Read Biblia Mixe de Quetzaltepec 1 Corintios 3 Bible Online

1 Corintios 3 - Biblia Mixe de Quetzaltepec bible

1 Corintios 3

¹Mëku'uktëjkëty, ko ojts miits nyaj'ijxpëktë, ka'ap ojts jëtu'un nmëmëtya'aktë ijxtëm ja ja'ayën mëti'ipë ja Kënu'kxymyëkajtën tu'unwinwoowëpën, jëtu'un miits nyaj'ijxpëjktë ijxtëm ja ja'ayën mëti'ipë yajtuumpyën ja naaxwiinyëtë winma'any ëkë ijxtëm tu'uk ja mëxu'unkën ka'apë tii tja'akyukën ma ja Kristë.

²Ka'ap ojts miits tsip nyaj'ijxpëktë. Jëtu'un nyaj'ixpëjktë ijxtëm tu'uk ja mëxu'unk yajmo'oyën ja tsyi'tsk ko ka'ap tjaty tkayëty ja kääky uuky, jä'ä ko ka'ap miits ënäty xyjyatë wi'ix xyjyä'äkyukëtëty mëti'ipëty tsipën. Tyampaat ka'ap xyjyatë,

³jä'ä ko miitsëty ëmuumnëm xymyëët'atë ja naaxwiinyëtë winma'any. Ko tii mkanätyukmë'ixëtë, ko mtsiptuntë ets ko mnäy'ëxëëk'ixëtë nixim niyam, mmëët'ajtëpnëm ja naaxwiinyëtë winma'any ëmuumnëm ets jëtu'un mtu'uye'eytyë ijxtëm ja ja'ay tyu'uye'eytyën mëti'ipë ja naaxwiinyëtë winma'any yajtuuntëpën.

⁴Jä'ä ko miits m'ëna'antë: Pablo yë jyä'ä npanëjkxëpës; ets ja wiinkëtypë y'ëna'antë: Apolo jyä'ä npanëjkxëpës. Jëtu'un yajja'akyukë ko miitsëty ëmuumnëm xymyëët'atë ja naaxwiinyëtë winma'any.

⁵¿Pën xyëëwajtyp Apolo ets pën Pablo? Tios ëëts yi'iyë nmëtuuntëp mëti'ipë miits të xymyëpëktën. Këëkjä'ä ëëts ja ntuunk ntuntë mëti'ipës ja Wintsën të xytyuknipëktën ets ntuntëtyës.

⁶Ëjts ojts ni'ipy nkojy ets Apolo të tyajxooky, e yë Tios yë'ë të tyajyony të tyajjiitsy.

⁷Mëti'ipë niptëpën ets mëti'ipë yaj'ujtsxo'ktëpën, ka'ap yë'ëty nätyu'uk myëta'aktë; Tios tu'uk tyuuntääpy winë, yë'ë yajyoomp ja aay ujts.

⁸Pën kojtëp niptëp ets yaj'ujtsxo'ktëp, tu'knax yë'ëjëty, oy nëjkx këëkjä'ä yajmëjuytyë ja tyuunkëty.

⁹Tu'ukyë ëëts ja Tios ja tyuunk ntuunëtë ets jëtu'un miitsëty ijxtëm ja kamën ma ja Tios ja tyuunk tyu'uye'eyën, jëtu'un miitsëty ijxtëm tu'uk ja mëj tëjkën mëti'ipë Tios të tkojyën.

¹⁰Ëjts jëtu'unës të ntuny ijxtëm tu'uk yë pojtspën, maas ja Tios të xypyëjktä'äkyën ets ja potsy ëjx nyajtso'onta'akëtyës ets ja wiinkpë të myintë mëti'ipë të tjëjpëtën. Je'eyëp ko nitu'ukjaty mëk ja tyuunk tkëwent'atë.

¹¹Ni pën mëpaat wiinkpë potsy tkapëjktä'äky ijxtëm ya'atë potsy të tsyo'ontä'äkyën. Jesukristë yajtijp potsy.

¹²Pën jää pën ja potsy yë'ë tukjëjpëja'any ja pu'ts pujxn, ja poop pujxn, tsujëtypë tsaa, kepy, mëëy ëkë waxk aay, ma ya'atë tuunk të tsyo'ontä'äkyën,

¹³jäänëm nëjkx yaj'ixy yajnijawë ko ja näpyaye'eyë tyunëtëty pën wi'ixjaty ënäty pën të tyuny, jä'ä ko jëën jää nëjkx tyuny ets tyajnikëxë'ëka'any wi'ixjaty ënäty pën të tyunyën.

¹⁴Pën ënäty të tkojyën ja tëjk ta'tspëky, mëti'ipë ka'ap ja jëën myäyëtëty, yë'ë nëjkx yajkumay;

¹⁵e pën ënäty ja tëjk të tkojy mëti'ipë tooytyëkoopyën, yë'ë nëjkx winë tyajtëkooytyä'äy, oy ënäty kë'ëm jyanäyatso'okyë ijxtëm ja ja'ay ja jëën tkuke'ekyën.

¹⁶¿Këtii xynyijawëtë ko miitsëty, jëtu'un yë Tios myajnaxëtë ijxtëm tu'uk yë tsajptëjkënë ets ko ja Kënu'kxymyëkajtën yë'ë jap tsënääpy ma miitsëtyënë?

¹⁷Pën yajkwintëkoopy ja Tios ja tsyajptëjk, yajwintëkoopy näjyëtu'un ja Tios; jä'ä ko wa'ats ja Tios ja tsyajptëjk ets miitsëty Tios mtsajp tëjk'ajtëtëp.

¹⁸Ni pën kë'ëm kyanäwyin'ëënëtëty: pën jää pën nyätyijyë wijy kejy ijxtëm ja naaxwiinyëtë ja'ay ja wyinma'anyëtyën, jëtu'un miits näpyëjkta'akëtë ijxtëm ja ja'ay ni'ik tsuupën mëti'ipë ka'ap tii tjaty nijawën, ënät miits myaj'ixtëty wijy kejy mëti'ipë ka'ap kyixy nyäxyën.

¹⁹Yë naaxwiinyëtë ixpëkyajtën tsuuwinma'any yë Tios tyajnaxy, jëtu'un ja Tios ja y'aaw y'ayuk kyëxja'ayëty: Näy yë'ë kyë'ëm wijyajtën nëjkx ja ixpëkyjyä'äy Tios tyu'u'ëtukëtë ijxtëm tu'uk ja jëyujk yajtu'u'ëtukyën, jä'äkyëjxm ko tkanijawëtë ko ja y'o'kën t'anëjkxëtë.

²⁰Ets näjyëtu'un y'ënä'äny: Nyija'awëp ja Tios ko tsuuwinma'any yë naaxwiinyëtë ja'ay wyijy'ajtën.

²¹Paaty ka'ap miits tii mnätyukyajmëjnaxëtëty, jä'ä ko aak miits yë'ë mjä'äjëty;

²²yë Pablo, yë Apolo, yë Cefas, yë o'kën, yë xëëw po'o, yë miinpë wiinkoonpë, aak miits yë mjä'äjëty,

²³yë Kristë miits mjä'ä'ajtëtëp, ets Kristë, Tios jä'ä'ajtëp.