Read Biblia Mixe de Quetzaltepec Efesios 2 Bible Online

Efesios 2 - Biblia Mixe de Quetzaltepec bible

Efesios 2

¹Miitsëty jëtu'un ijty m'itë ijxtëm ja o'kpën, jä'ä ko pokyjoty ijty myajpaatë.

²Yë'ë ijty mpatuuntëp ja naaxwiinyëtë ja'ay ja wyinma'any ets ja ku'oypyë mëti'ipë jëtijtpën pojjotm ets tjotmëkmo'oy ja ja'ay mëti'ipë ka'ap tmëmëtowtën ja Tios.

³Näyjyëtu'un ijty njuuky'ajtëm ni'ëmukë, yë'ë npatu'unëm ja nkë'ëm winma'any'ajtëm, ja poky ets ja ëxëëk atsojkën. Jëtu'un ijty n'ijtëm ijxtëm ja ja'ay oy pyënëtyën, paatykyëjxm ijty xypyaat'ajtëm ja Tios ja myëj tëytyu'unën.

⁴E mëët ko ja mëj Tios pya'ëyoy ets ko xytsyojkëm mëjwiin këjää,

⁵tëë xymyo'oyëmën ja juukyajtën ko mëët ja Kristë ma ënäty nyajpatëmën ooky ko ja nëë poky nmëët'ajtëmë. Tios ja myëyajtën të ttuny ets miits të xypyaatë ja nitsokën.

⁶Tëë ja Tios xyajjuukpyëjkëm tu'ukyë mëët ja Kristë Jesús ets yë'ë mëët të xyajnaaxwä'tsëmë jam tsajpjotm.

⁷Paaty ja Tios jëtu'un tuny ets yaj'ix yajnijawëty ja xëëw tiempë mëti'ipë miimp wiinkoonpën, ko ni'ik xytsyojkëm ets mëj ja y'oyjyot y'oywyinma'any mëti'ipë të xytyuk'ijxëmën mëët ja Kristë Jesús.

⁸Tios të tuny ja mëyajtën ets të myajnitso'okëtë ko të mëpëktë. Ka'ap yë'ëkyëjxmëty ko miits oy tii të xytyuntë, Tios të tuny ja mëyajtën.

⁹Ka'ap yë'ëkyëjxmëty ko tii ntu'unëmë, këtiipë pën tii nyätyukmëjjawëtëty.

¹⁰Tios të xypyëjktakëm ets ntu'unmëty ja oypyë tuunk tu'ukyë mëët ja Jesukristë, ijxtëm të tuknipëjktaakën.

¹¹Jëtu'un miitsëty, mëti'ipë ka'ap jyutiis'atën, ka'apë tsyuky'atën ets mëti'ipë nätyijëtëp ko tsyuky'atë, mëti'ipë tëë yajnatsujk'ëwtitën ja ye'etyëjk'ajtënëty,

¹²ja'amyätstë ko jëwyiinyëp ka'ap ijty mëët ja Kristë m'itë, winjëkämjaty ijty myajpaatë ma ja Israel ja'ayëtyën, ets mëjëkäm'ajtëp ja Tios ja wyaantakën. Jëtu'un ijty miits yaa naaxwiiny mjuuky'atë, ka'ap ja Tios xynyijawëtë ets nitii xykyajëjp'ixtë.

¹³E tyam, miitsëty mëti'ipë ijty ijtëpën jëkäm, tëë xymyëwinkontë ja Kristë ets të xymyëpëktë; jä'ä ko ja nye'pyny të tyajtsuny të tyajkxe'kxy.

¹⁴Kristë ëëts të xymyo'oyëm ja jotkujk'ajtën. Yë'ë të tyajnämyukyë ja jutiis ja'ayëty mëët mëti'ipë ka'ap jyutiisëty ets të tyajkutëkoy ja tsip mëti'ipë ijty xyajnäwya'kxëmën,

¹⁵jëtu'unts ka'ap y'ëktuunë ja ënä'ämën mëti'ipë winë nyikäjpxypën tii yajtun kayajtunëpën, tu'ukyë të tyajwë'ëmy ja jutiis ja'ayëty mëët ja mëti'ipë ka'ap jyutiisëty. Ets të tyajnaaxkëtä'äky ja jotkujk'ajtën.

¹⁶E ko ja Kristë ojts y'ooky kruutskëjxm, yë'ë ojts tyajkëxy tyajnaxy ja tsip ets tyajnäy'oyëty ja jutiis ja'ay mëët ja ka'apë jyutiisëty.

¹⁷Kristë ojts tmëminy ja jotkujk'ajtën ets yajtuk'ëwaanëtë ni'ëmukë ja ja'ayëty; jëtu'un miitsëty pën ja Tios ijty myëjëkäm'ajtëpën ets pën ja Tios ijty myëwinkon'ajtëpën.

¹⁸Kristë xypyutëjkëmëp ni'ëmukë mëët ja kënu'kxymyëk'ajtën ets npatmëty ja Tios, jëtu'un ja jutiis ja'ayëty ets näjyëtu'un mëti'ipë ka'ap jyutiisëty.

¹⁹Miitsëty ka'ap m'ëk jaaypyo'kxy ja'ay'ajnëtë, tu'kkukajpn miitsëty tyamnë, tu'ukyë ja Tios myaj'itëtë ijxtëm ja ja'ay tu'kjëën tuktëjkpën.

²⁰Jëtu'un miitsëty ijxtëm ja potsyën; ets ja ijxpëjkpëtëjk ets ja Tios ja kyäjpxynyajxpëtëjk jëtu'un ijxtëm ja potsy ëjxën; ja Jesukristë yë'ë jëtu'un ijxtëm ja tsaajën mëti'ipë ja potsy myëtënääpyën.

²¹E ko ja potsy pyety ets oy nyämyajts'ijta'ayë mëët ja Kristë, winpäjt'ëtëtsp ja tëjk ets y'awinpita'any tsajptëjkën wa'atspë mëët ja Wintsën ja myëj'ajtën jyääntyajtën.

²²Näyjyëtu'un miits ko tu'ukyë m'itë mëët ja Kristë, tu'ukyë mwinpätë koonëm myajpaatëty ma ja Tios ja tsyajptëjkën mëti'ipë yajpatpën mëët ja Kyënu'kxymyëk'ajtën.