Read Biblia Mixe de Quetzaltepec Romanos 9 Bible Online

Romanos 9 - Biblia Mixe de Quetzaltepec bible

Romanos 9

¹Tëy jaantyës n'ëna'any, ka'apës n'antä'äky. Ja njot nwinma'anyës Kënu'kxymyëkajtën tu'uwinwoowëp mëti'ipës xytyuknija'apën ko ya'atë tyiyëty.

²Nmëët'ajtypës ja ma'ayën tajën, xëmës nmay ntajy,

³ja ënaanpës ets jeexyë kajpxpoky n'ityës, nmëjëkäm'atyës ja Kristë ets tuk'oy'atëty ja nmëku'uktëjkës, nmëjutiis ja'ayës.

⁴Yë'ë u'unk'ajt ok'ajtëtëp ja Israel, ets ja Tios të kyupëkëtë tä y'u'unkën. Yë Tios ojts yajpaaty ma yë'ëjëtyën mëët ja myëj'ajt y'oyajtën, ets myooyëtë ja ënä'ämën ets ja waantakën, näjyëtu'un wi'ix twinjawëtëty twintsë'ëkëtëty ja Tios.

⁵Yë'ë y'u'unk y'ok ja y'aptëjkëty; yë'ë tsyikts'ajt y'aats'ajtëp, ma txëëwatën naaxwiinyëtë ja'ay, ma niTios'ajta'ayën winë, mëj'äämpy wintsë'ëkë y'itëty xëmëkyëjxm. Oy jyëtu'un'atëty.

⁶Ka'apës n'ëna'any ko ja Tios ka'ap tkuuytyuny ja y'aaw y'ayuk; paatyës jëtu'un n'ëna'any jä'ä ko mëti'ipë nätyijëtëpën Israel ja'ay ka'ap ni'ëmukë y'israel ja'ay'atë.

⁷Ka'ap ni'ëmukë t'u'unkëty ja Abraham ja y'u'unk, jä'ä ojts yë Tios y'ënë'ëmxëty: Mijts jam yë m'u'unk m'ok tsyoona'any ma Isaac yë y'u'unk y'ëna'kën.

⁸Jëtu'unts ya'atë yajja'akyukë ko ka'ap yë'ëkyëjxmëty ja'ay Tios y'u'unk'atyë ko ko ja tyeety y'ap pyënja'ayëty; Tios yë'ë y'u'unkniwäämpy yë ja'ay mëti'ipë pyatuumpyën ijxtëm ja Tios të twinwanën, yë'ë tëyëty u'unk o'k jyänty yajtijtë.

⁹Ya'atë jëtu'un ojts ja Tios tukwinwanë ja Abraham ko y'ënëmaayë: Wimpitaanpës ëjts ya'atë tiempo maajës të n'akäjpxyën, tëë ja Sara ënäty ja y'u'unk tyajmëxu'unk'aty.

¹⁰E ka'ap yi'iyëty. Ja Rebeca y'u'unk mäjtskpë, tu'ukyë teety'ajtë ja Isaac, ëëts ja n'ap'ajt nteety'ajtëmë.

¹¹Naamka'anëm ënäty myintë kyä'äxtë, ka'anëm ënäty tii tuntë oy ka oy, ko ja Rebeca ja Tios y'ënëmaayë: Ja mëjpë myëtunëp ja mutskpë, näjyëtu'un ijxtëm ja Tios ja y'aaw y'ayuk kyëxja'ayëtyën: Ntsojkës ja Jacob, Esaú ka'ap. Jëtu'un ojts wyi'imy nijawë ko ja Tios myëët'ajtyp ja kutujkën ets twin'ixëty mëti'ipë yë'ë tsyojkpyën, mëti'ipë yë'ë myëkajpxäämpyën oy ënäty tii oy pën të tkatuny.

¹⁴¿Wi'ixts na'ëna'anmëty? ¿Wä'än jëtää n'ëna'anmëty ko ka'ap y'oyëty mëti'ipë ja Tios tyuunpyënë? Niwi'ix'äämpy.

¹⁵Jëtu'un ja Moisés Tios y'ënëmaayë: Npa'ëyowäämpyës pën ënäty npa'ëyowäämpyës, najts'ëyoowëjäämpyës ja ja'ay pën ënäty najts'ëyowëjäämpyës.

¹⁶Paaty ka'ap ja Tios jä'ä twin'ixy ja ja'ay mëti'ipë oy tii tyuuntëpën, yë'ë wyinwijtsyp mëti'ipë kë'ëm pya'ëyoopyën.

¹⁷Jëtu'un ja Tios ja y'aaw y'ayuk y'ënä'äny ko yajnëmaay ja Egiptë yajkutujkpë: Paaty mijts yajkutujkpë të npëjktä'äky ets mijtskyëjxm ja nmëk'ajtënës nyikëxë'ëkëty ets ja ja'ay nijawëtëty oymyaa naaxwiinyëtëty koos nmëjjëty njaantyëty.

¹⁸Tios pya'ëyoopy yë ja'ay mëti'ipë pya'ëyoowäämpyën ets yajju'unëp ja ja'ay ja y'aaw jyot mëti'ipë ënäty jëtu'un tyuknipëjktakëpën.

¹⁹E jam ma miitsëtyën wä'än jëtää jam pën y'ëna'anëty: Pën jëtu'un, ¿tiixë ko ja Tios ja ja'ay tpoky'ixy? ¿Pën jëtää mëpaat t'ëk'ëtuky mëti'ipë ja Tios të tuknipëjktaakën?

²⁰Mijts naaxwiinyëtë ja'ay ¿tiikutujkën mëët'ajtyp ets ja Tios xyajtëwëty tii tyuunpyën oy ka'oy? ¿Wä'än jëtää ja tu'ts nëëmëty ja mëti'ipë yajkojëpën tiijës ko jëtu'un të xyajkojyë?

²¹Ja tu'ts pojtspë myëët'ajtyp ja kutujkën ets ja mo'onts tpotsëty wi'ix tuknipëjktaakën, nän yë'ë mo'onts yajtunëp ets tu'uk ja tu'ts tpotsëty mëti'ipë ka'ap oy najëna'a tyunëtyën ets mëti'ipë xëmë tunëpën.

²²Tios jyamëët'ajtyp ja kutujkën ets jeexyë ja naaxwiinyëtë ja'ay tukumëtoy ja pyoky, je'eyëp ko yë'ë mëk tmëmä'kxtuky ja ja'ay mëti'ipë japaat'ajtëtëp ja ëyo'on.

²³Näy jä'ä ko ënäty tyajnikëxë'ëka'any ja myëj'ajt jyääntyajtën ma ja mëti'ipë pya'ëyoopyën, mëti'ipë tyuknipëjktakëpën ets mëët y'itëty ma ja myëj'ajt y'oyajtënën.

²⁴Jëtu'un, ëëtsajtëm Tios të xywoowtso'owëmë, tam mëti'ipë jutiis ja'ayën ets tam ka'apë jyutiisëty.

²⁵Ijxtëm ja Oseas y'ënänyën: Mëti'ipë ijty ka'ap nja'ayëtyën, yë'ëjës nja'ay'atäämpy. Pën ijty nkatsojkpyës, ëna'anëpës koos yë'ë ntsoky.

²⁶Ets näjyëtu'un, ma yajnëmaaytyën: ka'ap miits nja'ay'atë, jä'ä nëjkx yajmëkajpxtë Tios juukpyë m'u'unk'ajtëtëp.

²⁷Mëëtpë ja jutiis ja'ayëty, jëtu'un ja Isaías y'ënäny: Oy ja jutiis ja'ay jyamay'atë ja y'u'unk y'okëty, ijxtëm ja jinën mëti'ipë mejypyë'aayën, niwäänë nëjkx tpaatë ja nitsokën,

²⁸jä'ä ko tsojk ja Tios tpatuna'any ja y'ayuk yaa naaxwiiny.

²⁹Ijxtëm ja Jeséas ënäty të y'ënä'änyën: Ko jeexyë ja Wintsën mëti'ipë maaytyääyëpën winë të tkayajwë'ëmy ja u'unk ok, jëtu'un jeexyë tyam nyajpatëmë ijxtëm ja Sodomë kajpn ets Gomorra kajpnën.

³⁰¿Wi'ix na'ëna'anmëty? Mëët ko të myëpëktë ja ja'ayëty mëti'ipë ka'ap jyutiis'atën, tëë ja Tios yajpokywya'atsëtë mëti'ipë ënäty ka'ap t'ixta'atën ja oypyë ja nipaye'eyënë.

³¹E ja jutiis ja'ayëty mëti'ipë yë'ë kyajpxkopk'ajtëpën ja ënä'ämën ko yë'ë nyipaye'ey mëtëy, ka'ap të tpaatë ja nipaye'eyënë.

³²¿E tii ko ka'ap? Jä'äkyëjxm ko ka'ap ja mëpëjkën tyajtuuntë, yi'iyë yajmëjnajxtë ma winë tii oy tjatunantën. Paaty ojts kyunäpëtë ma ja tsaajën mëti'ipë yajkunäjpëpën.

³³Jëtu'un ijxtëm ja Tios ja y'aaw y'ayuk kyëxja'ayëtyën: Ja'aykyukëtë, npëjktäkpypës jam Jerusalén tu'uk ja tsaa, tu'uk ja tsaa mëti'ipë ja'ay yajkëtawëpën ko jam kyunäpëty. Pën yë'ë tyuk'ijxpejtyp, ka'ap tsyëtyu'unpaata'any.