Read Biblia Mixe de Quetzaltepec Romanos 16 Bible Online

Romanos 16 - Biblia Mixe de Quetzaltepec bible

Romanos 16

¹Mkëwent'atëp ja ntsë'ë'ajtëmë Febe, mëti'ipë nyikopk'ajtypyën ja mëpëjkpëtëjk, jampë ye'eymyuktën Cencrea.

²Kupëktë yajxon Wintsën xyëëwkëjxm, jëtu'un ijxtëm pyaat'atyën ma nxëëw'ajtëmën mëpëjkpëtëjk. Putëkëtë ma tii tyajmëyätyën, jä'ä ko tëë ja ja'ay may tputëkë, ëjtspaat kë'ëm.

³Kajpxpo'kxtë ja Priscila ets ja Aquila, yë'ëjës mëët nmëtuntë ja Kristë Jesús.

⁴Yë'ë tëë nyäpyëjkta'akëtë kutsë'ëkëtum, o'kënjëjp'am, ëjtskyëjxm. Nyajnaxyës ja kukajpxën ets ka'apës nätyu'uk nkukajpxë, näjyëtu'un ni'ëmukë nkukajpxës ja mëpëjkpëtëjk mëti'ipë ka'ap jyutiis ja'ay'atën.

⁵Kajpxpo'kxtë näjyëtu'un ja mëpëjkpëtëjkëty mëti'ipë niye'eypyäjtëpën ma ja Priscila ets Aquila ja tyëjkën. Kajpxpo'kxtë ja Epeneto, mëti'ipës nmëku'ukja'apën, yë'ë ojts tmëpëky ja Kristë jëyëjp jam Asia y'itjotm.

⁶Kajpxpo'kxtë ja Maria, mëti'ipë mëk të tyunyën ma miitsëtyën.

⁷Kajpxpo'kxtë ja nmëku'uk'ajtëmë Andrónico ets ja Junías, mëti'ipës të nmëpujxntëjk ja'ay'atën ets mëti'ipë ijxpëjkpëtëjk wintsë'ëkë yaj'ijtëtëpën ets jëwyiin ojts tmëpëktë ja Kristë ok ëjts.

⁸Kajpxpo'kxtë ja Ampliato, mëti'ipës ni'ik ntsojkpy nja'apën Wintsën xyëëwkëjxm.

⁹Kajpxpo'kxtë ja Urbano, mëti'ipë mëët nmëtu'unëmën ja Kristë tyuunk ets ja Estaquis, mëti'ipës mëk ntsojkpy nja'apën.

¹⁰Kajpxpo'kxtë ja Apeles, mëti'ipë wintëy wiinkujk myëtuumpyën ja Kristë; kajpxpo'kxtë ja Aristóbulo ets mëti'ipë tsënaaytyëpën jam ma jyëën tyëjkën.

¹¹Kajpxpo'kxtë ja nmëku'ukës Herodión ets ja Narciso, mëët mëti'ipë tsënaaytyëpën jam ma jyëën tyëjkën ets mëti'ipë myëpëjktëpën ja Wintsën.

¹²Kajpxpo'kxtë ja to'oxytyëjkëty Trifena ets ja Trifosa, mëti'ipë ni'ik ja Wintsën myëtuuntëpën, näjyëtu'un kajpxpo'kxtë ja to'oxytyëjk Pérsida, ja nmëëtmëpëjkpë'ajtëm mëti'ipës ntsojkpyën, mëk yë Wintsën të tmëtuny.

¹³Kajpxpo'kxtë ja Rufo, mëti'ipë yaj'oyjya'apën Wintsën xyëëwkëjxm ets näjyëtu'un ja tyaak, mëti'ipës jëtu'un nja'apën tääjës ntaakën.

¹⁴Kajpxpo'kxtë ja Asíncrito, ja Flegonte, ja Hermes, ja Patrobas, ja Hermas ets ja mëpëjkpëtëjk mëti'ipë jam mëëtëtyën.

¹⁵Kajpxpo'kxtë ja Filólogo, ja Julia, ja Nereo ets ja myëkä'äx to'oxytyëjkpë, ja Olimpas ets ni'ëmukë ja mëpëjkpëtëjk mëti'ipë jam mëëtëtyën.

¹⁶Neykajpxpo'kxëtë nixim niyam oyjyot oywyinma'any mëët. Pën maajëty ja'ay ye'eymyuktë mëti'ipë Kristë myëpëjktëpën, ni'ëmukë ntuknikäxtë ja kajpxpo'kxën.

¹⁷Mëku'uktëjkëty, m'ixtëp mtuntëp ja ja'ay mëti'ipë tyuunk'ajtëpën ja näy'ëxëëk'ixë ets t'ixkukëtë ja tsip. Mëti'ipë jëtu'unpë tyuuntëpën, ka'ap yë'ë jyëtu'unëty ijxtëm ja ijxpëjkën mëti'ipë miits të xynyijawëtën. Nikë oy ko xywyinye'eytyu'utëty.

¹⁸Ka'ap yë Wintsën Jesukristë yë'ëjëty tmëtuntë, kyë'ëm tsojkën yë'ë myëmaay myëtajtëp ets ja ja'ay twin'ëëntë ko janty yujy janty tëtä'äky myëtya'aktë; yë'ë wyin'ë'ëntëp mëti'ipë ka'ap oy tnijawëtën tii ja Tios tsyojkpyën.

¹⁹Ets nyija'awëtëp ja ja'ay oypyënëty ko miits ja Tios xymyëmëtowtë, paatyës jotkujk nyajpaaty ets ntsojkpyës ets wijy kejy myajpaatëty wi'ix xytyuntëtyën ja oypyë, ka'ap yë'ëjëty wi'ix tii ëxëëk xytyuntëtyën.

²⁰Jëtu'unts ja Tios, mëti'ipë yäjkpyën ja jotkujk'ajtën, nëjkx tsojk tyaj'atëkoy ja mëjku'u ma miitsëtyën. Wä'än ja Wintsën Jesús mkënu'kxëtë.

²¹Timoteo, mëti'ipës mëët ntunyën, mtuknikäjxëtëp ja kajpxpo'kxën ets näjyëtu'un ja Lucio, Jasón ets ja Sosípatro, ëjts ja nmëku'uktëjkës.

²²Ëjts Tercio, ëjts ya'atë noky njääpy, näjyëtu'un miits ntuknikäxtë ja kajpxpo'kxën Wintsën xyëëwkëjxm.

²³Mkajpxpo'kxëtëp ja Gayo, jam maas nja'ajtä'äkyën, ma ja mëpëjkpëtëjk ye'eymyuktën. Mkajpxpo'kxëtëp näjyëtu'un ja Erasto, mëti'ipë ja kajpn meeny pyëjkë'kpyën ets ja nmëku'uk'ajtëm Cuarto.

²⁴Wä'än ja Wintsën Jesukristë mkënu'kxëtë.

²⁵Nmëjja'aw njaantyjya'awëm ja Tios. Wä'än yë'ë mputëkëtë ets tu'ukyë xymyëpëktëty ja oy aaw oy ayuk mëti'ipës të nkajpxwä'kxyën. Näy yë'ë mëti'ipë ja Tios ja ja'ay tyuknija'awëyën mëti'ipë ijty kayajnija'apën ma kanaak xëëw kanaak jëmëjt të y'ityën,

²⁶je'eyëp ko tëë tyam yajnijawë ko ja y'aaw y'ayuk të tukjaaywyi'imy ja kyäjpxynyajxpëtëjk ijxtëm tni'ënä'ämën ja xëmëkyëjxmëpë Tios ets ja naaxwiinyëtë ja'ay ni'ëmukë yajtuknijawëtëty jëtu'un tmëpëktëty ets tmëmëtowtëty.

²⁷Ja Tios, tu'ukyëpë wyijy'äty kyejy'ätyën, wä'än yë'ë tyajmëjjaw tyajjaantyjyawë xëmëkyëjxm mëët ja Jesukristë. Jëtu'un y'itëty.