Read Biblia Mixe de Quetzaltepec Romanos 5 Bible Online

Romanos 5 - Biblia Mixe de Quetzaltepec bible

Romanos 5

¹Paaty ja Tios wa'ats të xyajwë'ëmëmë ko të nmëpëjkëmë, nmëët'ajtëm ja jotkujk'ajtën mëët ja Tios ko ja nWintsën'ajtëm Jesukristë të myiny naaxwiiny.

²Mëët ko ja Kristë të nmëpëjkëmë paaty të tjëkyepy wi'ix nmëwinko'onmëtyën ja Tios, ets xoontä'äky nyajpatmëty ko të xypya'ëyo'owëmë, mëk ja mëpëjkën nmëët'ajtmëty, ets amëj akëjxm njëjp'ijxmëty ja Tios ja myëj'ajt y'oyajtën.

³Ka'ap yi'iyë ntukxoontakmëty ja jotkujk'ajtën, näjyëtu'un ko n'ëyo'owmëty, jä'ä ko nnija'awëm ko ja ëyo'on yë'ë xyajmëkpëjkëm ets nmëmëtakmëty.

⁴Ko mëk nyajpatmëty ma mëpëjkënën, yë'ë xyajnaxa'anëm oy, ets ko ntuknajxmëty ja tsipë jotkujk näjya'awëmëty.

⁵Ya'atë mëpëjkën ka'ap maa tëkatsy xyajwë'ëmëty, jä'ä ko yë Tios tëë xymyo'oyëm ja tsyojkën jya'awën ma njoot'ajt nwinma'any'ajtëmën mëët ja kënu'kxymyëk'ajtën.

⁶Ko ënäty ëëts'ajtëmë ka'ap tjëkyepy ëwaatsëtuuy nyajpatmëty, ënät ja Kristë myiiny ets ja pokyjyä'äy tni'o'ktuty.

⁷Tsip ets pën tku'ookëty tu'uk ja ja'ay mëti'ipë të nyitëkën. Ets oy ënäty ja ja'ay ka'ap jyapokymyëët'ajtpë; ets oy tii mëtëy të tjatuunpë.

⁸E yë Tios yajnikëxë'kpy ko tsoky tjawë ja ja'ay. Ma ënäty ëëtsajtëm pokyjyä'äy nyajpatëmën, Kristë të xykyu'o'këmë.

⁹Ets tyam ko tëë ja Tios wa'ats xyajwë'ëmëmë ko ja Kristë të xykyu'o'këmë, wäänëni'ik ëëts njëjp'ijxëm ko mëët ja Kristë ka'ap npaata'anëmë ja Tios ja tyiytyu'unën.

¹⁰Jä'ä ko ijty ja Tios nmëtsip'ajtëmë, tëë ja Tios mëët nämyë'oypyëjkëmë jä'äkyëjxm ko ja y'u'unk të y'ooky; ets ko ja Tios mëët të nämyë'oypyëjkëmë, wäänëni'ik ëëts njëjp'ijxëmë ko ka'ap ja ëyo'on npaata'anëmë jä'äkyëjxm ko yë'ë jyuuky'äty.

¹¹Ets ka'ap yi'iyëty tyaapë, näjyëtu'un ntuk'ijt ntukxo'onëm ja mëti'ipë ja Tios të tunyën Jesukristë mëët, jä'ä ko Jesukristë mëët të nämyë'oypyëjkëmë ja Tios.

¹²Jä'äkyëjxm ko tu'uk ja ja'ay pyokytyuuny paaty ja poky ojts tsyo'ontä'äky yaa naaxwiiny, ets ko ja poky tsyo'ontäky ënät näjyëtu'un tsyo'ontäky ja o'kën; jëtu'un ja o'kën nyaaxkëtäky ma ni'ëmukë ja ja'ayëtyën, jä'ä ko ni'ëmukë pyokytyuuntë.

¹³Naamka'anëm ënäty ja ënä'ämën yaa naaxwiiny, pokytyuunpëm ja ja'ay ijty; e oy ja ja'ay jyapokytyuuny, ka'ap ja wi'ix yaj'ixy jä'ä ko ka'anëm ënäty tii ja ënä'ämën.

¹⁴Jä'ä tëy ma jyuuky'äjtyën ja Adán ets jääpaat ma ja Moisés jyuuky'äjtyën, ja o'kën ojts jää y'ëne'emy ma ja pokytyuunpëtëjkëtyën. Ka'ap yë'ëkyëjxmëty ko ja ënä'ämën tkapatuuntë, ijxtëm ja Adán jyäjtyën, mëti'ipë yajnitë'kxën ko ënäty ja Kristë myina'any.

¹⁵E ja Adán ja nyëë pyoky tim wäänë jä'ä, ni'ik këjää ja oyajtën mëti'ipë ja Tios të xymyo'oyëmën. Jä'ä ko tu'ukpë ja ja'ay pyokytyuunyën may ja ja'ay ojts y'ooktë; e mëët ko ja Tios xyajmëj'ajtëmë namëyajtën, tu'uk ja ja'ay të myëtä'äky ets ëëts nimay të ntuk'oy'ajtëmë, yë'ë jëtu'un yajtijp ja Jesukristë.

¹⁶Tu'ukpë ja ja'ay ja nyëë pyoky, ka'ap tjëkyepy n'ijxkijpxmëty mëët ja Tios ja y'oyajtën, jä'ä ko je'eyë tu'uk ja ja'ay të kyamëtä'äky tääts ni'ëmukë të tyëkooytya'atë; e ja Tios ja y'oyajtën nimay ja ja'ay tyajwatsta'ay, oy jyamayëty ja nëë poky.

¹⁷Pën paatykyëjxm jyää'ajty ja o'kën ko tu'ukpë ja ja'ay pyokytyuuny. Ni'ik ja Tios, mëët ja tsyojkën jya'awën namëyajtënpë tyajwa'atsa'any ja mayjyä'äy, ma y'ënä'äma'anyën xëmëkyëjxm tu'ukpë ja ja'ay, ja Jesukristë.

¹⁸Jëtu'un ijxtëm ja Adán ja nyëë pyoky tyajpokytyëjkëtyääyën ja naaxwiinyëtë ja'ay, näjyëtu'un ja Jesukristë ja tyuunk mëtëypyë tyaj'ëwaatsë pëtsëëmta'ay ja ja'ay ets tmo'oy ja juukyajtën xëmëkyëjxmëpë.

¹⁹Yë'ë tyijpy ko tu'uk ja ja'ay kyäjpxykyumëtoownajxy, may ja ja'ay ojts tmëpokytyëjkë; näjyëtu'un ënät ko tu'uk ja ja'ay ojts kyäjpxymyëtoy, may ja ja'ay tuk'oy'ata'any ets wa'ats nëjkx wyë'ëmtë.

²⁰Ko ja ënä'ämën ojts kyëjääjë ënät ojts ja poky näjyëtu'un kyëjääjë; je'eyëp ko ja poky ojts kyëjääjë, wäänëni'ik ja Tios ojts ja y'oyjyot y'oywyinma'any kyëjääjë.

²¹Jëtu'un ijxtëm ja poky ojts y'ëne'emyën mëët ja o'kën, näjyëtu'un ja Tios ja y'oyjyot y'oywyinma'any ojts mëtëy y'ëne'emy ko tyajmiiny ja juukyajtën xëmëkyëjxmëpë, mëët ja Jesukristë ja xyëëw.