Read Biblia Mixe de Quetzaltepec Gálatas 3 Bible Online

Gálatas 3 - Biblia Mixe de Quetzaltepec bible

Gálatas 3

¹Miits, Galacia ja'ayëty kutsuujëty. ¿Pën të mpatoy të mpanaxëtë? Tëëts yajxon ntuk'ijxpëktë miits mwintuuyëty ijxtëm ja Jesukristë ojts kyëruutspetyën.

²Yi'iyës ntsojkpy ets miits xy'ëtsoowinpitëty mëti'ipës nyajtëëwtëpën: ¿Ojts miits ja Kënu'kxymyëkajtën xy'ëxajëtë ko xypyatuntë ja Moisés ja y'ënä'ämën, ëkë ko xymyëpëjktë ja aaw ayuk mëti'ipë mmëtoow'ijtënë?

³¿Mtimtsyuu miitsëty, këtiijë? Tëë mëët ja Kënu'kxymyëk'ajtën xy'ëkyajtso'onta'aktë ja mmëpëjkënëty, ¿ets ënät tyam xyajkukëxëja'antë mëët ja mwinma'anyëtyë?

⁴¿Oywyi'ix miits xyajtëkoya'antë mëti'ipë të xykyu'ëyowëtënë? ¿Tii ko nëkoo të xykyu'ëyowëtë?, pën ka'ap xyajtsowpaata'antë.

⁵Ko ja Tios mmo'ojëtë ja Jyot jya'awën ets tyaj'ixyë ja myëj'ajtën ma miitsëtyën, ¿tii ko jëtu'un tuny? ka'ap yë'ëkyëjxmëty ko xypyatuntë ja Moisés ja y'ënä'ämën, yë'ëkyëjxm ko xymyëpëktë ja Tios ja y'aaw y'ayuk mëti'ipë tëë xymyëtoow'itën, ¿këtiijë?

⁶Näyjyëtu'un ja Abraham, ojts ja Tios tmëpëky, paaty ja Tios yajnajxë wa'ats.

⁷Jëtu'un xyjyä'äkyukëtëty ko yë'ë ja Abraham y'u'unk'ajtyp y'ok'ajtyp mëti'ipë jëtu'un mëpëjktëpën tä yë'ë ojts myëpëkyën.

⁸Ma ja Tios ja y'aaw y'ayuk këxja'ay myinyën, tap nimëtyä'äky ko mëpëjkënkyëjxm ja ja'ay oy wyi'imy mëët ja Tios mëti'ipë ka'ap jyutiisëty ets jëtu'un ja Abraham yajtuk'ëwa'anëy ja oy aaw oy ayuk ko ja Tios y'ënëmaayë: tu'kë'ëyë naaxwiinyëtë ja'ay kënu'kxy nëjkx wyë'ëmta'atë mëëtkyëjxm ko mijts të mmëpëky.

⁹Paaty, pën ja Tios myëpëjktëpën, kënu'kxanëtëp ja Tios mëët ja Abraham, mëti'ipë ojts näjyëtu'un myëpëkyën.

¹⁰Mëti'ipë yi'iyë tyuk'ijxpäjtëpën ja Moisés ja y'ënä'ämën, kajpxpoky ja yajpaatë, jä'ä ko jëtu'un ja Tios ja y'aaw y'ayuk y'ënä'äny mëti'ipë këxja'ay miinpën: Kajpxpoky ja ja'ay y'ity mëti'ipë ka'ap kä'pxy tpatunyën ja ënä'ämën mëti'ipë këxja'ay miinpën.

¹¹E jëtu'un, yajxon yajja'akyukë ko ka'ap pën wa'ats nyäxy ko ja ënä'ämën tpatuny, jä'ä ko jëtu'un ja Tios ja y'aaw y'ayuk y'ënä'äny mëti'ipë këxja'ay miinpën: Ja wa'ats ja'ay ja mëpëjkën mëët jyuuky'ata'any.

¹²Ja ënä'ämën ka'ap yë'ëjëty ja mëpëjkën mëët tyuny, jä'ä ko y'ënä'äny: Pën ja ënä'ämën pyatuumpy, yë'ë yajjuuky'atëtëp.

¹³Tëë ja Kristë xyajpëtsë'ëmëmë ma ijty kajpxpoky n'ijtëmën, jä'äkyëjxm ko ja Kristë ojts nyätyukjä'ätijyë ja kajpxpojkën mëti'ipë ënäty ëëts njä'ä'ajtëmën, jëtu'un këxja'ay myiny: Kajpxpoky tu'kë'ëyë winë y'ity mëti'ipë kepykyijxy këx'o'kpën.

¹⁴Paatykyëjxm jëtu'un tyuunë jyajtë ets ja Tios ja kyënu'kxën jya'atëty ma ja ja'ayëtyën ka'apë jyutiis'atën, mëti'ipë ja Tios tyukwinwa'anëyën ja Abraham, ets näjyëtu'un ja Kënu'kxymyëkajtën n'ëxajëmëty ni'ëmukë mëti'ipë ja Tios tëë twaantä'äkyën.

¹⁵Mëku'uktëjkëty, tyam miits ntuknijawëja'antë wi'ix ja ja'ay tii tmëtyä'äkyën. Ko tu'uk ja ja'ay tkäjpxy'äty tii ets tyajkojy tu'uk ja noky ets tsa'ay, ka'ap pën myäyëtëty tyajma'atëty ëkë tyajkojtëkatsëty.

¹⁶Näyjyëtu'un ënät, Tios ojts tukwinwanë ja Abraham mëët ja y'u'unk y'ok ja oypyë ja juukyajtën. Yë Tios yë y'aaw y'ayuk ka'ap ni'ëmukë ja'ay tijta'ay: U'unk ok, jä'ä y'ënäny mijts yë m'u'unk m'ok, ja Kristë yajtijp.

¹⁷Ya'atës jëtu'un ntijpy: Tios ojts tuny ja käjpxytyu'unën mëët ja Abraham ets ojts nikajpxë. Paatykyëjxm ja Moisés ja y'ënä'ämën mëti'ipë ojts myinyën kom taxk mëko'px ja i'px majk jëmëjt, ka'ap tjëkyepy tyëkoyëty ets nyatëkë'atëty mëti'ipë ja Tios wyaantakën.

¹⁸Ko jeexyë jam kyëxmëtä'äky ma ja Moisés ja y'ënä'ämën mëti'ipë ja Tios të xytyukwinwa'anëmën, ka'ap jeexyë y'ëkwaantakën'ajnë; e yë Tios ojts tukwinwanë yë Abraham jëtu'unyë namëyajtën ka'ap jyuyëty.

¹⁹¿E tii wya'anëty ja Moisés ja y'ënä'ämën? Mëti'ipë ok yajmooyën ets nyikëxë'ëkëty ja naaxwiinyëtë ja'ay ja pyokyëty, koonëm myinëty ja u'unk ok mëti'ipë ja Abraham ojts yajtukwinwanën. Kukäjpxy ojts yajtuknipëktë ets nikajpxtëty ja ënä'ämën ets ja Moisés je'eyë ojts tjaaynyäxy.

²⁰E ko ja Tios ja wyaantakën ojts tyajwë'ëmy mëët ja Abraham, kë'ëm twaantäky, ka'ap ojts pën ëpëky tkajpxnaxy.

²¹Ëkë, ¿jä'ä jëtää tijy ko Moisés ja y'ënä'ämën ko tmëtsip'aty ja Tios ja wyaantakënë? Niwi'ix'äämpy. Ko jeexyë ja Moisés ja y'ënä'ämën t'ëkyäky ja juukyajtën, jyëkyejpy jeexyë ja ja'ay oy wyi'im Tios wintum ko tpatuny ja Moisés ja y'ënä'ämën.

²²E ja Tios ja y'aaw y'ayuk jëtu'un y'ënä'äny ko ni'ëmukë ja ja'ay pokyjotm y'ijta'atë ets tpaatëty mëti'ipë ja Tios të twinwanën ko ja Jesukristë të tmëpëktë.

²³Ko ënäty ka'anëm ja Kristë myiny, jëtu'un ja ënä'ämën ijty xyaj'ijtëmë tsumpyë matsypyën, yaj'ëwxity ets ja mëpëjkën yajpaatëty.

²⁴Ja ënä'ämën jëtu'un ijty xykyëwent'ajtëmë ijxtëm tu'uk yë mëtuunpë tkëwent'atyën ja pi'k ëna'k; koonëm myiiny ja Kristë ets ojts mpatëmë ja ëwaatsë'ajtën.

²⁵E mëët ko tyam të nmëpëjkënë ja Kristë, ka'ap ja ënä'ämën xy'ëk'ijx'ijtënë,

²⁶Tios miits tyam ni'ëmukë m'u'unk'ajtënëtëp ko të xymyëpëktë ja Jesukristë,

²⁷jä'ä ko ni'ëmukë mëti'ipë të nyëëpätën mëët ja Kristë ja xyëëw, tëë ja Kristë ja jemywyit myo'ojëtë.

²⁸Ka'ap ma y'ëktuunnë pën jutiis kajutiis, mëtuunpë ëkë kamëtuunpë, ye'etyëjk ëkë to'oxytyëjk, jä'ä ko tu'ukyë miitsëty ijxtëm ja ja'ay tu'ukpën, jä'äkyëjxm ko tu'ukyë mëët ja Kristë Jesús m'itë.

²⁹Ets pën Kristë miits të xymyëpëktë, ja Abrahamën näjyëtu'un m'u'unk'ajt m'ok'ajtëtëp ets miits xyjyä'ä'atë ja kuma'ayën mëti'ipë ja Tios të tuknipëjktaakën.