Read Biblia Mixe de Quetzaltepec Romanos 13 Bible Online

Romanos 13 - Biblia Mixe de Quetzaltepec bible

Romanos 13

¹Ni'ëmukë mëpaat yajmëmëtoy ja ja'ay mëti'ipë myëët'ajtëpën ja kutujkën. Jä'ä ko ka'ap ma kutuunk mëti'ipë ka'ap jam kyutukyën ma Tiosën, mëti'ipë jääjëtyën Tios yë të pyëjkta'akëtë.

²Paaty ko pën ja kutuunk tkamëmëtowëty, wyiink'ijxyp ënäty mëti'ipë ja Tios të tuknipëjktaakën. Ets mëti'ipë käjpxy kumëtoownajxpën nëjkxëp ja yajtëytyuny.

³Yë kutuunktëjk ka'ap yë'ëkyëjxmëty të yajpëjkta'aktë ets tyajjotkëxtëty mëti'ipë oy winë tyuunpyën, yë'ë të yajtuknipëjktaakëtë ets tpaye'eytyëty mëti'ipë ëxëëk ëtëtstëp ënantëpën. Pën ka'ap mëët ja tsë'ëkë mjuuky'ata'any, tun kajpxp mëti'ipë oyën ets ja kutuunk m'oyjyawëtëty.

⁴Tios yë'ë të tyuknipëjktaakëtë ets miits jotkujk myajpaattëty. E pën mijts ëxëëk m'ëtë'ëtsy m'ëna'any kopkpëky ko mtsë'ëkëty; jä'ä ko ka'ap ja kutuunktëjk nëkoo ja mëk'ajtën të yajmo'otë, yë'ë ets ja Tios tmëtuntëty ets tëytyuntëty ja ja'ay mëti'ipë ëxëëk ëtëtstëp ënantëpën.

⁵Yë'ë oy ko kutuunktëjk nmëmëto'owmëty, ka'ap tyim yë'ëkyëjxmëty ets yajkumëtowëty ja ëxëëkpë, yë'ëkyëjxm ets ntu'unmëty mëti'ipë mëtëyën.

⁶Paaty miits myaktë mkëpätë ma ja kutuunktëjkën, jä'ä ko Tios myëtuuntëp paatykyëjxm jam të yajpëjkta'aktë.

⁷Yaktë nijä'äjaty mëti'ipë paat'ajtëpën. Mëti'ipë mëpaat xykëpätën, yaktë ja m'ayajk m'ako'onënëty; pën jam ja këpäjtën myuky, yaktë ja mjä'äjëty; pën nitëjkëyëp yajwinkutsë'ëkëty, wiinkutsë'ëkëtë; pën paat'ajtëp mëj y'itëty, mëj yajnaxtë.

⁸Këtii pën xymyënu'kxy'atëty, yi'iyë ja oyjyot oywyinma'any miits mnätyukmënu'kxy'atëtëp nixim niyam; pën ja myëku'uk tsyojkpy, tëë ënäty tpatuny wi'ix ja ënä'ämën y'ënä'änyën.

⁹Jëtu'un ja ënä'ämën y'ënä'äny: ka'ap xyajtëkoytyëty ja nyiwintsë'kën ja pëjkën ukën, ka'ap myajja'ay'ookëty, ka'ap mmäätsëty, ka'ap mmëku'uk nyaax kyam xy'atsojkëty. Tu'kë'ëyë ya'atë ets wiinkëtypë ja ënä'ämën, ënät tsyoowtëjkëtyä'äy ko yajpatuny ja ënä'ämën mëti'ipë ënaanpën: Tsok ja mjëëky mmëku'uk ijxtëm kë'ëm mnätsyokyën.

¹⁰Mëti'ipë ja'ay tsojkp ja'apën, ka'ap yë myëku'uk t'ëxëëktuny, ma ja nätsyok näjyawën jam ja ënä'ämën yajpatuunta'ay.

¹¹Ixtë tuntë wi'ix ja xëëw jëmëjt tyu'uye'eyën, ets yë'ë mëmay mëtajtë ko tëë tpatnë jëna'a ja ja'ay myä'äywijtëtyën. Jä'ä ko ja nitsokën'ajtëm tim winkon ja yajpatnë, ka'ap y'ëkjëtu'un'ajnë ijxtëm ojts nmëpëjktso'onëmën.

¹²Tëë ja tsu'um'it nyajxnë, jëtu'un tyamnë ijxtëm jeexyë xyiinyëjanën, paaty ka'ap n'ëkpokytyu'unënëty, ka'ap n'ëk'ijtënëty akootstuuy; wä'än nyajpatëmë ajajtuuy ijxtëm tu'uk ja tsiptuunpë y'ijx'ity kyëwent'atyën.

¹³Tsojk winë oy ntu'unëm ijxtëm xëëny tii yajtunyën. Ka'ap je'eyë xëmë n'ukmëty nmukëmëty, ka'ap xim yam yë ye'etyëjk t'ixëty yë to'oxytyëjk ëkë yë to'oxytyëjk xim yam yë ye'etyëjk, ëkë xim yam pën mëët ntsiptu'unmëty.

¹⁴Ni'ikyë miits mnätyukxoxëtëty ja mëpëjkën mëti'ipë jam mmëët'ajtëpën ma ja Wintsën Jesukristën ets ka'ap yi'iyë xymyëmay xymyëtajtëty wi'ix ja mjot mnini'kx tii t'oyjawëtyën.