Read Biblia Mixe de Quetzaltepec Romanos 7 Bible Online

Romanos 7 - Biblia Mixe de Quetzaltepec bible

Romanos 7

¹Mëku'uktëjkëty, miits mnija'awëtëp ja ënä'ämën ets mnija'awëtëp ko jää ja tyuny ko ja ja'ay jyuuky'äty.

²N'ëkpëjktakëm tu'uk ja to'oxytyëjk mëti'ipë pëkyën, ko ja nyiye'etyëjk jyuuky'äty kopkpëky ja ko tmëëtsëënë jä'ä ko jëtu'un ja ënä'ämën y'ënä'äny. E ko ja ye'etyëjk y'o'knë, najtspëkë ja to'oxytyëjk wyë'ëmnë ets jyëkyejpy ja wiinkpë tpëkëty, jä'ä ko ka'ap ja ye'etyëjk y'ëkjuuky'ajnë.

³E ko ja to'oxytyëjk ja wiinkpë ja ye'etyëjk tpuwa'akëty ets tamnëm ja nyiye'etyëjk jyuuky'äty, poky ënäty tyuunpy; e pën ku'ooky, ëwaatsë ja yajpaaty ets jyëkyejpy ja wiinkpë t'ëtsowëty ets ka'ap ënäty pyokyëty ttuny.

⁴Näyjyëtu'un miitsëty mëku'ukëty, ko të xymyëjwa'kpätë ja Kristë jëtu'un tpaaty ijxtëm jeexyë mëët të m'ooktën ma ja ënä'ämënën, ets tu'ukyë m'itëty mëët ja Kristë ijxtëm ja ni'kx kopkën, mëti'ipë të y'ookyën ets tëë jatëkok jyuukpyiky. Jëtu'unts njuuky'ajtmëty tsuj yajxon ijxtëm yë Tios tsokyën.

⁵Ko ijty ëëts njuuky'ajtëmë ijxtëm kë'ëm ntsojkëmën, ja ënä'ämën je'eyë ojts xytyuknija'awëmë ko tii ëxëëk ntu'unëmë, ets ojts mpëjkmujk ntuunmujkëmë ja o'kën.

⁶E tyam, ko n'ijtëmë ijxtëm ja o'kpën ma ja ënä'ämën mëti'ipë ka'ap xy'ëk'ënä'ämënën, ëwaatsëtum të nwë'ëmënë ets ja Tios nmëtu'unmëty ma ja Kënu'kxymyëkajtën jempyë ja nyë'ë tyu'u; ka'ap n'ëkmëtu'unënë ja ënä'ämën tëëpë nyajxnën.

⁷¿E jyëkyejpy n'ëna'anmëty ko jyää'aty ja ënä'ämën paaty jyää'aty ja pokyë? Niwi'ix'äämpy. Je'eyëp ko ja ënä'ämën jeexyë kyaka'ty, ka'ap jeexyë ëjts nijawë tii poky'ajtp. Ka'apës jeexyë të nijawë ko tii yaj'atsoky poky yë'ë, ko jeexyë ka'ap ja ënä'ämën y'ënä'äny këtii m'atsokëty.

⁸E ja poky tëë tukmëtä'äky ya'atë ënä'ämën ets ja kyutujkën tyajtuny ets xytyuk'atsokyës oy tyimtiijëty. Ko ja ënä'ämën kya'ity, ka'ap ja poky tii mëk'ajtën tmëëtëty.

⁹Juuky'ajtpës ijty ko ja ënä'ämën nkanijawës; e koos nnija'awëy ja ënä'ämën, ënät ja poky ja myëk'ajtën tpëjky,

¹⁰e ëjts tëëjës n'ooky. Jëtu'unës të nnijawë ko tääpë ja ënä'ämën mëti'ipës jeexyë xyajjuuky'ajtpën, ni'ikyës të xyaj'ooky.

¹¹Jä'ä ko ja poky yë'ë tyukmëtak ja ënä'ämën ets ojts xywyin'ëënyës, ets ja poky nän yë'ë ja ënä'ämën të tukmëtä'äky etsës të n'ooky.

¹²Ko konyë nkajpxa'anmëty, ja ënä'ämën wa'ats, mëtëy ets oy yë'ë.

¹³E jyëkyejpy ënät n'ëna'anmëty, ¿ya'atë mëti'ipë ënäty oyën, yë'ëjës të xytyukpaaty ja o'kënë? Niwi'ix'äämpy. Ja poky, paaty yaj'ooky ets jëtu'un tyajnikëxë'ëky ko poky yajtuny, je'eyëp ko yë'ë tyukkajpxpejtyp ja ënä'ämën ets yaj'ixëty oy yowë. Jëtu'unts ja ënä'ämën të tyajnikëxë'ëky wi'ix y'ëxëëkëtyën ja poky.

¹⁴Nnija'awëm ëëtsajtëm ko yë ënä'ämën ka'ap yaj'ixy, e ëjts jä'äs ko npokyjyä'äyëty, paatyës jëtu'un nyajpaaty pokyjotm ijxtëm tu'uk ja ja'ayën mëti'ipë juy tookyën.

¹⁵Ka'apës nja'akyukë tiijës ko jëtu'un n'ëtë'ëtsy; jä'ä ko ka'apës yë'ë ntuny mëti'ipës njatsojkpyën; jä'äs ntuunpy mëti'ipës ka'ap njatuna'anyën.

¹⁶E pën jä'äs ntuunpy mëti'ipës ka'ap njatuna'anyën, nkupëjkpyës ko oy ja ënä'ämën.

¹⁷Jëtu'unts yajnijawë ko ka'ap y'ëjtsëty kë'ëmwinma'any winë ntuny, ja poky ëtëtsp mëti'ipës nnëkëjxm'ajtypyën.

¹⁸Nija'apës koos, maas të ntukmin të ntukja'tën ja ëxëëkpë, ka'ap ja oypyë yajpaaty; paaty ja ëxëëkpë yë'ë ntunyës oy ja oypyë njatuna'anyës.

¹⁹Ka'apës ntuny ja oypyë mëti'ipës njatsojkpyën, yë'ëjës ntuunpy ja ëxëëkpë mëti'ipës ka'ap njatuna'anyën.

²⁰Koos ntuny mëti'ipës ka'ap njatsokyën, ka'ap y'ëjtsëty ntuny, ja poky ëtëtsp mëti'ipës nnëkëjxm'ajtypyën.

²¹Jëtu'unës njaty nkëpety: koos njatuna'any ja oypyë, poky ënätyë tim nawinkëxë'kp ma ëjtsën.

²²Jap njootjoty nwinma'anyjyotyës njatsojkpyës ja Tios ja y'ënä'ämën;

²³je'eyëp ko tamës nmëëtëty mëti'ipës ka'ap xy'ëxmatsyën ets ja oypyë ntunëtyës, yë'ë ja ënä'ämën mëti'ipë yajnikëxë'kpyën ja poky, mëti'ipë yajpatpën ma ëjtsën ijxtëm jeexyë tsum matsy xyaj'ityënës.

²⁴O'ktëyës njaty. ¿Pën xy'ëktukniwa'atsëpës ja poky mëti'ipë yaj'o'kpën?

²⁵Nkukajpxëpës ja Tios, yë'ëjës xytyukniwatsp, koos të nmëpëky ja Wintsën Jesukristë. Ëjts, njanija'apës ko yë'ë oy ko ja Tios ja y'ënä'ämën ntuk'ijtëmëty, e ëjts jä'ä ko npokytyunyës paaty ja poky yë'ë ja y'ënä'ämën ntuk'ijtëyës.