Read Biblia Mixe de Quetzaltepec Romanos 15 Bible Online

Romanos 15 - Biblia Mixe de Quetzaltepec bible

Romanos 15

¹Ëëts'ajtëm, mëti'ipë mëk yajpatëpën ma mëpëjkënën, mëpaat mputëjkëmë mëti'ipë ka'ap oy myëpëktënëm, ets ka'ap yi'iyë n'ixtä'ämyëty mëti'ipë ntukjotkëtakmëpën.

²Ni'ëmukë ëëts xypyaat'ajtëmë ntukjotkëtakmëty ja nmëku'uk'ajtëmë ets tuk'oy'atëty wi'ix wäänë oy tmëpëktëty ja Kristë.

³Ka'ap ojts kë'ëm ja Kristë nyätyukjotkëtä'äkyë, jëtu'un ijxtëm ja Tios ja y'aaw y'ayuk kyëxja'ayëtyën: Ko ja ja'ay mwinkajpxpätëtëty, aak'ëjts xytyukkëtakp.

⁴Paaty ojts tu'kë'ëyë winë yajjaaywyi'imy ets xytyuk'ijx xytyuknija'awëmëty, ets amëk jotmëk nmëtënä'ämyëty ja ëyo'on mëti'ipë nmënajx nyajnajxëmën, jëtu'un nmëët'ajtmëty ja jotkujk'ajtën ko ja Tios ëmuumtu'ukjot njëjp'ijxëmë.

⁵Ja Tios, mëti'ipë xyajmä'kxtujkëmën ets xyajjotmëktakëmën, yë'ë mmo'ojëtëp ja winma'any ets tu'ukyë mjuuky'attëty xim yam, jëtu'un ijxtëm ja Kristë Jesús najtstu'unëyën,

⁶jëtu'unts tu'ukyë xymyëjjaw xyjyääntyjyawëtëty ja Tios, Wintsën Jesukristë Tyeety.

⁷Paaty näkyupëkëtë nixim niyam ijxtëm ja Kristë të mkupëkëtën ets ja Tios mëjjaw jaantyjawë y'itëty.

⁸Ja Kristë tëë jëyëjp tniminy ja Jutiis ja'ay ets tpatuny ja aaw ayuk mëti'ipë ja Tios tyukwinwa'anëyën ja n'ap'ajt nteety'ajtëmë, ets tyajnikëxë'ëky jëtu'un ko Tios pyatuumpy yë'ë ko tii twinwanë.

⁹Näyjyëtu'un ojts tniminy mëti'ipë ka'ap jyutiisëty ets tmëjjaw tjaantyjawëtëty ja Tios ko tëë pya'ëyowëtë, ijxtëm ja Tios ja y'aaw y'ayuk kyëxja'ayëtyën: Paaty mijts nmëjjaw njaantyjyawë ma ja ja'ayëtyën mëti'ipë ka'ap jyutiis'atën etsës nkuuy'ëwëty ja mxëëw.

¹⁰Jëtu'un ja Tios ja y'aaw y'ayuk y'ënä'äny jatu'kpëky: Miitsëty, mëti'ipë ka'ap jyutiis ja'ay'atën, itë xontë mëët ja Tios ja jyä'äyëty.

¹¹Ets jatu'kpëky y'ënä'äny: Miits, naaxwiinyëtë ja'ayëty, ni'ëmukë naax kajpn, mëjjaw jaantyjyawëtë ja Tios.

¹²Näyjyëtu'un ja Jeséas ojts y'ënä'äny: Jotkujk ja Jesé ja y'u'unk y'ok y'ita'any, mëti'ipë yajkutukaanpën ma ja naax kajpnën, ets ja ja'ay yë'ë tyuk'ijxpäta'anyë.

¹³Ja Tios, mëti'ipë njëjp'ijxëmën, wä'än yë'ë ni'ëmukë mmo'ojëtë ja xoontakën ets ja jotkujk'ajtën mëët ko yë'ë xymyëpëktë ets wä'än mmo'ojëtë ja jotkujk'ajtën mëët ja myëk'ajtën ja Kënu'kxymyëkajtën.

¹⁴Mëku'uktëjkëty, nmëpëjkpës ko tyiyëty ko miits ni'ik xymyëët'atë ja oyjyot oywyinma'any, ja wijyajtën kejyajtën ets mjajtëp wi'ix mnäkyajpxwijëtëty.

¹⁵Paaty miits tyam ya'atë noky ntuknijayëtë ets ntukja'amyätstë. Jä'äkyëjxmës jëtu'un ntuny ko ja Tios të xytyuknipëkyës mëët ja y'oyjyot y'oywyinma'any

¹⁶etsës nmëtunëty ja Jesukristë ets ja ja'ay tuk'oy'atëty mëti'ipë ka'ap jyutiis'atën. Yë'ës ntukmëtuumpy ja Jesukristë etsës nkajpxwa'kxëty ja oy aaw oy ayuk mëti'ipë tso'onën ma ja Tiosën. Jëtu'untsës ntuny ets y'itëty mëti'ipë ka'ap jyutiisëty ijxtëm ja wintsë'kën mëti'ipë Tios y'oyjya'apën, mëti'ipë Kënu'kxymyëkajtën të tyajwa'atsyën.

¹⁷Nmëët'ajtypës ja mëk'ajtën etsës nämyëjjawëtëty ma ja Kristë Jesús, jä'äkyëjxm koos ja Tios nmëtuny.

¹⁸Ka'apës nnätyuk'a'ixëty tii nimëtya'aktëty, yi'iyës nimëtyäkpy mëti'ipë ja Kristë të tunyën ëjtskyëjxm etsës nputëkëty mëti'ipë ka'ap jyutiis ja'ay'atën ets ja Tios tmëmëtowtëty. Ya'atë yë'ë mëët wyintu'upëky ja käjpxy mëtyä'äky ets ja tuunk,

¹⁹ets mëët yë myëk'ajtën ja Kënu'kxymyëkajtën ko yajtuny ja mëj'ajtën. Jëtu'unës të nkajpxwä'kxy ja oy aaw oy ayuk ma ënäty ka'anëm ja Kristë yajnimëtyä'äkyën, jam Jerusalén ets Lirië y'itjotm.

²⁰Xëmës ntsoky etsës nkajpxwa'kxëty ja oy aaw oy ayuk ma ka'anëm yajnijawën ja Kristë. Ka'apës jyamëty të ntëkë ma ja ja'ay të yajtuk'ëwaanëtën ja Kristë këtiipës nyajpaatëty jëtu'un ijxtëm ja ja'ayën mëti'ipë jyëjpkojëpën tu'uk ja tëjkkojtuk ma wiink ja'ay të tkojtso'ontä'äkyën.

²¹Nikë jëtu'unës të ntuny ijxtëm ja Tios ja y'aaw y'ayuk kyëxja'ayëtyën: Yë'ë nëjkx t'ixtë nijawëtë mëti'ipë ënäty ka'anëm tnijawëtën, yë'ë nëjkx tja'akyyukëtë mëti'ipë ënäty ka'anëm tja'akyukëtën.

²²Paaty miits ka'ap nninëjkxtë oyës kanaak ok të njatuknipëjktaakë.

²³E tëë tyam ja ntuunkës nyaj'apaatë ma ya'atë itën ets tëë kanaak jëmëjt nyajxnë ma miits të njaninëjkxa'antë,

²⁴njëjp'ijxypës ko jääjës jam nnëjkxëty koos ënäty nnëjkxy España. Ko ënäty miits wäänë mëët të n'it të nxontë, xypyutëkëtëpës etsës nja'tëty maas ntijyën.

²⁵E jam Jerusalén tyam nnëjkxyës, yë'ëjës ja näypyutëkë nmënëjkxyp ma ja nmëku'uk'ajtëmën mëti'ipë ëyoopëja'ayëtyën.

²⁶Jä'ä ko tëë ja näypyutëkë tyajmuktë ja nmëku'uk'ajtëmë mëti'ipë jam tsënaaytyëpën Macedonia ets Acaya ets tuknikäxtë ja mëpëjkpëtëjk, ëyoopëja'ayëty jampë Jerusalén.

²⁷Kë'ëmwinma'any të tyajmuktë, oy n'ëna'anmëty jëtu'unyëm ënäty pyaat'atëtë; jä'ä ko jëtu'un ijxtëm ja Jutiis ja'ayëtyën ojts ja myëpëjkën tpëjkwa'kxtë mëët ja mëti'ipë ka'ap jyutiis ja'ay'atën; jëtu'un tyam pyaatëtë tpukëtëty ja ka'apë jyutiis ja'ayëtyën ets tputëkëtëty mëët ja pyëjktä'äkyëty ja jutiis ja'ayëty.

²⁸Jëtu'unts, koos ënäty ya'atë tuunk të nyajjëjpkëxy ets ko ënäty të ntukkë'ëtëkëtë ja näypyutëkë, ënätës nnëjkxëty jam España ets jam miits nninaxtëty.

²⁹Nija'apës ko mëj këjää ja Kristë xykyënu'kxa'anëmë ko ënäty nja'tyës jam ma miitsëtyën.

³⁰Mëku'uktëjkëty, mëët ja Wintsën Jesukristë ets ja Kënu'kxymyëkajtën ja tsyojkën jya'awën mëti'ipë të xymyo'oyëmën, n'amëtoyës miitsëty mëktä'äky ets ëmuumtu'ukjot ja Tios nja'amyäjtsmëty tu'ukyë ets miits ja Tios xytyuknija'amyätsëtëtyës.

³¹Amëtowtë pëjktsowtë ja Tios etsës xy'akëëytyuk xy'axajtukëty ma ja ja'ayëtyën mëti'ipë Judea yajpatëpën mëti'ipë ka'ap tmëpëktën ja Kristë ets näjyëtu'un oy yajkupëkëty ja putëjkën mëti'ipë yajtuknikäjxtëpën ja mëpëjkpëtëjk jampë tsyëënëtën Jerusalén.

³²Pën ënaanp ja Tios etsës jotkujk nja'tëty ma miitstsëtyën ets nxoontakmëty, npo'kxmëty npëjkmëty ko miits ënäty jam nku'ixëtë.

³³Ja Tios mëti'ipë jotkujk'ajtën yäjkpyën wä'än yë'ë tyajpaaty ma miitsëtyën. Oy jyëtu'un'atëty.