Read Biblia Mixe de Quetzaltepec 1 Corintios 11 Bible Online

1 Corintios 11 - Biblia Mixe de Quetzaltepec bible

1 Corintios 11

¹Mëti'ipës të nnajtstunën, yë'ë miits tuntë; ijxtëm ëjtsën yë'ëjës ntuunpy mëti'ipë ja Kristë të tnajtstunën.

²Ntukxoontäkpyës miits mëku'uktëjkëty, ko xyjyä'ämyätstës ets ko xypyatuntë ja ijxpëjkën mëti'ipë të ntuk'ëwaanëtën.

³E ntukja'amyätsantëp näjyëtu'un ko yë Kristë yë'ë nyikëpajk'ajtyp yë ja'ay tu'uktu'uk; ets ye'etyëjk yë'ë nyikëpajk'ajtyp yë tyo'oxytyëjk, jëtu'un ijxtëm ja Tios nikëpajk'atyën ja Kristë.

⁴Ko ja ja'ayëty kujupxë ëkë kupe'eny ja Tios tja'amyetsy ëkë ko ënäty tkajpxwä'kxy ja Tios ja y'aaw y'ayuk, ja Kristë ënäty kyawintsë'këp mëti'ipë këpajk'ajtpën.

⁵Ets pën ka'ap yë to'oxytyëjk nyäkyupe'enyë ko ja Tios tja'amyetsy ëkë ko ja Tios ja y'aaw y'ayuk tkajpxwa'kxë, ja nyiye'etyëjk ënäty kyawintsë'këp mëti'ipë kyëpajk'ajtypyën, jëtu'un tpaaty ijxtëm jeexyë të nyäkyukä'ptu'utyën.

⁶Pën ka'ap ja to'oxytyëjk nyäkyupe'enyë, nikë oy ko jeexyë tyimnäkyukeepyë. Ets pën tsëtyuump ko nyäkyukeepyë, wä'än näkyupe'enyë.

⁷Ye'eytyëjk ka'ap mëpaat nyäkyupe'enyë, jä'ä ko yë'ë ja Tios myëj'ajtën jyääntyajtën yajwinkëxë'këp ets ko nän yë'ë Tios yajmëjnajxyp. Ja to'oxytyëjk yë'ë ye'etyëjk myëj'ajtën jyääntyajtën yajwinkëxë'këp.

⁸Ko ja Tios ojts tyajkojy ja ye'etyëjk ets to'oxytyëjk, ka'ap ojts jap ja ye'etyëjk tsyoony ma ja to'oxytyëjk ja kyätsy pyajkën, ja to'oxytyëjk jap ojts tsyoony ma ye'etyëjk yë kyätsy pyajkën.

⁹Ja ye'etyëjk ka'ap ojts yë'ëjëty yajtukni'oytyunë ko jyää'aty ja to'oxytyëjk, ja to'oxytyëjk ojts yajtukni'oytyunë ko jyää'aty ja ye'etyëjk.

¹⁰Mëët ko jyëtu'unëty ets ko jyää'atë yë anklëstëjkëty, yë to'oxytyëjk myëët'atëp yë kyumots ëkë kyupä'än mëti'ipë yajnikëxë'ëkëpën ko ja kutujkën tmëët'aty.

¹¹Oy jyajëtu'unëty, ma ja mëpëjkën, näjyëtu'un ja to'oxytyëjk tëyajtën tmëëtëty ijxtëm ja ye'etyëjkën.

¹²Tëy ko ja to'oxytyëjk ojts tsyoony ma ja ye'etyëjkën, ets tëy näjyëtu'un ko ja to'oxytyëjk yajmiimpy yajke'exyp ja pi'k ëna'k, je'eyëp ko Tios aakyë'ë nyikopk'ajtääpy winë.

¹³Miits kë'ëm ëk'ixtë pën oy ko ja to'oxytyëjk ka'ap nyäkyupa'anëtëty ko ja Tios t'ëwtatëty.

¹⁴Yë'ë ëëts ja naaxwiinyëtë ja'ay ja y'ënä'ämën nmëët'ajtëmë, tsëtyu'un yë'ë ko ja ye'etyëjk wyääy tyajyony.

¹⁵Ka'ap tsyëtyu'unëty ma ja to'oxytyëjkën, tyukmëjnajxyp jä'ä ko wyääy tyajyony, jä'ä ko tëë yë wyääy yajmo'oy yony ets ja kyëpajk nyitukëty.

¹⁶Pën jamts pën tii tjaakkajpxa'any, wä'än tnijawë ko ëëtsëty ets mëpëjkpëjkpëtëjk ka'ap tii wiinkpë winma'any yajmëëtëty.

¹⁷Mëti'ipë miits tyam ntuknija'ayëtëpën, ka'ap yë'ëty ets oy nimëtya'aka'antë. Ko mye'eymyuktë wäänë o'ktëy mjatë.

¹⁸Mëtu'kpëky ëjts të nyajtukmëmëtyä'äky ko miits mye'eymyuktë, ma ja Tios xywyintsë'ëkëja'antën, këëkjä'ä xyajtu'uye'eytyë ja mtuunkëty; e ëjts nmëpëjkpyës.

¹⁹Jëtu'un tyimjataanpë ets miits mnäpyëjkwa'kxëtëty ets yajnijawëty pën oy myëtuuntëp ja Tios.

²⁰Ko mye'eymyuktë ets xy'atuunaxtë ja Wintsën ja y'a'ux, ka'ap jëtu'un xytyuntë ijxtëm ja Wintsën ojts tni'ënä'ämën.

²¹Ko mkaya'antë, jënaakën jëwyiin jëyëjp kyääykyojtë, tyam jatu'kpëky ayuu y'ijtpë, jënaakën myuktëkooyënëtë.

²²¿Këtii jëtää miits jam mjëën mtëjkëty ets jam mkaytyëty m'uuktëtyë? ¿Këtii jëtää miits xyajtsëtyuntë ja Tios ja myëpëjkpë mëti'ipë ka'ap tii tmëët'atë? ¿Wi'ixës n'ëna'anëty? Ka'ap tjëkyepy miits ntukxoonta'aktëty ko jëtu'un m'ëtë'ëtstë.

²³Näy Wintsënës yë ijxpëjkën të xymyo'oy mëti'ipë miits të nmo'otën. Jä'ä koots ma ja Wintsën ënäty yajkë'ëyaka'anyën, jää tkoonë'ky tu'uk ja tsajpkääky.

²⁴Ets ojts ja Tios tkukajpxë, ënät ojts tujkwä'kxy ets y'ënäny: Ëjts ya'atë nxixy, mëti'ipë o'kpën ets miits xytyuk'oy'attëty. Mtuntëp ya'atë etsës xyjyä'ämyätstëty.

²⁵Ko ënäty të y'a'ux'ajta'atë, ënät ojts tkoonë'ëky ja a'ukën ets y'ënäny: Yë'ë ya'atë jempyë ja käjpxytyu'unën koos ja ne'pny tyunëty xyä'kxëty. Ko miits tëkok tëkok xy'uuktëty, jëtu'un xyjyaamyätstëtyës.

²⁶Koonëm ja Wintsën myinëty, miitsëty yë'ë ënäty mnikajpxtëp ko koo xykyäytyëty ya'atë tsajpkääky ets ko xy'uuktëty ya'atë tsatym nyëë.

²⁷Jëtu'un, ko pën tkayëty t'uukëty ya'atë tsajpkääky ëkë ya'atë uuky ets ka'ap twinkutsë'ëkë, yë'ë ënäty ja Wintsën ja nyi'kx kyopk myëtëkoopy.

²⁸Paaty, jëyëjp xy'ixtëty xytyuntëty ja mjuukyajtënëty wi'ix myajpaatën naamka'anëm ënäty xykyäytyë xy'uuktë ya'atë a'ux.

²⁹E ko nëkoo ajotkumonë pën tkayëty t'uukëty ya'atë a'ux ets ka'ap tnijawë ko yë'ë ja Wintsën ja nyi'kx kyopk kyääpy y'ukpy, yë'ë ënäty ja y'ëyo'on kyääpy jyi'kxyp.

³⁰Paaty miits ja mmëku'uktëjkëty jënaakën pya'ampätë ets myontë tyuktë ets tää mëti'ipë të y'ooktën.

³¹Kooxyëp jeexyë kë'ëm näyaj'o'oyëmë, ka'ap ja Tios jeexyë xytyiytyu'unëmë.

³²Ko ja Tios xytyiytyu'unëmë, oy yë'ë, ets nja'akyujkëmëty këtiipë npatmëty ja tëytyu'unën mëët ja ja'ayëty mëti'ipë yajtuuntëpën ja naaxwiinyëtë winma'any.

³³Jëtu'un mëku'uktëjkëty, ko mkaya'an m'uuka'antëty, näy'ëwxitëtë nixim niyam.

³⁴Ets pën jap pën yuu'ookyë, wä'än tkay jam ma tyëjkën ets ja Tios ka'ap tsyäätyunëtëty ko ënäty kya'ëwxity ma ye'eymyuktën. Jäänëmës wiinkëtypë ja jotmay nyaj'oyëty ko ënäty jam nëjkx nku'ixëtë.