Read Biblia Mixe de Quetzaltepec 2 Corintios 3 Bible Online

2 Corintios 3 - Biblia Mixe de Quetzaltepec bible

2 Corintios 3

¹Koos jëtu'un n'ëna'antë, ¿wä'än jëtää miits xyjyawëtë koos kë'ëm nämyëjpëjkta'akëtë jatëkokë? ¿Ëkë atsip ënät ja nnoky tsyä'äy myajtuk'ixtëty, ëkë myaj'amëtowtëty ijxtëm jënaakën y'ëtë'ëtstënë?

²Miits jëtu'un mnajxtëp ijxtëm ja noky tsyä'äyën mëti'ipës nyajmëyajtëpën: këxja'aypyë y'ityën ma ja jot winma'anyën, mëti'ipë ni'ëmukë y'ixy'ajtëpën ets jyëkyejpy tkajpxtëty.

³Wa'ats yaj'ixy ko jëtu'un miitsëty ijxtëm ja noky tsyä'äyën mëti'ipë ja Kristë kë'ëm të tja'ayën ets ëëts të nyaktë, ka'ap oy nyatiijëty të yajtukja'ay, yë'ë të yajtukja'ay yë Juukpyë Tios yë Jya'awën; ja noky mëti'ipë ka'ap tsaakëjxy kyëxpajyëtyën, mëti'ipë të yajja'ayën ma naaxwiinyëtë ja'ay ja jyot wyinma'anyëtyën.

⁴Jä'ä ko Tios yajtuk'ijxpety mëët ja Kristë ja xyëëw, paaty ëëts nijawëtë.

⁵Ka'ap kyë'ëmëty të ni''ijxpëjkëmë ets n'ëna'anmëty ko tii nmëët'ajtëmë, Tios yajktääpy tu'kë'ëyë winë mëti'ipë ntu'unëm nkajpxëmën.

⁶Yë'ë të xyajwij të xyajkäjëm ets ja käjpxytyu'unën nkuuytyu'unmëty; ka'ap yë'ëjëty mëti'ipë Moisés yajmooyën, yë'ë mëti'ipë ja Kënu'kxymyëkajtën tyuunpyën. Yë ënä'ämën tëyajtën je'eyë nyi'ënä'ämë ets n'o'kmëty, e yë Kënu'kxymyëkajtën yäjkpy yë juukyajtën.

⁷Yë ënä'ämën jëwyiinpë, mëti'ipë ja o'kën tukpatpën, tsaakëjxypyë kyëxja'ayëtyën mëët ja të'kxën jajën, ojts nyikëxë'ëky ma ja Israel ja'ayëtyën ets ka'ap ja Israel ja'ay myääyëtë twintë'kxtëty; jä'ä ko tääpë ja ajajk atë'kxk mëti'ipë ënäty tëkoyaanpën mëk ënäty yaj'ixy tyi'kxy.

⁸¿Wi'ixpëm jëtää wäänëni'ik ja mëj'ajtën jaanty'ajtën tmëët'ata'any yë jempyë käjpxytyu'unën mëti'ipë Kënu'kxymyëkajtën jyä'ä'ajtypyën?

⁹Jä'ä yajwinjawë, pën ni'ik ja mëj'ajt jaanty'ajtën ojts tmëët'aty ja ënä'ämën mëti'ipë nyi'ënä'ämëpën ja o'kën, ¿wi'ixpëm? jëtää ni'ik ja mëj'ajtën jaanty'ajtën tmëët'ata'any ja aaw ayuk mëti'ipë nyikäjpxypën wi'ix ja Tios xyajtso'oka'anëmën.

¹⁰Ja mëj'ajtën jaanty'ajtën mëti'ipë të nyäxyën, ka'ap tmëpaaty mëti'ipë tyam wäänë mëj wäänë jaantyën.

¹¹Ets pën mëj jaanty y'ijty mëti'ipë ka'ap jeky y'ita'anyën. Ni'ik mëj jaanty nyaxa'any mëti'ipë xëmëkyëjxm itaanpën.

¹²Mëët yë'ë ko tääpë ja oyajtën n'a'ix njëjp'ijxëmë, paaty akujk jotkujk nikajpx nimëtyakëmë.

¹³Ka'apës jëtu'un n'ëtë'ëtstë ijxtëm ja Moisés ijty nyäwyinkuwitsëtyën ets ja Israel ja'ayëty ka'ap t'ixtëty ja ajajk atë'kxk mëti'ipë këxaanp naxaanpën.

¹⁴Je'eyëp ko yë'ëjëty ka'ap ojts tja'akyukëtë, tyampaat je'eyëm jëtu'un tyajtu'uye'eytyë. Ko tjakajpxtë ja tukpë ja ënä'ämën, jëtu'un nyäpyëjkta'akëtë je'eyëm yowë twinkuwitsë'atë ja wit, jä'ä ko ka'ap pën të tyukwinwijtstu'utëtë, jä'ä ko ënät jeexyë jyënäky ko jeexyë yë Kristë tmëpëktë.

¹⁵Tyampaat ko tjakajpxtë ja Moisés ja y'ënä'ämën, jëtu'un nyäpyëjkta'akëtë ijxtëm jeexyë tu'uk yë wit yajtukwinkujuuxëtën këtiipë tii tja'akyukëtëty.

¹⁶E ko ja ja'ay tmëpëky ja Jesukristë, jënajkp ja wyinkujuuxë.

¹⁷Jä'ä ko yë Wintsën yë'ë Kënu'kxymyëk'ajtën'ajtp; ma ja Kënu'kxymyëkajtën yajpaatyën tam'ajtp ja nitsokën.

¹⁸Paaty ëëtsajtëm, ni'ëmukë, ka'ap n'ëkwinkujuuxë'ajtënë, jëtu'un nyajpatëmë tä tu'uk yë ijxnën ma yaj'ixyën ja Wintsën ja myëj'ajt jyääntyajtën, ni'ikyë n'awinpijt'ëtëtsëmë ijxtëm ja Wintsën y'ixëtyën. Jä'ä ko winjëpom npatëm ja Wintsën ja myëj'ajt y'oyajtën, e paaty jyëtu'unëty jä'ä ko Wintsën tyuny mëët ja Kyënu'kxymyëk'ajtën.