mëti'ipë të tuknipëjktaakën ets ka'ap pën myäyëtëty twinjawëty ja nyë'ë tyu'u.

³⁴E ¿Pën y'ëknija'ap ja Tios ja wyinma'any? ¿Pën y'ëkkajpxwijëp?

³⁵¿Pën winë ja Tios të t'ëkmoopyë ets jatëkok kyëpäjtxëtëty?

³⁶Tios tu'kë'ëyë winë myëët'ajtääpy, ets yë'ë winë yaj'ijtääpy. Jëtu'un xëmëkyëjxm y'itëty ja Tios ja myëj'ajt y'oyajtën.