Read Biblia Mixe de Quetzaltepec 2 Corintios 13 Bible Online

2 Corintios 13 - Biblia Mixe de Quetzaltepec bible

2 Corintios 13

¹Mëtëkëëk'ok tyam miits nëjkx nku'ixëja'antë. Jää nëjkx winë tyiytyëkë mëët nimäjtsk nitëkëëkën mëti'ipë y'ixtëp nyijawëtëpën winë.

²Mëti'ipë tëë pyokytyuntën ets ni'ëmukë, tyam maas jëkäm nyajpaatyën jatëkok ntuk'ëwaanëtë, ijxtëm ojts n'ëktuk'ëwa'anëtëpën koos jam n'ojtsy mëmäjtsk'ok. Pën nëjkxpës jatëkok, ka'ap n'ëkpa'ëyowanëtë,

³jä'ä ko miitsëty yë'ë m'ixtaaytyëp pën ja Kristë oy xynyikäjpxy xynyimëtyä'äkyës. E yë Kristë ka'ap jyëtu'unëty ijxtëm tu'uk ja ja'ayën mëti'ipë ka'ap tii tmëëtëtyën ja mëk'ajtën, yaj'ijxëp ja myëk'ajtën ma miitsëtyën.

⁴Tëy ko jëtu'un ojts kyëruutspety ijxtëm jeexyë tkamëët'atyën ja mëk'ajtën, je'eyëp ko juuky'ajtp ja tyam mëët ja Tios Teety ja myëk'ajtën. Näyjyëtu'un ëëtsëty yë Kristë nmë'ëyoowpättës, je'eyëp ko Tios xymyëk'ajtënmooytyëpës ets njuuky'attës mëët ja Kristë ets miits nputëkëtëty.

⁵Nämyëmay nämyëtajëtë miits kë'ëm ets xy'ixtëty xynyijawëtëty pën mjantymyëpëjktëp ja Jesukristë. Näwyinma'any'ixëtë miits kë'ëm. ¿Këtii xynyijawëtë ko ja Jesukristë yajpaaty mëët miitsëtyë? ¿Ëkë nëkoo miits mnanyikajpxëtë ko Kristë xymyëpëktë?

⁶Njëjp'ijxtëpës ets miits xynyijawëtë ko ëëtsëty tëëjës ja ëxëëkpë ntuknaxtë.

⁷Nmëpëjktsoowtëpës ja Tios ets ka'ap ja ëxëëkpë xytyuntëty; ka'ap yë'ëkyëjxmëty ko ëëts ja ëxëëkpë të ntuknaxtë; yë'ëkyëjxm ko miitsëty maayëtëp tii oy winë xytyuntëty, oy jëtu'un yaj'ixy ka'apës yowë ja ëxëëkpë të ntuknaxtë.

⁸Jä'ä ko ka'ap tjëkyepy ni'ojëmëty ja tëyajtën, yi'iyë xypyatëm ets oy nimëtyakmëty.

⁹Paaty jotkujk näjya'awëm ko ëmaay paki'ix nyajpatëmë ets miits mëk myajpaatëty; xëmës ja Tios n'amëtowa'any mpëjktsowa'antë ets wa'ats m'awinpitëty.

¹⁰Jëtu'unts miits tyam nnijäyëtë naamka'anëmës nnëjkxy ma miitsëtyën ets këtiipë nëkoo mëk xyjyawëtëty ja kutujkën mëti'ipës ja Wintsën të xymye'eyën. Ka'ap yë'ëjëty ets nyajkutëkoytyëty; yë'ë ets miits mwinpätëty mëpëjkënkyëjxm.

¹¹Tyamës nkajpxwë'ëmy mëku'uktëjkëty, ntukmëtsojktëp ets akujk jotkujk mjuuky'atëty. Yë'ë ixta'atë mëti'ipë wa'atsën. Patuntë mëti'ipë ojts ntuknijayëtën ets itë tu'ukyë mëët ja jotkujk'ajtën. Pën mtuuntëp jëtu'un, m'itantëp mëët ja Tios mëti'ipë ja oyjyot oywyinma'any yäjkpyën tëy tëtä'äky.

¹²Neykajpxpo'kxëtë nixim niyam wa'ats aaw wa'ats jot mëët ja nitsokën.

¹³Ni'ëmukë ja Tios ja jyä'äy mtuknikäxëtë ja kajpxpo'kxën.

¹⁴Ja myëj'ajt y'oyajtën ja nwintsën'ajtëm Jesukristë, ja Tios ja tsyojkën jya'awën ets ja Kënu'kxypyë ja Mëk'ajtën wä'än tyajpaaty ma miitsëtyën ni'ëmukë.