Read Biblia Mixe de Quetzaltepec Romanos 4 Bible Online

Romanos 4 - Biblia Mixe de Quetzaltepec bible

Romanos 4

¹¿Wi'ix n'ëna'anmëty, tii ojts tpaaty ja nteety'ajt n'ap'ajtëmë Abraham?

²Ko jeexyë ja Abraham ojts oy wyi'im mëët ja Tios mëët ko winë oy të tuny, jyëkyejpy jeexyë nyämyëjjawëty, oy kyajamëty Tios wyintum.

³Jëtu'un ja Tios ja y'aaw y'ayuk y'ënä'äny këxja'ay: Abraham ojts ja Tios tmëpëky, paaty ojts wa'ats yajnaxyë.

⁴E jëtu'un, ko pën tyuny, yajmëjuupy yë'ë, ka'ap ja meeny yajnamo'oy, yë'ë yajmoopy mëti'ipë paat'ajtëpën.

⁵E ko tu'uk yë ja'ay tmëpëky ja Tios, mëti'ipë wa'ats yajnajxypyën ja pokyjyä'äy, Tios myëjpëjktäkpy ja ja'ay ja myëpëjkën ets wa'ats tyajnaxy, oy tii tkatuny oy mëti'ipë tsoowpatpën.

⁶Näyjyëtu'un ja David ojts tnimëtyä'äky ko jotkujk ja ja'ay yajpaaty mëti'ipë ja Tios wa'ats yajnajxëpën ets ka'ap ja pyoky yajmëjpëjktä'äky.

⁷Jëtu'un ja David y'ënäny: Jotkujk ja ja'ay yajpaaty mëti'ipë ja Tios ja pyoky të nyime'kxyën, ets ka'ap ja pyoky yajmëjpëjktä'äky.

⁸Jotkujk ja ja'ay mëti'ipë ja Wintsën ka'ap myëjpëjktakxëtyën ja pyoky.

⁹¿Ko jëtu'un ja David y'ënäny, wä'än jëtää yi'iyë pyaat'atëtë ja jotkujk'ajtën mëti'ipë tëë yajnatsujk'ëwtitën ja ye'etyëjkajtën, ëkë paat'ajtëtëp näjyëtu'un mëti'ipë ka'apënë? Tëë n'ëna'anëm ko yë Abraham oy ojts wyi'im mëët ja Tios jä'äkyëjxm ko myëpëjky.

¹⁰¿E jëna'a jëtää ojts oy wyi'im mëët ja Tios, ko ja Abraham ojts yajnatsujk'ëwtity ja ye'etyëjkajtën, ëkë ko ënäty ka'anëm yajnatsujk'ëwtityë? ka'anëm ënäty yajnatsujk'ëwtity ja ye'etyëjkajtën ko ojts oy wyi'im mëët ja Tios.

¹¹Ja ijxwë'ëmën mëti'ipë ojts yajpëjktä'äkyën ko yajnatsujk'ëwtijty ja ye'etyëjkajtën, jä'ä yë'ë ets nyikëxë'ëkëty ko yë'ë oy të wyi'im mëët ja Tios ko tmëët'aty ja mëpëjkën. Jëtu'unts ja ja'ay mëti'ipë ja Tios myëpëjktëpën, oy kyanatsujk'ëwtityëty yë ye'etyëjkajtën, Abraham yë'ë y'ap'ajtëp y'ok'ajtëp ets oy wyë'ëmtë mëët ja Tios.

¹²Näy Abraham y'ap'ajt y'ok'ajtëp ja jutiis ja'ayëty mëti'ipë tsukyëtyën ets tmëpëktë ja Tios ijxtëm ja Abraham myëpëjkyën ko ënäty ka'anëm yajnatsujk'ëwtity ja ye'etyëjkajtën.

¹³Tios ojts tukwinwanë ja Abraham ets ja y'u'unk y'ok tukumayä'äny ja naaxwiinyëtë; ka'ap yë'ëkyëjxmëty ko ja ënä'ämën tpatuntëty, yë'ëkyëjxm ets oy ets mëtëy ja paye'eyën jyää'atëty ko myëpëjky.

¹⁴Ko jeexyë yë'ë'atë ja kuma'ayën t'ëxajëja'antë mëti'ipë ja Tios ja y'ënä'ämën pyatuuntëpën, ka'ap jeexyë tyuny ko Tios yajmëpëky ets ni kyatuny jeexyë ja Tios ja wyaantä'äky.

¹⁵Jä'ä ko ja ënä'ämën tukpatp ja tsëtyu'un ko ka'ap yajpatuny, e ma ja ënä'ämën kya'ityën ka'ap jam tii yajtuuntëkoy jä'äkyëjxm ko ka'ap ja ënä'ämën jam.

¹⁶Jëtu'un ja waantakën xëmë tsyoowpaatëty mëti'ipë ja Abraham tyuunën ets tuk'oy'atëty ja y'u'unk y'ëna'k; tyaapë oyajtën namëyajtën ojts tpaatë, yë'ëkyëjxm ko myëpëjktë. Ka'ap yi'iyëty mëti'ipë pyatuuntëpën ja ënä'ämën tëyajtën, näjyëtu'un ja mëti'ipë mëpëjktëpën jëtu'un tä ja Abrahamën. Jëtu'un'äämpy ja Abraham teety nyäjxy ma ëëtsajtëmën.

¹⁷Ijxtëm ja Tios ja y'aaw y'ayuk y'ënä'änyën: Tëë mijts npëjktä'äky ets ja naaxwiinyëtë ja'ay may xy'u'unk'at xy'ok'atëty. Abraham ëëts nteety'ajtëmë Tios wyintuuy wyinkujk, ja Tios mëti'ipë myoopyën ja juukyajtën ja o'kpë ets tyajkoj'ëtë'ëtsy mëti'ipë kaka'atpnëmën.

¹⁸Ko ënäty ka'ap tii ja Abraham t'ëkjëjp'ijxnë, jää ojts myëpëky ets jatëkok winë tjëjp'ijxy; jëtu'unts ojts nyäxy, teety ma ni'ëmukë ja naax kajpnën, jëtu'un ijxtëm ja Tios ënäty të y'ënë'ëmxëtyën: Jëtu'un nëjkx ja m'u'unk m'ok myäyë.

¹⁹Ka'ap ja Abraham ojts ja myëpëjkën y'amutskë oy ënäty ja jyëmëjt myëko'pxëjanë ets nyija'awënëp ko ka'ap tii y'u'unk y'ëk'itanë, jä'ä ko mëjja'ay ni'ikëtynyë näjyëtu'un ja tyo'oxytyëjk Sara.

²⁰Ka'ap ojts tmëjot'amutskë ja Tios ja wyaantakën, wäänëni'ik jyaak timmyëpëjky. Ojts ja Tios tmëjjawë tjaantyjyawë,

²¹tëë ënäty ja y'aaw jyot tpëjktä'äky ko Tios ja mëk'ajtën tmëëtëty ets tpatun ja wyaantä'äky.

²²Paaty ojts oy wyi'im mëët ja Tios.

²³Ko ojts yajjaaywyi'imy ko ja Abraham ojts wa'ats nyäxy Tios wintum mëpëjkënkyëjxm, ka'ap yi'iyëty ja Abraham ojts jëtu'un yajnimëtyä'äky,

²⁴näjyëtu'un ojts ëëtsajtëm nyajnimëtyakëmë. Jä'ä ko ja Tios yajmëjnajxyp näjyëtu'un ëëts ja nmëpëjkën'ajtëmë, ko nmëpëjkëmë mëti'ipë yajjuukpyëjkën ja nWintsën'ajtëm Jesús ko y'ëk'o'ky.

²⁵Jesús, ojts yajkë'ëyäky ets y'ookëty mëët ko ënäty ëëtsajtëm npokymyëët'ajtëmë, e ojts jyuukpyiky ets ëëtsajtëm wa'ts nwë'ëmëty.