Read Biblia Mixe de Quetzaltepec 1 Corintios 6 Bible Online

1 Corintios 6 - Biblia Mixe de Quetzaltepec bible

1 Corintios 6

¹Ko miits jënaakën tiitsip xymyëët'atëty mëët ja mmëku'ukëty, ¿tii ko mnëjkxtëty jam ë'ënpë ma ja yajkutujkpën ka'apë myëpëktën, jëtu'un ijxtëm jeexyë jam m'ëëntën ma ja mëti'ipë mëpëjktëpën?

²¿Ka'ap xynyijawëtë ko ja mëpëjkpëtëjk pyaye'eytyëp näjyëtu'un ja naaxwiinyëtë ja'ayë? e pën miitsëty mnija'awëtyëp ko xypyaye'eya'antë ja naaxwiinyëtë ja'ay, ¿wi'ix ko ënät mkamayëtëty ja jotmay wäänëpë?

³¿ka'ap xynyijawëtë ko tsajpjotmëtë kukäjpxy paat npaye'eya'anëmë? Pën jëtu'un, ¿këtii jëtää ni'ik mpaatëtë xypyaye'eytyëty ja jotmay yaapë naaxwiinyënë?

⁴Pën tiijotmay mmëët'ajtëp, ¿tii ko xytyukpaye'eya'antë ja ja'ay mëti'ipë ka'ap pyaat'atyën pyaye'eyëty ma ja mëpëjkpëtëjkën? Jä'ä miits mtukninëjkxtëp ja jotmay mëti'ipë ka'ap ja Tios tmëpëktën.

⁵Paaty jëtu'un n'ënëëmëtë ets xytsyëtyu'unjawëtëty ko jëtu'un m'ëtë'ëtstë, ¿wä'än jëtää ka'ap jam pën paye'epyë ma ja mëpëjkpëtëjkëtyënë?

⁶Yë mëpëjkpëtëjkëty ka'ap jye'eyëty tsyiptuntë, näjyëtu'un ënätyë nyëjkxkojtë ma ja paye'epyën mëti'ipë ka'ap myëpëkyën.

⁷Ko mtsiptuntë aak miitsëty, ka'ap jëtu'un y'oyëty. ¿Tii ko xykyamëmëta'aktë ko pën mkapaye'eyëtë ets tii ko xykyana'ixtë ets myajmäätstëty?

⁸E miits aak jëëmpit tii xytyuntë, ka'ap myëtëyëty tii xytyuntë, mä'tspë mnäpyëjkta'akëtë ma ja mëpëjkpëtëjkëtyën.

⁹¿Ka'ap xynyijawëtë ko yë ëxëëkja'aytyëjk ka'ap jyuuky'ata'antë ma ja Tios ja kyutujktaknënë?

¹⁰Këtii myajwin'ëëntëty, jä'ä ko jam ma ja Tios ja kyutujktaknën ka'ap yajpaata'antë mëti'ipë jyot nyini'kx yajktëpën, mëti'ipë tsaatsetsy, kepy tsyetsy y'ëwtajtypyën, mëti'ipë ka'ap yë nyiye'etyëjk ëkë tyo'oxytyëjk twintsë'ëkën, ëkë mëti'ipë ato'oxyën, ëkë mëti'ipë myëye'etyëjk pyijkpyën y'ukpyën.

¹¹Ets jëtu'un ijty jam pënëty ma miitsëtyën jënaakën mja'ay'atë; je'eyëp ko tyam, tëë ja Tios myajwa'atsëtë, tëë mnätyukë'ëtëkëtë ja Tios. Oy të mwë'ëmtë mëët ja Tios ets mëët ja Wintsën Jesukristë.

¹²Jëtu'un ja aaw ayuk y'ënä'äny: Ëjts najtspëkës n'ity, oyës tii ntuna'anëty ëxëëk. Oy jyajëtu'unëty, ka'ap oytyiijëty ntuk'oy'ajtmëty. Näyjyëtu'un ja aaw ayuk y'ënä'äny: Najtspëkës n'ity ets ntunëtyës pën tiijës ntunäämpy. Oy jyajëtu'unëty, ka'ap mëpaat tii nätyukmëmëtä'äkyës.

¹³Näyjyëtu'un yajnimëtyä'äky: Ko ja uuky, jot tsooy je'eyë wyä'äny; ets jot yë'ë uuky të yajtuknikojë. Oy jyajëtu'unëty, Tios yajwintëkoyäämpy yë jot ets uuky. E ka'ap tyiyëty ko yë ni'kx kopk paat'ajtëp yajtook yajyakëty; yë ni'kx kopk Wintsën yë'ë jyä'ä; ets Wintsën ni'kx kopk jä'ä'ajtëp.

¹⁴Jëtu'un ijxtëm ja Tios të tyajjuukpyikyën ja Wintsën, näjyëtu'un xyajjuukpyëka'anëm mëët ja myëk'ajtën.

¹⁵¿Ka'ap xynyijawëtë ko yë mni'kx mkopkëty jëtu'un yë'ë ijxtëm kanaakjëjpën winë, ets tu'ukyë yajpaaty mëët ja Kristë? ¿Mëpaat jëtää ëjts njëpëky tu'kpëky mëti'ipë ijtpën tu'ukyë mëët ja Kristë etsës ntuknini'kx'atëty ja ku'into'oxyë? Niwi'ix'äämpy.

¹⁶¿Ka'ap miits xynyijawëtë ko tu'uk ja ye'etyëjk nyämyukyë mëët ja ku'into'oxy, tu'ukyë nyämyukyë? Jëtu'un ja Tios ja y'aaw y'ayuk y'ënä'äny: Ja ja'ay nimäjtskpë, jëtu'un jä'ä wyimpity ijxtëm ja ja'ay tu'ukpën.

¹⁷E ko ja ja'ay nyämyukyë mëët ja Wintsën, nän tu'ukyë wyimpity mëët yë'ë.

¹⁸Ka'ap yë tu'u xymyo'otëty ja in'ajtën. Ko pën ja wiinkëtypë poky tuny, ka'ap ja ni'kx kopk tmëtëkoy, ets pën ëtëtsnajxpën, pokytyuunp jä'ä ma ja kyë'ëm ni'kx kyë'ëmkopkën.

¹⁹¿Ka'ap miits xynyijawëtë ko ja Tios mni'kx mkopk myajwa'anxëtë tä ja mëjtsajptëjkën ets ko mtsënaaytyakn'atëtë ja Kënu'kxymyëkajtën mëti'ipë ja Tios të mmo'ojëtënë?

²⁰Jä'ä ko tëë ja Tios mkujuyëtë ko ja y'u'unk të mku'ookëtë, mmëjjaw jaantyjyawëtë ja Tios mëët ja mni'kx mkopkëty.