Read Biblia Mixe de Quetzaltepec Romanos 8 Bible Online

Romanos 8 - Biblia Mixe de Quetzaltepec bible

Romanos 8

¹Paaty tyam ka'ap pën poky y'ëk'ijnë, mëti'ipë ja Kristë Jesús mëët tu'ukyë yajpaatyën,

²jä'ä ko ja Kënu'kxymyëkajtën ja y'ënä'ämën mëti'ipë ja Kristë Jesús yajjuuky'äjtypyën, tëë ja myajpëtsëmyë ma ja pokyën mëti'ipë yaj'o'kpën.

³Tëë ja Tios tuny mëti'ipë ja ënä'ämën ka'ap myääyën tunëty, jä'ä ko ënäty ja myëk'ajtën kyujënäkyëty ets ko ja ja'ay ëmaay paki'ix yajpaatë. Paaty ja Tios ja y'u'unk të tkexy ets yaj'ijxy ijxtëm ja pokyjyä'äyën ets wyintsë'kën'atëty, tkunaxëty ja ja'ay ja pyoky, jëtu'un tyajkutëkoy ja poky ma ëëtsajtëmën.

⁴Paaty jëtu'un të tuny ets ja ënä'ämën ni'ëmukë yajpatunëty, ka'ap ntu'unmëty mëti'ipë ni'kx'ajt nkopk'ajtëm tsyojkpyën, Kënu'kxymyëkajtën ëëts jyä'ä ntu'unmëp.

⁵Mëti'ipë juuky'ajtëpën ijxtëm ja nyi'kx kyopk tsoktën, aakjä'ä myääytyëp tyajtëp mëti'ipë ja nyi'kx kyopk tsyojktëpën; ets pën juuky'ajtëpën ijxtëm ja Kënu'kxymyëkajtën tsokyën, aakjä'ä myääytyëp tyajtëp mëti'ipë ja Kënu'kxymyëkajtën tsyojkpyën.

⁶Ko ja ja'ay tmay ttajy mëti'ipë ja ni'kx kopk tsyojkpyën, tukpatëp ja o'kën; e ko ja ja'ay twinmay mëti'ipë ja Kënu'kxymyëkajtën tsyojkpyën, tukpatëp ja juukyajtën ets ja jotkujk'ajtën.

⁷Pën myääytyëp tyajtëp mëti'ipë ja ni'kx kopk tsyojkpyën, myëtsip'ajtëp ja Tios, jä'ä ko ka'ap ja Tios ja y'ënä'ämën tsojkëtë ets ka'ap tpatuunëtë.

⁸Mëti'ipë tyuuntëpën mëti'ipë ja ni'kx kopk tsyojkpyën, ka'ap tmëmëta'aktë tuntëty mëti'ipë ja Tios tyukjotkëtäkpyën.

⁹E miitsëty, ka'ap jëtu'un m'ëk juuky'ajnëtë ijxtëm ja ni'kx kopk tsokyën, jëtu'un miits mjuuky'atë ijxtëm ja Tios ja Kyënu'kxymyëk'ajtën tsokyën, pën tëy ko miits ja Tios Kyënu'kxymyëk'ajtën xymyëët'ajtëtë. Pën ka'ap tmëëtëty ja Kristë ja Kyënu'kxymyëk'ajtën, ka'ap ja Kristë jyä'ä'atyë.

¹⁰Pën yajpatp ja Kristë ma miitsëtyën, tam xymyëët'atë ja juukpyë ja kënu'kxymyëk'ajtën, jä'äkyëjxm ko m'itë jotkujk mëët ja Tios, oy ja jot nini'kx të jyayajpëjktä'äky o'kp mëët ko jyääjëty ja poky.

¹¹Ets pën ijtp ja Tios ja Kyënu'kxymyëk'ajtën ma miitsëtyën, mëti'ipë ja Jesús ojts yajjuukpyikyën, yë'ë myo'ojäämpy ja juukyajtën ja mni'kx mkopkëty mëti'ipë o'kpën mëët ja Tios ja Myëjaaw myëk'ajtën, mëti'ipë juukyajtpën ma miitsëtyën.

¹²Jëtu'un mëku'uktëjkëty, ëëtsajtëm nmëët'ajtëm ja tuunk, ka'ap jyëtu'unëty ijxtëm ja ni'kx kopk tsokyën.

¹³Pën mjuuky'ajtëp miits ijxtëm ja ni'kx kopk tsokyën, m'ookantëp yë'ë; e pën Kënu'kxymyëkajtën mëët miits xyaj'ooktë mëti'ipë ja mni'kx mkopk tsyojkpyën, xëmëkyëjxm miits mjuuky'ata'antë.

¹⁴Tëkokyë ja ja'ayëty mëti'ipë në'ëmooy tu'umooyëpën ja Tios ja Kyënu'kxymyëk'ajtën, Tios ja u'unk'atanëtëp.

¹⁵Miitsëty ka'ap yë'ëjëty të myajmo'otë ja Kënu'kxymyëkajtën mëti'ipë tëytyuunpën ets yajtsë'këpën, yë'ë të myajmo'otë mëti'ipë myajnaxëtëpën Tios u'unk. Mëët ya'atë ja Kënu'kxymyëkajtën ëëts n'ëna'anëmë: Tatë, Teety.

¹⁶Ets nän yë'ë ya'atë Kënu'kxymyëkajtën mëët tu'ukyë yajpaaty mëët ëëts'ajtëmë ets nyajtijmëty Tios y'u'unk.

¹⁷Ets ko yë'ë xy'u'unk'ajtëmë, näjyëtu'un ja Kristë mëët xypyaat'ajtëmë ja kuma'ayën mëti'ipë ja Tios të xytyukwinwa'anëmën, jä'ä ko tu'ukyë ja Kristë mëët nyajpatëmë ja myëj'ajt jyääntyajtën, jä'ä ko tu'ukyë mëët n'ëyo'owëmë ets jam nyajpatmëty ma myëj'ajt y'oyajtënën.

¹⁸Ja ëyo'on mëti'ipë tyam nmënajx nyajnajxëmën yi'inëm yë'ë, ko mëët n'ijxkijpxmëty ja mëj'ajtën jaanty'ajtën mëti'ipë ok npaata'anëmën.

¹⁹Tu'kë'ëyë mëti'ipë ja Tios të tyajkojyën jyëjp'ijxtëp ja xëëw ma ja Tios tyajnikëxë'ëkanyën mëti'ipë y'u'unk'ajtypyën.

²⁰Tu'kë'ëyë mëti'ipë Tios y'oytyuunën, kajpxpoky ojts wyë'ëmtë. Ka'ap yë'ëty kë'ëm jëtu'un tsojkën'ajtë, yë'ë tsyojk mëti'ipë tyuknipëjktakëyën; je'eyëp ko xëmë ojts tjëjp'ixtë ja oyajtën

²¹ets ja mëj'ajtën jaanty'ajtën ëwa'atstum pyëjkta'akëtëty ets ja Tios ja y'u'unk y'ëna'k tpata'antë ja myëj'ajt y'oyajtën.

²²Nnija'awëm ko tu'kë'ëyë mëti'ipë ja Tios y'oytyuunën, ëyoow jotëkooytyëp jä'äjëty tyam ijxtëm tu'uk ja to'oxytyëjkën mëti'ipë u'unkpaataanpën.

²³Ka'ap yi'iyëty y'ëyowtë, näjyëtu'un ëëtsajtëm n'ëyo'owëm nijënaak ja Tios të xymyo'oyëmën ja Kënu'kxymyëkajtën, ijxtëm jeexyë ëka'any të xymyo'oyëmën mëti'ipë xymyo'oja'anëmën. Mëk nku'ëyo'owëmë ko n'a'ijx njëjp'ijxëmë ets ja Tios xykyupëjkmëty ijxtëm ja y'u'unk y'ëna'kën, mëti'ipë nëjkx ni'kx'ajt nkopk'ajtëm tyaj'ëwaatsëpëtsëmyën.

²⁴Paaty ja nitsokën npatëmë ko njëjp'ijxëmë. Je'eyëp tëy ko pën tëë yaj'ijxnë ja mëti'ipë ënäty yajjëjp'ijxpën, ka'ap nëkooyë y'ëktsoowpatnë ja ëwxijtën. Jä'ä ko ¿Pën y'ëwxijtyp mëti'ipë tëë t'ixyën?

²⁵E mëti'ipë njëjp'ijxëmën ets ka'ap tii n'ijxëmë mëët ja nwiin'ajtëmë, ëyo'owmëp ko jeky n'ëwxijtëmë.

²⁶Jëtu'un ja Kënu'kxymyëkajtën xypyutëjkëmë ma tii ntsipja'awëmën. Jä'äkyëjxm ko nkajajtëm wi'ix ja Tios nja'amyäjtsmëtyën ijxtëm pyaat'atyën, yë Kënu'kxymyëkajtën ëëts xykyunu'kxtakëm ma ja Tiosën, jä'ä ko ka'ap ja aaw ayuk yajpaaty wi'ix yajkajpxpëtsëmëtyën.

²⁷Ets ja Tios, mëti'ipë tyuk'ijxnajxypyën ëëts ja n'aaw'ajt njot'ajtëmë, nyija'ap mëti'ipë winma'any ja Kënu'kxymyëkajtën myëët'ajtypyën, jä'ä ko ja Kënu'kxymyëkajtën nyinu'kxtäkpy ja jyä'äy ijxtëm ja Tios tsokyën.

²⁸Nnija'awëm ëëtsajtëm ko ja Tios yë'ë të tpëjktä'äky winë ets tuk'oy'atëty ja ja'ay mëti'ipë tsojkëpën, mëti'ipë të twoowtsoyën ijxtëm të tuknipëjktaakën.

²⁹Mëti'ipë tëëyëp ja Tios y'ixy'äjtypyën ets ojts tuknipëjktaakë ko t'u'unk'ata'any; jëtu'un ja y'u'unk mëj y'itëty ma nimay ja myëkä'äxtëjkën.

³⁰Mëti'ipë ja Tios tëëyëp wyin'ijxën tëë ja tmëkäjpxy; mëti'ipë ojts tmëkäjpxyën ojts wa'ats tyajnaxy ets mëti'ipë wa'ats yajnajxën ojts mëj'äämpy tpëjktä'äky.

³¹¿Tii ënät njaaktimkyajpxmëp? Pën Tios mëët ëëtsajtëm, ni pën xykyamëmëtakmëty.

³²Jä'ä ko ka'ap ja Tios të tukwintuk'ooky ja kyë'ëm U'unk, tëë ni'ëmukë xykyu'o'këmë, ¿Wi'ix ko ënät xykyamo'omyëty mëët yë'ë tu'kë'ëyë winë?

³³¿Pën jëtää y'ëkni'ëënëp mëti'ipë ja Tios të twin'ixyën? Tios tëë kë'ëm tyajnaxy wa'ats.

³⁴¿Pën xy'ëkyajnitujkëmëp? Kristë Jesús mëti'ipë ojts y'ookyën ets mëti'ipë ojts jyuukpyikyën ets tam yajpaaty Tios y'aka'anytsyow ma xynyinu'kxtakëmën.

³⁵¿Pën jëtää xy'ëkpëjkëmëp ja Kristë ja tsyojkën? ¿Wä'än jëtää yë'ëty tsipë, ëyo'on, ko nyaj'ëxwojpmëtyë ëkë ko yuu xëëw nyajnajxmëtyë, ëkë ko nwit'ajt nxox'ajtëm kya'itëtyë, ëkë ko kutsë'ëkëtuuy nyajpatmëtyë, ëkë ko yë ja'ay xyaj'o'kmëtyë?

³⁶Jëtu'un ijxtëm ja Tios ja y'aaw y'ayuk y'ënä'änyën: Jä'äkyëjxm ko mijts myajmëpëky, xëmë ëëts ja ja'ay xyaj'ooka'antë, jëtu'un ëëtsëty naxtë ijxtëm ja kupixyny yajmënejkxyën ma ja y'o'ktaknën.

³⁷Ko tii xyjyajtëm xykyëpäjtëm, nmëmëtakëm, jä'äkyëjxm ko ja Kristë xypyutëjkëmë, mëti'ipë ni'ik xytsojkëmën.

³⁸Nnija'apës ko ka'ap pën xypyëjkëmëty ja Tios ja tsyojkën: ni o'kën, ni juukyajtën, ni tsajpjotmëtë kukäjpxy, ni ku'oypyë, ni tyampë, ni miinpë wiinkoonpë,

³⁹ni këkpë, nitii wiinkëtypë mëti'ipë Tios y'oytyuunën. Ka'ap tii xytyuk'ëxmajtsmëty ja Tios ja tsyojkën mëti'ipë nmëët'ajtëmën Wintsën Jesukristë mëët.